2 Tesalonicenses 3
3
Oy ta yo'nton Pablo ac'o ich'atuc ta muc' li sc'op Diose
1Slajeb xa chacalboxuc tal quermanotac. C'opanbuncutic Dios, yu'un ac'o pucuc ta ora li sc'op Cajvaltique. Ac'o ich'atuc ta muc' jech chac c'u cha'al ic'ot ta pasel ta atojolic li vo'oxuque. 2Xchi'uc ac'o colcuncutic loq'uel ta sc'ob li jpasmulil cristianoetique, li chopol cristianoetique, yu'un mu ono'ox scotoluc ta xch'unic li Cajvaltique. 3Mu sna' sjel sc'op li Cajvaltique, jech ta ono'ox xac'boxuc lec stsatsal avo'ntonic; ta xchabioxuc ta sventa mu xastsaloxuc li pucuje. 4Jch'unojcutic ta sventa Cajvaltic ti chapasic xa, xchi'uc ti ta ono'ox xapasic batel li c'usitic laj calbotcutic comele. 5Cajvaltic ac'o scoltaoxuc ti ac'o c'anvananic jech chac c'u cha'al chc'anvan li Diose, xchi'uc ti ac'o avich'beic stsatsal yo'nton li Cristoe.
Tsots sc'oplal tsc'an chij'abtejutic
6Quermanotac, ta xcalbotcutic mantal ta sventa Cajvaltic Jesucristo ti tsc'an chavoc' abaic ta stojol li boch'otic xch'unojic ti mu'yuc ta yo'nton yabtelique, ti mu ja'uc chch'unic jech chac c'u cha'al la jchanubtasotcutic comele. 7Yu'un xana'ic xa c'usi tsc'an chapasic sventa ac'o achanic ti c'u xi'elancutique. Yu'un laj avilic c'u x'elan li'abtejcutic ti c'alal te oyuncutic ta atojolique. 8Mu'yuc boch'o jeche' no'ox la jc'anbecutic li jve'elcutique. Ta c'ac'al ta ac'ubal mu'yuc bu la jcuxcutic; tsots li'abtejcutic, yu'un muc jc'an xcac'cutic avocolic junuc li vo'oxuque.#Hch 18.3; 1 Ts 2.9. 9Ma'uc yu'un mu'yuc sc'oplal xu' chamac'linuncutic. Ja' no'ox yu'un muc jc'ancutic jech, yu'un ta jc'an chcac'cutic avilic ti ta persa tsc'an cha'abtejic ec li vo'oxuque. 10C'alal te oyuncutique, jech laj calcutic comel ava'yic: “Li boch'otic mu x'abteje, ja' lec mu me xve'”, xichicutic. 11Yu'un ca'yojcutic ti oy jayibuc avu'unic ti mu'yuc ta yo'nton yabtelique. Ja' no'ox ta stiq'uilan sbaic ta buyuc no'ox ti muc ja'uc sventaique. 12Li boch'o jech tspasique ta xcalbecutic mantal, ta jtaq'uicutic ta sventa li Cajvaltic Jesucristoe. Junuc yo'nton ac'o abtejicuc, ac'o ve'uc ta yabtel stuquic.
13Li vo'oxuque quermanotac, mu me xalubtsajic ta spasel li c'usitic leque.#Gá 6.9. 14Me oy boch'o mu xch'un li c'usi laj calcutic tal ta carta li'i, q'uelic lec boch'o. Mu me xachi'inic, yu'un jech ac'o q'uexovuc. 15Pero mu me xacontrainic. Albeic c'usi lec ta pasel, yu'un ja' quermanotic.
Sc'anel bendición ta slajeb c'op
16Ja' stuc Yajval jun o'ntonal ac'o spasboxuc ta jun avo'ntonic ta scotol ora. Ac'o xchi'inoxuc acotolic li Cajvaltique.
17Li patub o'ntonal li'i vu'un ta jts'iba tal ta jc'ob jtuc, vu'un li Pabloune. Ja' jech senyail chcac' ta scotol jcarta, jech chvinaj ti vu'un jcartae. 18Ac'o xc'uxubinoxuc o acotolic li Cajvaltic Jesucristoe.
Currently Selected:
2 Tesalonicenses 3: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
