Proverbios 29
29
1Li boch'o ta stoy sba c'alal chich' taq'uiele,
ta soc o; mu xa stac' poxtael o.
2C'alal ja' chlic spasic mantal li boch'o tuc' yo'ntonique, xcuxet no'ox yo'ntonic li jteclume;
c'alal ja' chlic spas mantal li boch'otic chopolique, ta xlic svocol li jteclume.
3Me lec cha'ay bijubtasel li nich'onile, xcuxet no'ox yo'nton yu'un li stote;
yan me ja' batem yo'nton yu'un jmulavil antse, jeche' no'ox chixtan li staq'uine.
4Me tuc' ta xchapanvan li ajvalile, lec chbat li slumale;
yan me ja' no'ox ta sloq'ues taq'uine, ta soc yu'un li slumale.
5Li boch'o tsmacbe sat xchi'ile,
te no'ox ta syac sba stuc.
6Li boch'o chopole ja' spets'ul chc'ot li smul stuque;
yan li boch'o tuc' yo'ntone xcuxet no'ox yo'nton, xq'uejin no'ox.
7Li boch'o tuc' yo'ntone oy ta yo'nton tscolta li me'onetique,
pero li boch'o chopole mu sventauc.
8Li jlabanvanejetique ja' no'ox ta sa'beic sjol sjunul lum;
yan li boch'otic tuc' yo'ntonique sna' c'u x'elan tslamesic li c'ope.
9Me chnitvan ta chapanel li boch'o bije,
li boch'o bole ja' no'ox ta x'ilin, ta xlabanvan; mu'yuc c'usi lec ta xchapaj o yu'unic.
10Li jmilvanejetique chopol chilic li boch'o lequique;
li boch'otic chopolique tsnop c'u x'elan xu' tsmilic li boch'o tuc' yo'ntonique.
11Li boch'o bole mu xu' yu'un spajesel li sc'ac'al yo'ntone;
yan li boch'o tuc' yo'ntone xu' yu'un tspajes sba.
12Me oy jun ajvalil chch'un li c'usitic mu meleluque,
chopol chbat scotol li j'abteletic yu'une.
13Li boch'o uts'intabil xchi'uc li boch'o ch-uts'intavane oy c'usi co'ol lec tstaic,
yu'un co'ol ac'bil sq'uelic saquil osil xchibalic yu'un li Muc'ul Diose.#Pr 22.2; Mt 5.45.
14Me lec tuc' chchapan me'onetic li ajvalile,
j'ech'el mu xlaj o sc'oplal li yabtel ta ajvalilale.
15Li nucul xchi'uc taq'uiele ja' sventa chbijub li ololetique;
yan li querem ti te no'ox q'uelbile ja' no'ox chac' ta q'uexlal li sme'e.
16C'alal me ta x'epaj li boch'otic chopolique, ta x'epaj noxtoc li mulile,
pero li boch'otic tuc' yo'ntonique ta to xilic c'u x'elan ta xich'ic ulesel.
17Taq'uio lec li anich'one, jech jun avo'nton yu'un,
jech xcuxet no'ox avo'nton.
18Ti bu mu'yuc j'alc'op yu'un Diose chopol chijbatutic;
me chquich'tic ta muc' li smantal Dios chij'albate, xcuxet no'ox co'ntontic.
19Oy mozoetic ti mu xlecub ta eil no'oxe;
ac'o me cha'ay, pero mu xich' ta muc'.
20Me oy xavil jun vinic ti ta anil no'ox chtac'ove,#Pr 26.12.
le'e ja' toj ven chopol ja' xu' to jutuc li jun bol vinique.
21Li boch'o stotinoj smozo c'alal biq'uit toe,
ts'acal xu' chlic ventainbatuc scotol li c'usitic oy yu'une.
22Li boch'o toj simarone ep ta sliques c'op;
li boch'o toj biq'uit yo'ntone ep ta sta smul.
23Li jtoybae ta syalesat yu'un li stoyobbaile;
yan li boch'o biq'uit chac' sbae ta x'ich'at ta muc'.#Mt 23.12; Lc 14.11; 18.14.
24Li boch'o tsc'an ta xchi'in j'eleq'uetique ta xac' sba ta vocolajel stuc,
yu'un me te xa oy ta chapanele, mu xa sna' c'usi chut sba.
25Me ja' chijxi'utic yu'un li cristianoetique, ta xchucvan jech chac c'u cha'al lasu;
yan me ja' ta jpat co'ntontic ta stojol li Muc'ul Diose, mu'yuc xi'el chca'itic.
26Ep boch'o tsa'ic, ep boch'o tsc'anic coltael ta stojol li ajvalile,
pero ja' jchapanvanej stuc li Muc'ul Diose.
27Li boch'o chopolique chopol chilic li boch'o tuc' yo'ntonique;
ja' no'ox jech ec li boch'o tuc' yo'ntonique mu'yuc lec chilic li boch'o chopol c'usi tspasique.
Currently Selected:
Proverbios 29: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
