Lukas 22
22
At Yesus ebe woruogoluk obok ʼbaligisa wene
(Matius 26:1-5; Markus 14:1-2; Yohanes 11:45-53)
1Is aphwami Yahudi aʼge seni lok setil lagai aʼge ano onuk Paskah noʼgulat, eʼgen roti poruagoluk ogola ʼgwelabogwi aʼge ogola ʼgwelebak erlak aʼge werakho noʼgwi aʼge ano agauwa horok lau wagama welat e, 2is ap Allah eiye aʼge onuelak ʼgaindek emin, Allah iak pelal wogo eiye aʼge emin, aphwami ʼberlegat onogorlok en e,
“Yesus wene ʼgesogo ebam poluk worul epegep,” oluk obok ʼbalogu legesa.
At Yudas en Yesus woruagoluk yoʼgo laga wene
(Matius 26:14-16; Markus 14:10-11)
3Asogo obok ʼbalogukhwe re, is Yesus osi enebe 12 ebano aʼge, mesik onuk Yudas Iskariot ano ogola Iblis ʼgwegei. 4ʼGwegeimu re, at Yudas, is ap Allah eiye aʼge onuelak emin, Allah owi werik tenak welegesa aʼge emin, eneʼbek lagarik e,
“Yesus ai worogup en e, noʼgosogo heneʼgikmu paik o,” oluk enemin obok ʼbaligisa. 5Enemin obok ʼbaligisarik e, is ap ebano onogola enagai hogulat e,
“Oʼgo uang hwerli ai pam wokhomul,” oluk obok moʼgulegisa. 6Obok moʼgulegisema, at Yudas en e,
“I o,” oluk moʼgulentesirik e,
“Aphwami eneperlak oruakhwe, panoasuak Yesus ematekma oruakma, metne en eneʼgikmu paik e,” oluk ogola en obok eselat mennei ebetil lasu laga.
Domba wam seni Paskah no aʼge paget degeli louwagoluk osi peragenebesi wene
(Matius 26:17-25; Markus 14:12-21; Yohanes 13:21-30)
7Yudas asogo ede eberisokhwe, eʼgen roti poruagoluk ogola ʼgwelabogwi aʼge ogola ʼgwelebak erlak aʼge werakho noʼgulat, seni Paskah paget wam domba wam wusogo no hegit aga. 8No hegit agama re, at Yesus en Petrus Yohanes emin peragenebasulat e, disogo moʼgulentesi,
“Nis seni Paskah paget domba wam nenemin nul en, laguptik werakho degelogo pogu lomup o,” oluk moʼgulentesimu, 9is en e,
“Nis en di aʼge yu aʼge o ʼgeba degelogo poluk wolom hagai en egen,” oluk egesema, 10at Yesus en e,
“His o kota ano ʼgwi laguptik e, ap mesik ik eʼbe ʼgwiang domul heleʼgik aʼge pam ik naʼgoluk wagoma enemin sarlok togup ani o. Sarlok toguptik e, eʼberligat lu o. Laguptik at owi pam ʼgwiso holuk e, 11ap owi eiye aʼge ai ebam hin disogo oluk womup o,
At nonue wene moʼgulnentasu aʼge ano en e, disogo egei,
An nosi niak wogwi aʼge nemin seni Paskah paget domba wam wusogo nouwogoluk, o ebale seʼgerlak ogorlirak ʼge ʼgelaʼge nebegen, oluk hin wai lit o, oluk peraknonobou wagama wege, oluk asogo moʼgulogwiam, 12at en e, o holiʼbo lok seʼgerlak ogorlirak aʼge werakho noma ebale modok heleʼgik aʼge hwiakhontouwa ani o. Hwiakhontouema re, ebayat di aʼge yu aʼge degelogo poluk wolomup o,” oluk e, peragenebesi. 13Peragenebesimu, is eriano legesa ʼgal e, at en egei hegitsogoat, asogo oruakma hai legesarik e, seni Paskah paget domba wam wit-wat e, werakho degelogo pegesa.
At Yesus osi enemin en soʼboru emin, anggur eʼgen aʼbosu emin, ologun pam neʼgesa wene
(Matius 26:26-30; Markus 14:22-26; 1 Korintus 11:23-25)
14Arat no hegit lau wagama re, at Yesus en e, osi peragenebaigoluk yoʼgo enebesi aʼge pema akhit logon emin legesarik, enemin nouwogoluk huregesa. 15Huregesarik, at en disogo moʼgulentesi,
“An di obotut yu obotut hasukhwe watnobua ano, owan taknobo erlak oruakhwe, domba wam seni Paskah paget yogodak nul yu re, nosi nemin nolo e, oluk, an nagai aʼbik hasu legi o. 16Nenemin yayat noluk pobuk, at Allah en eragam onoboluk ebe aʼge nul ai owan oruakhwe re, yu aʼge mesik henemin no erlakma en weleik o, oluk demat moʼgulhentegis o,” oluk moʼgulentesirik e, 17-18pobuk ik eʼbe anggur eʼgen aʼbosu neʼgak aʼge eʼgikmu wesirik Allah hau wusogo, osi wogentasulat e, disogo moʼgulentesi,
“Anggur eʼgen aʼbosu yu noluk e, an pobuk logon no erlakma en weleiktik, hwerli, at Allah en eragam onobouwa ai hwerli, pobuk en naik o. Holuk e, yu wik-wok honuʼgwarek en soʼbusogo noʼgu lorogup en wokhentegis o,” oluk moʼgulentesi. 19Asogo moʼgulentesirik e, pobuk soʼboru roti aʼge eʼgikmu wesirik e, Allah hau werak poluk ebe ʼgusogo re, osi soʼburentasulat e, disogo moʼgulentesi,
“Yu an nebeat o. [An nebe his henebaget watnobogwiam wareikmu re, an nebam eberak wolorogup en e, disogoat noʼgu lomup o,” oluk moʼgulentesimu, 20arat noʼgwiam e, ik eʼbe anggur eʼgen aʼbosu neʼgak aʼge asogoat wogentasulat e,
“Yu re, an nemebat o. Allah en wene ʼget aʼge wusogo wokhenebik, egei ano his henebaget nemep namogo watnobua ai pam, demat ema o,” oluk soʼbusogo wogentesi.] Wogentesirik e, disogo moʼgulentesi,
21“Nosi! Yethemit! Ap mesik soʼboru e delak pam neʼbirek mesikmu noʼgu lege aʼge ya enat, an watnobuagoluk yoʼgo louwa ani o. 22Yoʼgo louwema an abat daklau wegi ano at Allah en e,
At woruak, oluk epesi hegitsogoat watnobua aʼgeat de, ap an watnobuagoluk yoʼgo louwa aʼge ai nak e, nede o. Wiak ema o,” oluk moʼgulentesimu re, 23is-is nak disogo egesa,
“Ai sa ʼgelaʼge en tua aʼge de, egei,” oluk e, hin wok han wok egesa.
“Hat ʼgain no? An ʼgain,” il legesa wene
24Asogo il legesarik e, ʼgain e, sa, oluk eniak sagalugulat e, disogo egesa,
“Hat ʼgain no? An ʼgain,” oluk, at mesik en osokhwe, mesik en osokhwe, toluk, eniak sagaligisa. 25Asogo egesema, at Yesus en disogo moʼgulentesi,
“Is aphwami oʼborl oʼgwe aʼge ai re, onuelak ononuk logo aʼge en onosi tenentarok welat eniak ningsogoat,
Di aʼge tip, yu aʼge tip, oluk moʼgulontogulat, ye, is onosi en,
Nonue ai op tennentarok oruak, ogulat, ogwi ai ʼgelaʼge re, 26his en, asogo modok togup o. Holuk e, ap his aʼge mesik en e,
An ʼgain welle, epasu holuk e, honot ʼgelaʼge emak o. Ye,
An en tenentarok welle, oluk epasu holuk e, heneragam aʼgeat emak o. 27His honogola en e, ap sa ʼgelaʼge ʼgain welema epegep. At ap mesik hweriogo welat soʼboru nasu aʼge ai ya? At e, eragam aʼge en, at ue nouwagoluk wogosu ago aʼge ai ya. Erlak o. ʼGain e, at hweriogo welat soʼboru nasu aʼge, aiat o. Asogo aʼgeat de, an his henemin welat heneragam aʼge ʼgelaʼge taga legi o. 28Loksogo wik-wiak taknobogukhweat de, his yu nak e, an uknobogwi erlak nemin modok welege ai en e, 29-30an naik en aphwami an neragam tenentarok welemagoluk ediknebesi ai ʼgelaʼge re, his ogo aphwami an neragam enebaikmu eba soʼboru noʼgulat, ik noʼgulat, tugulat e, henebale delakma eba ʼgainat welat, aphwami Israel aʼge enaʼgul onuk 12 ebano wene enebam pogulat, noʼgorlogulat, togup oluk, hisat edikhenebegi o,” oluk moʼgulentesi.
“Hat en, Yesus neperlak, olu elabe togun ani o,” oluk Petrus moʼgulesi wene
(Matius 26:31-35; Markus 14:27-31; Yohanes 13:36-38)
31Yesus en asogo moʼgulentesirik e, Petrus mesik disogo moʼgulesi,
“Simon! Simon! Hesaʼgo hwelin! Gandum agap hwelilogo ukpogwi ai ʼgelaʼge, his ʼberlegat asogo, at Iblis en henebe hwelilhenebigoluk Allah ʼgonu moʼgulesimu, at en elit oluk moʼgulesi aʼgeat de, 32hat hede nebam heʼberik poluk welegen aʼge ai erlak emano oluk e, hat hebaget an Allah yoʼgo arat pegimu ani o. Hebabut heberlorogun holuk e, harilak yema hat en enede ago weriso lomup o,” oluk moʼgulesi. 33Asogo moʼgulesimu, at Petrus en e, disogo moʼgulesi,
“Nue o! O aphwami eneʼgik herle wusogo onobogumu ʼgwelaphobogulat, hebe modok wathobogulat, takhobogwi holuk e, an neminat watnonobuagoluk welegi o,” oluk moʼgulesi aʼgeat de, 34at Yesus en e,
“Petrus! Yogodak ayam iak owan u erlak oruakhwe, hat en,
Yesus ai an neperka, oluk, heʼgik henaganam elabe togun ani o,” oluk moʼgulesi.
“ʼGarok emin, di aʼge yu aʼge emin, woluk lu o,” oluk moʼgulentesi wene
35At Yesus en asogo moʼgulesirik e, at Petrus arilak pema akhit enemin laʼbulogo disogo moʼgulentesi,
“An en, his honouang owi emin, honosumaʼge emin, henesepatu emin, woluk lagup o, oluk perakhenebegi ano en e, his di aʼge yu aʼge erlak aʼge welegep a?” oluk moʼgulentesimu, is en e, disogo moʼgulegisa,
“Erlak o. Elirat welege o,” oluk moʼgulegisema, 36at Yesus en e, disogo moʼgulentesi,
“Aʼgeat de, yogodak nak e, honouang owi emin, honosumaʼge emin, oruak holuk e, horloluk lu o. Ye, his mesik ʼgarok ap waronobogwi aʼge ano erlak holuk e, hosum oʼborl oʼgwe ʼbuktak aʼge ano pam oʼgo ʼbalogo uang waguntik e, ʼgarok oʼgo ʼbalip o. 37An taknobouwa aʼge paget pelal wokho pogulat e,
At ai aphwami enebabut wiak togwi aʼge enemin hegitsogo tagenebegesa o, (Yesaya 53:12)
oluk egesa ai, an nebam hegit om aʼgeat yogodak hegit lau wago ai en moʼgulhentegis o,” oluk moʼgulentesimu, 38is en e, disogo moʼgulegisa,
“Nue. Nis en aʼge ʼgarok ap waronobogwi aʼge ano ʼbiren oruak yema hemen?” oluk onukhegesema, at Yesus en e,
“Ai elit oruak o,” oluk moʼgulentesi.
At Yesus dom Zaitun duk pam ligagarik Allah yoʼgo pesi wene
(Matius 26:36-46; Markus 14:32-42)
39Asogo moʼgulontoluk enemin lebegesarik e, o kota ano ukpoluk e, at Yesus dom Zaitun duk pam ligaga laga ano ʼgelaʼgeat ligagama, osi iak wogu legesa aʼge ebano eʼberlik legesa. 40Arat legesarik e, disogo moʼgulentesi,
“Wiak tuagoluk honogola ʼgagalil wemano oluk e, seʼban ogu lemis o,” oluk moʼgulontoluk e, 41at ebe ematekma ʼgeksogo helep hwikhai loma ʼgelaʼge horoksogo lagarik e, odogorlu pam hurotluk seʼban eselat e, 42disogo egei,
“Naik o! Hat en op epegen holuk e, an wiagapnobua aʼge ai delnebip o,” oluk u ʼgelaʼge,
“Ik neʼgak aʼge nouwagoluk woknema ai, hat en an nebam aʼge wokhomup o. Aʼge re, an nogola epasu legi aʼge ai erlak o. We, hat hede epegen aʼge aiat taknobomup o,” oluk moʼgulesi. [ 43Moʼgulesimu, is malaikat Allah en yoʼgo peragenebasu aʼge mesik ʼbogorl pam en ʼbu agarik e, ede ago weregei. 44Ede ago weregei aʼge re, ede modok wiak welat pobuk seʼban eʼginsogo osokhwe, erlegisak mep ʼgelaʼge dep hasulat e, ʼgwiangma dingdung-dangdungsogo ʼbegei.] 45Seʼban oluk inagarik, osi ebano eneʼbek waga ʼgal e, is ebano onogola modok wiak agama no oluk e, nogogumu entau waga. 46Entau wagarik e, disogo moʼgulentesi,
“His nopaget nogo ogu legep. Wiak tuagoluk henede ʼgagalu wemano oluk e, henebe inotluk seʼban ogu lemis o,” oluk moʼgulentesi.
At Yesus ebe tenak pegesa wene
(Matius 26:47-56; Markus 14:43-50; Yohanes 18:3-11)
47At Yesus en asogo osokhwe erianoat, at osi enebe 12 ebano aʼge mesik onuk Yudas ano, yoʼgo lagarik e, ap esanat wogonoboluk wagarik e, at naduk Yesus hau emde motok werigoluk, eʼbek waga. 48Wagama, at Yesus en e, disogo moʼgulesi,
“Yudas! An abat daklau wegi ano, aphwami en pobirak noboluk noruagoluk, hat en hau hemde motok wusogo nebe eneʼgigem paigoluk wegen a?” oluk moʼgulesimu, 49is ap Yesus emin welegesa aʼge ebano en e, is wegesa aʼge ebano enil ontoluk e, onogola en e,
Disogo tua hegi, epegesarik, Yesus disogo moʼgulegisa,
“Nue! Nis ʼgarok pam waronobu a? Erlak a,” oluk, hin wogulat erianoat, 50Yesus ot mesik en ap Allah eiye aʼge onue ʼgain eragam aʼge mesik weriogoluk lelhesi ʼgal e, esaʼgo ʼbekhit akhit nak sebasogo ʼbo pesi. 51Asogo sebasogo ʼbo pesi aʼgeat de, at Yesus en e,
“ʼBuk ʼbuk! Arat o,” oluk, ap ano esaʼgo eʼgik en tenak poluk e, pobuk dopnorak pesi. 52Asogo dopnorak pesirik e, at Yesus en, is ap Allah eiye onuelak ʼgaindek emin, Allah owi werik tenak welegesa aʼge emin, enarluedek emin, at ebe tenakpouwogoluk wegesa aʼge ʼberlegat disogo moʼgulentesi,
“Ap yogorlia wasumu tenak pou wagai ʼgelaʼge, his asogoat tennobuogoluk ʼgarok emin, ʼgoʼbu emin, woluk wegep yema re! 53Nin erlige nan erlige Allah owi werikmu his an henemin oruakhwe eriano tennobu erlakma en welegeptik en de, yogodak ya nak e, o hiktak eiye welago aʼge ano anni agama re, his en tennobu hegirat wegep ai o,” oluk moʼgulentesi.
At Petrus en, “Yesus ai an neperlak o,” oluk elabe tegei wene
(Matius 26:57-58, 69-75; Markus 14:53-54, 66-72; Yohanes 18:12-18, 25-27)
54At Yesus en asogo moʼgulentesimu, is en at ebe tenak pegesarik e, ap Allah eiye aʼge onue ʼgain aʼge ano owi pam woluk lagaihwe, at Petrus ano pobuk eneʼberlik daduk laga. 55Asogo lasu lagarik, ap ʼgain ano owi dipmu aphwami en odouk muʼgelak poluk sogwei oroʼgogulat hweriogo oruakma re, eneʼgerlakma huraga. 56Asogo hweriogo oruakma odouk magale eʼgerlak oʼgwe, hwele mesik eneragam aʼge en Petrus ebe il yethesirik e, il ebam puttak welat e, disogo moʼgulentesi,
“Ap yu ogo re, Yesus emin welegesa aʼgeat o,” oluk moʼgulentesimu, 57at Petrus en elabe tagalat e, disogo moʼgulesi,
“Erlak o. Hwele yu! Ap ai ebe an neperlak o,” oluk moʼgulesi. 58Asogo moʼgulesirik wolom erlakma enat, ap akhen en Petrus ano il holuk e, disogo moʼgulesi,
“Hat yu re, is aʼgeat epegi,” oluk moʼgulesi ʼgal e, at en e,
“Nue. An erlak o,” oluk moʼgulesi. 59Asogo moʼgulesimu pobuk satu jam ʼgelaʼge welegesarik e, ap mesik en iak ningsogoat is aphwami ebano disogo moʼgulentesi,
“Ap yu ebe Galilea aʼgeatma, demat Yesus emin nese laga aʼgeat o,” oluk moʼgulentesimu, 60at Petrus en e,
“Nue! Hat egen ai, an neperlak o,” oluk osokhwe erianoat ayam iak egei. 61Egeimu re, Yesus orogole edenogo Petrus il yethesi ʼgal e, at Petrus ogola en e, disogo epesi,
“Eige! At Yesus en an moʼgulneselat e,
O yogodak sue ayam iak owan u erlak oruakhwe, hat en e,
Yesus neperlak o, oluk, heʼgik henaganam elabe togun ani o, oluk moʼgulnesi ano ebe arat elabe tegismu hegi o,” oluk ede eberegei. 62Ede ebetholuk e, odipmu lebagarik e, nge modok aʼbik ede duk-duksogo tegei.
At Yesus ʼgoʼbu worugulat, eniak esegen yagugulat, tigisa wene
(Matius 26:67-68; Markus 14:65)
63At Petrus asogo nge tagokhwe, is ap Yesus ebe tenak welegesa aʼge ebano en eniak esegen yagugulat, ʼgoʼbu worugulat, tigisa. Asogo tugulat, 64il sebelak poluk e,
“Sa en wathebegei no. Moʼgulnentemen da!” oluk moʼgulogulat, 65eniak esegen di-damuksogo yagugulat, eʼgerli worugulat, togu legesa.
At Yesus emdema wegesa wene
(Matius 26:59-66; Markus 14:55-64; Yohanes 18:19-24)
66Asogo moʼgulogulat oruakma, o dakha egeimu re, ap Yahudi aʼge enarluedek ebano emin, Allah eiye aʼge onuelak ʼgaindek ebano emin, Allah iak pelal wogo eiye aʼge emin, odoktigisarik, wene Allah iak paget edip ʼbeloʼgogumu ebano oruakma, Yesus woluk eneʼbek ʼgwigisema re, 67is en disogo moʼgulegisa,
“Allah en Kristus yoʼgo poluk perakpou weik egei ano harat a? Hat holuk e, moʼgulnentemen da,” oluk moʼgulegisema, at Yesus en e, disogo moʼgulentesi,
“An en moʼgulhentasukhwe re, demat oluk henede eberogup no? 68An en hin wokhentasuam e, oʼgo moʼgulnorogup no? Erlak o,” oluk moʼgulentesirik, mesik disogo moʼgulentesi,
69“Hwerli yogodak ya en e, pobuk an abat daklau wegi aʼge naik Allah anni welat di aʼge yu aʼge tu aʼge nakma re, eʼgik ʼbekhit akhit ʼgainat weleik o,” oluk moʼgulentesimu, 70is ʼberlek en e, disogo moʼgulegisa,
“Holuk e, hat Allah omlogo no?” oluk moʼgulegisema, at en e,
“His honuʼgwarek en egep aiat o,” oluk moʼgulentesimu, 71is en e, disogo moʼgulegisa,
“Aphwami en at wiak tisokhwe enil hegesa aʼge en wene seʼgeksogo uagoluk ai re, nopaget yerentarok wolomul no. Wene at uʼgwarek en egei aʼge arat nenesaʼgo hwelige ʼgelaʼge yema re!” oluk egesa.
Currently Selected:
Lukas 22: WUL
Highlight
Share
Copy
Want to have your highlights saved across all your devices? Sign up or sign in
