Yohanes 10

Pikuyaꞌ ung belo: pang domba-dombanna

1Musuana‑mi ti Yesu moa teꞌ, “Matantu te ung Ku pusua: matung e teꞌ Tau ung dang pone: i baba: mintama i pammakuangna domba, sangadinna kumaseꞌ‑da, tau to dea‑mo ung pumanauang pang ung làsi:. 2Hampoꞌ dea ti ung mintama pone: i baba:, dea‑mo to ti pikuyaꞌna domba to. 3Pumpukuyaꞌ babana pammakuang manghungkai‑ing pikuyaꞌna domba to, pang domba-dombanna mampitako:‑i. Na hàngo ti domba-dombanna pantang konana, pang na baha missòhong.

4To na baha‑mo nasang missòhong, na pidolung‑ming. Pang domba-dombanna mangulaꞌ‑i, sàbaꞌ na pitako:‑i se. 5Hampoꞌ tau ung dang na pirupa‑i se, ha na ulaꞌ‑ida, sangadinna na piruru:‑ing sule: sàbaꞌ hang na pitako:‑ida.”

6Na pusua:‑ing Yesu ti rampeang to, hampoꞌ hang na pahang‑i dasse: ti patuna.

7Jadiꞌ, musua: ho ti Yesu moa teꞌ, “Matantu te ung Ku pusua: matung e teꞌ Koi:‑mo ti baba: ung na ola: domba-domba. 8Nasang ung bùruꞌ dolung nai Koi: dea‑mo ung pumanauang pang ung làsi:. Hampoꞌ domba-dombangKu hang mampisàdìngi‑i se. 9Koi:‑mo ti baba:. Isai-sai ti ung mintama mangola: Koi:, nipasalamaꞌa, pang mintamaa missòhong mangkorai: padang ung belo:. 10Ung pumanauang bùruꞌ‑da teng mumanau, mupatei pang mupapunta. Hampoꞌ Koi:, Ku bùruꞌ‑ko mangking tulino mangkorai: katuhoang ung màle pang kànaꞌ ti kabeloangna.

11Koi:‑mo ti pikuyaꞌ ung belo:. Ku mampehea katuhoangKu sàbaꞌ domba-dombangKu. 12Tau ung mingkamaꞌ teng mangking nisaroi, ung dang dea sitongangna pikuyaꞌ, pang handei: ho ampunna domba-domba, mirurua malai ìna mangita serigala bùruꞌ. Urungang oloꞌ-oloꞌ to marroko domba-domba pang na pasisara-saraka. 13Tau to miruru:, sàbaꞌ ung nisaroi‑da teng, pang hang na karaꞌi‑ida ti domba-domba.

14Koi:‑mo ti pikuyaꞌ ung belo:. Ku ìsang ti ung Ku ampui pang Ku na ìsang‑i se, 15sibali to Ku na ìsang AmangKu, pang Ku ìsang ti Dea. Pang katuhoangKu, Ku pehea sàbaꞌ domba-dombangKu. 16Ara ho domba-domba sintàna: ung Ku ampui, ung dang sola: pammakuang tee. Parallu Ku baha‑i se ho. TakoKu na pitakoi: se, pang nasang domba ung Ku ampui miluhalia sampolaiang ung Ku kuyaꞌ.

17Ku na pulemu AmangKu sàbaꞌ Ku pehea ti katuhoangKu mangking Ku korai: pole. 18Hari:‑da moi besa tau ung hela mangala katuhoangKu, sangadinna Koi: kalenanna ti mampehea. Ku makuasa‑ko mampehea pang mangala pole. Dea‑mo to ti parenta ung Ku tarima nai AmangKu.”

19Sikeboꞌi‑mo pole ti pantangaꞌna‑i se tu Yahudi sàbaꞌ suana Yesu to. 20Boso: ti ung moa teꞌ, “Na katama‑Da dihata bulituku. Kalolaang‑Da! Aka pu u pisàdìngi‑ko se?”

21Hampoꞌ ara ho ti ung moa teꞌ, “Tau ung na katama dihata bulituku, hang musua:‑ida mène: to. Hela naꞌ ti dihata bulituku mampapaita tau ung buta?”

Yesu i perayaang Mallìsòngi pole Tamming Kabussùngang

22Nai anto, tau i Yerusalem mampukauꞌ perayaang Mallìsòngi pole Tamming Kabussùngang. Tempo to, tempo mirarung. 23Yesu mammulao-lao i kaoneang Tamming Kabussùngang, i Pililòngang Salomo. 24Bùruꞌna‑mi se ti ung si nipiama: i aluku tu Yahudi mampimpalìngi‑I, pang musua: teꞌ, “Sangakaa kang masainna ki U patatang mangampe-ampei pusuaMu? I tongang‑Ko Datu: Pipasalamaꞌ, baꞌ kahuloi:‑kang.”

25Na sùmuinna‑mi Yesu teꞌ, “Ladu‑mo u Ku konai:‑ing se, hampoꞌ ha u patongang‑ko se. Kamaꞌang ung Ku pukauꞌ i laling konana AmangKu, miluhali passabii mao i Koi:, 26hampoꞌ ha u patongang‑ko se sàbaꞌ hang tama‑ko dosse: domba-dombangKu. 27Domba-dombangKu mampitako:‑Kaꞌ. Ku ìsang‑i se pang Ku na ulaꞌ‑i se. 28Ku hengi‑ing se katuhoang ung màle. Deaꞌ tùrungna harai:‑da na mate‑i se. Pang hari:‑da ho moi besa tau ung helaa mangala‑i se nai kangkangKu. 29AmangKu ti ung manghengi‑ingNaꞌ domba-dombangKu. AmangKu iaho nai nasang, pang hari:‑da moi besa tau ung helaa mangala‑i se nai kangkangna Ama:. 30Koi: pang Ama:, Ki besa‑ika.”

31Mangalanna‑mi se ho hatu ti tu Yahudi to‑i se àla: na panghatui‑ing se Yesu. 32Musuana‑mi ti Yesu teꞌ, “Boso: ti kamaꞌang ung belo: nai Ama:, ung nu ita‑mo se Ku pukauꞌ. Ummanna ti ung mambùruꞌ‑ing u panghatuiing‑Naꞌ se?”

33Misùmunna‑mi se teꞌ, “Handei:‑da nai kamaꞌang ung belo: to ti ki panghatuiing‑Ko, sangadinna sàbaꞌ U mampaihoiꞌ Puang. U tulino‑do, hampoꞌ U mangkonai: kalaeMu Puang.”

34Na sùmuinna‑mi Yesu teꞌ, “U mangkonai: se Suraꞌna Puang dea‑mo atorangmu se, pambàtiꞌ nironno: i anto ti suana Puang teꞌ, ‘Dio se tee dea‑mo puang.’*#10:34 Masmur 82:6 manturo: tau ung mantarima suana Puang. 35Aka ti ung nironno: i laling Suraꞌna Puang hang hela‑i nihùlìngi. Jadiꞌ, ìna Puang mangkonai: puang tau to‑i se ung nipampadeaꞌi SuaNa, 36baꞌ aka pu u Mi konai: se mampaihoiꞌ Puang, nai suaKu ung mangkonai: moa teꞌ, Ku Anakàna Puang? pambàtiꞌ Ku na paone: sala: Ama: pang Ku Na pantuyu mao i lino. 37I mènena‑i to moa teꞌ hang Ku pukauꞌ‑i ti kamaꞌang nai AmangKu, baꞌ hanaii‑mi u Mi patongang se. 38Hampoꞌ tiꞌ Ku pukauꞌ‑ko. Deanna‑mo to, na moi hang Mi patongang‑ko se, patongang‑ko se ti ung Ku pukauꞌ to, mangking u ìsang tungka se moa teꞌ Ama: pàraꞌ i Koi: pang Koi: pàraꞌ i Ama:.”

39Massàding suana Yesu to, na sukaꞌna‑mi se pole ti mantingkang‑I, hampoꞌ sàpuꞌ malai.

40Nai anto, kakarang ti Yesu pang lumao pole i heteꞌna Uhai Yordan, ung na kaonei: dolung Yohanes mudoiꞌ. Leta: one:, 41pang boso: tau bùruꞌ mao i Dea. Na konai:‑i se moa teꞌ, “Yohanes hang mampukauꞌ‑ida moi besa kalle-kalleang, hampoꞌ nasang ti ung na pusua: mampatu: Tau tee, tongang‑da.” 42Pang boso: ti tau mupatongang mao i Yesu i anto.

Currently Selected:

Yohanes 10: skx

Highlight

Copy