1 Samuel 1
1
Ivoc' li Samuele
1Oy jun vinic te nacal ta Ramá ta vitsetic ta yosilal Efraín. Li vinique Elcana sbi; ja' xnich'on Jeroham. Li Jerohame ja' xnich'on Eliú. Li Eliue ja' xnich'on Tohu. Li Tohue ja' xnich'on Zuf; ja' muc'ta moltotil yu'unic. Le'e efrata la sbiinic. 2Li Elcanae oy chib yajnil. Li june Ana sbi; li yane Penina sbi. Li Peninae oy yalab; yan li Anae mu'yuc yol. 3Li vinique scotol jabil chbat ta Silo, yu'un chbat yich' ta muc', chbat smilbe smoton li Muc'ul Dios ti tspas ta mantal scotol te ta vinajele. Ja' te oy li chib xnich'nab pale Elie, ja' Ofni xchi'uc Fineese; ja' paleetic ta stojol Muc'ul Dios ec.
4C'alal la smilbe smoton Dios li Elcanae, laj yac'be spuculal ti'bol li yajnile, ja' li Peninae, xchi'uc li squeremetic, stsebetique. Ja' jech yepal laj yac' ti c'u yepal tsc'an ta sventa jujunique. 5Yan li Anae lec t'ujbil spuculal laj yac'be ta sventa ti lec sc'anoje, ac'o me muc x'aq'ue alajuc yu'un Muc'ul Dios. 6Li Peninae oy ta yo'nton tstsalvan, jech lic stoy sba, lic sna'le li Ana ti mu x'ac'bat yol yu'un Muc'ul Diose. Jech ep laj yat yo'nton li Anae.
7C'alal chbat yac'beic smoton Dios ta jujun jabile, ja' jech chlic sna'le, chlic yilbajin. Ja' yu'un li Anae choc'ta sba; mu xve' o. 8Li Elcanae jech lic sjac'be li yajnile: “¿C'u yu'un cha'oc'? ¿C'u yu'un mu xave'? ¿C'u yu'un ep chavat avo'nton? Vu'une toj ep chajc'uxubinot jech chac c'u cha'al oyuc lajuneb avole”, xut.
9Ta yan c'ac'al c'alal te oyic ta Siloe, c'alal ilaj yo'nton ta ve'el li Anae, iva'i. Li pale Elie te chotol ta xchotleb ta yoyal xch'ulna Muc'ul Dios. 10Li Anae te lic oc'uc; bats'i toj abul sba laj ya'ay. Te lic sc'opan Muc'ul Dios. 11Oy c'usi laj yal ta stojol li Diose, jech laj yal: “Muc'ul Dios, vo'ot ti chapas ta mantal scotol te ta vinajele, me chavil ti ep chcat co'ntone, me chana'un, me mu xach'ayun ta avo'ntone, ac'bun junuc cunin querem. Me laj avac'bune, ta xcac' tunuc o avu'un ti jayib c'ac'al cuxule. Mu'yuc ta xcac'be ta loc'bel sjol;#Nm 6.5. ja' senyail ti cac'ojbot o ta ac'obe”, xut.
12C'alal jal te la sc'opan Muc'ul Diose, li Elie te tsq'uelbe ye li Anae. 13Pero li Anae ta yo'nton no'ox la sc'opan Dios. Ja' no'ox ibac' yanal ye; muc xvinaj li sc'ope. Li Elie la snop ti yu'un chyacube. 14Jech laj yalbe:
—¿Baq'uin to chcux avo'nton ta yacubel? Quechano xa yuch'el li poxe —xut.
15Itac'ov li Anae:
—Mu'yuc chiyacub; mu'yuc cuch'oj pox, mu'yuc cuch'oj c'usi tsots ta uch'el. Ja' no'ox yu'un cac'oj co'nton ta sc'opanel li Muc'ul Diose yu'un toj ep chcat co'nton. 16Mu me xanop ti chopol antsune. Yu'un toj ep jvocol, ep chcat co'nton, ja' yu'un ti li' ta jc'opan o Diose —xut.
17Li Elie jech laj yalbe:
—Batan, junuc avo'nton. Li Dios yu'un Israele ac'o yac'bot li c'usi laj ac'anbee —xut.
18—Bats'i colaval —xi itac'ov li Anae.
Jech isut batel li Anae; lic ve'uc. Mu'yuc xa laj yat yo'nton. 19Ta yoc'omal sob iliquic, bat sc'opanic Dios yan velta. C'alal laj yo'ntonique, isutic batel ta snaic te ta Ramá. Li Elcanae la xchi'in li yajnile. Li Muc'ul Diose te la sna' c'usi c'anbil yu'un li Anae. 20Jech te lic nabuc xch'ut li Anae. C'alal ivoc' li yole, ja' unin querem. Samuel#1.20 Samuel - Ta hebreo c'op ja' smelol c'anbil. laj yac'be sbi, yu'un c'anbil yu'un ta stojol Muc'ul Dios.
21Ts'acal ibatic ta Silo sjunulic ta na li Elcanae yu'un bat smilbeic smoton Dios ta sventa jun jabil, xchi'uc bat spasic li c'usi yalojic ta stojol Muc'ul Diose. 22Pero li Anae muc xbat, jech laj yalbe li smalale:
—Vu'une mu'yuc to chibat. Ja' to me icom xchu' li olole, chbat cac' ta stojol Muc'ul Dios, yu'un te xa ta jcomtsan o —xut.
23Itac'ov li smalale:
—Me ja' lec chava'ay jeche, xu' chacom, ja' to me icom xchu' li olole. Ja' no'ox venta ic'ot ta pasel c'usi laj yal li Muc'ul Diose —xut.
Jech te icom li Anae; laj to sts'ites li yole, ja' to ti c'alal icom xchu'e. 24C'alal icom xa xchu'e, laj yic' batel ta xch'ulna Muc'ul Dios te ta Silo, xchi'uc oxcot ch'ium tot vacaxetic, xchi'uc chib xcha'vinic (22) litro arina, xchi'uc jbej q'uib ya'lel ts'usub. Li quereme biq'uit to'ox. 25Te la smilbeic smoton Dios; laj yaq'uic ta sc'ob Elí li quereme. 26Li Anae jech laj yalbe li Elie:
—Ja' vu'un ti li' ono'ox li'aye, ti li' la jc'opan Muc'ul Dios ta ats'ele. Ta sventa ti cuxulot toe, jech tal calbot ava'ay. 27Ja' la jc'anbe Muc'ul Dios li querem li'i, jech laj yac'bun. 28Ja' yu'un tal cac'be ec li cole. Ti jayib c'ac'al cuxule, ja' yu'un Muc'ul Dios chc'ot o —xut.
Jech te lic spatan sba; la stojbe ta vocol li Diose.
Currently Selected:
1 Samuel 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
