Lukas 19
19
Ap Zakheus en tegei wene
1Asogo toluk e, at Yesus o Yeriko ʼgwi lagarik, o seli eba ukpoluk ʼbekhirat lasumu re, 2ap mesik onuk Zakheus, uang pemerintah paget ʼgonu oluk odoktogu legesa aʼge onue ʼgain welat aʼge aʼbigat welaga. 3Oruakma,
“Yesus ai ebe noʼgorak logwe,” oluk il yethaigoluk tegei aʼge re, aphwami enebe modok aʼbik en e, at ebe horokma no oluk e, noʼgosogo yetho ʼgelaʼge aga. 4Asogo agama, at ogola en e,
“Yesus ebela ʼgo yu wagoma nil yethele,” oluk, is aphwami ebano pobugabonoboluk e, at ebe naduk pungtak lagarik e, e pam ligaga. 5Ligagarik oruakma, at Yesus eriano lagarik il likholuk e, onuk ʼbaksogo disogo moʼgulesi,
“Zakheus, yogodak hat howi pam neʼbirek nogo i lul en e, perlene ʼbi suk o,” oluk moʼgulesimu, 6at Zakheus ano perleneat ʼbu agarik e, Yesus ebe hau wusogo wesirik e, ogola agai hil hil, at owi pam eʼbirek legesa. 7Eʼbirek lagaihwe, is aphwami logon ʼberlegat en enil yerontoluk, ʼbousogo eniak ngorluk-seʼgip onobok ʼbalugulat e, disogo egesa,
“Yesus e, ap wiak tago aʼge ano owi pam eʼbirek nogo i louwogoluk lagai ai nonogorlok e!” oluk egesa aʼgeat de, 8at Zakheus ano inagarik e, at nonue ʼgain Onuk Logo aʼge Yesus ano disogo moʼgulesi,
“Nue! An naʼge di aʼge yu aʼge ʼberlegat ʼburl heisogo meʼgitholuk e, is aphwami pema enaʼge erlak welat enerlagaik aʼge eba soʼburentaik o. Ye, an en aphwami niak esei lalenebegis aʼge holuk e, oʼgo neʼgik uganam pobuk ebam loukhegeik wogentaik o,” oluk moʼgulesi. 9Asogo moʼgulesimu at Yesus en e,
“Hat hebe Abraham en dogoʼgwe aʼge holuk e, yogodak yayat hat heiyagai eneminat Allah en delhenebegei yo! 10Delhenebegei aʼge ai, an abat daklau wegi ano, is aphwami nal agai aʼge ai herasogo delenebigoluk wegi o,” oluk moʼgulentesi.
Uang emas eʼgin aʼge ebam elitsogo moʼgulentesi wene
(Matius 25:14-30)
11At Yesus en asogo moʼgulentesirik e, enesaʼgo hwelak oruakhweat, o Yerusalem arat horok lai legesarik en e, is aphwami ebano onogola en disogo epegesa,
“Allah en eragam nonobouwa ai yogodak yayat nenebasukhwe nenil hul ani,” oluk onogola epegesa ai en e, at Yesus en wene mesik ebam elitsogo disogo moʼgulentesi,
12“Ap ʼgain en dogoʼgwe aʼge mesik ogola en e,
O ap ʼgaindek ononuk logo aʼge edigonobogumu eba lasuam an ʼgain nonuk logo aʼge ediknobouema togolik weik, oluk epesi. 13Asogo epesirik welat e, eragam aʼge enebe 10 worlentesimu wegesema re, uang emas eʼgin aʼge ebe 10 enebe loʼbok mesik mesik soʼbusogo wogentasulat e, disogo moʼgulentesi,
An owan wom erlakhwe, nouang ya pam seik-ʼbeiksogo saborogulat togu lomup, oluk moʼgulontoluk e, at ano laga. 14Lasukhwe re, is ue ari ebano ap ai enebit en e, wene ʼbaligisarik,
At ap ai nonue ʼgain onuk logo aʼge wolom e, nenebit o, oluk moʼgulentai lu, oluk, yoʼgo eʼberlik peragenebegesa. 15Asogo wene wusogo peragenebegesa aʼgeat de, ap ano ʼgain onuk logo aʼge welemagoluk edikpegesema owi akhit togolik waga. Wagarik e,
Uang an en aʼge ebano is en ʼgesogo sabusogo seik-ʼbeiktak pegesa, oluk, aluk emagoluk e, eragam aʼge ebano worlentesi. 16Worlentesimu, at ap mesik naduk wagarik e, disogo moʼgulesi,
Nue. An uang emas eʼgin aʼge mesigat nak woknigen ano pam, an en sabusogo re, pobuk 10 pam loʼboktak poluk sabusogo hebegimu yema o, oluk moʼgulesimu, 17at ue ano en e,
Not wa! Hat hebabut op taga legenma hegi o. Weiyat aʼgeat de, hebabut heʼbisogo taga legenma re, yogodak e, o kota 10 yema pobuk hat eiye welat tenentarok wolorogun en edikhebegi o, oluk moʼgulesi. 18Asogo moʼgulesimu pobuk at ap mesik eʼberlik wagarik e, disogo moʼgulesi,
Nue. An uang emas eʼgin aʼge mesigat woknigen ano pam, an sabusogo re, pobuk huaben loʼboktak poluk sabusogo hebegimu yema i o, oluk moʼgulesimu, 19at ue ano en e,
Not wa! Holuk e, o kota huaben yema pobuk hat eiye welat tenentarok wolorogun en edikhebegi o, oluk moʼgulesi. 20-21Is asogo moʼgulentesirikmu en, pobuk at ap mesik wagarik e, disogo moʼgulesi,
Nue. Hat hebabut modok ningtak welat, hat en aʼge erlakmayat de, is muon en aʼge hwerlasulat, ye, hat en owi pelu pukmu en de, we, is en owi pelogwi aʼgeat de, eʼgen heʼgik abusak ʼbaliselat, taga legen ano re, hebabut ʼbalegistik, nogorlok en e, uang emas eʼgin aʼge mesigat woknigen ano an sum nerlegisak horago aʼge pam hetsogo tenak welegirik e, wokhosu wegi yu o, oluk moʼgulesi. 22Asogo moʼgulesimu, at ap ʼgain ano en e,
Not. Hat hebabut modok wiagat taga legen o. Hat hiak egen ai pamat wene hebam poluk wiagaphebaik o. An nebabut ningtak welat e, an en po erlak aʼge hwerlasulat, owi an en yoru erlak aʼgeat de, eʼgen ʼbaliselat, tisoma, nebabut hat haluk holuk e, 23an togolik weiktik nouang ebe aʼge emin, ebam loʼboksogo mangno tua aʼge emin, an hwerlaumagoluk e, is aphwami muon uang tenak welat, sabusogo logon emin ebam louksogo pogwi aʼge ebano wogonto aʼgeat de, nopaget en hat wogonto erlak welegen, oluk moʼgulesi. 24Asogo moʼgulesirik e, is aphwami eragam edik welegesa aʼge disogo moʼgulentesi,
Uang emas mesigat eʼgin aʼge ap ai tenakho oruak ai wik-wok e, ap mesik uang 10 sabusogo pesi aʼge ai wogomis o, oluk moʼgulesimu, 25is aphwami ebano en e, disogo moʼgulegisa,
Nue! At ap yu ouang emas eʼgin aʼge 10 oruak yema re, oluk moʼgulegisema, 26at ap ʼgain ano en e, disogo moʼgulentesi,
Is aphwami enaʼge oruak aʼge ai, enebe loʼbok pobuk logon emin ebam louksogo wogontouwa o. Ye, is pema enaʼge erlak aʼge ai, wei nak tenakho oruak aʼge ai re, eneʼgikmu en delogo horlouwa ai en e, at ap aiat wogorogup oluk moʼgulhentegis o. 27Asogo moʼgulentesirik e,
Is ap an nemin hwerlirak aʼge ʼgelaʼge taknoboluk ogulat e,
At ai nis nonue ʼgain onuk logo aʼge wolom e, nenebit o, oluk egesa aʼge ai enebe wogonoboluk wotluk e, an nilem yayat warenebip o, oluk moʼgulentesi,” oluk e, at Yesus en aphwami ebano moʼgulentesi.
At Yesus erliktugukhwe o Yerusalem ʼgwegei wene
(Matius 21:1-11; Markus 11:1-11; Yohanes 12:12-19)
28Wene arat asogo moʼgulontoluk e, aphwami ebano owan oruakhwe, at Yesus ebe naduk, o Yerusalem ligaga. 29Ligaga lagarik e, dom Zaitun edipmu o seli mesik onuk Betfage, mesik onuk Betania, eba hegit lai lagarik e, at osi iak wogu legesa aʼge logon enebe ʼbiren wene wusogo naduk peragenebasulat e, 30disogo moʼgulentesi,
“O seli honlogotma etle lu o. Ye, eba ʼgogup ʼgal e, wam keledai emalik aʼge owan aphwami oʼborl pam huragaiam wogonoboluk lasu erlak aʼge ʼgoʼbi erlelik oruakma henil hagup ani o. Ye, arat henil haguptik e, ʼgoʼbi erlelik aʼge ai hebilogo woluk manup o. 31Asogo ʼgoʼbi hebelogumu, is aphwami eba aʼge pema en,
Keledai ʼgoʼbi hebelogu legep ai nopaget, oluk hin wogwi holuk e, disogo moʼgulontomup,
Nis nonue ʼgain Onuk Logo aʼge en keledai yu aʼge erlak en e, woluk lul en ʼgoʼbi hebelogu lege, oluk moʼgulontomup o,” oluk e, wene wusogo peragenebesi. 32Asogo peragenebesimu, is ebano legesa ʼgal e, at en egei hegitsogoat oruakma hegesa. 33Hegesarik e, keledai ano ʼgoʼbi hebelogumu, is ap onuam eiye aʼge en e,
“Wam keledai ai nopaget ʼgoʼbi hebelogu legep,” oluk moʼgulentigisema 34is en e,
“Nis nonue ʼgain Onuk Logo aʼge ano wam keledai yu aʼge erlak en e, woluk louwogoluk ʼgoʼbi hebelogu lege o,” oluk moʼgulontoluk e, 35wam keledai ano woluk Yesus eʼbek wegesa. Wegesarik e, onosum oʼborl oʼgwe ʼbuktak aʼge noʼgorlogo wam ano oʼborl pam delak poluk e, Yesus ebe wam ano oʼborl pam hweriogo pegesa. 36Asogo hweriogo pegesema, wam oʼborl pam huragarik lasumu re, is ebano onosum ʼbuktak aʼge noʼgorlogo re, ebelaʼgwe demil legesa. 37Demil legesarik e, o Yerusalem horok lai legesarik, ebela dom Zaitun pam en ʼbugumu eba ʼbuogoluk e, at osi eʼberlik noʼgu legesa aʼge enebe esan logolak ebano, at Yesus tu puk aʼge elalin taga laga aʼge ebano enil hogu legesarikmu no oluk e, onogola enagai welat eniak loksogoat amitmit supsogo Allah erliktil ʼbi legesa. 38Amitmit supsogo ʼbugulat e, disogo egesa,
“Allah en nonue ʼgain Onuk Logo aʼge perakhobou wagama wegen yu, at enat obaphobuak o! (Mazmur 118:26)
Is ʼbogorl pam welagai aʼge eba enede haʼbuksogo welemak o.
Ye, Allah ʼbogorl pam logo welago aʼge erliktogu lomok o,”
oluk asogo il il ʼbigisa.
39Asogo il ʼbugumu re, is ap Farisi aʼge pema aphwami esan ebano eneʼgerlakma ʼbugulat e, Yesus disogo moʼgulegisa,
“Nue! Hosi eniak erlak emagoluk enesaʼgo worogunmu re,” oluk egesema, 40at Yesus en disogo moʼgulentesi,
“An niak demat moʼgulhentaik. Is aphwami yu eniak u pukmu en mo elipmu re, helep yema eniak amitmit sup elibat o,” oluk moʼgulentesi.
At Yesus en aphwami o Yerusalem aʼge enebaget nge tegei wene
41At Yesus en asogo moʼgulontoluk horoksogo ʼbigisarik e, at Yesus il o Yerusalem kota ano yetholuk e, ebaget nge tegei. 42Ebaget nge tagalat e, disogo egei,
“His aphwami o Yerusalem aʼge ai, honogola en,
Nis opsogo labulik wolomul en disogo tuok o, oluk yogodak yayat henede eberu aʼgeat de, eberak erlak welegep ai, eige! Nede o! Aʼge re, yogodak wene ai his henilmu hisogo oruak en pobirak erlak welegep o. 43-44Allah en obaphenebaigoluk heneʼbek waga aʼgeat de, his pobirak erlak welegep ai en, his pobuk honowi pam en hweiye lebemano oluk e, heneselei aʼge en leget waliʼgogo werak honoboluk e, pema pema en waleʼgik poluk, hop-hop ʼguma ani o. ʼGumarik e, honowi helep aʼge moruk-moruk werik aʼge eba mesik ebalema werik ukpo pukmu en moluktugulat henebe modok perlengsogo henemalik enemin ʼberlek lologunsogo wathonobua o,” oluk enebaget nge tegei.
At Yesus en Allah owi werikmu ʼgoluk degelegei wene
(Matius 21:12-17; Markus 11:15-19; Yohanes 2:13-22)
45Asogo moʼgulentesirik e, Allah owi werikmu ʼgwegeitik, is aphwami oʼgo ʼbalugu legesa aʼge mukho-makho lebigenebasulat e, disogo moʼgulentesi,
46“Allah en e,
An nowi werik yu re, o seʼban ogu lommayat o, (Yesaya 56:7)
oluk, pelal wogo oruak aʼgeat de, his en e, is ap aphwami logon enaʼge yogorlia delogo horlogwi aʼge onowi ʼgelaʼge wusogo onobogu legep yema re!” oluk wene yagentesi. 47Asogo moʼgulontoluk e, at Yesus en nin erlige nan erlige Allah owi werikmu wene moʼgulentasu modok welaga. Asogo moʼgulentasumu re, is ap Allah eiye aʼge onuelak ʼgaindek emin, Allah iak pelal wogo eiye aʼge emin, aphwami Yahudi aʼge ʼgaindek ononuk oruak aʼge enemin en,
“At Yesus ebe noʼgosogo worul,” oluk obok ʼbalugu legesa. 48Asogo obok ʼbalugu legesa aʼgeat de, is aphwami lok oʼgwe re, at Yesus iak osokhwe enesaʼgo hwelak modok welegesa ai en e, at ebe noʼgosogo woru ʼgelaʼgeat aga.
Currently Selected:
Lukas 19: WUL
Highlight
Share
Copy
Want to have your highlights saved across all your devices? Sign up or sign in
