Peragenebesi 11
11
At Petrus en Kornelius ik olomu ʼbelabegei aʼge ʼbeliʼgogo aphwami Yerusalem aʼge moʼgulentai laga wene
1Is aphwami pema en e,
“Is aphwami oʼborl oʼgwe aʼge Allah iak wegesa o,” oluk egesema, is ap Yesus en enebe yoʼgo peragenebesi aʼge ebano emin, Allah eiyagai o Yudea odoktugu legesa aʼge logon emin, enesaʼgo hweligisa. 2Asogo hweligisarik oruakma en, at Petrus ebe pobuk Yerusalem ʼbisoma re, is aphwami enagap eneʼgerlimu aʼge ʼbelak welat enede Yesus ebam heʼberik pegesa aʼge ebano en wene yagegisa. 3Wene yagogulat e,
“Hat hebe is aphwami enagap eneʼgerlimu aʼge ʼbelak erlak aʼge eneʼbek legentik e, soʼboru enemin mesikmu noʼgu legeptik wegen ai nopaget,” oluk wene yagegisa. 4Asogo wene yagegisema, at Petrus en wene edipmu enat ʼbeliʼgogo re, disogo moʼgulentesi,
5“An o Yope eba seʼban eselat e, nabi ʼgelaʼge pam disogo hegi. Sum kain lok aʼge oʼgut ugan egeik aʼge herle erlilogo ʼbogorl pam en neragam ʼbelakpou wagoma nabi ʼgelaʼge hasulat nil hegi o. 6Asogo hegirik, nil pusogo ʼgwelakhegi ʼgal e, sum ano ogola di wam yu wam, di ʼbaik yu ʼbaik, di inaʼge yu inaʼge, ʼgwiangma welago aʼge eba emin, ye, di tue yu tue ʼbogorl oʼgwe darak noso aʼge eba emin, yagarak oruakma nil hegi o. 7Asogo hasumu, at Allah en, sa iak ʼgelaʼgeat moʼgulneselat e,
Petrus. Hebe inoroguntik e, eba wusogo men o, oluk moʼgulnesi. 8Asogo moʼgulnesi aʼgeat de, an en e,
Erlak o. Nue. Asua aʼge emin, yuelak erlak aʼge emin, weiyat ogo an nemdema mesik ʼgwelabiso modok erlak o, oluk moʼgulegis. 9Asogo moʼgulegis aʼgeat de, at iak ano pobuk ʼbogorl pam en disogo moʼgulnesi,
Allah en,
Op aʼge, no nak o, oluk egei aʼge holuk, hat e,
Asua aʼge, naik erlak, oluk hede epagun o, oluk moʼgulnesi. 10Asogo eʼgik ʼbirenam moʼgulnesirik, henaganak aʼge moʼgulnotluk e, pobuk di aʼge yu aʼge ebano ʼberlegat ʼbogorl pam en togolik lisogo wesimu ʼgoboksogo ligaga o. 11Ai erlige, ap enebe henagan o Kaisarea en peragonobou wegesema, o an ap ʼbok ʼgelaʼge oruakma wegesa. 12Wegesema re, Allah Arogun en an disogo moʼgulnesi,
Enemin lo mia, oluk hogola wenemennei eberu erlakma enat, enemin lu o, oluk moʼgulnesi. Asogo moʼgulnesimu re, is Allah eiyagai o Yope aʼge enebe hebarligen wegesarik yema oruakma re, eneminat o Kaisarea lege. Legerik, nis ʼberlegat ap Kornelius owi pam ʼgwige. 13ʼGwige ʼgal, at Kornelius en e,
An ya oruakma en e, malaikat Allah en yoʼgo ʼbelagonobou wago aʼge ebano mesik o pam yema ʼbu agarik edik oruakma nil hegi o. At yema edik welat e, wene disogo moʼgulnesi,
Ap mesik onuk naduk Simon. Ye, pobuk Petrus, o Yope eba oruak aʼge ano o yema wemagoluk, ap mesik at yoʼgo perakpemen o. 14At en hat hebe emin, hue hosi emin, heiyagai emin, Allah en delhonobuagoluk, wene moʼgulhontouwa aʼge oruak o, oluk moʼgulnesi, oluk at Kornelius en egei. 15Egeimu re, an wene moʼgulentaigoluk edip owan oso oruakma, Allah Arogun naduk nis nenebam ʼbu aga ai ʼgelaʼge, is pobuk enebam ʼbu aga ai o. 16Enebam ʼbu agama re, nonue ʼgain Onuk Logo aʼge en wene disogo oluk egei aʼge nede eberegis,
Yohanes en ik olomu ʼbelabenebegei aʼgeat de, Allah en Arogun henebam ʼbelakpouma o, oluk egei ai en eberegis o. 17Nenede nonue ʼgain Onuk Logo aʼge Yesus Kristus ebam heʼberik pogwiam, Arogun is emin, nis emin, nenemin hegitsogoat woknentasu ai o. Holuk e, Allah enat asogo woknentasuam e, an en e,
Is wogentasu puk, oluk wene ʼbalu no? Mia o,” oluk moʼgulentesi.
18At Petrus en asogo moʼgulentesimu, is en wene yagogu legesa aʼge ano re, pobuk mo oluk disogo egesa,
“Holuk e, Allah ebabut op en, nis taknenebasu ʼgelaʼgeat, is aphwami oʼborl oʼgwe aʼge enebabut heberlagoam enelaluk modok welemagoluk elit tagonoboat hegi o,” oluk Allah erliktigisa.
Allah eiyagai o Antiokhia en togu legesa wene
19At Stefanus ano ebe werigisarik e, Allah eiyagai di obotut yu obotut tagonobogulat, muk-mak ontogu legesema, ʼbogulogo o propinsi Fenisia emin, ik eʼgenma Siprus emin, kota Antiokhia emin, wegesarik, wene is aphwami Yahudi aʼge nak moʼgulontogu legesa. 20Is asogo togu legesa aʼgeat de, is pema enemin ʼbogoligisa aʼge onowi re, ik eʼgenma Siprus aʼge emin, o Kirene aʼge emin, o kota Antiokhia wegesarik, wene op wene nonue ʼgain Onuk Logo aʼge Yesus tegei aʼge ano, is aphwami enaʼgul onuk Yunani aʼgeat moʼgulentigisa. 21Asogo moʼgulentasuam, nonue ʼgain Onuk Logo aʼge eminat welat, annisogo lerentasuam e, aphwami enebe esan en,
“Wene ai demat hegi,” oluk wik-wok e, enebabut heberlegesarik, onolukhwe at wogegisa. 22Asogo tigisema, is aphwami logon en e,
“Is Yesus iak wegesarik, enebabut heberligisa o,” oluk onobok ogu legesema re, is Allah eiyagai, o Yerusalem odoktugu legesa aʼge ebano enesaʼgo hweligisarik e, at Barnabas yoʼgo poluk, ebe o Antiokhia perakpou wegesa. 23-24At Barnabas ai, ebabut op welat, ede Yesus ebam heʼberik modok oruakma re, Allah Arogun ogola ʼbeterak welaga ai en e, perakpou wegesema, wagarik il ontoluk, ogola en e,
“Allah ebabut op en obabenebegeimu oruak hegi o,” oluk ogola agai hesi. Ogola agai holuk e,
“His ʼberlegat henede nonue ʼgain Onuk Logo aʼge ebam heʼberik poluk, at henemin modogat hwedik welemis o,” oluk enesaʼgo weregei. Enesaʼgo werise lagama, aphwami esan en, nonue gain Onuk Logo aʼge oruak oʼgwe laʼbuk otluk enebe aʼbigat logetil legesa.
25Asogo logetil lagaihwe re, at Barnabas pobuk at Saulus ebe horotil o Tarsus waga. 26Wagarik, ebe eʼbirek sarlok tigisarik e, woluk o Antiokhia laga. O eba lagarik, o mo ligom ʼbugom tagokhwe, 1 tahun welat e, Allah eiyagai emin odoktak poluk, aphwami aʼbigat wene moʼgulontogu legesa. Is aphwami Yesus iak wogwiam enaʼgul onuk Kristen ogwi ai re, naduk naduk o Antiokhia eba en tualigisa.
27Ai erlige re, is ap Allah iak moʼgulontogu legesa aʼge logon o Yerusalem en o Antiokhia orlu egesa. 28Is wegesa eria aʼge, ap mesik onuk Agabus ai, Allah Arogun en ogola ʼgagalegeimu, inagarik disogo moʼgulentesi,
“O di owi yu owi ʼberlegat soʼboru obuk hul o,” oluk moʼgulentesi. Moʼgulentesi ai, ebe ap onuk Klaudius ebe ʼgain onuk logo welat tenentarok oruakma aga ai o.
29Ai soʼboru ebe owan obuk om erlak oruakhwe re, is aphwami Yesus iak wegesa aʼge ebano en e,
“Holuk e, nis nenebe loʼbok uang neneʼgikmu aga aʼge hegitsogo nenarilak nonorokhwi o propinsi Yudea eba odoktogwi aʼge lerontouwogoluk odoksogo perakpouwok o,” oluk wene ʼbaligisarik uang odoktigisa. 30Asogo odoktigisarik e, Barnabas Saulus eʼbirek en, eneʼgikmu woluk loluk, is ap Allah eiyagai tenentarok welegesa aʼge ebano eneʼgikmu pei louwagoluk peragenebegesa ai o.
Currently Selected:
Peragenebesi 11: WUL
Highlight
Share
Copy
Want to have your highlights saved across all your devices? Sign up or sign in
