Salmos 148
148
Ac'o yalbeic slequilal Muc'ul Dios scotol li c'usitic pasbile
1Quich'tic ta muc' li Diose.
Albeic tal slequilal te ta vinajel li Muc'ul Diose;
albeic slequilal te ta toyol.
2Albeic slequilal vo'oxuc li yaj'almantaloxuque;
albeic slequilal vo'oxuc ti yu'untacoxuc te ta vinajele.
3C'ac'al,#148.3 C'ac'al - Oy boch'o chalic jtotic. u,#148.3 U - Oy boch'o chalic jme'tic. albeic slequilal li Muc'ul Diose;
c'analetic, vo'oxuc ti xaxojobanic no'oxe, albeic slequilal ec li Muc'ul Diose.
4Vinajel, vo'ot ti toyol oyote,
xchi'uc vo'oxuc vo'etic, ti oyoxuc ta toyole,
albeic slequilal li Muc'ul Diose.
5Albeic slequilal sbi li Muc'ul Diose,
yu'un ja' ta smantal ti jech i'ayin scotole.
6J'ech'el laj yac' comuc o;
laj yac'be lec jun mantal ta stojolic;
persa ja' chch'unic o.
7Albeic slequilal Muc'ul Dios li' ta banamil,
vo'oxuc muc'tiquil chanul nabetic, vo'oxuc natil nabetic,
8vo'oxuc c'oq'uetic ta vinajel, botetic, tayoetic, job osiletic,
xchi'uc vo'oxuc muc'tiquil iq'uetic, chauquil vo'etic ti chapasbeic c'usi tsc'an li Muc'ul Diose.
9Albeic slequilal, vo'oxuc muc'tic vitsetic, bic'tal vitsetic,
jsatinom te'etic, ch'ut te'etic,
10ts'unbilal chonbolometic, te'tical chonbolometic,
vo'oxuc ti xana' xavilique, xchi'uc vo'oxuc quiletel chonetic.
11Albeic slequilal, vo'oxuc ajvaliletic ta banamil, ta bic'tal lumetic,
banquilaletic, jpasmantaletic ta banamil,
12viniquetic, antsetic, queremetic, tsebetic, ololetic, mol me'eletic.
13Albeic slequilal sbi li Muc'ul Diose,
yu'un ja' no'ox stuc toj ech'em smuc'ul;
ja' toj ech'em svu'el te ta vinajel xchi'uc ta banamil.
14Ja' laj yac'be tsots svu'elic li steclumale;
albeic slequilal acotolic vo'oxuc ti steclumaloxuque,
vo'oxuc li yalab xnich'naboxuc Israele ti nopol oyoxuc ta stojole.
Ich'biluc ta muc' li Diose.
Currently Selected:
Salmos 148: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
