1 Reyes 18
18
Li Eliase ibat ta stojol Acab
1C'alal i'ech' xa'ox oxib jabile, li Muc'ul Diose la sc'opan li Eliase jech laj yalbe: “Batan ta stojol li Acabe yu'un ta xa xcac' taluc vo' li' ta banamil”, xut.
2Jech ibat ta stojol Acab li Eliase. Te ta Samariae bats'i tsots li vi'nal cha'yique. 3Li Acabe laj yic' li Abdías, ja' li jchabina yu'une. Li Abdiase bats'i lec yich'oj ta muc' li Muc'ul Diose. 4Yu'un c'alal ta ox smilan scotol yaj'alc'optac Muc'ul Dios li Jezabele, li Abdiase lic stsob li j'alc'opetique. Vo'vinic (100) la sta; la snac' ta chib nailch'en. Lajuneb yoxvinic (50) laj yac' ta jujun nailch'en. Ja' bat yac'be sve'elic, xchi'uc laj yac'be vo' yuch'ic. 5Li Acabe jech laj yalbe li Abdiase:
—Bat xano scotol li cosilaltique. Jt'untic ta scotol nio'etic, xchi'uc ta uc'umetic me oy to bu jtabetic sve'el li ca'etic xchi'uc li mulaetique yu'un mu lecuc me mu'yuc jts'unub covoltic chijcome —xut.
6Jech la svoc' sbaic. Ta jujuntal ibatic ta scotol yosilalic. Li Acabe yan be ibat; jech ec li Abdiase ta yan be ibat ec. 7C'alal chanov batel ta be li Abdiase, te la snup sbaic ta be xchi'uc li Eliase. C'alal laj yotquine, la snijan sba ta stojol, jech laj yalbe:
—¿Me vo'ot, yu jtot Elías? —xut.
8—Vu'un. Bat albo li avajvale: “Li' xa oy li Eliase”, uto —xut.
9Itac'ov li Abdiase:
—¿C'usi chopol la jpasbot ti chatacun sutel ta stojol cajval yu'un jech ac'o smilune? 10Jamal chacalbot ta stojol Muc'ul Dios, ja' li Dios cu'untique, li cajvale laj xa st'unot ta scotol banamil, ta scotol muc'tic lum, pero laj yalic ti mu'yuc bu xayilicote. Li ajvaliletique, ta jujun banamile laj yalic ta jamal ta stojol Muc'ul Dios ti mu'yuc bu la staicote. 11Pero li vo'ote chavalbun ti ac'o bat calbe cajval ti li' xa oyote. 12Pero c'alal me la jvoc' jbatic tanae, li Muc'ul Dios ti mu'yuc sbec'tale chayic'ot batel ti bu mu xa jtaot ta t'unele. C'alal me bat calbe ya'ay li cajvale, me mu'yuc la staot ta t'unele, vu'un chismilun. Pero vu'un li avajtunelune ta jbic'tal ono'ox quich'oj ta muc' li Muc'ul Diose. 13¿Me mu'yuc ava'yoj c'usi la jpas ti c'alal lic sjapu smilel scotol yaj'alc'optac Muc'ul Dios li Jezabele? Yu'un la jnac' vo'vinic (100) yaj'alc'optac Muc'ul Dios; ja' ta lajlajuneb yoxvinic (50) la jnac' ta jujun nailch'en. Vu'un laj cac'be sve'elic xchi'uc vo' yuch'ic. 14¡Pero li' ta orae chavalbun ti ac'o bat calbe cajval ti li' xa oyote yu'un jech ac'o smilun! —xi.
15Li Eliase jech laj yalbe:
—Jamal chacalbot ta stojol Muc'ul Dios ti tspas ta mantal scotole, ti chitun yu'une, tana no'ox chibat ta stojol li Acabe —xut.
16Ja' yu'un li Abdiase bat st'un li Acabe; c'ot yalbe ya'ay. Li Acabe ibat sta sbaic xchi'uc li Eliase. 17C'alal laj yil Elías li Acabe, jech laj yalbe:
—¿Me vo'ot ti chavac'be svocol li israeletique? —xut.
18Itac'ov li Eliase:
—Muc vu'cun ta xcac'be svocolic. Ja' vo'ot xchi'uc li achi'iltaque. Ja' ta scoj ti laj acomtsanbeic smantaltac li Muc'ul Diose yu'un ja' bat avich'ic ta muc' li Baaletique. 19Ja' lec alo mantal ti ac'o stsob sbaic scotol li israeletic te ta vits Carmeloe, xchi'uc li o'lol yo'bal (450) ciento j'alc'opetic yu'un Baale xchi'uc li chanib ciento (400) j'alc'opetic yu'un Asera ti chmac'linatic yu'un li Jezabele —xut.
Sc'oplal Elías xchi'uc j'alc'opetic yu'un Baal
20Li Acabe la stsob scotol te ta vits Carmelo li israeletique xchi'uc scotol li j'alc'opetique. 21Li Eliase inopaj batel ta stojol scotol li israeletique jech laj yalbe:
—¿Baq'uin to chacomtsanic ti chib avo'ntonique? Me ja' cuxul Dios li Muc'ul Diose, ja' xavich'ic ta muc'. Yan me ja' cuxul li Baale, ja' xavich'ic ta muc'#Is 36.6; Ez 29.6. —xut.
Li israeletique muc xtac'ov ic'otic. 22Li Eliase jech laj yal noxtoc:
—C'ajumal xa jtuc cuxulun, vu'un li yaj'alc'opun Muc'ul Diose; yan li j'alc'opetic yu'un Baale oy o'lol yo'bal (450) ciento. 23Ac'buncutic cha'cotuc vacax. Ac'o st'ujic jcotuc li j'alc'opetique; ac'o sbojic. Ac'o yaq'uic ta sba si', pero mu me xac'beic sc'ac'al. Jech li vu'une ja' ta jmeltsan ec li jcote. Te chcac' ta ba si', pero mu'yuc ta xcac'be sc'ac'al ec. 24Li vo'oxuque c'opanic li diosetic avu'unique. Jech ec li vu'une ja' ta jc'opan li Muc'ul Diose. Li boch'o ta x'aybat sc'ope, ti ta xtacbat tal c'oc' yu'un li sdiose yu'un ja' cuxul Dios obi —xut.
Itac'ovic li israeletique:
—¡Toj lec li c'usi laj avale! —xiic.
25Ja' yu'un li Eliase jech laj yalbe scotol li j'alc'opetic yu'un Baale:
—T'ujic jcotuc li vacaxe; meltsanic ba'yuc yu'un vo'oxuc epoxuc. C'opanic li dios avu'unique, pero mu me xavac'beic sc'ac'al li vacaxe —xut.
26Laj yiq'uic li jcot vacaxe; la smeltsanic. Te lic sc'opanic li Baale; la sliquesic ta sob c'alal to o'lol c'ac'al#18.26 C'ac'al - Oy boch'o chalic jtotic. jech laj yalic: “¡Baal, tac'bun li jc'opcutique!”, xutic. Pero mu'yuc boch'o xtac'ov. Te ch-ac'otajic ta spat xocon li scajleb smoton spasojique. 27C'alal sta xa'ox o'lol c'ac'ale,#18.27 C'ac'ale - Oy boch'o chalic jtotique. li Eliase ta lo'iltic sba lic sna'le, jech laj yalbe:
—Tsots xavaptaic, yu'un ja' jun dios. Oy yic'al yu'un oy c'usi tsnop, o me yu'un oy c'usi tspas, o me batem ta xanubal. Xchi'uc oy yic'al yu'un chvay, jech tsc'an chatijic —xut.
28Te x'avetic o, xchi'uc la sbojilan sbaic ta cuchilo, ta jich'il taq'uinetic jech chac c'u cha'al stalelic ono'oxe. Solel balum ch'ich'ic o ta jyalel. 29C'alal its'ebuj c'ac'ale,#18.29 C'ac'ale - Oy boch'o chalic jtotique. te x'avlajetic o; te xbitlajetic o, jech chac c'u cha'al jun chuvaj c'alal to ista yorail ti c'usi ora ono'ox chac'beic smoton li sdiosique. Pero mu'yuc boch'o xtac'ov; mu'yuc boch'o x'aybunuc li sc'opique. 30Li Eliase jech laj yalbe scotol li israeletique:
—Nopajanic tal li' ta jtojole —xut.
Jech scotol israeletic inopajic batel. Li Eliase ja' lic xcha'pas li scajleb smoton Muc'ul Dios jinesbile. 31La stsac lajcha'bej ton yu'un jech lajcha'chop ibat li xnich'on Jacob, ja' li boch'o jech ono'ox i'albat yu'un Muc'ul Diose: “Israel ta xc'ot abi”,#Gn 32.28; 35.10. ti x'utate. 32Ja' la smeltsan o li scajleb smoton Muc'ul Diose. La spasbe sbevo'al ta joyob, ja' x'och jun anmul sbec' c'usi chloc' yu'unic. 33La slatsbe lec si'il; la smeltsan noxtoc li vacaxe. Te laj yac' ta sba li si'e. 34Jech laj yal:
—Ich'ic tal chanibuc q'uib vo'; malic ta sba li matanale xchi'uc ta sba li si'e —xut.
Laj yal mantal ti oxib velta ac'o spasic jeche, jech la smalic ta vo' oxib velta. 35Inoj ta vo' scotol li spat xocon scajleb smoton Diose xchi'uc li sbevo'al pasbil ta joyobe. 36C'alal la sta yorail c'usi ora chchiq'uic ono'ox matanale, li Eliase inopaj batel, jech laj yal: “Muc'ul Dios, Dios yu'un Abraham, Isaac, xchi'uc Israel: li' ta orae ac'o ta ilel ti vo'ot Diosot li' ta Israele, xchi'uc ti vu'un avajtunelune, xchi'uc ti vo'ot ta amantal ta jpas li c'usitic li' ta jpase. 37Muc'ul Dios, a'ibun li jc'ope yu'un jech ac'o sna'ic scotol jchi'iltac ti vo'ot cuxul Muc'ul Diosote, yu'un jech chlic sutes yo'ntonic ta atojol yan velta”, xut.
38Li Muc'ul Diose la stac tal c'oc' ta vinajel, jech ic'ac' li matanale, li si'e, li tonetique, xchi'uc li banamile, xchi'uc ic'ac' noxtoc li vo' te ts'anal ta sbevo'al ta joyobe. 39C'alal laj yilic scotol li israeletique, la squejan spatan sbaic ta banamil, jech laj yalic: “¡Li Muc'ul Diose ja' Dios ta melel; li Muc'ul Diose ja' Dios ta melel!”, xiic.
40Li Eliase jech laj yalbe scotolic:
—¡Tsaquic scotol li j'alc'opetic yu'un Baale! ¡Mu me xjatov junuc avu'unic! —xut.
Li israeletique lic stsaquic. Li Eliase te laj yic' batel ta bevo' Cisón; te la smilan.
Li Eliase la sc'opan Dios yu'un ac'o taluc vo'
41Li Eliase jech laj yalbe li Acabe:
—Bat ve'an, uch'an vo', yu'un ven chauquil vo' xvo'et tal chca'ay —xut.
42Li Acabe ibat ve'uc, bat yuch' vo'. Li Eliase imuy batel ta jolvits Carmelo. Te la squejan sba, la spatan sba ta sjol yacan, 43jech laj yalbe li smozoe:
—Batan le'e. Q'uelo batel le' ta nabe —xut.
Jech ibat. La sq'uel batel li nabe, jech laj yal:
—Mu'yuc c'usi chvinaj —xi.
Li Eliase jech laj yalbe:
—Bat q'uelilano vucubuc velta —xut.
44Ta svucubal velta jech laj yal li smozoe:
—Oy ta xquil juteb toc chmuy ta ba nab jech smuc'ul jech chac c'u cha'al yut jc'obtic —xi.
Li Eliase jech laj yalbe:
—Batan, bat albo ya'ay Acab ti ac'o yac'be sca'il li scaretae. Ac'o batuc, yu'un jech mu li'uc xmacat yu'un li vo'e —xut.
45Li Acabe icaji ta scareta; ibat ta Jezreel. Ta ora ital toc imac li vinajele, xchi'uc ital tsots ic'; bats'i tsots chauquil vo' laj yac'.#Stg 5.18. 46Li Eliase i'ac'bat stsatsal yu'un li Muc'ul Diose. C'alal la slap lec sc'u'e, ibat ta anil ta Jezreel. Ja' ba'yuc ic'ot; ja' ts'acal ic'ot li Acabe.
Currently Selected:
1 Reyes 18: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.
