Yohanes 17

Yesu musumbayang

1To na pusua:‑mo Yesu ti nasang to, tumonga: pàli i langiꞌ pang musumbayang moa teꞌ, “O Ama:, tempona‑mo. Ku palau mangking U mampupiita kamalabiꞌangna AnakàMu, mangking AnakàMu mampupiita kamalabiꞌangMu, 2sibali U manghengi‑ming kuasa Anaka mampatu: nasang tulino, mangking manghengi‑ing se katuhoang ung màle mao i nasang tau ung Nu hengi‑ming. 3Dea‑mo te ti katuhoang ung màle, teꞌ, Tulino mangìsang‑Ko, besa-besanna Puang ung tongang, pang mangìsang Yesu Datu: Pipasalamaꞌ ung Nu pantuyu. 4Ku pupiita‑mo ti kamalabiꞌangMu i lino tee, mangola: mampaladu kamaꞌang ung Nu patongang‑mingNaꞌ. 5O Ama:, i latenna Ku palau mangking U Mi paiaho i heleꞌMu sìnang kamalabiꞌang ung Ta ampu sola:, hang nitampa‑mi ti lino.

6Ku pupiìsang‑mo ti konaMu mao i tau te‑i se ung Nu hengi‑mingNaꞌ, ung dang dea hura: nai lino tee. Tau te‑i se dea‑mo ung Nu ampu, pang U Mi hengi‑ming. Tau te‑i se mantoroꞌi‑mo suaMu. 7I latenna na ìsang‑mi se moa teꞌ nasang angkanna ung Nu hengi‑mingNaꞌ ìnang nai Dio. 8Sàbaꞌ dea ti sua:-sua: ung Nu hengi‑mingNaꞌ, Ku padeaꞌ‑mo mao i dei: se, pang na tarima‑mi se. Pang na ìsang tungka‑mi se moa teꞌ Ku bùruꞌ nai Dio, pang na patongang‑mi se moa teꞌ Dio ti ung mampantuyu‑Kaꞌ.

9Ku pusumbayang‑ing se. Handei:‑da lino ti ung Ku pusumbayang‑ing, sangadinna tau te‑i se ung Nu hengi‑mingNaꞌ. Ku pusumbayang‑ing se sàbaꞌ dei: se U ampu. 10Nasang ung Ku ampu, U ampu‑do ho, pang nasang ung Nu ampu, Ku ampu‑ko ho. Pang Ku nipaiaho‑mo i àlaꞌ-àlaꞌna‑i se.

11I latenna Ku matùnga‑mo. Hang letaa‑Kaꞌko hura: i lino, hampoꞌ dei: se one: i lino. O Ama: ung malìsong, pumatotoꞌ‑i se i laling konaMu, dea‑mo kona: ung Nu hengi‑mingNaꞌ, mangking mamesa‑i se, mène: Dio pang Koi:. 12Tempona Ku sola:‑i se maang, Ku kuyaꞌ‑i se i laling konaMu, kona: ung Nu hengi‑mingNaꞌ. Ku kuyaꞌ‑mi se pang hari: moi besa ung hùling, sangadi to ung matantu‑mo ìnang hùling. Nasang tee nipukauꞌ mangking tikannaꞌ ti ung nironno: i Suraꞌna Puang.

13I latenna Ku matùnga‑mo. Hampoꞌ te Ku one: maang i lino, Ku pusua: nasang ti te mangking na korai:‑i se ti kahakaangKu pang mangking kahakaangKu to miluhali kànaꞌ i laling pinanahanna‑i se. 14Ku padeaꞌ‑ming se ti suaMu, pang lino mampukàrang‑i se sàbaꞌ dei: se handei: hura: ung nai lino tee, sibali Koi: handei: ung nai lino tee. 15Hang Ku palau‑iko mangking U ala‑i se nai lino tee, sangadinna Ku palau mangking U mangkuyaꞌ‑i se nai Datuna dihata bulituku. 16Dei: se handei: hura: ung nai lino tee, sibali Koi: handei: ung nai lino tee.

17Ku palau mangking U mallìsòngi pang mangàna: sala:‑i se, mangola: katongangang nai suaMu. SuaMu dea‑mo katongangang. 18Sibali Dio mampantuyu‑Maꞌ mao i lino, Ku pantuyu‑i se ho mao i lino, 19pang Ku paone: sala: ti kalaeKu, ha umma‑i to, dei: se, mangking dei: se ho nipaone: sala: mangola: katongangang.

20Handei: se teng tee ti ung Ku pusumbayang‑ing, sangadinna nasang tau ung mampatongànga‑Kaꞌ mangola: suana‑i se tau tee. 21O Ama:, Ku palau mangking nasangna‑i se mamesa, sibali Dio mao i Koi:, pang Koi: mao i Dio. Na mamesa‑rangmi se i laling Kìta:, mangking lino mampatongang moa teꞌ Dio ti ung mampantuyu‑Kaꞌ. 22Ku hengi‑ming se ti kamalabiꞌang ung Nu hengi‑mingNaꞌ, mangking mamesa‑i se, sibali Kìta: mamesa, 23dea‑mo, Koi: pàraꞌ i dei: se pang Dio pàraꞌ i Koi:, mangking kànaꞌ ti kamamesaangna‑i se, mangking lino mangìsang moa teꞌ Dio ti ung mampantuyu‑Kaꞌ pang mampulemu‑i se, sibali Dio mampulemu‑Kaꞌ.

24O Ama:, Ku kapelai: mangking nasang tau ung Nu hengi‑mingNaꞌ, one: sola: Koi: iaka Ku kaonei:, mangking na ita‑i se ti kamalabiꞌangKu, dea‑mo kamalabiꞌang ung Nu hengi‑mingNaꞌ sàbaꞌ U Mi pulemu songka: hang nitampa‑mi ti lino.

25O Ama: ung mahulo:, lino hang na ìsang‑Ko, hampoꞌ Koi: U Ku ìsang‑do, pang tau te‑i se mangìsang moa teꞌ Dio ti ung mampantuyu‑Kaꞌ. 26Ku pupiìsang‑mo ti konaMu mao i dei: se, pang tùrùnga Ku pupiìsang, mangking malemumMu mao i Koi:, pàraꞌ ho i laling pinanahanna‑i se pang mangking Koi: ho pàraꞌ i dei: se.”

Currently Selected:

Yohanes 17: skx

Highlight

Copy