Colosenses 3

1Ta melel co'ol xa lacha'cuxesatic xchi'uc li Cristoe,#Ro 6.4-11; Col 2.12. ja' yu'un tsc'an ja' no'ox chasa'ilanic o li c'usi sventa vinajel te yo' bu chotol ta sbats'ic'ob Dios li Cristoe.#Sal 110.1; Heb 1.3. 2Ja'uc me te batem asatic yu'un li c'usi sventa vinajele; mu me ja'uc xbat asatic yu'un li c'usi sventa no'ox banamile. 3Yu'un chamenoxuc xa ya'yel. Ja' xa cuxuloxuc ta sventa li Cristo ti junic xchi'uc Diose. Ja' te nac'al ta stojol li acuxlejalique. 4C'alal chtal li Cristo ti ja' xa acuxlejalique,#Gá 2.20; Fil 1.21. co'ol chac'ot achi'uquic, co'ol alequil avutsil achi'uquic.

Tsc'an ja' chquich'tic ach' jtaleltic

5Ja' yu'un tsc'an j'ech'el chamenoxuc o ta sventa li c'usi sventa no'ox banamile: ja' li mulivajele, li c'usitic toj chopolique, li c'usi tsc'an abec'talique, li c'usitic chopol oy ta avo'ntonique, xchi'uc li xpich'etel avo'ntonique, yu'un xco'laj xchi'uc oy sloc'obal jdiostic chc'ot me jech co'ntontique. 6Li boch'otic jech tspasique, ilintabilic xa yu'un li Diose.#Ef 2.3. 7Ta vo'one c'alal mu'yuc to'ox ach'unojique, ja' to'ox jech laj apasic ec. 8Pero li' ta orae comtsanic scotol li c'usitic chopole: ja' ti stsoq'uet no'ox avo'ntonique, ti ta anil no'ox cha'ilinique, ti xcupet no'ox sc'ac'al avo'ntonique, ti chachopolc'opojique, xchi'uc li c'usitic mu'yuc stu chloc' ta aveique. 9Mu xa me xavepalc'opta abaic, yu'un laj xa ajipic comel li poco' atalelique#Ef 4.22. xchi'uc li yabtelal chapasic to'oxe. 10Ja' xa xalapic o batel li ach' atalelique,#Ef 4.24. yu'un jech yantic chalecubic batel. Jech co'ol chac'ot achi'uquic li Boch'o la spasutique,#Gn 1.26; Ef 2.10. jech lec ts'acal chavotquinic scotol. 11Jech mu'yuc xa sc'oplal me judioutic, me yanlumutic, me quich'ojtic circuncisión, me mu quich'ojticuc circuncisión, me bijutic, me muc bijuticuc, me ochemutic ta mozoil, me muc ochemuticuc ta mozoil. Ja' tsots sc'oplal ti co'ol chquich'tic ta muc' li Cristoe, yu'un ja' sventainoj scotol.

12Ja' me lapic o li slequil avo'ntonique, li c'uxubinvaneje, ti biq'uit chavac' abaique, ti mansooxuc no'oxe, li yutsil avo'ntonique, xchi'uc li smuc'ul avo'ntonique.#Ef 4.2. Yu'un t'ujbiloxuc xa yu'un li Diose, yu'unoxuc xa, lec sc'anojoxuc. 13Talbat xats'icbe abaic me oy c'usi chc'ot ta pasel avu'unique. Pasbo abaic perdón me oy bu chlic c'op avu'unique. Jech chac c'u cha'al la spasboxuc perdón yu'un amulic li Cristoe, ja' jech tsc'an chapasbe abaic perdón ec li vo'oxuque.#Ef 4.32. 14Li c'usi tsots sc'oplal ta scotole, ja' ti oyuc ta avo'ntonic o li c'anvaneje, yu'un ja' mero jpasvanej ta jun. 15Te me nacluc o ta avo'ntonic li jun o'ntonal chac' Cristoe. Ti laj yic'oxuc ta stojole, yu'un tsc'an jun no'ox chac'ot ta acotolic. Xchi'uc tsc'an chatojbeic ta vocol.

16Ac'o c'otuc lec ta avo'ntonic c'usi chal li sc'op Cristoe. Chanubtaso abaic; taq'uio abaic ta sventa scotol li bijubtasele. Q'uejinanic, tojbeic ta vocol Dios ta sventa q'ueojetic, ta salmoetic xchi'uc ta bic'tal q'ueojetic. 17Scotol li c'usi chapasique xchi'uc li c'usi chavalique pasic ta sventa li Cajvaltic Jesuse. Tojbeic ta vocol Jtotic Dios ta sventa li Cajvaltique.#Ef 5.19-20.

C'usi tsc'an tspas jch'unolajeletic yu'un Cristo

18Antsetic, ich'o ta muc' li amalalique,#Ef 5.22; 1 P 3.1. yu'un ja' jech tsc'an chapasic ta stojol li Cajvaltique. 19Viniquetic, c'ano me li avajnilique.#Ef 5.25; 1 P 3.7. Mu me toj simaronuc xapas abaic ta stojol. 20Alab nich'nabetic, ch'unbeic smantal li atot ame'ique, yu'un ja' toj lec chil Cajvaltic c'alal me jech chapasique.#Ef 6.1. 21Vo'oxuc li totil me'iloxuque, mu me xasa'beic sc'ac'al yo'nton li avol anich'onique,#Ef 6.4. yu'un jech mu xchibaj yo'ntonic ta spasel li c'usi chavalbeique. 22Mozoetic, ch'unbeic smantal li avajvalic li' ta banamile. Mu me ja'uc no'ox lec chatunic yu'un ti c'alal te sq'uelojoxuc jech chac c'u cha'al li boch'o ja' no'ox tsc'an lec sc'oplal yu'un cristianoetique. Scotoluc avo'ntonic lec xa'abtejic; ja' me xi'anic yu'un li Diose. 23Scotol li c'usiuc no'ox chapasique, pasic ta scotol avo'ntonic. Ja'uc me cha'abtejic yu'un Cajvaltic chava'yic. Mu xanopic ti cristiano cha'abtejic yu'une. 24Na'ic me ti chayac'boxuc amotonic li Cajvaltique, ja' li c'usi sc'oplal ono'ox chayac'boxuque. Yu'un li mero Avajvalic cha'abtejic yu'une ja' li Cristoe. 25Yan li boch'o ja' tspas c'usi mu'yuc tuq'ue, ja' chich'be stojol li c'usi mu'yuc tuc' tspase,#Ef 6.5-8. yu'un li Diose mu'yuc tst'uj boch'o chc'uxubin.#Dt 10.17; Ef 6.9.

Currently Selected:

Colosenses 3: TZE97

Highlight

Copy