Tegagia 15

Pedandia-Do Ue Ala saru i Burama

15:1-21

1Ka i'amba haweomo pau-Do i Ue ndi Burama a laro asa pongkita, ”Siimo doito, Burama, Ongkuemo kantamu; tambomu ta tedoa langkai.” 2Sumangki i Burama, ”Oo Ue Ala, hapake anu Komiu weeakune? Aku mate nahina anaku, ka anu ta me'ueo rahaku onaemo i Eliese, to Damasi atuu.” 3Motae mbo'u i Burama, ”Omiu nahi poweeakune inule, ranta asa ataku anu ta gagi me'ueo arataaku.” 4Sine, haweomo pau-Do i Ue ndi onae, kanandio, ”Mia atuu nahi ta gagi me'ueo arataamu, tendeano ana ngkoroimu, onaemo anu ta gagi me'ueo arataamu.” 5#Rom. 4:18; Ibr. 11:12Ka Do'amba i Ue wawao i Burama meluarako ka Dopepau, ”Pentombumo i langi ka doaomo anano wula, tewala upokodoao.” Mepau Ira mbo'u ndi onae, ”Kanatuumo te'ipua hadiono inulemu.” 6#Rom. 4:3; Gal. 3:6; Yak. 2:23I Burama me'ala-ala Ira i Ue ka Ondae i Ue mementeeo po'emano.

7Pau-Do mbo'u i Ue ndi onae, ”Ongkuemo Ue, anu wawako meluarako inso i Uri-Kasidimi ka Kuweeakomu wita andio gagi tiamu.” 8Motae i Burama, ”Oo Ue Ala, kana'umpeke aku tumo'orio, nine aku me'ueo?” 9Pau-Do i Ue ndi onae, ”Alaa-Kune asa sapi waino tinuwuno otolu nta'u, asa bembe waino tinuwuno otolu nta'u, asa bimba lakino tinuwuno otolu nta'u, asa manu-manu wurokou ka asa anano manu-manu marapati.” 10Luwuno atuu i'alao tia-Do i Ue ka ibansio gagi orua. Ka i'amba batu-batuno atuu inaao anu asa i horino anu susua. Sine, manu-manu atuu nahi bansio. 11Tempono dontetopa manu-manu mpongkaa bau i wawono bauno kondehora atuudo, isaari ira i Burama. 12Tamo sumoo oleo, i Burama tekoturi rodo. Ka i'amba wongi mpusu anu mongkokongiri metii tumutuwio. 13#Pel. 1:1-14; Tin. 7:6Pau-Do i Ue ndi Burama, ”To'oriomo ntu'u nine inulemu ira megagi mia mehawe i asa wita, anu komba tiado, ka nine ira mempine'ata ka binobarasai i larono pato etu nta'u. 14#Pel. 12:40-41; Tin. 7:7Sine tongku anu ta me'ata ira, Aku humukuo. Umarino atuu ira mpeluarako mpowawa arataa anu hadio. 15Omue kolumako manangai ndi ondae uempu'umu ka kokinaburu tempono moputeomo wuumu. 16Sine inule anu ko'opaa ira mpekule i ndi'ai, hangano mosa'ono poweweudo to Amori atuu napi inihii ranta kanandio-andio.”

17Tempono sumoo oleo ka ipetii wongi-wongi, tengkitaomo api anu me'ahu ka pansona melanga telalo i olono batu-batuno bau atuu. 18#Tin. 7:5I Oleo atuu Ondae i Ue mowutu pedandia saru i Burama ka mepau, ”A inulemumo Kuweeako ira wita andio, mompu'u inso a ngkoro Masiri hawe a ngkoro Eparata, korono anu langkai atuu, 19onaemo witado to Keni, to Kenasi, to Kadimoni, 20to Heti, to Perisi, to Repaimi, 21to Amori, to Kana'a, to Gerigasi ka to Yebusi.”

Currently Selected:

Tegagia 15: XMZ

Highlight

Copy