2 Reyes 23
23
1Ja' yu'un li ajvalile lic stac ta iq'uel scotol li banquilaletic ta Judá xchi'uc ta Jerusalene yu'un ac'o stsob sbaic. 2Li ajvalile ibat ta xch'ulna Muc'ul Dios xchi'uc li paleetique, li j'alc'opetique, xchi'uc scotol li judaetique, xchi'uc li jnaclumetic ta Jerusalene. C'alal ta biq'uit ta muc' ibatic. Te laj yaptabe ya'yic c'usi chal li svunal c'usi xchapanoj Dios#Dt 31.11-13; Neh 8.1-8. ti la staic ta ch'ulna yu'un Muc'ul Diose. 3Li ajvalile te la sva'an sba ta nopol yoyal ch'ulna. Te lic yal ta stojol Muc'ul Dios ti ja' no'ox tsts'aclin o li Muc'ul Diose, ti ta scotol sjol yo'nton chch'unbe o li smantaltaque, li chanubtaseletic yu'une, xchi'uc li c'usitic yantic yaloje, xchi'uc li c'usi ts'ibabil ta svunal c'usi chapanbil yu'un Diose. Scotol li israeletique lec laj ya'yic.
Li Josiase la xcha'liques lec yich'el ta muc' Dios
(2 Cr 34.3-7)
4Li ajvalile lic yalbe mantal li banquilal pale Hilciase, xchi'uc li yantic paleetique, xchi'uc li jchabi ti'naetique, yu'un ac'o sloq'uesic ta xch'ulna Muc'ul Dios scotol li c'usitic chtun yu'unic sventa chich'ic ta muc' li Baale, xchi'uc li Aserae, xchi'uc li c'usitic oy ta vinajele. Te bat xchiq'uic ta spat Jerusalén ta yosilal Cedrón. Li stanile la stsobic; te bat yaq'uic ta Betel. 5Jech noxtoc la sloq'ues ta paleal li boch'otic itic'atic ta paleal yu'un ajvaliletic ta Judá sventa chchiq'uic pom ta toyol c'opojebaletic te ta lumetic ta Judá xchi'uc ta spat xocon lum Jerusalene. Xchi'uc la sloq'ues noxtoc li paleetic ti la xchiq'uic pom ta stojol li sdiosique, ja' li Baale, li c'ac'ale,#23.5 C'ac'al - Oy boch'o chalic jtotic. li ue,#23.5 Ue - Oy boch'o chalic jmetique. li muc'tic c'analetique, xchi'uc li yantic c'usitic oy ta vinajele. 6La sloq'ues noxtoc li sloc'obal Asera te oy ta xch'ulna Muc'ul Diose; te bat xchic' ta stenlejaltic Cedrón, ja' to ti c'alal ipas ta tan yu'une. Li stanile te bat svijic comel ta muquinaltic yu'un li me'onetique.#2 R 21.3; 2 Cr 33.3. 7Jech noxtoc la sjines li snail mulivajel yu'un viniquetic c'alal chich'ic ta muc' li sdiosic te ta xch'ulna Muc'ul Diose, ja' ti bu la sjalic poc' antsetic sventa scarpanail sjalalme'ic Aserae.
8Laj yal mantal noxtoc ti ac'o talicuc scotol li paleetic ta lumetic yu'un Judae. Xchi'uc la soques scotol li toyol c'opojebaletic xlic ta Geba c'alal to ta Beerseba yo' bu la xchiq'uic pom li paleetique. La sjines noxtoc li scajleb smoton pucujetic pasbil ta stuq'uil ts'etc'ob yo' bu yocheb li Josuee, ja' li ajvalil ti tspas mantal te ta Jerusalene. 9Pero li paleetic yu'un toyol c'opojebaletique muc xa xbatic ta scajleb smoton li Muc'ul Dios te ta Jerusalene. Te no'ox la sve'ic pan xchi'uc xchi'iltaquic ta paleal, ja' li pan ti mu'yuc yich'oj svolesubil xch'ute.
10La soques noxtoc li xchic'ubil xnich'nabic Tofel te ta stenlejaltic Hinome,#Jer 7.31; 19.1-6; 32.35. yu'un jech mu'yuc xa boch'o chbat xchic' squerem, o me stseb ta stojol li sdiosic Moloque.#Lv 18.21. 11Xchi'uc la sloq'ues noxtoc li ca'etic yu'un ajvaliletic ta Judá ti yac'ojic ta sventa smoton c'ac'ale.#23.11 C'ac'ale - Oy boch'o chalic jtotic. Li ca'etique te oy ta sti' xch'ulna Muc'ul Dios ta nopol scuarto Natán-melec, ja' li capon vinic ti sventainoj tsobtsobnaetique. La xchic' ta c'oc' li caretaetic te chtun sventa chich'ic o ta muc' li c'ac'ale. 12La sjines noxtoc li scajleb matanaletic pasbil yu'un ajvaliletic ta Judá te ta sjol sna Acaze xchi'uc li scajleb matanaletic pasbil yu'un Manasés te ta xcha'jotal yamaq'uil ch'ulnae.#2 R 21.5; 2 Cr 33.5. La slilin scotol; te bat sjip ta bevo' Cedrón.
13La soques noxtoc li toyol c'opojebal te ta yeloval lum Jerusalén, ta xocon vits olivatic ta stuq'uil bats'ic'obe. Ja' ti spasoj ono'ox ajvalil Salomón ta sventa Astoret, ja' li me' dios yu'un sidonetique, xchi'uc Quemos, ja' li dios yu'un moabetique, xchi'uc Milcom, ja' li dios yu'un amonetic ti toj chopolic chil Diose.#1 R 11.7. 14Xchi'uc la slilin noxtoc li c'usitic pasbil ta tone xchi'uc li sjalalme'ic, Asera sbie. Li yavil bu to'ox yac'ojique la snojesic ta baquil animaetic. 15Ja' jech la slilin noxtoc li scajleb matanaletic xchi'uc li toyol c'opojebaletic te ta Betel ti spasoj li Jeroboam, xnich'on Nabat,#1 R 12.33. ti laj yac'be sa' smulic li israeletique. Biq'uitic la slilin ja' to ti c'alal ipas ta pucuc yu'une; ts'acal laj yac'be sc'ac'al. Jech noxtoc la xchic' ta c'oc' li sjalalme'ic, Asera sbie.
16C'alal isut ta Jerusalén li Josiase, laj yil ti oy muquinaltic te no'ox ta vitse. La stac batel boch'o bat sloq'ues tal li baquetic ta muquinaltique; te la xchic' ta scajleb smoton sdiosic yu'un jech ac'o socuc o sc'oplal ta j'ech'el li c'usitic chich'ic ta muq'ue. Ja' ic'ot o jech chac c'u cha'al laj ono'ox yal Muc'ul Dios ta sventa yaj'alc'op ti jech ono'ox chc'ot ta pasele.#1 R 13.2.
17Jech la sjac' noxtoc:
—¿Boch'o smuquinal le'e? —xi.
Itac'ovic li cristianoetic te ta lume:
—Ja' smuquinal yaj'alc'op Dios liquem ta Judá, li boch'o laj ono'ox yal ti ja' jech chc'ot ta pasel jech chac c'u cha'al laj apasbe li scajleb matanal ta Betele#1 R 13.30-32. —xiic.
18Jech laj yal:
—Te ac'o comuc; mu me boch'o xbat spicbe avu'unic li sbaquile —xi.
Jech mu'yuc boch'o la spicbe li sbaquile xchi'uc li sbaquil j'alc'op liquem ta Samariae.
19Li ajvalil Josiase la sjines noxtoc li snailtac diosetic yu'unic te ta toyol c'opojebaletic ta lumetic te ta Samaria ti spasojic li ajvaliletic ta Israele, ti ja' ta scoj ilic sc'ac'al yo'nton yu'unic li Muc'ul Diose. 20Te la smilan ta sba scajleb matanaletic li paleetic te chtunic ta toyol c'opojebaletique. Xchi'uc te la xchic' baquil animaetic ta sba yac'olic. Jech isut batel ta Jerusalén.
La sliques spasel q'uin Coltael li Josiase
(2 Cr 35.1-19)
21Li ajvalile jech lic yalbe scotol li israeletique: “Jpastic q'uin Coltael#Ex 12.1-13,21-27; Lv 23.5-8; Nm 28.16; Dt 16.1-8. ta sventa li Muc'ul Dios cu'untic jech chac c'u cha'al ts'ibabil ta svunal li c'usi chapanbil li'i”, xut. 22Ti c'u x'elan la spasique, mu'yuc ono'ox bu jech spasic q'uin Coltael c'alal yorail oy jchapanvanejetic te ta Israel, xchi'uc c'alal to ta yorail i'och ajvaliletic yu'unic te ta Israel xchi'uc ta Judae. 23Ja' ta xvaxaclajunebal jabil yochel ta ajvalilal Josías ti c'alal lic spasic q'uin Coltael te ta Jerusalén sventa chich'ic ta muc' li Muc'ul Diose.
Li Diose mu'yuc ono'ox ilecub yo'nton ta stojol li Judae
24Li Josiase la smes loq'uel noxtoc li j'ic'ch'ulelaletic, li jt'unuletic, xchi'uc li bic'tal diosetic yu'unic ta jujubej snaique, xchi'uc li yantic diosetic te ta yosilal Judá xchi'uc ta Jerusalene. Yu'un ja' la spas li c'usitic ts'ibabil ta svunal li mantaletic yu'un Dios ti la sta te ta xch'ulna Muc'ul Dios li banquilal pale Hilciase. 25Mu'yuc ono'ox yan jech ajvalil jeloven, xchi'uc mu'yuc yan jech ital ta ts'acal jech chac c'u cha'al li ajvalil Josías ti laj yac' sba lec ta sc'ob Muc'ul Dios ta scotol sjol yo'nton, ta scotol stsatsal, jech chac c'u cha'al chal li smantal Dios laj yal comel Moisese.
26C'alal jech ic'ot ta pasele, mu'yuc xlecub o yo'nton Muc'ul Dios ta stojol li Judae, yu'un tsots ilinem o ta scoj ti toj chopol c'usi la spas li Manasese. 27Ja' yu'un li Muc'ul Diose laj yal ti tsloq'ues o ta stojol li Judá jech chac c'u cha'al la sloq'ues ta stojol li Israele. Xchi'uc laj yal ti tsjip ta yo'nton li Jerusalén ti t'ujbil yu'une xchi'uc li xch'ulna ti yaloj ono'ox ja' no'ox stuc te chich' ich'el ta muq'ue.
Icham li Josiase
(2 Cr 35.20-27)
28Li yantic sc'oplal Josiase xchi'uc scotol li c'usitic la spase te ts'ibabil ta svunal c'usitic ic'ot ta pasel yu'un li ajvaliletic ta Judae. 29C'alal ja'o cuxul li Josiase, ja'o yorail ital li ajvalil Faraón ta Egiptoe, Necao sbi. Te ibat ta uc'um Éufrates, yu'un ja' bat scolta ta pleito li ajvalil ta Asiriae. Li ajvalil Josiase iloc' batel ec. C'alal i'ilat yu'un li ajvalil Necaoe, te imilat ta Meguido. 30Li j'abteletic yu'une la smuyesic ta careta, la xcuchic batel ta Jerusalén; te c'ot smuquic ta smuquinal. Li cristianoetic te ta lume ja' la stiq'uic ta ajvalilal xnich'on li Josiase, Joacaz sbi. Ja' la xq'uexolin li stote.
Ipojbat yabtel ta ajvalilal li Joacaze
(2 Cr 36.1-4)
31C'alal i'och ta ajvalil li Joacaze, yich'oj oxib xcha'vinic (23) jabil. Oxib u i'abtej ta Jerusalén. Li sme'e Hamutal sbi; ja' stseb Jeremías liquem ta lum Libna. 32Li Joacaze toj chopol c'usi la spas ta stojol Muc'ul Dios jech chac c'u cha'al la spas li smoltotaque. 33Li Faraón Necaoe la xchuc te ta lum Ribla ta yosilal Hamat, yu'un jech mu me spas mantal te ta Jerusalén, xchi'uc laj yac'be stoj spatanic noxtoc li israeletique. Ja' oxmil xchi'uc oxib ciento (3,300) kilo saquil taq'uin, xchi'uc oxlajuneb xcha'vinic (33) kilo c'anal taq'uin. 34Li Faraón Necaoe ja' lic stic' ta ajvalil yan xnich'on li Josiase, Eliaquim sbi. Ja' xq'uexol stot ic'ot. Xchi'uc la sjelbe sbi; Joaquim laj yac'be sbi. Yan li Joacaze laj yic' batel ta Egipto; te icham o.#Jer 22.11-12.
35Li Joaquime laj yac'be li saquil taq'uin, li c'anal taq'uin ti la sc'an li Faraón Necaoe. Ti c'u x'elan itsob yu'une ja' lic sc'anbe spatan scotol li cristianoetic te ta lume. Jech lic yaq'uic li saquil taq'uin, li c'anal taq'uin ti c'u yepal chapanbil chaq'uic jujunique, yu'un jech tstsob yu'un ti c'u yepal chac'beic li Faraón Necaoe.
Lic stsac yabtel ta ajvalilal ta Judá li Joaquime
(2 Cr 36.5-8)
36C'alal i'och ta ajvalilal li Joaquime,#Jer 22.18-19; 26.1-6; 35.1-19. yich'oj vo'ob xcha'vinic (25) jabil. Buluchib (11) jabil i'abtej ta Jerusalén. Li sme'e Zebuda sbi; ja' stseb Pedaías te ta Ruma. 37Li Joaquime toj chopol c'usi la spas ta stojol Muc'ul Dios jech chac c'u cha'al la spas li smoltotaque.
Currently Selected:
2 Reyes 23: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.