Josué 22
22
Isut ta snaic li o'lol yoxchop israeletique
1Li Josuee lic yic'an li jchop liquemic ta Rubén, ta Gad, xchi'uc li o'lol jchop liquemic ta Manasese. 2Jech laj yalbe: “Li vo'oxuque lec laj ach'unic scotol c'usi yalojboxuc comel li Moisese, ja' li yajtunel Muc'ul Diose, xchi'uc laj ach'unbicun ec li c'usitic laj calboxuque. 3Muc xacomtsanic stuquic li jchi'iltactique; lic achi'inic tal ta sliqueb c'alal to tana. Ep xa c'ac'al laj achi'inic. Jech jun avo'nton laj ach'unbeic smantal li Muc'ul Dios cu'untique. 4Ja' yu'un li' ta orae xu' xa chasutic batel ta acarpanaic te ta jot uc'um Jordán ti bu laj yac'boxuc comel avosilic li Moisese. Yu'un li Muc'ul Diose laj xa yac'be xcuxubil yo'ntonic ec li yantic jchi'iltactique yu'un jech ono'ox yaloj.#Nm 32.20-32; Jos 1.12-15. 5Ja' no'ox chacalboxuc ti junuc me avo'nton xach'unic li mantaletic li tojobtaseletic laj yalboxuc comel li Moisese, ja' li yajtunel Muc'ul Diose. Ja' ti tsc'an ac'o ac'anic o li Muc'ul Dios cu'untique ti te ac'o oyanic o ta be yu'une, ti ac'o ach'unbeic li smantaltaque, ti ja' ac'o ats'aclinic o stuque, xchi'uc ti ac'o tunanic yu'un ta scotol ajol avo'ntonique”, xut.
6Jech li Josuee la sc'anbe bendición ta stojolic; la sc'opanan batel jech isutic o batel ta scarpanaic.
7Li o'lol jchop liquemic ta Manasese te i'ac'bat comel yosilic yu'un Moisés ta Basán. Li yan o'lol jchope te i'ac'bat yosilic yu'un Josué yo' bu laj yich' yosilic li yantic israeletic ta smaleb c'ac'al#22.7 C'ac'al - Oy boch'o chalic jtotic. ta jot uc'um Jordane. Li Josuee la sc'anbe bendición ta stojolic; ts'acal la stacan sutel ta scarpanaic. 8Jech laj yalbe: “Sutanic xa batel ta acarpanaic xchi'uc ep ac'ulejalic, ep avacaxic, achijic, xchi'uc c'anal taq'uin, saquil taq'uin, bronce, xchi'uc tsatsal taq'uinetic, xchi'uc ep ac'u' apoq'uic. Voc'bo aba acotolic li c'usitic laj apojbeic tal li cajcontratique”, xut.
9Jech isutic o batel ta snaic li jchop liquemic ta Rubén, ta Gad xchi'uc li o'lol jchop liquemic ta Manasese. La svoc' sbaic batel xchi'uc li yantic xchi'iltaquic te ta Silo ta yosilal Canaane. Isutic batel ta snaic te ta yosilal Galaad ti bu i'ac'batic yu'un Moisés ta smantal Muc'ul Diose.
La slatsbeic scajleb smoton Dios te ta ti' uc'um Jordán
10C'alal ic'otic ta ti' uc'um Jordán ta yosilal Canaán li jchop liquemic ta Rubén, ta Gad, xchi'uc ta Manasese, la slatsic scajleb smoton Dios; lec muc' la spasic. 11Li yantic israeletique laj ya'yic ti la spasic scajleb smoton Dios te ta ti' uc'um Jordán ta yosilal Canaán banamil li jchop liquemic ta Rubén, ta Gad, xchi'uc li o'lol jchop liquemic ta Manasese. 12C'alal laj ya'yique, la stsob sbaic scotolic te ta Silo yu'un bat stsaquic ta pleito. 13-14Ba'yuc la staquic batel li Finees xnich'on pale Eleazare. La xchi'in batel lajuneb viniquetic, ja' li mero banquilaletique. Jujun iloc' ta jujuchop israeletic, ich'bilic lec ta muc' ta jujuchop sbiic. 15Jech ibatic ta Galaad yo' bu oyic li jchop liquemic ta Rubén, ta Gad xchi'uc li o'lol jchop liquemic ta Manasese. Jech c'ot yalbeic:
16—Vu'uncutic tal c'opojcuncutic yu'un scotol li steclumal Muc'ul Diose. ¿C'u yu'un ti laj abajbeic smantal Dios cu'untic vu'utic li israelutique, ti laj acomtsanic li Diose, ti ta atoyobbailic laj apasic yan scajleb smotone?#Jos 12.5-6,13-14. 17¿Me mu xana'ic ti ep la jta jmultic yu'un li Peore, ti yoquel to mu'yuc colemutic o ta orae, xchi'uc ti ja' ta scoj ep ichamic li xnich'nabtac Muc'ul Diose?#Nm 25.1-9. 18¿Me yu'un mu xavich' avo'ntonic o chava'yic ti chacomtsanic yan velta noxtoc li Muc'ul Diose? Me chatoy abaic ta stojol Muc'ul Dios li vo'oxuque, oc'ome ta x'ilintaatic yu'un Muc'ul Dios scotol li jchi'iltactique. 19Me yu'un mu'yuc ventainbil yu'un Dios chava'yic li avosilic laj ataique, la'ic me li' ta banamil yu'un Dios yo' bu oy li ch'ulna yu'une. Ich'ic avosilic li' yo' bu oy cosilcutique. Pero chatoy abaic ta stojol Muc'ul Dios xchi'uc ta jtojolcutic ec ta sventa ti chapasbeic yan scajleb smotone. Yu'un oy xa ono'ox scajleb smoton li Muc'ul Dios cu'untique. 20Na'ic me c'usi ic'ot ta pasel c'alal la sta smul li Acán, xnich'on Zera c'alal laj yich' li c'usi albil xa sc'oplal chich' ulesel o yu'un Muc'ul Diose. Ja' ta smul ti i'ilintaatic yu'un Muc'ul Dios scotol li jchi'iltactique. Muc ja'uc no'ox stuc icham ta scoj li smule#Jos 7.1-26. —xutic c'otel.
21Li jchop liquemic ta Rubén, ta Gad, xchi'uc li o'lol jchop liquemic ta Manasese, jech la stac'beic li banquilaletic yu'un scotol israeletique:
22—Li Muc'ul Diose, ja' li Dios yu'un scotol yantic diosetique, lec sna', xchi'uc ja' chac' ana'ic ec li vo'oxuque ti muc ja'uc jech jnopojcutic jech chac c'u cha'al chavalique. Yan me ja' jech jnopojcutic ti jech la jpascutique, mu me xats'icbuncutic; miluncutic comel. 23Me ja' sventa ta jcomtsancutic Muc'ul Dios, o me ta jchic'becutic smoton, me chcac'becutic yantic smoton, o me chcac'becutic smoton sventa co'ol co'ntoncutic xchi'uque, ja' stuc Muc'ul Dios ac'o yac'bun jtojcutic. 24Ti jech la jpascutique, ja' chixi'cutic me jech chlic yalbeic c'usi ora jnich'nabcutic li anich'nabique: ‘Li vo'oxuque mu xatic' abaic ta stojol li Muc'ul Dios yu'un Israele. 25Li Muc'ul Diose te la svoc'oxuc comel ta jot uc'um Jordán vo'oxuc li xnich'naboxuc Rubén xchi'uc Gade, jech mu xu' chatic' abaic ta stojol li Diose’, naca me xiic. Jech xu' chlic xch'aybe o ta yo'ntonic c'u x'elan ta ich'el ta muc' Muc'ul Dios li jnich'nabcutique. 26Ja' yu'un la jnop la jpascutic li jun scajleb smoton Muc'ul Diose, pero ma'uc sventa te ta jchic'becutic smoton, o me chcac'cutic yan matanaletic. 27Ja' no'ox svinajeb ti lec chquil jbatique, xchi'uc ti lec ac'o yil sbaic ec li jmomnich'nabtique, xchi'uc ti xu' chituncutic yu'un Muc'ul Dios, ti xu' ta jchic'becutic smoton; xu' ta jmilbecutic smoton sventa jmulcutic, xchi'uc sventa co'ol co'ntoncutic xchi'ucutic eq'ue. Jech mu xu' jech chlic yalbeic jnich'nabcutic li anich'nabique: ‘Li vo'oxuque mu xu' chatic' abaic ta stojol li Muc'ul Diose’, mu xu' xutic. 28Me oy jech chlic yalbe sbaic li calab jnich'nabtique, xu' jech ta jtac'betic li vu'utique: ‘Q'uelavilic, li scajleb smoton Muc'ul Dios li' la spasic jmoltotactic ta vo'onee, ma'uc sventa te la xchic'beic, o la smilbeic smoton. Ja' no'ox sventa ti lec chquil jbatic ta jujujote’, xu' xcutic. 29Mu xc'ot ta pasel ti ta jtoy jbacutic ta stojol li Muc'ul Diose, ti ta jcomtsancutic yich'el ta muq'ue. Xchi'uc mu jpascutic jech ti ta jpasbecutic yan scajleb smoton sventa te ta jchic'becutic, ta jmilbecutic smoton, xchi'uc chcac'becutic yantic smoton tee yu'un oy xa ono'ox scajleb smoton te ta sti' li ch'ulna pasbil ta nucule —xiic.
30Li pale Finees xchi'uc li banquilaletic yu'un israeletic ti ich'bilic ta muc' ta jujuchop sbiique c'alal laj ya'yic c'u x'elan itac'ovic li jchop liquemic ta Rubén, ta Gad, xchi'uc li o'lol jchop liquemic ta Manasese lec laj ya'yic. 31Li Finees, xnich'on pale Eleazare, jech laj yalbe li yalab xnich'nab Rubén, Gad, xchi'uc Manasese:
—Li' ta orae ta jna'cutic ti ta melel li' oy Muc'ul Dios ta jtojoltique yu'un mu'yuc ta avo'nton ti chatoy abaic ta stojole. Jech mu xijyac'butic jtoj jmultic ta acojic li Muc'ul Diose —xut.
32Li Finees xchi'uc banquilaletique la sc'opanic comel li o'lol yoxchop xchi'iltaquique; iloq'uic batel ta Galaad banamil. Isutic batel ta Canaán banamil yo' bu comenic li yantique, c'ot yalbe ya'yic scotol li c'usi laj ya'yic batele. 33C'alal laj ya'yique, lec laj ya'yic scotolic; la stojbeic ta vocol li Diose. Jech muc xa xalic ti chbat smilic, ti chbat yulesic o te ta yosilalic li smomnich'nabtac Rubén xchi'uc Gade. 34Li smomnich'nabtac Rubén xchi'uc Gade la sa'beic sbi li scajleb matanale. “Ja' Svinajeb”, xi sbi laj yac'beic yu'un jech laj yalic: “Li'i ja' svinajeb cu'untic ti ta melel ja' Dios li Muc'ul Diose”, xiic.
Currently Selected:
Josué 22: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.