2 Reyes 1

Icham Ocozías

1C'alal chamen xa'ox li Acabe,#1 R 22.34-37. ital tsacaticuc ta pleito yu'un Moab li israeletique. 2Li Ocoziase#1 R 22.51-53. ibalch'uj yalel ta ventana ta yan jcoj sjol spasubmantal te ta Samaria, toj ip ibat, jech te la stac batel viniquetic yu'un ac'o bat sjac'beic Baal-zebub, ja' li dios ta Ecrone, jech laj yalbe batel: “Bat jaq'uic tal ca'tic me chicol toe”, xut. 3Li yaj'almantal Muc'ul Diose la sc'opan li j'alc'op Elías liquem ta Tisbee, jech laj yalbe: “Bat nupo ta be li j'almantaletic yu'un ajvalil ta Samariae, jech xavalbe: ‘¿Me yu'un mu'yuc Dios te ta Israel ti ja' chbat ajaq'uic ta stojol li Baal-zebub, sdiosic ta Ecrone? 4A'yo ava'ay, jech chalbe Ocozías li Muc'ul Diose: Mu'yuc bu chatots o ta avayab ti bu mocholote; ta persa chacham’, uto”, x'utat li Eliase.

Jech ibat li Eliase. 5C'alal isutic batel ta stojol ajvalil li j'almantaletique, jech ijac'batic:

—¿C'u yu'un ti lasutic tale? —x'utatic.

6Itac'ovic:

—Yu'un la jnupcutic ta be jun vinic, jech laj yalbuncutic: ‘Sutanic batel ta stojol li ajvalil ti la stacoxuc tale, jech xc'ot avalbeic: Jech yaloj li Muc'ul Diose: ¿Me yu'un mu'yuc Dios te ta Israel ti ja' te chbat ajaq'uic ta stojol li Baal-zebub, sdiosic ta Ecrone? Ta sventa ti jech chapase, mu'yuc xa chacol; mu'yuc xa chatots o ta avayab. Ta persa chacham, uto’, xiyutuncutic —xiic.

7Li ajvalile jech la sjac':

—¿C'u x'elan li vinic ti va'i x'elan laj yalboxuque? —xi.

8Itac'ovic:

—Li vinique lec pim stsotsil li sc'u' slapoje, xchi'uc xchucoj xch'ut ta nucul#Mt 3.4; Mr 1.6. —xiic.

Li ajvalile jech laj yal:

—¡Ja' Elías chca'ay ti liquem ta Tisbee! —xi.

9Li ajvalile ta ora la stac batel jun banquilal soldado xchi'uc li lajuneb yoxvinic (50) soldadoetic sventainoje. Te chotol ta jolvits c'ot staic li Eliase. Li banquilal soldadoe jech laj yalbe:

—¡Yaj'alc'op Dios, Yalan la tal ta ora, xi li ajvalile! —xut.

10Itac'ov li Eliase:

—Me ta melel vu'un yaj'alc'opun Diose, ac'o yaluc tal c'oc' ta vinajel; ac'o xchic'oxuc achi'uc li lajuneb yoxvinic (50) avajsoldadotaque#Lc 9.54. —xut.

Jech iyal tal c'oc' ta vinajel, te ic'aq'uic o xchi'uc li lajuneb yoxvinic (50) yajsoldadotaque.

11Li ajvalile la stac batel yan banquilal soldado noxtoc xchi'uc li lajuneb yoxvinic (50) soldadoetic sventainoje, jech c'ot yalbe li Eliase:

—¡Yaj'alc'op Dios, yalan la tal ta ora, xi li ajvalile! —xut.

12Itac'ov li Eliase:

—Me ta melel vu'un yaj'alc'opun Diose, ac'o yaluc tal c'oc' ta vinajel; ac'o xchic'oxuc achi'uc li lajuneb yoxvinic (50) avajsoldadotaque —xut.

Jech ta ora iyal tal c'oc' ta vinajel, te ic'aq'uic o.

13Li ajvalile la stac batel yoxibal velta yan jun banquilal soldado xchi'uc li lajuneb yoxvinic (50) yajsoldadotaque. Li banquilal soldadoe imuy batel yo' bu oy li Eliase; la squejan sba ta stojol jech laj yalbe:

—Vo'ot li yaj'alc'opot Diose, ach'ul vocoluc, mu xamilun xchi'uc li lajuneb yoxvinic (50) avajtuneltac li'i. 14Li chib banquilal soldadoetic italic ta ba'yuque iyal tal c'oc' ta vinajel, jech ic'aq'uic o xchi'uc li xchi'iltaquique. Li vu'une ta jc'anbot vocol ta atojol ti ac'o ac'uxubinuncutique —xut.

15Li yaj'almantal Muc'ul Diose jech laj yalbe li Eliase:

—Bat chi'ino; mu xaxi' yu'un —x'utat.

Li Eliase ibat xchi'in li banquilal soldadoe; te ic'otic ta stojol li ajvalile, 16jech c'ot yalbe:

—Jech chayalbot li Muc'ul Diose: ‘¿Me yu'un mu'yuc Dios li' ta Israel ti ja' te laj atac batel j'almantaletic avu'un ta stojol Baal-zebub, ja' li dios ta Ecrone? Ta sventa ti jech laj apase, mu'yuc xa chacol, te chacham o’, xayutot li Muc'ul Diose —xut.

17Jech te icham o jech chac c'u cha'al laj yal Muc'ul Dios ta sventa li Eliase. Ta sventa ti mu junuc xnich'on li Ocoziase, ja' i'och ta xq'uexol jun yits'in, Joram sbi. Ja' ta xchibal xa'ox jabil yochel ta ajvalilal te ta Judá li yan Joram, xnich'on Josafate.

18Scotol li c'usitic yan la spas Ocoziase, te ts'ibabil ta svunal c'usitic ic'ot ta pasel yu'un li ajvaliletic ta Israele.

Currently Selected:

2 Reyes 1: TZE97

Highlight

Copy