Matthieu 13
13
Ekoko a mophiki a mpoto. Ekoko a byèmbu. Ekoko a ephophela a moutarde. Ekoko a levain. Jésus adikize bayekoli ba wango ekoko a byèmbu. Ekoko èyeka ebombibaki. Ekoko a mondiki monyongo. Ekoko a bochèle.
1Bucha bwango Jésus atubaki o ndako, adyaki bwa mpoli n’ediba.
2Komoyena bato bakama bakokanaki o ma wango, wango akoloki o bwato, adyaki bwa o bwango, na bato bachò batemèki chu o mokièngata m’ediba.
3Jésus achiakolaki bango mawò makama o bikoko, alobaki bwe: ”Bokieka mophiki akièki tonga n’iphika mpoto.
4O wango aphikaki mpoto dina mpoto ikwaki mpoli na manè, na banyoli bayakaki, badyaki dyango.
5Dina mpoto ikwaki o che, ebèki ikolo na maboko, manyetu mabodyala makama ka, na mpoto itèzèki dyolo, tonga che ebèki kiènènge.
6O bucha botombamaki, bwango bolèkuzaki mpoto, tonga dyango ibèki tina twa, dyango inyitaki.
7Dina mpoto ikwaki enongo a byèmbu ba milò, na byèmbu bitoki, biyikaki mpoto.
8Dina mpoto ikwaki o che enyòngò, na dyango ibotaki mpuka, muna kama, muna mako machamano, muna mako machato.
9Koncha edi na matwe m’iwoka, tika wango awoke!”
10Bayekoli bayakaki, bayangaki wango bwe: ”K’ochiakole bango mawò machò o bikoko, mbekende?”
11Jésus ayambolaki bango bwe: ”Baphèki beni bolèngi b’iyeba beka ba yiche ba bokonchi b’ikolo, ko, byango bidi ophèba na bango ka.
12Koncha wango edi na beka, taphè wango bakbwi dyòkò, na wango tadyala na beka bikama, ko, koncha wango edi beka twa, takatula beka, byango bidi na wango dyòkò.
13Tonga na di nga chiakole bango mawò o bikoko, tonga michò ma bango midi phololo, ko, bango oyènè ka, matwe ma bango madi phololo, ko, bango owoka ka, bango oyeba mawò ka.
14Bango batunyolaki mawò, mango mach’otubana ka, elobaki mobandi ma Nzambe Esaie bwe:
”Beni towoka na matwe, ko, beni tiyebi,
Michò ma beni tidyala phololo, ko beni tiyèni.
15Mitema ma bato ba midi nyititi,
Babichula matwe babidipha michò ma bango,
Kobona bango oyènè na michò ka,
Owoka na matwe ka, oyeba na mitema ka,
Oyencha mitema ma bango ka, bwe nga belize bango.”
16”Ko, michò ma beni midi na moni, tonga myango miyènè, na matwe ma beni madi na moni dyòkò, tonga beni bowoke.
17Nga lobe na beni nènè: Mibandi ma Nzambe mikama na bato banyòngò badingaki boyènè beka, byango beni boyènè, ko, baboyènè byango ka, badingaki bowoke mawò, mango beni bowoke, ko, babowoka mango ka.
18Tonga na di bowoka mawò m’ekoko a mophiki a mpoto.
19O moto awoke mawò ma bokonchi ba Nzambe, wango oyeba mango ka, molèmba aya na wango amiche iwò, dyango iphikibaki o ch’a motema ma moto. Edi dyango iphikibaki mpoli na manè.
20Na dyango iphikibaki o che ebèki ikolo na maboko, edi wango ewoke iwò a Nzambe, achingane dyolo na moni,
21ko, wango edi tina o ch’a mwe ma wango twa, wango abike bobiko boki, o kièlèlè eya na boluphachane tonga iwò a Nzambe, wango abèchè dyolo.
22Dyango iphikibaki enongo a byèmbu ba milò, edi wango ewoke mawò ma Nzambe, ko, tonga n’iphanu a beka ba che, na bwanya b’idwa biyike mawò, wango obota mpuka ka.
23Dyango iphikibaki o che enyòngò edi wango ewoke mawò ma Nzambe, wango ayebe mango, wango abote mpuka, muna kama, muna mako machamano, muna mako machato.”
24Jésus achiakolaki ekoko akbwi: ”Bokonchi b’ikolo bodi ko moto aphikaki mpoto inyòngò o kub’a wango bona.
25Ko, o bato babèki o ma bilò, koncha ebèki boyino na wango, ayakaki, aphikaki mpoto a byèmbu otete a dyango, konch’a kuba aphikaki blès, n’akièki.
26Ko, o blès itèzèki ibotaki mpuka, komoyango byèmbu biyènèki dyòkò.
27Baboy ba konch’a kuba bayakaki, bayangaki wango bwe: ”K’obophika mpoto inyòngò o kub’a kò ka? Yango eya na byèmbu bwe?”
28Wango alobaki na bango bwe: ”Ekielaki kobona koncha edi boyino na nga.” Baboy ba wango bayangaki wango bwe: ”K’òdinge banga bokie, bochala byèmbu?”
29Ko wango alobaki bwe: ”Twa, mo beni bochale byèmbu ta beni bobila blès elòngò na byèmbu.
30Tika byango bichò bibale bikate echoko yò, kokoko ncho bucha b’itòlò tokoka, bobiko, bwango nga taloba na bato bitòlò bwe: ”Bokakuza byèmbu bocho, bokanga byango o bichimba, tonga n’itumba byango, ko, konginya blès o ndako a nga ikonginya mpoto.”
31Na wango achiakolaki ekoko akbwi: ”Bokonchi b’ikolo bodi ko ephophel’a moutarde bona, yango moto aphikaki o kub’a wango.
32Yango elèki mpoto ichò boki, ko, chima yango iwola elèke dina mpoto dyola, banyoli b’ikolo baya, batonge myumbu o mataki, mango mawolaki.”
33Na wango achiakolaki ekoko akbwi: ”Bokonchi b’ikolo bodi ko levain bona, wango mwatò akwaki aphutinyaki mimèko ma phuphu michato, kokoko ncho michò michekwaki levain.”
34Jésus achiakolaki bato mawò machò ma o bikoko, abochiakola bango mawò ka, ko, o bikoko phencha.
35Kobona iwò, dyango mobandi ma Nzambe molobaki, itubanaki bwe:
”O nga diphole muna ma nga, nga tachiakola mawò o bikoko phencha.
Nga taloba mawò, mango mabombibaki o bophotiche ba che kokoko ncho kinòwa.”
36Chima o Jésus abèki akakola bato o ma wango, wango akolaki o ndako, bayekoli bayakaki o ma wango, balolaki bwe: Dikiza banga ekoko a byèmbu bibèki o kuba!”
37Wango alobaki bwe: ”Koncha ephike mpoto inyòngò edi Mwan’a bole a moto.
38Kuba edi bato ba che, mpoto inyòngò idi bana ba bokonchi ba Nzambe, mpoto a byèmbu edi bana ba molèmba.
39Ndoli aphikaki edi molèmba, bucha bitòlò edi bochiliche ba bobiko bu, bato bitòlò edi bangelo.
40Ko bato bachale byèmbu tonga n’itumba o meya bona, nà bochiliche ba bobiko bu todyala kobona.
41Mwan’a bole a moto tatinda bangelo ba wango, na bango takakuza o bokonchi ba Nzambe bango bachukwize baninga na maye, na bakieli ba matoma mabè bachò.
42Na bango tabwaka bango o ibembeke, ondo tedyala mbèmbe na bachulinyi ba mino.
43Komoyena bato banyòngò talanga ko bucha bona o bokonchi ba Chango a bango. Koncha edi na matwe m’iwoka, tika wango awoke.
44Bokonchi b’ikolo bodi dyòkò ko eyek’a motuya mokuli, ebombibaki o kuba, o moto ayènèki yango wango abombaki yango, akièki na moni, atèkizaki beka ba wango bichò, n’achombaki kuba yango.
45Bokonchi b’ikolo bodi dyòkò ko mochombi bona, ayengaki mindiki minyòngò, motuya mokuli.
46O wango adwaki mò, motuya molèkaki bokuli, wango akièki, atèkizaki beka ba wango bichò, n’achombaki mwango.
47Bokonchi b’ikolo bodi dyòkò ko bochèle bolambibaki ediba bona, bwango botokize chwe moto elènge elènge.
48O bwango butonda bachabuzaki bwango o ngolo, badyaki bwa, bachòlòki beka binyòngò, bakanaki byango o nchongo, babwakaki beka bibè.
49Na bokokele ba bobiko bu todyala kobona. Bangelo taya, nabango takakuza bato babè na bato banyòngò,
50tabwaka bango o ibembeke, ondo tedyala mbembe na bachulinyi ba mino.
51Jésus ayangaki bango bwe: ”Beni bobiyeba mawò machò ma?” Bango bayambolaki wango bwe: ”He.”
52Wango alobaki na bango bwe: ”Moto a bokièngu ba mikanda ikika, wango bango bakanaki o boyekoli ba bokonchi b’ikolo, wango awule konch’a ndako acholele beka bitemu na beka b’ikale o ndako ibomba beka.”
53Okomo Jésus achilizaki bikoko bi, wango alangwaki ondo.
54Na chima wango ayakaki echoko a wango, wango adikizaki bato o ndako ibondim’a bango, kobona bango bayèmèlèki, na balobaki bwe: ”Moto wo adwaki bolèngi bu na nguli ikiela matoma machimube owè?
55Wango adi odya mwan’a bole a moto a mabaya ka? Kombo a nyango a wango edi odya Marie ka? na makombo ma banyango ba baphele ba wango edi odyala Jacques, Joses, Simon na Jude ka?
56Na banyango ba batò ba wango badi odyala otete a banga ka? Yena nguli ikiela matoma machimube, wango achònòki na yango owè?”
57Na bango babèchèki wango. Ko, Jésus alobaki na bango bwe: ”Mobandi ma Nzambe mobodyanchwiba echoko akbwi ka, modyanchwibe o mbok’a mwango koncha.”
58Na wango abokiela matoma machimube ondo makama ka, tonga bango babochingana wango ka.
Currently Selected:
Matthieu 13: BUI1947
Highlight
Share
Copy
Want to have your highlights saved across all your devices? Sign up or sign in
Published in 1947, by Örebromissionen, now part of the Evangelical Free Church of Sweden (Evangeliska Frikyrkan).
