Tegagia 17

Petindi gagi tondonino pedandia-Do Ue Ala saru i Burahima

17:1-27

1Tempono i Burama tinuwuno sio pulu ka osio nta'u, Ondae i Ue mepopokita ndi Burama ka Dopepau ndi onae, ”Ongkuemo Ue Ala Anu Tedoa Pabawa, tuwumo i aro-Ku saru nahina tataano. 2Aku moweweu pedandia i olo-Ku ka omue, ka Aku weweuko hadio ntu'u.” 3Ka i'amba menggolontuomo mesomba i Burama, ka Ondae i Ue mepau ndi onae, 4”Inso ndi Ongkue, ndiomo pedandia-Ku saru omue: Omue kogagi amado asa ntia langkai tongku. 5#Rom. 4:17Neemu komba i Burama mbo'u, tendeano i Burahima, hangano omue Kupakosikomo gagi amado asa ntia langkai tongku. 6Aku weweuko mo'ule hadio ntu'u ka weweuko gagi hadio tongku ka insomo ndi omue dome'inso luwuno mokole. 7#Luk. 1:55Aku pakosio pedandia i olo-Ku ka omue saru inulemu mapa'api-api inule gagi pedandia anu nahina tampulaano, ka Ongkue gagi Ue Alamu ka Ue Alado inulemu. 8#Tin. 7:5Ndi omue ka a inulemu Kupeweengakono luwuno wita Kana'a, wita anu upo'iangario andio gagi mia hawe, gagi tiamu ranta nahina tampulaano; ka Ongkue gagi Ue Alado.”

9Ondae Ue Ala mepau mbo'u ndi Burahima, ”Inso ndi omue, asalakono ka u'inio pedandia-Ku, omue ka inulemu mapa'api-api inule. 10#Tin. 7:8; Rom. 4:11Ndiomo pedandia-Ku anu asalakono ime'inio, pedandia i olo-Ku ka omiu saru inulemiu, sompo tama i olomiu asalakono tinindi. 11Kulino anumu asalakono sinesei, ka onae atuu ta gagi tondonino pedandia i olo-Ku ka omiu. 12Nana'ote anu tinuwuno oalu oleo i olomiu asalakono tinindi, sompo ana ntama, mapa'api-api inule, moiko ata anu hina i rahamiu maupo anu inoliako doi inso a asa mia inuleno mia hawe anu komba inulemiu. 13Ata anu hina i rahamu ka ata anu u'oliakono doi asalakono tinindi. Telalo a ngkoroimu pedandia-Ku gagi pedandia anu nahina tampulaano. 14Tama anu nahi tinindi, anu nahi sinesei kuli anuno, mia atuu asalakono pinokotampula inso i olono suku tongkuno. Ihapuomo pedandia-Ku.” 15Ka i'amba Ondae Ue Ala mepau ndi Burahima, ”Mongkona i Sarai, beinemu, si poboiakono mbo'u i Sarai. Kanandio-andio neeno i Sara. 16Aku rumonsoo, ka inso ndi onae mbo'u Aku moweakomu asa ana ntama. Aku rumonsoo, ranta ka igagi tepu'uado luwuno tongku, luwuno mokoledo tongku inso ndi onae.” 17I Burahima metuudu. Onae mengingisi ka ipotae i aroano, ”Mentee koake asa nana'ote pine'anaako anano mia anu tinuwuno asa etu nta'u ka mentee koake i Sara, anu tinuwuno sio pulu nta'umo atuu me'anaakono asa nana'ote?” 18Ka i'amba i Burahima mepau ndi Ondae Ue Ala, ”Ha, bakanaano i Sumaila tuwu i aro-Miu!” 19Sine Ondae Ue Ala mepau, ”Komba kanatuu, tendeano i Sara, beinemu atuu anu ta me'anaakomu asa ana ntama. Konumeeakono Isaki, ka Aku pakosio pedandia-Ku saru onae gagi pedandia anu nahina tampulaano tiado inuleno. 20#Teg. 25:12-16Mongkona i Sumaila, Kurongeomo po'emamu. Kuronsoo, weweuo ka ipo'ule ka tedoa hadio. Ndi onae pine'anaako hopulu ka orua mokole, ka Aku weweuo gagi tongku anu langkai. 21Sine pedandia-Ku, Aku pakosio saru Isaki, anamu anu ta pine'anaakono i Sara ta'u ramai a tempo kanandio.” 22Mansa-Do umari mepau ndi Burahima, Ondae Ue Ala mewuatako bintao i Burahima.

23Ka i'amba i Burahima pumpu ira i Sumaila, anano, ka luwuno ata anu hina i rahano, saru luwuno ata anu inoliako doi, onaemo sompo tama a laro rahano. Ka i'amba tumindi ira a oleo koa mbo'u atuu, kana anu pinau-Do Ue Ala ndi onae. 24Tinuwuno i Burahima sio pulu ka osio nta'u tempono ipetindi. 25Ka i Sumaila, anano, hopulu ka otolu nta'u tinuwuno tempono itinindi. 26A oleo anu mengkena i Burahima ka i Sumaila, anano, tinindi. 27Ka luwuno tama anu a laro rahano i Burahima, moiko ata anu hina i rahano maupo anu inoliako doi inso a mia inuledo mia mehawe, tinindi meronga saru onae.

Currently Selected:

Tegagia 17: XMZ

Highlight

Copy