Markus 3
3
Allah paget weat oruakhwe, Yesus en ap mesik eʼgik il ʼgorlo aʼge obaptegei wene
(Matius 12:9-14; Lukas 6:6-11)
1Pobuk e, at Yesus o is aphwami Yahudi aʼge seʼban ogumu eba ʼgwegei. ʼGwegei ʼgal e, o eba ap mesik eʼgik il pema ʼgorlo aʼge welaga. 2Asogo oruakma ʼgwegeimu re, is ap pema enede en e, disogo epegesa,
“Yogodak e, agauwa sabit aʼge Allah paget weat oruakhwe, at en ap ai heleʼgua ya? Erlak a. Heleʼgiso holuk e,
Hat wiak tigen, oluk, wene ebam pouwok o,” oluk enil en wogu legesa. 3Asogo enil en wogukhwe, at Yesus en e, ap eʼgik il ʼgorlo aʼge ano disogo moʼgulesi,
“Hebe inotluk e, ʼburl ya suk o,” oluk moʼgulesimu, 4inlai lagama re, aphwami ebano en disogo moʼgulentesi,
“Agauwa sabit aʼge pam Allah paget weat welat e, aphwami obabonobu a? Wiagabonobo a. Ye, delonobu a? Waronobu a,” oluk moʼgulentesimu re, eniak erlak mo egesa. 5Mo egesema re, at Yesus il yerentil lagarik ede en e,
“Enebabut lagorak yema re!” oluk olot het agalat enebe ede en e, ap ano disogo moʼgulesi,
“Heʼgik ʼbelinghemen o,” oluk moʼgulesimu re, eʼgik ʼbelinghesi ʼgal arat op aga. 6Eʼgik asogo heleʼgegeimu re, is ap Farisi aʼge ebano libegesarik perleneat Herodes osi eneʼbek legesarik e,
“Yesus ʼgesogo wotul,” oluk enemin obok ʼbaligisa.
At Yesus ik Galilea esaʼgoma oruakma aphwami aʼbigat eʼbek wegesa wene
7-8Asogo tigisarik e, pobuk, at Yesus osi iak wogu legesa aʼge ebano enemin e, ik Galilea omugwe ano esaʼgoma legesa. Legesema re, aphwami en e,
“Yesus disogo tago, asogo tago,” oluk obok ogukhwe, is aphwami o Galilea doʼgo aʼge enebe esanat enesaʼgo holholuk eneʼberlik eneʼberlik lagaimu, is aphwami o Yudea doʼgo aʼge emin, o Yerusalem aʼge emin, o Idumea doʼgo aʼge emin, o ik Yordan iak etle akhit aʼge emin, o Tirus Sidon aʼge emin, Yesus eʼbek odoktigisa. 9-10Asogo odoktigisema re, enebe aʼbigat ou obabenebisokhwe re, is ou enebam aʼge ʼberlek en, aphwami pema hial-hial Yesus ano eneʼgik tenakpouwogoluk eʼbek ʼgwigisa ai paget, at Yesus en e, at osi iak wogu legesa aʼge ebano disogo moʼgulentesi,
“Aphwami aʼbigatma re, an neragam oʼgwe ʼbun-ʼbun uano oluk e, ik so wei aʼge mesik noboluk welemis o,” oluk moʼgulentesi. 11Ou asogo obabenebasukhwe, is muʼgat enebabut wiak aʼge aphwami onogola ʼgoluk welegesa aʼge en Yesus ebe enil holuk e, onorogole sogup ʼbou til legesarik e, eniak loksogo moʼgulugulat, disogo ogu legesa,
“Allah omlogo re, harat o,” oluk moʼgulogu legesa. 12Asogo moʼgulegisa aʼgeat de, at Yesus en disogo egei,
“An Allah omlogo, oluk nobok modok moʼgulentagup o,” oluk iak ningsogoat wene yagentesi.
Yesus en ap enebe 12 yoʼgo enebesi wene
(Matius 10:1-4; Lukas 6:12-16)
13Asogo wene yagontoluk eʼberlik e, at Yesus ebe dom pam ligaga. Ligagarik e,
“Ap enebe eria neʼbek wemak,” oluk ede epesi aʼge nak worlentesimu, eʼbek legesema re, 14-15enebe 12 eriano edigenebasulat e, disogo moʼgulentesi,
“His an nemin modok modok wolomultik en e, op wene moʼgulontogulat, muʼgat enebabut wiak aʼge aphwami onogola ʼgoluk oruakma, an nanni wokhentaikmu henokho lebikpogulat, til denaga lorogup en perakhenebaik o,” oluk edigenebesi. 16Enebe 12 edigenebesi aʼge ebano, ononuk e, yu: Simon onuk mesik e, Petrus tualegei aʼge ano emin, 17Zebedeus eiyagai Yakobus ot Yohanes eʼbirek ononuk nis neniak pam orlolu iak oso oluk u ʼgelaʼge, is eniak pam Boanerges tualenebegei aʼge emin, 18Andreas emin, Filipus emin, Bartolomeus emin, Matius emin, Tomas emin, Alfeus omlogo Yakobus emin, Tadeus emin, Simon,
“O Kanaan yema nonowirak aʼge nak wolomok o,” oluk ese laga aʼge ano emin, 19Yudas Iskariot Yesus woruagoluk pobuk yoʼgo laga aʼge ano emin, enebe eriayat edigenebesi.
“At Yesus ai Beelzebul ebam louktakma til denago ai o,” oluk egesa wene
(Matius 12:22-32; Lukas 11:14-23, 12:10)
20Asogo edigonoboluk togolik owi pam ʼbu agoma re, aphwami esanat pobuk eʼbek odoktu egesema re, Yesus osi emin onsoʼboru noʼgosogo no ʼgelaʼgeat aga. 21Asogo agama, aphwami nin pema en e,
“At ede ʼbal agarik oruak o,” ogwiam, at Yesus osi enesaʼgo hweligisarik e, at ebe wouwogoluk wegesa. 22Is wagaihwe, is ap Allah iak pelal wogo eiye aʼge o Yerusalem en orlu egesarik e, disogo egesa,
“Beelzebul muʼgat enebabut wiak aʼge onue ʼgain ano Yesus ebam louk egeimu oruak o. Asogo oruakma no oluk e, at anni pam muʼgat at osi ʼgelaʼge enebabut wiak aʼge aphwami onogola ʼgoluk oruakma henokho lebigenebasu o,” oluk egesa. 23Asogo egesema, at Yesus en aphwami esan ebano worlontoluk e, wene ebam elitsogo re, disogo moʼgulentesi,
“Iblis aphwami onogola ʼgwiselat e, uʼgwarek en elit henokho lebikpo no? Modok mia o. 24Ye, ap ʼgain onuk logo aʼge mesigat aʼge osi eragam tenentarok welago aʼge emin is-is hwerlirak poluk enemin il ʼbelak welema holuk, mesikmu welat enanni welegesa ʼgelaʼge welema erlak o. Enanni erlak ema o. 25Ye, ap mesik eiyagai enemin hwerlirak poluk enemin il ʼbelak welema holuk e, ap mesigat eiyagai enemin welat op welegesa ʼgelaʼge welema erlak o. Wiagat ema o. 26Ai ʼgelaʼge re, at Iblis uʼgwarek osi muʼgat enebabut wiak aʼge enemin hwerlirak poluk enemin wiak elepma re, we welagai ʼgelaʼge enannisogo wellep erlak o. Arat erlak elep o. 27Ye, ap mesik anni aʼbik aʼge eʼgik herle wusogo po erlakma en e, owi pam aʼge di aʼge yu aʼge yogorlia wa ʼgu mia o. At e, at eʼgik herle wusogo poluk nak e, elirat wa ʼgwilo yo,” oluk moʼgulontoluk eʼberlik wene disogo moʼgulentesi,
28“An niak demat moʼgulhentaik o. Aphwami en di wiak yu wiak togwi aʼge emin, onogola en mi-miarak onobogulat, eniak pam en onobok wiaksogo ʼbalogwi aʼge emin, at Allah en elit erlagapsogo ukpo aʼgeat de, 29Allah Arogun ai onogola en mi-miarak pogulat obok wiak ʼbalogwi holuk e, erlagapsogo ukpo mia o. We, wiak tua ai paget wene enebam mun-mun welema o,” oluk moʼgulentesi. 30Wene asogo moʼgulentesi ai re, is en e,
“Yesus muʼgat ebabut wiak aʼge ogola ʼgwegeitik oruak,” oluk egesema en de, moʼgulentesi o.
Yesus ia emin osi emin eʼbek wegesa wene
(Matius 12:46-50; Lukas 8:19-21)
31Wene asogo moʼgulentesirik oruakma, at Yesus ia emin, osi emin, wegesarik odipmu edik welat, Yesus liplaumagoluk aphwami enebam wene wusogo ʼgwelabenebigisa. 32ʼGwelabenebigisema re, is aphwami aʼbik Yesus eragam hweriogo welegesa aʼge en disogo moʼgulegisa,
“Yesus, yethemen! Hat hia emin, hosi emin, palo hebil wegesarik odipmu oruak o,” oluk moʼgulegisa. 33Asogo moʼgulegisema at Yesus en e,
“An nia nosi ai salak no,” oluk moʼgulentesirik e, 34aphwami at eragam, hweriogo welegesa aʼge ebano il yerentil lagarik e, disogo moʼgulentesi,
“An nia nosilak e, his yuat o. 35Sa en, at Allah ede epasu aʼge hegitsogo tiso holuk e, at ai an not, nerei, nia, oruak o,” oluk moʼgulentesi.
Currently Selected:
Markus 3: WUL
Highlight
Share
Copy
Want to have your highlights saved across all your devices? Sign up or sign in
