Tegagia 38

I Yehuda ka i Tamari

38:1-30

1I tempo atuu i Yehuda binta ira pepaekompono ka iperato a asa mia i kota Adulami neeno i Hira. 2I tu'ai i Yehuda mongkita asa ana beine to Kana'a, neeno mia atuu i Siua. I Yehuda kumombiao ka ipewowaliakono. 3Beine atuu mentia ka me'anaakono asa ana ntama anu ineeakono i Ere. 4Beine atuu mentia mbo'u, ka i'amba me'anaakono asa ana ntama ka ineeakono i Onani. 5Pohona mbo'u beine atuu me'anaako asa ana ntama ka ineeakono i Siela. I Yehuda tekonai kongko i Kesibi tempono nana'ote atuu pine'anaako.

6I Yehuda mo'alaakono i Ere, ana akano, asa mia beineno, neeno i Tamari. 7Sine i Ere, ana akano i Yehuda atuu lambaha a pongkita-Do i Ue, onaemo ka Dopepateo i Ue. 8Ka i'amba i Yehuda motaeakono i Onani, ”Pewowaliakonomo beineno pepaekompomu atuu, kombiaomo umeuo pepaekompomu ka wanguakonomo inuleno pepaekompomu atuu.” 9Sine ito'orio i Onani nine komba onae anu ta me'ueo inuleno te'ingka. Onaemo pu'uno, sompo ipewowaliakono beineno pepaekompono atuu, ipo'ineeo uwoi anuno tetadi-tadi, ka sipoweeakono inuleno pepaekompono. 10Sine hapa anu wineweuno atuu mosa'o a pongkita-Do i Ue, onaemo ka Dopepateo mbo'u i Ue. 11Ka i'amba i Yehuda motaeakono i Tamari, ponino, ”Po'iamo i rahado amamu gagi tuwu beine, ranta ka isompo tinuwuno anaku i Siela.” Hangano ipewowoloo, ”Ba mansa onae mate mbo'u kana orua ira pepaekompono atuu.” Ka i'amba i Tamari lumako ka ipo'ia i rahado amano.

12Ba opia nta'u lembuino anano i Siua, kombiano i Yehuda, mate. Tampulaomo mo'inombo i Yehuda lumako i Timina, a mia anu mpogonti wuludo bimbano, onae saru i Hira, sambe'eno, to Adulami atuu. 13Tempono pinauako i Tamari, ”Ponimu tama kontongaano te'aro i Timina ta mogonti wulu bimbano,” 14ilohuo sangka tuwu beineno, mompake tutuwi rupa ka mesoumbu. Ka i'amba lumako mentoro a mpewowa mewinso i Enaimi anu po'iangano a nsala lumako i Timina, hangano ikitao nine i Siela sompoomo tinuwuno, sine onae nahi pinokogagi beineno i Siela. 15I Yehuda kumitao i Tamari ka potaeno onae asa beine belesu, hangano itutuwio rupano. 16Ka i'amba i Yehuda mewolili umpedaakono beine anu a wiwi nsala atuu ka ipotae, ”Aiwamo, aku mewowaliakomu.” Hangano, onae nahi to'orio nine beine atuu ponino. Mesikenoomo beine atuu, ”Hapake anu komiu weeakune, tewala upewowaliakune?” 17Sangkino, ”Aku mo'oliwiakomu asa ana bembe inso a asa bawaa bembe bimbaku.” Motae beine atuu, ”Humbee, poolo ka upoweeakune pe'inia hawe ka upo'oliwiakune.” 18Motae i Yehuda, ”Hapa pe'inia anu asalakono kuweeakomu?” Sumangki beine atuu, ”pontondonimu, enu-enumu ka tuko anu a ngkaemu atuu.” Ka i'amba i Yehuda weeakono luwuno atuu ka ipewowaliakono. Beine atuu mentiaomo hangano onae. 19Beine atuu mewangu, ka i'amba lumako, ilohuo tutuwi rupano ka ipakeo mbo'u sangka tuwu beineno.

20Ka i'amba i Yehuda umoliwio ana bembe molalo sambe'eno, to Adulami, ka iwali umalao pe'inia inso a ngkaeno beine atuu, sine beine atuu nahi haweo mbo'u. 21Ka i'amba mesikeno a luwuno mia pehori-horino po'iangano beine atuu, ”Isuaomoke beine belesu a raha mpelahumoaa, anu hieno kongko a wiwi nsala i Enaimi atuu?” Mesangki ira, ”Nahina beine belesu i ndi'ai.” 22Onae mekule ndi Yehuda ka ipotae, ”Nahi kuhaweo. Luwuno mbo'u mia a mpo'ianga atuu mpotae: Nahina beine belesu i ndi'ai.” 23Motae i Yehuda, ”Po'ineeomo luwuno sangka atuu i'alao, ka si domentata kita mia. Mentee ntu'u, ana bembe atuu ku'oliwiomo, sine nahi uhaweo beine atuu.” 24Bara'ura otulu wula lembuino pinauakoomo i Yehuda, ”I Tamari, ponimu, mebelesuomo tendeano mentiaomo inso a mpebelesuno atuu.” Ka i'amba motae i Yehuda, ”Wawaomo beine atuu meluarako ka itinunu!” 25Kontongaano winawa meluarako, beine atuu montena mia lumako a mponino saru pe'oliwi, ”Inso a ntama anu me'ueo luwuno sangka andio kumentia.” Ipotae mbo'u, ”Paresaomo, isema me'ueo pontondoni saru enu-enu ka tuko andio?” 26Luwuno sangka atuu ito'orio i Yehuda, ka i'amba motae, ”Beine atuu menteeopo sekono ongkue, hangano lano nahi kuweeakono i Siela, anaku.” I Yehuda nahi pewowaliakono mbo'u beine atuu.

27I tempono onae ta me'ana, mengkaa indua anano a laro mpe'anakaano. 28Tempono itekonai me'ana, asa mia inso a nana'ote atuu lumuarakono asa mbali kaeno, ka i'amba sando mpe'ana uminio ka i'onggoakono bana motaha motu'a, ipotae, ”Ndiomo anu tese'elu meluarako.” 29Sine mansano nana'ote atuu wali padiio kaeno, meluarakoomo pepaekompono tama, ka ipotae sando atuu, ”Omue moroso ntu'u merumpa meluarako.” Onaemo pu'uno ineeakono i Peresi. 30Umarino atuu meluarakoomo pepaekompono tama anu kaeno me'onggoako bana motaha motu'a atuu, ka i'amba onae nineeako i Serahi.

Currently Selected:

Tegagia 38: XMZ

Highlight

Copy