Markus 8
8
Yesus en ap eneyave 4.000 erom wogeragagi wene
(Matius 15:32-39)
1Andi ogarit naguma, avakwa wisane At adema homari wagagwa. Homari wagagwa ako, enagarom naup dek atma, At ane welagwi menda ako yanggup yugeragagi. Yanggup yugirigya lagagimu, wagu lagagwama, it ako yugirigya dugwit, 2“It avakwa wisane yi, ninim nogo henggam yugu dugwit, enagarom ovok dek agarikmu, enabwa o. 3It nin enawi adumu en wagarwikmu, enamwa lakbugu neyalok, lagu dugwit, erom uvup en inivuput basogom ombasiga.”
4Yugirigya lagagimu, At ane welagwi menda akoen, “O harumu yoma avakwa enawi valek ambi mondok dek atma, enagarom ndatak napwak yiluk, erom nggoma belali lamwi?”
5Yugugu lagagwama At Yesus en iri dugwit, “Hit erom roti werago maren vagago agipik?” Yugirigya lagagimu, “Nit nininggimu erom roti 7 adigat vagago agurik,” yugogogwa.
6Yugugu lagagwama, At Yesus akoen avakwa wisane homago ako wema hora yupwak yiluk, yugirigya lagagirik, erom roti 7 inggimu dugwit, “Ala Nasin wa,” yiluk, erom ugurogo avakwa menagerapwak yiluk, At ane welagwi menda ako wogirigya lagagimu, menageragagwa. 7Menagurugu dugwit, ikan mariduk mberenat werekma, “Ala Nasin wa,” yiluk, samban ogagya lagagirik, “Ikan yi inim menageranes,” yiluk, wogeragagi. 8Menageragagwa ako nunggu lagagwarik, enagaum agya lagagimu, roti inim, ikan inim, nin higitlagagi ako andi, mburiyum 7-at elagapaga erogo yedogo bagagwa. 9It erom nunggugwa ako ap eneyave 4.000 hudi nunggugwarikmu, enamwa lakbugu lagagarik, 10Yesus At ane welagwi menda ako inim, mburis vaga nunggugu lagagwarik, o Dalamanuta lagagwa.
It Varisi menda en “Ninilup arup menda ogagya heyasogom o,” yugogogwa wene
(Matius 16:1-4)
11O Dalamanuta lagu lagagwama, it Varisi menda Yesus adema wagu lagagwarik, inim wene yugu dugwit, “Ninilup arup mbogot vaga menda ambi ogagya heyasogom o,” yiluk, At ogagya avut mbaluguluk yugogogwa. 12Yugugu lagagwama, At Yesus en, “Ai,” yiluk, yugirigya dugwit, “Hit avakwa yi, nggarogo yiluk, ninilup arup mbogot vaga menda ambi ogagya heyasogom adigat yuknisagwi? Hinilup arup menda ambi ogagya neyasogom mondok dek o, An avyarat yukheraliga.”
13Yugirigya lagagirik, it ako hekbisiluk, mburis vaga nunggwigya lagagirik, is ambo elavikit lagagwa.
Ragi roti virisiga menda avok wene
(Matius 16:5-12)
14It mburis vaga lagu dugwit, Yesus ane welagwi menda ako erom roti inunggut akluk, ambiat wolok lagu lagagwama, 15Yesus en yugirigya dugwit, “Avyak wai. It ap Varisi menda inim, at Herodes inim, enane andi, ragi roti virisiga menda ako hak atma, henendawima nunggwigya haoen, henova hwalogo dogop,” yiluk, enaruk watigi.
16Enaruk watya dugwit yugeragagi ako, it ako ambi yugigik ambi yugigik ogagu dugwit, “Nenagarom dek halok, yagas ai,” 17it yugwi ako Yesus inugu lagagirik, “Hit nggarogo yiluk erom roti dek andi yagalagwi? An yukhirigi ako ao dibagetek hinunggut dugwit, yagalagwi? Hit henendawi obak ugun dugwit, yagalagwi? 18-19Hit hinil werek ovara, hegetek dugwit, yagalagwi? Henaruk werek ovara, henaruk hunggitek dugwit, yagalagwi? Erom roti 5 vaga avakwa 5.000 homago ako ugurogo wogeragagis ako, henendawi moma akluk, yagalagwi? Erom roti ugurik higitlagagi ako, wonggalogo mburiyum maren hudi yedogo bagagup?
Yugirigya lagagimu, it ako, “Dek o. Mburiyum 12 hudi yedogo bagagup.”
20Yugu lagagwama, “Hivis andi, it avakwa 4.000 homago ako roti 7 ugurogo wokhirigya lagagimu, ugurik higitlaga ako, hiren mburiyum maren hudi yedogo bagep?
Yugirigya lagagimu, it akoen, “Mburiyum 7-at bagyo.”
21Yugugu lagagwama, Aren yugirigya dugwit, “Yogak ogo hit henendawi An ao dibanenggetek agipik?” yiluk, yugeragagi.
Yesus en ap il mbuk sek ogagagi wene
22Hivis, andi okbaluk, it ako o Mbesaida andoma wagagwa. Wagu lagagwama, it avakwa andoma en ap il mbuk werekma At adema wolok wagu lagagwarik, At Yesus en at eyave inggis vagarupwak yiluk, enabwa edok erogo Yesus yugogogwa.
23Yugugu lagagwama, At Yesus o andoma en inggis vagakluk wolok, werama winggigi. Wunggu lagagirik, Yesus en waris ap il vaga suvutbagya, eyave inggis vakbagya, okbagya lagagirik, “Yogak yi menda ndi menda vage hil haliga a dek a?” yiluk, 24yugugu lagagimu, at il venggenlagya dugwit, “Avakwa inisaliga ovara, yo ovagak nagu siliga o,” yiluk, yagagi.
25Iri lagagimu, At inggis il vaga lombabagya lagagimu, ap ako il yokhigya dugwit, avyarat il venggenligya lagagirik, yi menda ndi menda ovok erogo sigamat hagagi. 26Il sek okbagya lagagirik, “Henamwa andoma nunggubuk, hamwa elak,” yiluk, yugogogi.
Peterus en “Hat Keretus aro,” vagalogo yugogogi wene
(Matius 16:13-20; Lukas 9:18-21)
27Yesus At ane welagwi menda inim o andoma en o Kaisarea Pilipi yi awi ndi awi andoma nagu lagagwa. Suvaga lagu dugwit, Aren “It avakwa yi An sa numbutu dugwit, yagalagwi?” yiluk, At ane welagwi menda ako yugirigya lagagimu, 28irenen yugugu dugwit, “It ninen, ‘Hat Yohanes avakwa ima wombabugu lagagi akoat,’ yugwi, eke it ninen, ‘Hat Elia aro,’ yugwi, eke, it ninen, ‘Ap ambi Ala yugirigya hegek yugurugu lagagwa menda navi-navi ako menda ai,’ yugwi, yagalagwi o,” yugogogwa.
29Yugugu lagagwama, Aren it yugirigya dugwit, “Eke, hit andi, An sa numbutu dugwit, yagalagwi?”
Yugirigya lagagimu, at Peterus en, “Dek. Ala en avakwa enagap wendarupwak yiluk enogo lakba wagagi Keretus ako andi, Harat,” yiluk, yugogogi.
30Yugugu lagagimu, “An navok andi avakwa enadema mondok yugerabuk!” yiluk, enaruk watigi.
Yesus en “An narusogom o,” yugeragagi wene
(Matius 16:21-28; Lukas 9:22-27)
31Enaruk watya lagagirik, wene ambi yugirigya dugwit, “An Ap-At Endaklagagis ako, mondok nova anggin-mbanggin erogo banusogom. It ap ombok-ombok inim, it imam-imam enasini inim, it Ala wene vagago agarwik menda inim, An it enanggon numbutu dugwit natu dogomwima, hambigya dogomindik ndugwis mberen dukluk ndugwis ambi vaga niluk arisogon o,” yiluk, 32wene sigam erogo yugeragagi. Sigam erogo yugirigya lagagimu, at Peterus en Yesus inggis lirogo wolok lagya lagagirik, yugugu dugwit “Anderogo yubuk,” anggadi warigiluk ogagyaim, 33At Yesus en At ane welagwi menda ako il ambukmu dagalogo yoginugu lagagirik, Peterus mbet yugugu dugwit, “Hat Sile yi, Ala endawi ombasiga ako ndatak ombasigadek, ovara, avakwa enendawi ombasagwi ndatak ombasiga atma, mondok-mondok wilin,” yiluk, mbet yugogogi.
34Mbet yugugu lagagimu, it avakwa homago ako inim, At ane welagwi menda ako inim, eneyanggup yugeragagi, wagu lagagwama yugirigya dugwit, “Hit An ninim nagu dogop umbutu dugwit halok, yi menda ndi menda ogarup ombasagwi ako hekbisiluk, yo winik vaga lobalogo bigigaup ako hedelok, An ninim nagu dogosogom. 35Heneyave idi okhedasogom halok, heneyave yelemele-at yusogom. An ninis inim Sek Wene inim, ombok arupwak yiluk, heneyave hinididek okhedamwi halok, hinidi ogarek-at dogosogom. 36Hit yi awi ndi awi ovok erogo andok okhidugu dogomundik, heneyave yelemele yusogom halok, nggayoklarup embetep? 37Heneyave yelemele yusogom halok, avoloma nano betaup ombasagwi? 38It avakwa ovok erogo Ala mbobaluk, weyak adigat ogarit lendagwi ako enanggelekma dugwit, ap ambi saen An ninis inim, An nane inim, alon en yegetek dogosogon halok, An Ap-At Endaklagagis yi An Nasin mondok abinak werek iris ovagangge yikhedelok it Ala ake enek menda malaikat inim wagu dugwit, An ap ako inis yisogonbuk o,” yiluk, yugeragagi.
Currently Selected:
Markus 8: nbq2013
Highlight
Share
Copy
Want to have your highlights saved across all your devices? Sign up or sign in
