Yohanes 16
16
1U Ku padeaꞌ‑ming se nasang ti te mangking hang minassang‑ko se pang sumuruꞌ nai kapatongangangmu se. 2U nisaràkia se nai jamaa. Mala, bùruꞌa ti tempona teꞌ tau ung mampatei‑ko se, mangkonai: kalaena mallayani Puang. 3Na pukauꞌi: se nasang ti to sàbaꞌ hang na ìsang‑i se ti Ama:, pang Koi: hang na ìsang‑i se ho. 4aU Ku pusua:‑ming se nasang ti te mangking tempona nipukauꞌ, u kalehai se moa teꞌ u Ku padeaꞌ‑ming se.”
Yesu mampumakàso: kamaꞌangna Pinanaha Malìsong
4b“Hang Ku pusua:‑i nasang ti tee nai pararanna, sàbaꞌ u Ku pasola: se. 5Hampoꞌ i latenna, Ku sumulea‑mo mao i Dea ung mampantuyu‑Kaꞌ, pang hari: moi besa nai àlaꞌmu se ung mingkutiki mao i Koi: iaka ti Ku lumaꞌia. 6Sangadinna, masussa ti pinanahammu se, sàbaꞌ nai nasang aka ung Ku pusua:‑mo. 7Hampoꞌ katongangangna ti ung Ku pusua: matung tee teꞌ, Làbi belo:‑da sule: mao i dio se ìna Ku lumao. Sàbaꞌ, ìna hang lumao‑Kaꞌ, Pirannang to hang bùruꞌi:‑da mao i dio se. Hampoꞌ ìna Ku lumao, Ku pantuyua‑ko matung.
8Ìna bùruꞌ‑mo, mampumakàsoa mao i tulino aka ti ung tongang mampatu: kasalaang, katongangang pang hukungang. 9Mampumakàsoa kasalaang, sàbaꞌ hang mupatongang‑i se mao i Koi:. 10Pang mampumakàsoa katongangang, sàbaꞌ Ku lumao i Ama: pang hang Mi itao: se hura:. 11Pang mampumakàsoa hukungang, sàbaꞌ dea ti ung makuasa i lino tee nihukung‑mo.
12Boso: kang ti àla: ung Ku padeaꞌ‑ingko se, hampoꞌ tiꞌ hang hela‑mo: se mantarima i latenna. 13Hampoꞌ ìna bùruꞌ‑mo ti Pinanaha Katongangang to, u Na rannànga se mangìsang nasang katongangang. Hang musuai:‑Da nai kalaeNa kalenanna, sangadinna aka ti ung Na sàding, dea ti ung Na pusuaa, pang aka ti ung bùruꞌa, Na pupiìsànga matung. 14Na tarimaa nai Koi: pang Na pupiìsànga matung. Mangola: nasang to, kamalabiꞌangKu Na pupiitaa. 15Nasang aka ti ung na ampu Ama:, Ku ampu‑ko ho. Dea‑mo to pu Ku musua: moa teꞌ, Pinanaha Malìsong mantarimaa nai Koi: pang Na pupiìsànga matung.”
Pasikolana Yesu masussa, hampoꞌ mihakaa pole
16Musua: kang ho ti Yesu teꞌ, “Dùkuꞌ‑mo ti tempona, hang Mi itao: se hura:, pang hang masaii: ho, u Mi ita se pole.”
17Sikutikìna‑mi se ti pira-pira pasikolaNa teꞌ, “Aka ti ung Na pusua: teꞌ, ‘Dùkuꞌ‑mo ti tempona, hang Mi itao: se hura:, pang hang masaii: ho, u Mi ita se pole’? Pang aka ho ti patuna suaNa teꞌ, ‘sàbaꞌ Ku lumao i Ama:’? 18Pang aka ho ti patuna mangkonai: ‘hang masaii:’? Hang ta pahang‑i dasse: aka ti ung Na pusua:.”
19Na ìsang Yesu moa teꞌ palea:‑i se mingkutiki. Jadiꞌ, musua: moa teꞌ, “U sikutiki se naꞌ ti palleona to ung Ku konai: teꞌ, ‘Hang masaii: hura:, hang Mi ita‑ko se, pang hang masaii: ho, u Mi ita se pole’? 20Matantu te ung Ku pusua: matung e teꞌ U mantalihuhua dosse: kumàraka, hampoꞌ dea ti lino, mihakaa. U masussaa dosse:, hampoꞌ kamasussaangmu se to, mabàlia‑da miluhali kahakaang.
21Ìna besa bahine kianaka, masussa sàbaꞌ mipanaꞌ ti na kekiꞌi. Hampoꞌ sòhongna‑i ti anakàna, na puhuta‑mo ti pipanaꞌna sàbaꞌ haka: teꞌ mangkianaka‑ming besa anaka. 22Mène: ho ti dio se. I latenna u masussa dosse:, hampoꞌ u Ku pasikoraia se pole, pang tempo to, u mihakaa se. Pang hari: moi besa tau ung helaa mangala kahakaangmu se to. 23Tempo to, harai: hura: pingkutìkangmu se mao i Koi:.
Matantu te ung Ku pusua: matung e teꞌ Aka teng ti ung nu palau se mao i Ama: i laling konaKu, u Na hengiing. 24Deaꞌ i latenna, hara‑mi aka-aka ung nu palau se i laling konaKu. Palau‑ko se pang u tarima‑i, mangking kahakaangmu se miluhali kànaꞌ.”
Kuasanna lino na talo Yesu
25“Nasang te u Ku padeaꞌ‑ming se i laling rampeang. Hampoꞌ bùruꞌa ti tempona hang mampake‑Kaꞌ hura: rampeang, sangadinna Ku mahuloa mampaìsàngi‑ko se mampatu: Ama:. 26Tempo to, u mampalaua se mao i Ama: i laling konaKu. Hang Ku pusua:‑i matung moa teꞌ, Koi: ti ung parallu mampampalau‑ingko se mao i Ama:, 27sàbaꞌ Ama: kalenanna mampulemu‑ko se. U Na pulemu se, sàbaꞌ u Mi pulemu pang u Mi patongang‑mo se moa teꞌ Ku bùruꞌ‑ko nai Puang Ama:. 28Ìnang Ku nai Ama:‑ko, pang Ku bùruꞌ‑mo mao i lino. Pang i latenna Ku palii: ti lino pang sumule: mao i Ama:.”
29Musuana‑mi ti pasikolaNa teꞌ, “Màli: i latenna Ta mahulo: musua: pang hang mampake‑Ke hura: rampeang. 30I latenna makàso:‑mo mao i kami teꞌ U mangìsang nasang angkanna. Hang parallu‑Keda na kutiki tau, sàbaꞌ Ta ìsang‑mo ti àla: ung na pingkutik‑ing. Deanna‑mo to, ki patongang moa teꞌ U bùruꞌ nai Puang.”
31Na sùmuinna‑mi Yesu teꞌ, “Jadiꞌ, i latenna, u mupatongang‑mo se? 32Pisàdìngi‑ko se! Bùruꞌa‑mo ti tempona, mala tempona‑mo, u nipasisaràka se mao i pantang kaoneangmu se, mampalii:‑Kaꞌ na besa‑i. Hampoꞌ hang na besa‑Kaꞌko, sàbaꞌ Ama: mampasola:‑Kaꞌ.
33Nasang te, u Ku padeaꞌ‑ming se mangking u mangkorai: se kabeloang i Koi:. I lino tee u mangkorai: se kamaparriꞌang, hampoꞌ sabaraꞌ‑ko se pang pumasannang ti pinanahammu, sàbaꞌ Ku talo‑mo ti lino.”
Currently Selected:
Yohanes 16: skx
Highlight
Share
Copy
Want to have your highlights saved across all your devices? Sign up or sign in
