Génesis 29

Li Jacobe ibat ta Harán

1Li Jacobe ixanov batel noxtoc. Ja' la stambe batel sbelal slumalic li boch'otic te oyic ta sloq'ueb c'ac'ale.#29.1 C'ac'ale - Oy boch'o chalic jtotic.

2Li Jacobe laj yil jch'oj joc'. Te nopol chcux yo'ntonic oxtsob chijetic yu'un ja' ono'ox te chuch'ic ya'lel li joq'ue. Li sti' joq'ue macbil ta muc'ta ton. 3C'alal la stsob sba scotol li jaytsob chijetique, li jchabichijetique la sloq'uesic li ton ti macbil o sti' joq'ue yu'un chac'beic yoxo' yuch' li xchijique. C'alal laj yo'ntonique, la smaquic li sti' joq'ue. 4Li Jacobe jech la sjac'be li jchabichijetique:

—Jchi'iltac, ¿bu liquemoxuc tal? —xut.

—Liquemuncutic tal ta Harán —xiic.

5Jech la sjac' noxtoc:

—¿Me xavotquinic li Labán xnich'on Nacore? —xut.

Itac'ovic:

—Xcotquincutic —xiic.

6Li Jacobe mu xlaj yo'nton ta sjaq'uel:

—¿Me te no'ox tsots xana'? —xi.

—Li Labane te no'ox tsots. Q'uelavil, le' xtal xchi'uc xchijtac li stsebe, ja' li Raquele —xi li jchabichijetique.

7Li Jacobe jech laj yal:

—Li'i sob to, mu to ja'uc yorail ta xich' tiq'uel ta scoral li chijetique. ¿C'u yu'un muc chavac'beic yoxo' yuch', ts'acal xbat avaq'uic ve'uc yan velta? —xi.

8Itac'ovic:

—Mu xu' jech ta jpascutic. Ja' ta jmalacutic me la stsob sba scotolic li jaytsob chijetique xchi'uc li jchabichijetique. Yu'un co'ol ta jloq'uescutic li ton macbil o sti' joq'ue, jech xu' chich' ac'bel yoxo' yuch' li chijetique —xiic.

9C'alal ja'o te chlo'ilajic li Jacob xchi'uc jchabichijetique, li Raquele te ivul xchi'uc li xchijtac stote yu'un ja' ta xchabibe. 10C'alal laj yil ivul xchijtac svom Labán li Jacobe, ta ora bat sjam li joq'ue. Laj yac'be yoxo' yuch' li chijetique. 11Li Jacobe la sc'opan li Raquele. La sts'uts'; te lic oc'uc. 12C'alal laj yalbe ya'ay scotol ti ja' sme' li Rebecae xchi'uc ti ja' svom li Labane, li Raquele ibat ta anil. Bat yalbe ya'ay li stote.

13C'alal laj ya'ay Labán c'usi laj yal li Jacobe, ja' li yol yixlale, ibat ta anil; bat snup ta be. La smey; la sts'uts'. Laj yic' batel ta sna. Li Jacobe te lic xcholbe ya'ay scotol li c'usitic c'otem ta pasele. 14Li Labane jech laj yalbe: “Ta melel vo'ot mero cuts' calalot, jun jbec'tal jch'ich'altic”, xut.

Li Jacobe la stoj ta abtel Raquel xchi'uc Lea

Li Jacobe te la xchi'in jun u ta sna li Labane. 15C'alal i'ech' jun ue, li Labane jech laj yalbe li Jacobe:

—Ma'uc yu'un cuts' calal jbatic ti xu' jech no'ox cha'abtej cu'une. Ja' lec albun ti c'u yepal chac'an atojole —xut.

16Li Labane oy chib stsebetic: li vixile Lea sbi; li muquile Raquel sbi. 17Li Leae leclec no'ox sba yutsil; yan li Raquele toj c'upil sba ta scotlijil. 18Ta sventa ti toj lec sc'anoj Raquel li Jacobe, jech itac'ov:

—Chi'abtej avu'un vucub jabil ta sventa li atseb Raquele —xut.

19Itac'ov li Labane:

—Lec oy, ja' lec ti me vo'ot chaviq'ue; ja' chopol me yan bu ibate. Ja' lec coman li'i —xut.

20Jech li Jacobe i'abtej vucub jabil ta sventa li Raquele. Ta sventa ti toj lec sc'anoje, jech mu'yuc jal laj ya'ay li vucub jabil i'abteje. 21C'alal its'aqui xa li vucub jabile, li Jacobe jech laj yalbe li Labane:

—Ac'bun xa li atsebe. Ta xinupin jchi'uc, yu'un its'aqui xa li vucub jabil laj cal chi'abtej ta sventae —xi.

22Jech li Labane laj yic'an tal li boch'otic nopol nacalic xchi'uque yu'un ac'o tal sq'uelic li q'uin nupinele. 23Pero li Labane ta ac'ubaltic laj yic'be batel Lea li Jacobe, jech te la xchi'in ta vayel. 24Jech noxtoc li Labane laj yac'be jun squiara li Leae, Zilpa sbi. 25Ta yoc'omal laj yil Jacob ti ja' la xchi'in ta vayel li Leae, jech laj yalbe li Labane:

—¿C'usi smelol ti jech laj apasbune? ¿C'u yu'un ti laj alo'laune? ¿Me mu ja'uc li'abtej vucub jabil avu'un ta sventa li Raquele? —xut.

26Itac'ov li Labane:

—Li'i mu jechuc jtalelcutic ti ja' ba'yuc chcac'cutic ta malijel li muquile. 27Ac'o ts'aquiuc avu'un li jun xemuna q'uin sventa chanupin achi'uc li vixile, jech xu' chacac'bot noxtoc li Raquel me ta jchapantic cha'abtej to yan vucub jabile —xi.

28Li Jacobe la xch'un. C'alal iloc' jun xemuna li q'uin sventa Leae, li Labane laj yac'be yic' noxtoc li Raquele. 29Li Labane laj yac'be jun squiara ec li Raquele, Bilha sbi. 30Li Jacobe la xchi'in li Raquele. Toj lec sc'anoj; ja' jutuc no'ox sc'anoj li Leae, ac'o me ta to x'abtej yan vucub jabil yu'un li Labane.

Sc'oplal xnich'nabtac Jacob

31C'alal laj yil Muc'ul Dios ti mu'yuc c'anbil lec yu'un Jacob li Leae, laj yac'be yalab. Yan li Raquele muc to xac' alajuc. 32Li Leae lic xchi'in yol, jech ivoc' jun squerem. Rubén#29.32 Rubén - Ta hebreo c'op oy chib smelol: q'uelavilic jun olol, o laj yil ti ep chcat co'ntone. laj yac'beic sbi yu'un jech laj yal: “Li Muc'ul Diose laj yil ti chcat co'ntone, ja' yu'un li' ta orae xu' chlic sc'anun li jmalale”, xi.

33Ts'acal ivoc' yan yol noxtoc li Leae, Simeón#29.33 Simeón - Ta hebreo c'op ja' smelol laj ya'ay. laj yac'be sbi, jech laj yal: “Li Muc'ul Diose laj ya'ay ti chisbajicune, jech laj yac'bun yan col”, xi.

34Ivoc' yan yol noxtoc li Leae, Leví#29.34 Leví - Ta hebreo c'op ja' smelol chi'inel. laj yac'beic sbi. Jech laj yal: “Li' ta orae xu' ech'em to tsc'an chixchi'inun li jmalale yu'un oy xa oxib col”, xi.

35Li Leae ivoc' to yan yol, Judá#29.35 Judá - Ta hebreo c'op ja' smelol coliyal. laj yac'beic sbi, jech laj yal noxtoc: “Chcalbe slequilal li Muc'ul Diose”, xi. Jech te no'ox ilaj yo'nton ta alajel.

Currently Selected:

Génesis 29: TZE97

Highlight

Copy