1 Reyes 21

Li ajvalil Acabe la spojbe ts'usubtic yu'un Nabot

1C'alal i'ech' xa'ox jayibuc c'ac'ale, oy jun vinic ta lum Jezreel, Nabot sbi. Li vinique oy ts'usubtic yu'un te ta Jezreel ta nopol spasubmantal li Acabe, ja' li ajvalil ta Samariae. 2Li Acabe jech laj yalbe li Nabote:

—Ac'bun li ts'usubtic avu'une yu'un ta jc'an chcom ta ts'unubaltic cu'un, yu'un lec nopol li' ta jpasubmantal. Chacac'bot yan xq'uexol ti xjelov to slequil jech chac li'i, o me mo'oje, xu' ta jtojbot ta taq'uin ti c'u yepal chac'ane —xut.

3Itac'ov li Nabote:

—Li Muc'ul Diose mu lecuc chil ti vo'ot chacac'bot li c'usi yac'ojbun comel jtot jme'e —xut.

4C'alal isut batel ta sna li Acabe, toj ep chat yo'nton, xchi'uc ch-ilin ta sventa ti c'u x'elan itac'bat yu'un li Nabote. Yu'un i'albat ti mu xu' ja' chich' li c'usi ac'bil comel yu'un stot sme'e. C'alal ic'ot ta sna li Acabe, mu sc'an xve'; te no'ox c'ot xmochan sba ta svayab sq'ueloj batel c'alna. 5Li Jezabel, ja' li yajnile, ibat sc'opan, jech laj yalbe:

—¿C'u yu'un ti toj ep chavat avo'nton, ti mu xac'an xave'e? —xut.

6Itac'ov li Acabe:

—Yu'un la jac'be ts'usubtic yu'un li Nabot nacal ta Jezreele. Laj calbe ti xu' ta jtojbe ta taq'uin, ti xu' ta jq'uextabee, pero muc xiyac'bun —xut.

7Li Jezabele jech laj yalbe li smalale:

—Pero vo'ot chapas mantal li' ta Israele. Ja' lec bat ve'an; mu c'u xal avo'nton. Vu'un ta jq'uel c'u x'elan xu' chavich' li ts'usubtic yu'un Nabote —xut.

8Li antse ta ora la spas cartaetic ta sbi li Acabe; laj yac'be lec sello yu'un li ajvalile. La stacbe batel li moletic, xchi'uc li banquilaletic te ta lum yo' bu nacal li Nabote. 9Jech laj yal batel ta carta: “Alic mantal ti ac'o yich' ictael ixime. Va'anic ta stojol scotol achi'iltaquic li Nabote. 10Sa'ic chib j'epalc'op testigoetic. Ac'o stic'beic smul; ac'o yalic ti ichopolc'opoj ta stojol Dios, xchi'uc ta stojol ajvalile. Ja'o xaviq'uic loq'uel; milic ta ton”, xi batel ta cartaetic.

11Li moletic, li banquilaletic, xchi'uc scotol li viniquetic te ta lum yo' bu nacal li Nabote la spasic jech chac c'u cha'al laj yal batel ta cartaetic li Jezabele: 12Laj yictaic ixim; la sva'anic ta stojol scotol xchi'iltaquic li Nabote. 13Te ital chib j'epalc'op testigoetic. Ta stojol scotol xchi'iltaquic la stic'beic smul li Nabote; laj yalic ti ichopolc'opoj ta stojol Dios xchi'uc ta stojol ajvalile. Jech laj yiq'uic loq'uel ta pat lum; te la smilic ta ton. 14Ts'acal la staquic batel mantal ta stojol Jezabel ti laj xa smilic ta ton li Nabote.

15C'alal laj ya'ay Jezabel ti icham xa li Nabote, jech laj yalbe li Acabe:

—Batan, bat ich'o li ts'usubtic yu'un Nabot liquem ta Jezreele yu'un mu'yuc xa cuxul; icham xa —xi.

16C'alal laj ya'ay Acab ti chamen xa li Nabote, ibat yich'be li ts'usubtic yu'une. 17Ja' yu'un li Muc'ul Diose la sc'opan li Elías liquem ta Tisbee, jech laj yalbe: 18“Batan ta ora ta stojol li Acab ajvalil ta Israel te ta lum Samariae. Yu'un ta ora le'e te xa oy ta ts'usubtic yu'un li Nabote; ja' xa laj yich'. 19Jech xc'ot avalbe: ‘Jech chayalbot li Muc'ul Diose: Ta sventa ti laj amil li Nabote xchi'uc ti laj xa avich'be li c'usi ja' yu'une, te ta banamil yo' bu ilaj ta lec'bel xch'ich'al ta ts'i'etique, ja' no'ox te chavich' lec'bel ach'ich'al ta ts'i'etic ec’, uto c'otel”, xi li Muc'ul Diose.

20C'alal laj yil Acab te ic'ot li Eliase, jech laj yalbe:

—¿Me tal ataun, cajcontra? —xut.

Itac'ov li Eliase:

—Ta sventa ti tal jtaot ta c'opanele, yu'un solel avac'oj aba o ta spasel c'usi chopol ta stojol li Muc'ul Diose. 21Ja' yu'un jech chayalbot: ‘Ta xcac' taluc vocol ta atojol, yu'un ta jmes loq'uel scotol li amomnich'nabtaque. Ta xcules scotol c'alal ta biq'uit ta muc' li aqueremetic te ta Israele. 22Ja' jech ta jpas ta stojol avalab anich'nab jech chac c'u cha'al la jpasbe li Jeroboam, xnich'on Nabate, xchi'uc li Baasa, xnich'on Ahías, ta sventa ti la sa'bicun sc'ac'al co'ntone yu'un laj yac'be sa' smulic li israeletique’, xayutot li Muc'ul Diose. 23Jech chal noxtoc ta sventa li avajnil Jezabele: ‘Li Jezabele te ta xlaj ta ti'el ta ts'i' ta lum Jezreel’,#2 R 9.36. xi. 24Li avalab anich'nab chchamic ta yut lume ta xlajic ta ti'el ta ts'i'. Yan li boch'otic ta xchamic ta te'tique ta xlajic ta ti'el ta xulemetic —xut.

25(Mu'yuc boch'o yan jech chac c'u cha'al li Acab ti laj yac' sba o ta spasel c'usitic chopol ta stojol li Muc'ul Diose, yu'un te tsujilanat yu'un li yajnile, ja' li Jezabele. 26Yu'un bats'i chopol c'usi la spas, yu'un laj yich' ta muc' li c'usitic cuybilic ta diosetic jech chac c'u cha'al la spasic li amorretic ti la snuts loq'uel Muc'ul Dios ta stojol li israeletique.)

27C'alal laj ya'ay li Acabe, la sli' sc'u', lic slap c'u'il sventa at-o'nton ti ch'ixlajan ta lapele; laj yicta yixim noxtoc. Ja' jech slapoj o ivay; bats'i toj biq'uit laj yac' sba. 28Ja' yu'un li Muc'ul Diose jech laj yalbe li Eliase: 29“¿Me laj avil ti toj biq'uit chac' sba ta jtojol li Acabe? Ta sventa ti biq'uit chac' sba ta jtojole, jech mu'yuc ta xcac' taluc vocol ta stojol yalab xnich'nab ti c'alal cuxul toe. Ja' to ta xc'ot ta stojol li xnich'one”, x'utat li Eliase.

Currently Selected:

1 Reyes 21: TZE97

Highlight

Copy