Yohanes 17

At Yesus en osi enebaget seʼban egei wene

1-2At Yesus en wene asogo moʼgulentesirik e, at aʼgul lekho il ʼbogorl akhit likhesirik e, disogo egei,

“Naik o. An taknobouwa ano arat horok lau waga o. Hat en pageat aphwami pema woknigen aʼge enebe loʼbok an homlogo en tagonoboma enelaluk modok welemagoluk aphwami ʼberlegat an neʼgik pam pegen ai en e, hat hebe logo hebaik en, an homlogo logo nebemen o, naik. 3Is aphwami en e,

Allah erliktu aʼge ebe emetik-ematek nak welago yo, oluk, hebe enaluk agalat, ye, an Yesus Kristus peraknobou egenma wegi aʼge yu nebe enaluk agalat, togwi ai re, enelaluk modok welagai aʼge edip aiat o. 4An ʼgwiangma di aʼge yu aʼge tuagoluk ediknebegen ano yabuk ebe arat taga legirik ologun ʼbalegis ano pam en logo hebegi o. 5Naik. ʼGwiang owan walho erlak welat, neʼbiregat logo welege ano ʼgelaʼge yogodak hat oruakma eba logo nebemen o. 6Aphwami ʼgwiangma aʼge hat en pageat woknigen aʼge ebano ʼberlegat, hat hebe enaluk emagoluk moʼgulentegis o. Is enebe hat en aʼgeat de, an woknigenma no oluk e, hat hiak hologo togwi o. 7Yogodak di aʼge yu aʼge ʼberlek hat en woknigen aʼge ai, is en e,

Allah enat wogesimu o, oluk arat pobi tigisa o. 8Wene hat en moʼgulnigen aʼge ebano, is arat moʼgulentegismu, arat wegesarik, an nebaget ogulat e,

Allah en perakpou wagama re, at oruakma en demat waga o, oluk enaluk agarik e, nebe pobirak nebegesa o.

9An en seʼban ese legi yu re, is aphwami ʼgwiangma aʼge enebaget ese legi puk. At e, is hat heiyagai aʼge an woknigen ai en e, is enebagerat seʼban ese legi o. 10An en aʼge ʼberlegat e, hat en aʼgeat o. Ye, hat en aʼge ʼberlegat e, an en aʼgeat o. Is togwi ai pam, an logo nobogwi o. 11Yogodak an e, ʼgwiangma yema aregen weleik erlak o. We, hat hiau weik aʼgeat de, is nak e, ʼgwiangma yema welema o. Hat wiak tu erlakma en degelak modok welegen aʼge, naik o. Nis neʼbirek nenebe mesigat welege ai ʼgelaʼge, is asogoat enebe mesigat welemagoluk, hat honuk logo aʼge an tualnebigen ai pam, is tenentarok welemen o, naik. 12An is enemin yema welat e, is enebe nalemano oluk, hat honuk aʼge an tualnebigen ano pam, tene tarok oruakma, is logon nalom erlak o. We,

At ai nalema, oluk, hat hiak egen aʼge pelal wokho pegesa aʼge ano demat emagoluk, nalom ʼgelaʼgeat nalaga o. 13An nebe hat hiau weik aʼgeat de, yogodak ʼgwiangma ya welat, an nogola nagai hasu legi ai ʼgelaʼge, is onogola enagai modok houwagoluk, wene ʼberlek ai moʼgulhegis o. 14Hat hiak ano is arat moʼgulentegis o. Ye, an nebe aphwami ʼgwiangma aʼge yema onot erlak ai ʼgelaʼge, is asogoat enebe aphwami ʼgwiangma aʼge onosi erlak ai en e, is aphwami ʼgwiangma aʼge en modok enebirabonobogwi o. 15Hat en, is aphwami ʼgwiangma aʼge eneʼgerlakma en is nak ʼgegilogo wogonobogun en ʼgonu moʼgulhese legi puk. We, at wiak aʼge ano en wiagabenebigoluk eneʼbek wagoam, hat en pegentarok wolorogun en oluk moʼgulhese legi o. 16An nebe is aphwami ʼgwiangma aʼge onot erlak ai ʼgelaʼge re, is asogoat is aphwami ʼgwiangma aʼge onosi puk. Erlagat o. 17Hat hiak ese legen ai re, dem weneat o. Ye, hat hiak dem wene ai pam, is enebe hat huʼgwarek pagerat welemagoluk pulogo enebemen o. 18Hat en an nebe aphwami ʼgwiangma aʼge eneʼbek peraknobou wegen ai ʼgelaʼge, an en is asogoat aphwami ʼgwiangma aʼge eneʼbek peragenebegi o. 19Is enebe hat huʼgwarek hebaget dem wene pam polik welemagoluk e, an is enebaget nebe hat hebaget pegirik polik welegi o.

20Naik. Is ai enematek nak enebaget seʼban ese legi puk. Erlak o. Is logon mu aʼge, is en wene moʼgulentai louwa ano pam enede an nebam heʼberik pouwa aʼge eneminat enebaget seʼban ese legi o. 21Naik o. An en ʼgonu moʼgulhese legi yu re, disogo oluk. An en naik hat heʼbirek hwedik, ye, naik hat en an neʼbirek hwedik, welege ai ʼgelaʼge, is asogo enebe ʼberlek mesigat aʼge ʼgelaʼge welemagoluk ʼgonu moʼgulhese legi o. Asogo oruakma, is aphwami ʼgwiangma aʼge en ogulat e,

At e, aik enat perakpou waga ai demat, oluk pobi tuagoluk, is enebe nis nenemin hwedigat wolomok o. 22Nis nenebe mesigat welege ai ʼgelaʼge, is asogoat enebe mesigat welemagoluk, an nebe hat en logo nebegen ʼgelaʼge, an en is arat logo enebegi o. 23Is demat enebe mesigat aʼge welemagoluk, is en e, an nemin hwedik, ye, hat en an nemin hwedik wolomok o. Asogo wolomul holuk e, is aphwami ʼgwiangma aʼge en ogulat e,

At e, aik en perakpou wagarik ebe ede hwedik welago ai ʼgelaʼge, is enebe at wogesi aʼge ede hwedik welago yo, oluk enaluk emarik pobi tua o. 24Naik Allah o. Hat en ʼgwiang owan walho erlak welat, an nebe hede hwedik welegen ai en e, erliknobogu lemagoluk logo nebegen ano, is hat en pageat woknigen aʼge ebano enil niouwagoluk, o an weleikmu eba, is eneminat wolom nagai o. 25Allah hegitsogo nak taga legen aʼge, naik o. Is aphwami ʼgwiangma aʼge hat hebe eneperlak aʼgeat de, an nak e, hat naluk o. Ye, is hat en woknigen aʼge nak e,

At en perakpou waga oluk, enalugat o. 26Naik, hat en an hedeapnebegen ano ʼgelaʼge, is-is asogoat nede-hedesogo welat, an nebe is enemin hwedik wolomogoluk, hat honuk il il howene moʼgulentasu legirik logon eminsogo moʼgulentasu leigat o,” oluk seʼban egei.

Currently Selected:

Yohanes 17: WUL

Highlight

Copy