Génesis 34
34
Laj yich' milel boch'o la soquesbe sc'oplal stseb Jacob, Dina sbi
1Li Dinae, ja' li stsebic Jacob xchi'uc Leae, ibat svu'lan li yantic tsebetic te yo' bu nacalique. 2Pero li Siqueme, ja' li xnich'on Hamor heveo vinique, ja' li banquilal yu'unic te ta lume, laj yil li tsebe. Jech te la stsatsal-tsac; laj yuts'inta. 3Ts'acal la snop ti tsc'an chic' o li tsebe. Jech te la slecubtasbe yo'nton yu'un ac'o c'anatuc. 4Li Siqueme bat sc'opan li stote, ja' li Hamore, jech laj yalbe:
—Bat jac'bun li tseb le'e yu'un ja' ta jc'an ta xquic' —xut.
5Li Jacobe laj ya'ay ti uts'intabil xa yu'un Siquem li stsebe, ja' li Dinae. Pero mu'yuc to c'usi laj yal, yu'un li xnich'nabe batemic ta xchabiel xchijic ta te'tic, ja' to ti c'alal ivulique. 6Li Hamore, ja' li stot Siqueme, bat sc'opan li Jacobe.
7C'alal laj ya'yic xnich'nabtac Jacob li c'usi ic'ot ta pasele, isutic tal ta xchabiel xchijic. Tsots i'ilinic, yu'un toj q'uexlal sba ta sventa Israel ti laj yich' uts'intabel stseb Jacob yu'un li Siqueme. Yu'un mu'yuc boch'o tspas jech. 8Ja' yu'un li Hamore bat sc'opan noxtoc li xnich'nab Jacobe. Jech laj yalbe:
—Li jnich'on Siqueme toj juteb yo'nton yu'un li avixlalique yu'un tsc'an ta xic'. Avocolicuc, ac'bicun yic' li jnich'one. 9La' cuts' calalin jbatic, jech xu' ta xquic'cutic li tsebetic avu'unique. Ja' no'ox jech xu' chaviq'uic ec li tsebetic cu'uncutique. 10Li' oyanic oe; jchi'in jbatic ta naclej. Li lum li'i ja' alumalic ec. Naclanic li'i; bolomajanic; mano lec avosilic —xut.
11Li Siqueme jech laj yalbe ec li stot Dinae xchi'uc li xi'meltaque:
—Avocolicuc, tac'bicun li ca'yejcutique. Xu' ta jtoj ti c'u yepal chac'anique. 12Ac'o me ep jeloven ta jtoj jech chac c'u cha'al ta jtoj jbacutic li'i, xu' ta xcac' ep matanaletic noxtoc. Ja' no'ox venta me chavac'bicun quic' li tsebe —xi.
13Li xnich'nabtac Jacobe la slo'laic li Siqueme xchi'uc li stote, ja' li Hamore, yu'un soquesojbeic xa sc'oplal li Dinae. 14Jech laj yalbeic:
—Mu xu' ta xcac'becutic yic' quixlalcutic jun vinic ti me mu'yuc yich'oj circuncisione yu'un q'uexlal sba chca'icutic. 15Xu' ta jch'uncutic me chavich'ic circuncisión jech chac c'u cha'al vu'uncutique. Tsc'an chavich'ic circuncisión ti c'u avepal vinicoxuque. 16Jech xu' chaviq'uic li tsebetic cu'uncutique. Ja' no'ox jech xu' ta xquic'cutic ec li tsebetic avu'unique. Xchi'uc xu' li' chinaquicutic, jech jun jlumaltic chc'ot o. 17Pero me mu xach'unic ti chavich'ic circuncisione, chiloc'cutic batel li' ta alumalique; ta xquic'cutic batel li quixlalcutique —xutic.
18Li Hamor xchi'uc xnich'on Siqueme toj lec laj ya'yic ti jech i'albatique. 19Muc xa smalaic jal. Ta ora no'ox lic yich' circuncisión li quereme yu'un toj lec sc'anoj li tsebe. Li Siqueme ja' no'ox stuc lec ich'bil ta muc' te ta sna li stote. 20Ja' yu'un li Hamore xchi'uc li Siqueme te ibatic ta ti'coralton yu'un li slumalique, ja' te yo' bu ta xchonolajic scotol li jbolomaletique. Jech laj yalbeic li viniquetic tee:
21—Li viniquetic li'i ja' xa jchi'iltic. Li' ta xnaquiic, li' ta xbolomajic ta jlumaltique. Oy ep osil cu'untic ti bu xu' ta xnaquiique. Li vu'utique xu' ta xquic'betic li tsebetic yu'unique. Jech ec li stuquique xu' ta xiq'uic ec li tsebetic cu'untique. 22Pero ti c'u cha'al jun no'ox jlumaltic chc'ote, xchi'uc ti c'u cha'al xu' li' ta xnaquiic jchi'uctique, tsc'an ta jpastic jech chac li'i: tsc'an ac'o quich'tic circuncisión jcotoltic vu'utic li vinicutic jech chac c'u cha'al tspasic ono'ox li stuquique. 23Scotol li c'usitic oy yu'unique ja' cu'untic ec; ja' no'ox me lec chca'itic ec li c'usi chalique, xchi'uc me li' ta xnaquiic oe —xutic.
24Scotol li viniquetic te ta lume toj lec laj ya'yic c'usi laj yal li Hamor xchi'uc Siqueme, jech laj yich'ic circuncisión scotolic. 25Ta yoxibal c'ac'ale ibatic ta lum li xnich'nab Jacobe, ja' li Simeón xchi'uc Levie, ja' li mero xi'meltac Dinae. C'alal ja'o cha'ibeic xc'uxul li circuncisión laj yich'ique, la smilic comel ta espada scotol li viniquetique yu'un ch'ayem yo'nton itaatic. 26Te la smilic comel ta espada noxtoc li Hamor xchi'uc Siqueme. Jech noxtoc laj yiq'uic batel li yixlalic ti te xa'ox oy ta sna li Siqueme. 27Te ic'otic ec li yantic xnich'nab Jacobe; te ijelovic yo' bu oy li animaetique. Laj yich'ic batel scotol li c'usitic oy ta lume yu'un ja' tspaquic ti ilaj ta uts'intabel yixlalique. 28Laj yiq'uic batel chijetic, xchi'uc me' vacaxetic, buroetic, xchi'uc scotol li c'usitic oy te ta lume, xchi'uc li c'usitic oy ta yosilique. 29Laj yelc'anic batel scotol li c'usitic oy ta naetique. Jech noxtoc la xchucanic batel scotol li ololetic xchi'uc antsetique. 30Li Jacobe jech laj yalbe li Simeón xchi'uc Levie:
—Vo'oxuc ta acojic me la jta jvocol, me lic scontrainicun li canaanetic li'i, xchi'uc li ferezetique. Yu'un xu' ta stsob sbaic; ta snutsicun loq'uel. Yu'un mu'yuc ep jvinictac li vu'une, jech xu' chismilicun o comel xchi'uc li boch'otic oy cu'une —xut.
31Jech itac'ovic:
—¿Me yu'un ja' lec ti la scuy jech chac c'u cha'al jmulavil ants li quixlalcutique? —xutic.
Currently Selected:
Génesis 34: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
