Josué 6
6
La xchapan sbaic sventa chbat svuq'uesic lum Jericó
1Li coralton yu'un lum Jericoe bats'i lec smacojbeic scotol li sti'e. Me junuc mu'yuc boch'o xu' ta xloc', mu'yuc boch'o xu' ta x'och te ta lum ta scoj ti ta xi'ic yu'un li israeletique. 2Pero li Muc'ul Diose jech laj yalbe li Josuee: “A'yo ava'ay, cac'ojbot xa ta ac'ob li lum Jericoe, xchi'uc li ajvalile, xchi'uc li yajsoldadotaque. 3Vo'oxuc ti xu' xa avu'unic lec pleitoe, bat joyibtaic jun velta ta jujun c'ac'al li lume. Vaquib c'ac'al jech xapasic. 4Vucub paleetic ac'o jelovicuc batel ta ba'yucbe yu'un li xcaxail jmantale. Ac'o yich'ic batel jujun xcachuic sventa tsjupanic. Ta svucubal c'ac'ale joyibtaic vucubuc velta li lume. Li paleetique ac'o sjupan li xcachuique. 5C'alal chava'yic jal ta sjupan xcachuic li paleetique, tsots xa'avan acotolic, jech ta xvuc' yalel scotol li coralton yu'un lume. Ti butic va'ajticoxuc ta jujuntale, te no'ox xa'ochic batel acotolic”, x'utat.
6Jech li Josuee lic yic'an li paleetique, jech laj yalbe: “Ich'ic batel li xcaxail smantal Diose. Vucuboxuc jelovanic batel ta ba'yucbe yu'un li caxae. Ich'ic batel jujun acachuic pasbil ta xulub chij”, xut. 7Jech laj yalbe scotol li xchi'iltaque: “Batic jcotoltic; bat joyibtatic li lume. Li boch'o oy lec yabtejebique ac'o jelovicuc batel ta ba'yucbe yu'un li xcaxail smantal Muc'ul Diose”, xut.
8Scotolic la xch'unic c'usi i'albatic yu'un li Josuee. Vucub paleetic ijelovic batel ta ba'yucbe. Yich'ojic batel jujun xcachuic; la sjupanic batel. Ja' te nabal ibat ta spatic li xcaxail smantal Muc'ul Diose. 9Li viniquetic ti lec chapalic xchi'uc yabtejebique ja' ba'yucbeic batel yu'un li paleetic ti tsjupanic batel xcachuique. Ts'acal te ibat ta spat boch'otic yich'ojic batel caxa yan jtsob soldadoetic oy lec yabtejebic. Li paleetique mu'yuc ono'ox xquechanic batel sjupanel li xcachuique. 10Li Josuee jech laj yalbe batel scotol li xchi'iltaque: “Mu me xabaq'uic; me jutuc mu me xac'opojic. Ja' to me jech laj calboxuque: ‘Avancutic jcotoltic’, me xacutoxuque, jech tsots xlic avanan acotolic”, xut. 11Jech li Josuee laj yal ti ac'o sjoyibtaic junuc velta lum Jericó xchi'uquic li xcaxail smantal Muc'ul Diose. C'alal la spasic jeche, isutic tal ta scarpanaic; te tal vayicuc.
Ivuc' yu'unic lum Jericó li israeletique
12Ta yoc'omal sob ilic noxtoc li Josuee. Laj yich'ic batel yan velta xcaxail smantal Muc'ul Dios li paleetique. 13Li vucub paleetic ti ba'yucbeic batel yu'un li caxae mu'yuc ono'ox xpajic ta xanubal, xchi'uc me jutuc mu'yuc xquechanic sjupanel li xcachuique. Li jchabivanej yu'unique ja' ba'yucbe batel yu'unic. Li yan jchabivanej yu'unic sventa ts'acalpate, ja' te ibatic ta spat li caxae. Pero te ono'ox xtututet batel yu'unic li xcachuique. 14C'ot sjoyibtaic yan jun velta li lum Jericoe, ja' xchibal xa'ox c'ac'al. Jech te isutic tal ta scarpanaic noxtoc. Ja' jech la spasilanic vaquib c'ac'al.
15Ta svucubal c'ac'al ic' to iliquic; bat sjoyibtaic yan velta li lum jech chac c'u cha'al la spasic ono'oxe. Pero vucub velta xa la sjoyibtaic ta jun c'ac'al. 16C'alal la sjupan yoq'uesic ta svucubal velta li paleetique, li Josuee jech lic yal mantal: “Avanan acotolic, yu'un li Muc'ul Diose yac'ojbutic xa ta jc'obtic li lume. 17Li lume xchi'uc scotol li c'usitic oy tee albil xa sc'oplal ti chich' ulesel o yu'un Muc'ul Diose.#Dt 13.15-16; 20.16-18. Ja' xa no'ox cuxul ta xcom li jmulavil ants Rahabe xchi'uc li boch'otic te oy ta snae, yu'un ja' la snac' li chib jchi'iltic ti ay spamuc'taic c'u x'elan li lume. 18Pero li vo'oxuque bijanic me. Mu me xatsaquic, mu me xapiquic li c'usitic oy li' ta lum ti albil xa sc'oplal chich' ulesel o yu'un Diose. Yu'un jech mu xijyac'butic jtojtic te ta jcarpanatic ec li Diose, xchi'uc jech mu jtatic ep jvocoltic. 19Yan li saquil taq'uin, li c'anal taq'uin, xchi'uc li c'usitic pasbilic ta bronce, xchi'uc ta tsatsal taq'uinetique le'e ja' xa voc'bil yu'un li Muc'ul Diose. Xu' ta xquich'tic batel, chc'ot cac'tic te ta yavil yu'un li Muc'ul Diose”, xut.
20Jech lic avanuc scotol li israeletique. Jech ec li paleetique la sjupanic li xcachuique. C'alal laj ya'yic scotol israeletic ti jal la sjupan xcachuic li paleetique, ven tsots lic avanicuc scotolic, jech ijin yalel scotol li coralton yu'un lume.#Heb 11.30. Jech te no'ox tuc' i'ochic batel ti bu va'ajtic jujunique, jech i'och o ta sc'obic. 21Te la smilic ta espada scotol li vinic antsetique, li querem tsebetique, li mol me'eletique. C'alal ta xvacaxic, ta xchijic, ta sburoic la smilbeic comel.
22Li Josuee jech laj yalbe li chib viniquetic ti i'ay sq'uelic ba'yuc c'u x'elan li osile: “Batanic ta sna li jmulavil ants Rahabe. Iq'uic loq'uel scotolic xchi'uc li boch'otic te oyic ta snae yu'un jech ono'ox laj avalbeic comel ta stojol li Diose”, xut. 23Jech ibatic li chib viniquetique; laj yiq'uic loq'uel li Rahabe, xchi'uc li stot sme'e, xchi'uc li xchi'iltac ta voq'uele, xchi'uc scotol li yuts' yalaltaque. Te bat sa'beic lec yavilic ta spat to yo' bu spasoj scarpanaic li israeletique. 24Li israeletique lic xchiq'uic li lume xchi'uc scotol li c'usitic oy tee. Ja' no'ox laj yich'ic loq'uel li saquil taq'uin, li c'anal taq'uin, xchi'uc li c'usitic pasbilic ta bronce xchi'uc ta tsatsal taq'uine. Te c'ot yaq'uic ta yavil te ta xch'ulna li Muc'ul Diose. 25Li Josuee ja' xa no'ox la scolta comel li Rahabe, xchi'uc li stot sme'e, xchi'uc scotol li c'usitic oy yu'une, yu'un ja' la snac' li chib viniquetic ti itacatic batel yu'un Josué ta Jericoe.#Heb 11.3l. Li syal'alabtac Rahabe te xchi'uquic o ta naclej c'alal to tana li israeletique.
26Li Josuee oy c'usi laj yal ta stojol Muc'ul Dios te ta stojol li xchi'iltaque, jech laj yal: “Ac'o ac'batuc stoj yu'un Muc'ul Dios li boch'o tsc'an tsva'an yan velta c'usi ora li lum Jericoe. C'alal tsnacanbe li snaclebe, ac'o chamuc li banquilal xnich'one. C'alal tsnacanbe li sti'e, ac'o chamuc li its'inal xnich'one”,#1 R 16.34. xi.
27Li Josuee chi'inbil o yu'un Muc'ul Dios, jech ipuc batel sc'oplal.
Currently Selected:
Josué 6: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.