Lukas 24

At Yesus ebe elaluk aga wene

(Matius 28:1-10; Markus 16:1-8; Yohanes 20:1-10)

1Agauwa sabit aʼge pam Allah paget weat welegesarik, loruk oʼgwe hari Minggu pam hubet siaksogo is hwami ebano en aʼbosu degelogo pegesa aʼge ebano woluk e, owikmu werak pegesema ano wegesa. 2Wegesarik enil ʼgwelakhegesa ʼgal e, owikmu werak helep ʼgoduk dopnosogo lerakpegesa aʼge ano erlebilogo hwikhai legesema ʼgoduk hwerik oruakma enil hegesa. 3Hegesarik, enebe owikmu ʼgwi legesa ʼgal e, at nonue ʼgain Onuk Logo aʼge Yesus werak ano ebe erlakma enil hegesa. 4Werak ebe erlakma enil hegesarik e,

“Yu noʼgosogo aga,” oluk ebagase leʼgeksogo mennei yat horok eberugumu, ap enebe ʼbiren onosum amulit aʼbik aʼge ʼbuksogo, is hwami enilem erianoat ʼga en ʼgelaʼge eneragam inla ʼbu wegesa. 5Wegesema re, is hwami ebano onogorlok en onodogun ʼgi-ʼgonu oruakma re, is ap ʼbiren eriano en hwami ebano disogo moʼgulentigisa,

“His e, at elaluk welago aʼge ano aphwami werak aʼge welagaimu nopaget heratogu legep. 6At ebe yema erlak o. Allah en arat elalugaptegei ani o. 7At naduk his henemin o Galilea welat, disogo moʼgulhentesi aʼge anoat honogola eberip o. At en e,

An abat daklau wegi ano watnobuagoluk nebe ap wiak aʼge eneʼgigem noboma, e pam ediknoboluk watnobumu, agauwa ʼbiren werak weleiktik e, henaganak aʼge nelaluk eik ani o, oluk moʼgulhentesi ano honogola eberip o,” oluk moʼgulentigisema, 8is hwami ebano pobuk wene Yesus en moʼgulentesi aʼge ano enede eberigisa. 9Enede eberigisarik, owikmu eba en togolik o pam legesarik e, is ap enebe 11 ebano emin, is enarilak pema ebano emin, ʼbeliʼgogo moʼgulentigisa. 10Is hwami ebano enebe re, Maria owi Magdala aʼge ano emin, Yohana emin, Maria Yakobus ia emin, hwami ado ebano eneminat enebe ʼberlek ʼbeliʼgogo Yesus osi peragenebaigoluk yoʼgo enebesi aʼge ebano moʼgulentai legesa. 11Asogo moʼgulentai legesa aʼgeat de, is ebano demat oluk enede eberu erlak. We, eniak esei ogwi, oluk epegesa aʼgeat de, 12at Petrus ano nak e, peiyalogo inagarik, pungtak owikmu werak pegesema ebano il hau waga. Wagarik odogun ʼgonu oluk il ʼgwelakhesi ʼgal e, we sum lenan aʼge ano nak noʼgorlogo oruakma hesi. Asogo oruakma il holuk e,

“Yu noʼgosogo aga. Nogorlok e,” oluk ede pit-pit owi akhit laga.

Ap enebe ʼbiren Yesus emin o Emaus wagalat ebe enil hegesa wene

(Markus 16:12-13)

13O ai erlige re, Yesus osi iak wogu legesa aʼge ebano enebe ʼbiren o kota Yerusalem en o onuk Emaus eba, we, 2 jam ʼgelaʼge wagaimu no oluk e, is ebano womogoluk waga legesa. 14Wagalat e, di aʼge yu aʼge ʼberlegat aga aʼge ebano obok ʼbeleʼgil wegesa. 15Wene obok ʼbeleʼgil wagalat e, at ap mesik en e, at are mesik moʼguleselat, are mesik en e, at ap mesik moʼguleselat, til wagaimu re, at Yesus mugentau wagarik eneminat wegesa. 16Enemin wegesa aʼgeat de, is ap eriano en enak aʼge pobi nobuano oluk enilarogun sebelegeimu re, ebe enak aʼge pobi tu erlak. 17Wagaimu re, at Yesus en, is eriano disogo moʼgulentesi,

“His heʼbirek ebelaʼgwe lagalat, wene no wene il laga legep,” oluk moʼgulentesimu onorogole enerlagaik takpegesarik e, edik mo egesa. 18Edik mo oluk e, is eriano, at mesik onuk Kleopas en e, disogo moʼgulesi,

“Wene sono hau yayat aga eriano pam, is ap ʼbok o Yeusalem wotluk lodu oruak aʼge pema ʼberlegat enaluk aʼgeat de, hat yu nak e, heperlak welegenma hegi,” oluk moʼgulesimu, 19at Yesus en e,

“Wene ai noʼgosogo aga aʼge paget egen,” oluk moʼgulesimu, is eriano en e, disogo egesa,

“Ap onuk Yesus, owi o Nazaret aʼge ai, ebe Allah iak moʼgulentasu aʼgeat welat e, Allah ilem, nis aphwami ʼberlegat nenilem, wene moʼgulentasulat, di aʼge yu aʼge annisogoat taga laga aʼgeat de, 20is ap Allah eiye aʼge onuelak ʼgaindek emin, nis nonuelak ʼgaindek emin, enemin en wene ebam pegesarik e pam edikpoluk woruagoluk eneʼgigem pegesema werigisa o. 21Nis aphwami Israel aʼge, at en delnonobua oluk nenede opogu lege aʼgeat de, eige! Asogo arat agarikmu re, agauwa ʼbirenat nogoige ai o. 22Ye, is hwami nis aʼge pema en nenarogun lebi legesayat o. Is ai hubet siaksogoat werak owikmu pegesema ebano wegesa ʼgal e, 23werak ebe erlakma hegesa. Ebe erlakma enil holuk legesarik e, wene moʼgulnentasulat e,

Malaikat ʼbogorl pam aʼge en e,

Erlak o. At ebe elaluk agama ani o, oluk moʼgulnentigisema wege o, oluk, asogo egesema yuk ege o. 24Ye, nis nenarilak pema akhit owikmu werak pegesema eba hau wegesa aʼge re, ebe erlak welat en e,

Hwami moʼgulnentai legesa aʼge ano demat hegi, oluk, Yesus ebe enil ho erlakma en legesayat o,” oluk Yesus moʼgulegisa. 25Asogo moʼgulegisema, at Yesus en e,

“Eige! Henebe uo a? Ap Allah iak moʼgulontogu legesa aʼge ebano en wene ʼberlegat moʼgulontogu legesa aʼge ebano demat oluk his perlene pobi tu pukmu en welegep yema re! 26At Kristus Allah en yoʼgo pesi ano, di obotut yu obotut ho erlakma en erliktu no? Erlak o. Hasuamat erliktu o. His en egep ai tu hegitsogoat tigisa o,” oluk moʼgulentesi. 27Asogo moʼgulentesirik e, at uʼgwarek paget Musa en pelal wesi aʼge ebano hwerli en ʼbekhit e, is ap Allah iak moʼgulontogu legesa aʼge en pelal wegesa aʼge ebano, ʼberlegat dokhumsogo ʼbeliʼgogo moʼgulentesi.

28Asogo moʼgulentesirik, o Emaus womogoluk wegesa aʼge ano arat horok lau wegesarik e, at Yesus ebela ʼbekhit weigoluk ʼgelaʼge tegei. 29Asogo tegeimu re, is ap eriano en e, disogo moʼgulegisa,

“A! O hik iogoluk, mo arat ʼgobok egei yema re, nenemin yema nogouwok o,” oluk, tenak pegesema re, enemin nogouwogoluk o pam ʼgwigisa. 30ʼGwigisarik enemin soʼboru nouwogoluk e, huregesarik soʼboru roti aʼge eʼgikmu wesirik e, Allah hau wusogo seʼban oluk ʼgusogo is eriano soʼburentesi. 31Asogo tisokhwe, is eriano naduk enilarogun sebelegei aʼge ano dek otluk e, enak aʼge pobi tigisa. Enak aʼge pobi tigisa aʼgeat de, at ebe is eneʼgerlakma en ʼga laga ʼgelaʼgeat nalaga. 32Asogo nalagama re, is-is nak disogo egesa,

“Eige! Ebelaʼgwe wagalat e, wene Allah iak pelal wogo aʼge ʼbeliʼgogo moʼgulnentasukhwe re, nenede aganhan agarik nonogola ʼgagalaga ano erlak no?” oluk egesa. 33Asogo egesarik e, wolom erlakma en, is ebano eʼbiregat siaksogo inegesarik togolik o Yerusalem legesa. Legesema re, at Yesus osi enebe 11 ebano emin, enarilak onorokhwi pema emin, enemin odoktak welat disogo ogukhwe entai legesa,

34“Yesus Simon ologotma inagama il hesi ai, Allah en demat elalugaptegeimu oruak o,” oluk wene ʼbeliʼgisoma legesa. 35Legesarik, is enebe ʼbiren eriano en ebela pam wagalat Yesus emin tigisa aʼge emin, soʼboru ʼgusogo soʼburentasumu ebe pobi tigisa aʼge ano emin, modok ʼbeliʼgogo moʼgulentigisa.

At Yesus ebe osi ʼberlek en enil hegesa wene

(Matius 28:16-20; Markus 16:14-18; Yohanes 20:19-23; Peragenebesi 1:6-8)

36Wene asogo owan ʼbeloʼgogumu, at Yesus ebe ʼga en ʼgelaʼgeat eneʼgerlakma inagarik e,

“Nosi. Henede erlikhagup o,” oluk hau warenebisokhwe, 37is ebano yuk aʼbik egesarik e, muʼgat oluk onogorlok aʼbik aga. 38Onogorlok aʼbik agama re, at Yesus enat osi disogo moʼgulentesi,

“His e, nopaget honogorlok egeptik demat opo erlakma en henede ʼbiren welegep. 39An nebeat o. Neʼgik noyuk yema henil yethemit o! An e, neinno emin, nuak emin, oruak ai ʼgelaʼge, is muʼgat ai asogo modok erlak o. Holuk e, heneʼgik tenniogulat, henil niogulat, tugulat e,

Yesus demat, oluk honogola eberit o,” oluk, 40asogo moʼgulentasulat, at eʼgik oyuk ebano onugentesi. 41Asogo onugentasukhwe, is ebano en e,

“Eige!” oluk erliktugulat, onogola enagai en e, demat oluk owan pobirak erlak oruakma, at en is ebano moʼgulentasulat e,

“His soʼboru logon yema pegepma ya? Erlak a,” oluk moʼgulentesimu, 42is en e, hiane worogo aʼge ʼgwerik mesik wogegisema re, 43at en wesirik e, is ebano enilemat neʼgei.

44Noluk e, is ebano disogo moʼgulentesi,

“An his henemin welat moʼgulhentasulat e,

An taknobouwa aʼge Musa en pelal wasulat, ap Allah iak moʼgulontogu legesa aʼge ebano en wogulat, is nin pema en buku Mazmur pam wogulat, wokho pegesa ai hegitsogo, an arat taknobouwa ani o, oluk moʼgulhentasu legi ano ebe arat aga o,” oluk, 45Allah iak pelal wogo aʼge pobi tuagoluk, is ebano wene enede ʼbaksogo moʼgulentesimu pobi tigisa. 46Asogo enede ʼbaksogo moʼgulentasulat e,

“Allah en Kristus yoʼgo poluk perakpou weik egei aʼge pelal disogo oluk wogo oruak,

Di obotut yu obotut hil hil warotluk e, agauwa ʼbiren werak wolotluk e, henaganak aʼge warotluk lagaimu en elaluk ema o, oluk pelal wogo oruak. 47Ye, mesik disogo oluk pelal wogo oruagat,

His aphwami wiak togu legep aʼge ai, ukpoluk henebabut heberlogup holuk e, Allah en erlagapsogo ukpouwa o, oluk, at onuk ʼbalogo wene ogulat e, edip o Yerusalem hwerli en moʼgulentil, hwerli ʼbekhit o di owi yu owi aphwami enaʼgul onuk loʼbok modok moʼgulentil laga lomup o, oluk Allah iak pelal wogo oruagat o. 48Wene pelal wogo oruak ai ʼgelaʼge, ebe aga aʼge his henil hegep aʼge enat, is aphwami moʼgulentil laga lomup o. 49Ye, an naik en his wokhentaik, oluk obok moʼgulhentesi ano, an enat henebam ʼbelakhonobou weik o. Aʼge re, Allah anni ʼbogorl pam en owan henebam louk uom erlak oruakhwe ya re, henebe o kota yemayat wolomup o,” oluk wene weragenebesi.

At Allah en Yesus ʼbogorl pam woluk ligaga wene

(Markus 16:19-20; Peragenebesi 1:9-11)

50At Yesus en wene asogo weragenebesirik, at osi ebano o kota lokma en wogonoboluk libagarik e, o Betania eba laga. Lagarik, eʼgik lagabak poluk e, at ede aganhan enebam pasulat e,

“Allah en tenhentarok welat obaphenebise lemak o,” oluk hau warenebegei. 51Asogo hau warenebisokhwe erianoat e, is eriano oruakhwe, Allah en, at ebe haʼboksogo woluk ʼbogorl pam ligaga. 52Asogo ligagokhwe re, is osi ebano ondogorlu pam hurotluk e, onogola enagai aʼbik holuk, o Yerusalem togolik wegesa. 53Wegesarik, o Allah owi werikmu nak welat e, Allah erliktogwi modok welegesa.

Currently Selected:

Lukas 24: WUL

Highlight

Copy