1 Timoteo 2
2
Tsc'an ac'o jc'opanbetic Dios ajvaliletic xchi'uc scotol cristianoetic
1Chacalbot ti ja' tsots sc'oplal ta scotol ti tsc'an chac'opanbeic Dios scotol cristianoetique. Vocoletanic ta sc'anbel vocol ta stojolic, xchi'uc tojbeic ta vocol Dios ta sventaic. 2Tsc'an chac'opanbeic Dios noxtoc li ajvaliletique xchi'uc scotol li boch'otic oy yabtelique, yu'un jech xcuxet no'ox co'nton cuxulutic, xchi'uc jech jun co'ntontic, mu'yuc c'op chca'itic, jech jun co'nton chquich'tic ta muc' Dios, xchi'uc jech lec jc'oplaltic. 3Toj lec me jech ta jpastique, xchi'uc toj lec chil li Diose, ja' li Jcoltavanej cu'untique. 4Yu'un li stuque tsc'an ti ac'o coluc scotol cristianoetique, xchi'uc ti ac'o lic yotquinic li c'usi melele. 5Yu'un jun no'ox Dios oy, xchi'uc jun no'ox boch'o chc'opoj cu'untic ta stojol Dios, vu'utic li cristianoutique. Ja' li Jesucristo ti cristiano ic'ote. 6Yu'un ja' laj yac' sba ta milel cu'untic, ja' la smanutic jcotoltic.#Mt 20.28; Mr 10.45; Gá 1.4; Tit 2.14. Yu'un ic'ot sc'ac'alil laj yac' ta ilel ti c'uxutic ta yo'ntone. 7Ta sventa le'e, vu'un la st'ujun ta spuquel batel, xchi'uc ta yajtacbolal. Laj yac'bun cabtel sventa ta jchanubtas li boch'otic mu ja'uc israeletique yu'un jech ac'o xch'unic, ac'o sna'ic li c'usi melele. Ja' melel li c'usi ta xcale, mu'yuc chi'epalc'opoj.#2 Ti 1.11.
8Ja' yu'un ta jc'an ac'o sc'opanic Dios li viniquetic ti buyuc no'ox oyique, ac'o xbech sc'obic ta stojol Dios, ac'o mu'yucuc sc'ac'al yo'ntonic; mu me chopoluc c'usi oy ta yo'ntonic. 9Jech noxtoc li antsetic c'alal ta smeltsan sbaic xchi'uc sc'u' spoq'uique, ta smuc'uluc me yo'ntonic, ta yutsiluc me yo'ntonic ac'o slapic. Mu me toj yanuc xa sba spas li sjolique. Mu me st'ujumtas sbaic ta c'anal taq'uin, ta nats'il, xchi'uc ta c'u'il pac'al ti toyolic stojole.#1 P 3.3. 10Ja'uc st'ujumalic chc'ot ti lec yabtelique, yu'un ja' jech tsc'an tspasic li antsetic ti lec yich'ojic ta muc' Diose. 11Li antsetique ac'o ch'anxiicuc ti c'alal cha'yic chanubtasele, biq'uit ac'o yac' sbaic. 12Li vu'une mu'yuc chcal mantal ti ac'o chanubtasvanuc jun antse, mu xcac' xjelov ta stojol li viniquetique; ac'o ch'anxiicuc no'ox. 13Yu'un ja' ba'yuc ipasat yu'un Dios li Adane;#Gn 2.7. ja' ts'acal ipasat li Evae.#Gn 2.21-22. 14Xchi'uc mu ja'uc ilaj ta lo'lael li Adane; ja' ants ti ilaj ta lo'laele. Ta sventa ti ilaj ta lo'laele, jech te la sta o smul.#Gn 3.1-6. 15Pero ta xcoltaatic ta sventa me tspas sbaic lec ta me'ile, me jun yo'nton j'ech'el xch'unojic oe, me chc'anvanique, xchi'uc me chac' sbaic ta ventainel yu'un Diose.
Currently Selected:
1 Timoteo 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
