Matius 17
17
Kamalabiꞌangna Yesu nipupiita iaho mungku
(Mrk. 9:2-13, Luk. 9:28-36)
1Ùnung àlona nai anto, Yesu mambahaꞌi Petrus pang idua ung mantaladi:, dea‑mo Yakobus pang Yohanes, missaraka nai tau boso:, millanto mao i besa mungku ung iaho. 2Balikìna‑mi ti Yesu i heleꞌna‑i se. RupanNa makàsaꞌ mène: kùlaꞌ, pang pakeangNa mabusa: tungka. 3Mingèneꞌna‑mi ti Musa pang Elia massilàha:‑ing Yesu. 4Tipasuana‑mi ti Petrus mao i Yesu teꞌ, “Belo: tungka ti inneta se Tuang. Ìna Ta mio:, eloꞌna‑mo ki mampatèdeꞌ itàlu rasang-rasang, besa mampatu: Tuang, besa mampatu: Musa, pang besa mampatu: Elia.”
5Tarrang maang musua: ti Petrus, bùruꞌ ti kahung ung makàsaꞌ mallilong‑i se nasang, pang nai kahung to nisàding ti sua: moa teꞌ, “Dea‑mo te ti AnakàKu ung Ku pulemu. Ku masannang tungka mao i Dea. Pisàdìngi‑ko se!”
6Na sàdingna‑i se pasikolaNa ti sua: to, mariaꞌ‑i se tungka pang tipasùruku. 7Hampoꞌ mao ti Yesu mangerong‑i se teꞌ, “Tèdeꞌ‑ko se. Hau mariaꞌ se.” 8Dea tòna misaile:‑mi se, hari: hura: tau na ita‑i se sangadi Yesu mannang.
9Tòna sumòloꞌ‑mi se nai mungku to, Yesu mangapuꞌ mangking hang na patidolu‑i se moi mao i besa teng tau aka ti ung ladu na ita‑i se, i dang nipatuho:‑mi pole nai kamateangNa ti Anaka Tulino.
10Mingkutikìna‑mi se teꞌ, “Aka pùna musua: ti ung si manarangna i alukùta moa teꞌ Elia parallu bùruꞌ pole dolung nai Datu: Pipasalamaꞌ?”*#17:10 Hele i Mal. 4:5-6.
11Na sùmui Yesu teꞌ, “Ìnang parallu‑da bùruꞌ ti Elia mampatokana mintuꞌna. 12Pang Ku pusua: matung teꞌ, Ung mène: Elia bùruꞌ‑moda, hampoꞌ tau hang mangìsang‑i, pang na pukauꞌ‑mi se mao i dea mangulaꞌ pampuinahanna‑i se. Pang mènea‑da ho to ti Anaka Tulino na solàngi‑i se.”
13Na ìsangna‑mi se pasikolaNa moa teꞌ Yesu musua: mampatu: Yohanes Pumpudoiꞌ.
Yesu mampumatalete: besa anaka ung na katama dihata bulituku
(Mrk. 9:14-29, Luk. 9:37-43a)
14Tòna deaꞌ‑mo ti Yesu pang itàlu pasikolaNa mao i tau boso: to, ara besa muane bùruꞌ mukalimuntuꞌ i heleꞌna Yesu 15pang musua: moa teꞌ, “Tuang, pulemu‑ingnaꞌko ti anakàku muane. Kisai aniꞌang‑da, pang masussa tungka. Nene‑mo na bongka mao i api pang i uhai. 16Ku baha‑moko mao i pasikolaTa ung leta: inne:, hampoꞌ ha hela‑i na pumatalete:‑i se.”
17Musuana‑mi ti Yesu teꞌ, “E tau ung dang si mupatongang pang dang manuruꞌ, sangakaa kang masainna parallu Ku leta: i àlaꞌmu se? Sangakaa kang masainna parallu Ku sabaraꞌ matung? Baha‑ko se mai ti anaka to!” 18Na pasahunna‑mi Yesu ti dihata bulituku malai nai anaka to. Malainna‑mi ti dihata bulituku to, pang anaka to matalete: tempo dea ho teng to.
19Tòna missaraka‑mi se nai tau boso: ti Yesu, mingkutiki ti pasikolaNa moa teꞌ, “Aka pu dang ki hela‑ka mampasahu dihata bulituku to?”
20Na sùmui Yesu teꞌ, “Sàbaꞌ sangkìdoꞌ‑i ti kapatongangangmu se. Hampoꞌ matantu te ung Ku pusua: matung e teꞌ Na moi sibali‑i hatunna tanammong ti kapatongangangmu se, u helaa se musua: mao i mungku tee teꞌ, ‘Mingeliꞌ‑ko nai ante!’ Ìnang mingeliꞌnaa‑da. Hari:‑da moi besa pòteng ung dang helaa u pukauꞌ se. [ 21Hampoꞌ ung mène: to, hang hela‑ida nipasahu salalona i dang ni musumbayang‑i pang mapuasa.]”
Ung kapindua Yesu mampupiìsang kamaparriꞌangNa
(Mrk. 9:30-32, Luk. 9:43b-45)
22Ara sangàlo, tòna mukobu: ti pasikolana Yesu i Galilea, musua: ti Yesu mao i dei: se teꞌ, “Hang masaii: hura: ti Anaka Tulino nipehea mao i kakuasaangna tulino. 23Na pateii: se, hampoꞌ àlo ung kaitàlu nipatuhoa.” Masussanna‑mi tungka ti pinanahanna pasikolaNa.
Yesu mambayaꞌ simanna Tamming Kabussùngang
24Tòna bùruꞌ‑mi se i Kapernaung ti Yesu pang pasikolaNa, tau ung mangkobu: sima ung nipake i Tamming Kabussùngang mao i Petrus mingkutiki teꞌ, “Mambayaꞌ naꞌ simanna Tamming Kabussùngang ti tunggurummu se idua peraꞌ?”
25Na sùmui Petrus teꞌ, “Na bayaꞌ.”
Tòna mintama‑mo i tamming ti Petrus, na pidolùngi Yesu Na kutiki teꞌ, “Mangaka ti pantangaꞌmu Simon? Nai iaka na mangkobu: sima ti datu:-datu: i lino tee? Nai tanandapoꞌna? dea‑raka nai tau i sòhongna.”
26Na sùmui Petrus teꞌ, “Nai tau i sòhongna.”
Na konaina‑mi Yesu teꞌ, “Ìna mène: to, tanandapoꞌna hang parallu‑i mambayaꞌ. 27Hampoꞌ mangking hau na matòpeke‑i se ti tupassima, nao: muroang i tasiki. Pang urung ung parrara u ala, hungkai ti takona, u mangkoraia seeng ùpaꞌ peraꞌ. Ala ti seeng to, pang bayaꞌ mao i dei: se ti simanta.”
Currently Selected:
Matius 17: skx
Highlight
Share
Copy
Want to have your highlights saved across all your devices? Sign up or sign in
