Markus 7

It ap Yakuri enombawi ogagu lagagwa yugadek wene

(Matius 15:1-9)

1Andi okbaluk, it ap Varisi menda inim, it Ala wene vagago welagagwa menda inim, Yerusalem en Yesus adema wagagwa. 2Wagu lagagwarik, At ane welagwi menda ako ininggis adat it menda vaga horekdek, un ugun dugwit erom nunggwi inil inogogwa.

3(It Varisi menda ako inim, it Yakuri ovok erogo inim adat it enombawi ogagu lagagwa yugadek ogagu lagagwarikmu, ininggis adat vaga horekdek halok andi erom nenggetek wulugu lagagwa. 4Pasar ogasagwima akoma en wakluk, ininggis adat vaga horekdek dugwit, erom nelagwidekma. It enombawi ogagu lagagwa yugadek atma ogagu dugwit manggok inim, sogolowak ombok-mariduk inim,#7:4: Sogolowak ako andi gelas inim, piring inim, belanga inim, nin wisane inim adat vaga hutu lagagwa. adat vaga hurisagwima.)

5Anderogo ogasagwima, it Varisi menda ako inim, it Ala wene vagago welagagwa menda ako inim, Yesus yugugu dugwit, “Hat hane welagwi menda yi, adat nit nenombawi ogagu lagagwa ogasagwi hak, ogagetek, nggarogo yiluk ininggis adat vaga horekdek ugunat erom nelagwi?” yiluk yugogogwa.

6Yugugu lagagwama, At Yesus en it yugirigya dugwit, “At Ala en yagagi ako hit henagavoval ovagak hinigik at Yesaya en endak avyarat dirup watigi:

‘Hit avakwa yi, henane vaga An Ala siyabanilagwi ovara,

henendawi andi adumu erogo agipik o.

7 # Yesaya 29:13 yokhanes. It yugareralagwi andi, avakwa enane yerogo ogagu dogop yagalagwi ako adigat yugareralagwi atma,

enam warogo An ninis siyabanilagwi o.’”

8Yugirigya lagagirik ambi inim yugirigya dugwit, “Ala en ‘Yerogo ogarup, nderogo ogarup,’ yagagi wene ako sovalogo baluk, hit henombawi ogagu lagagwa yugadek atma ogagu hinigis o,” yiluk yugeragagi.

9Yugirigya lagagirik, “Hit henombawi ogagu lagagwa ako yugadek ogagu dogoguluk, At Ala yagagi wene hekbelagwi atma, hit segat hinigis. 10#Keluaran 20:12; Keluaran 21:17; Imamat 20:9; Ulangan 5:16 yokhanes. At Musa en iri dugwit, ‘Hinisa-henasin enagayuk wutu dugwit, enane des erogo hunggu dogones’. Eke, ‘Hit henane vaga hinisa-henasin mbidarogo bisamwi halok, mondok-mondok hinirup-at,’ yiluk, yagagi ovara, 11hit andi henasini-hinisai yugurugu dugwit, ‘An nangge wokhirup imbiti ovara, Korban. Andi, Ala ake betagagis o,’ yugurugu hiniselok, 12andi okbaluk, henasini hinisai enake okbisaup andi dek yugu hinigis. 13Adat hit henombawi ogagu lagagwa yugadek avakwa yugerelagwi ako ogarit lagwi vaga, Ala wene andi degerogo baguluk ogagu hisaliga. Hit ogasagwi ako andi, iya erogoat ogasagwi higi,” yugeragagi.

Nano vaga nenendawi weyak okninivisiga wene

(Matius 15:10-20)

14Yugirigya lagagirik, it avakwa wisane wonggalek ako yanggup yugeragagi, wagu lagagwama, yugirigya dugwit, “Hit ovok erogo An nane henaruk hobaluk dibagu dogwes,” 15yugirigya lagagirik, “Nelagwi menda andi vaga weyak okhinivisigadek ovara, henendawima en weyak menda wenggelogo baluk wilisiga ako vaga weyak okhinivisiga. 16Henaruk werek halok andi, des erogoat hunggu dogwes o,” yiluk, yugeragagi.

17Yugirigya lagagirik, avakwa ako hekbisiluk, umwa nunggwigya lagagimu, At ane welagwi menda akoen, “Hat wene wakhegek atok hwilagago ovagak yegen ako andi, adem des erogo yukneran,” 18-19yugugu lagagwama, At Yesus en iri dugwit “Hit ogo dibagetek dugwit, yuknisagwi? Yi menda ndi menda nelagwi menda ako henendawima nunggwisigadek. Ata, yi menda ndi menda nelagwi ako enagaum elola wambigya lagarik, beyak helendagwi ako, henendawi weyak okhinivisigadek, yi hegep?” yiluk, yugeragagi. (Wene yugeragagi andi, nelagwi menda ovok erogo moga dek yiluk yugeragagi.)

20Yugirigya lagagirik, ambi yugirigya dugwit, “Henendawima en wenggelogo baluk wilisiga ako vaga weyagat okhinivisiga. 21Henendawi weyak wenggenggwis, wanggis wugwi, enonggop wugwi, ap watwis, 22ap ogwa werek hwa agun werek hegek ogagwi, ap enangge hogop umbutwi, yi weyak ndi weyak ogagwi, henane agil-amok vaga ap enendawi wugwi, henendawi hwa vaga adigat wenggelek dugwit, ugun-ugun ogarit lagwi, haterek-anderek yugwi, mbidarogo bugwis, an iya umbutwi, ap wes okhidugwi, 23andi menda henendawima en wilisiga ako vaga, ogarit nagu dugwit weyak okhinivisiga o,” yiluk, yugeragagi.

Hwa ambi Venisia menda avyarat imbitigi wene

(Matius 15:21-28)

24Yugerelok, o andoma en lagya lagagirik, o ambi inis Tirus nonggagagi. Nonggagagirikmu, o ambiat valekma nonggagagi, akoma dugwit, “Avakwa inil neyagu saoen yiluk, hwilaklarisogon” imbitigi ovara, dek agagi. 25Dek agya lagagimu, hwa ambi eyak hwavyak madis endawima nonggagagirikmu, Yesus wagagi ako aruk hobaluk, Yesus adema lagya lagagirik, avema seve yiluk, 26abwa edok erogo yugugu dugwit, “An neyak madis endawima nonggagagi andi, nggigilogo wibanogen yiluk, yukhisiga,” yugogogi. At hwa ako eyave Yakuri menda dek. At Yunani menda ovara, o Venisia, propinsi Siria vaga endaklagagi.

27Yugugu lagagimu, At Yesus en it ap Yakuri enavok iri dugwit, “Avyak enagarom enendak enagaum erogo napwak yiluk iya erogo wogeraup o,” iri lagagirik, it ap weram menda enavok iri dugwit, “It avyak-mariduk enagarom ininggimu en, haurogo yangge napwak yiluk wogerelagwidek,” 28yugugu lagagimu, at hwa akoen, “E o Nasin. Yo mbanggu ndalek vaga avyak enagarom nunggusigik, enggen liso-liso wambisiga andi eneyangge-at nelagwi o,” yugogogi.

29Yugugu lagagimu, Aren, “Harenen wene sek anderogo yegen vaga heyak madis endawima nonggagagi ako vage nggigilogo winggarikmu hamwa elak o.” 30Yugugu lagagimu, hwa ako amwa lagya lagagirik, eyak ako madis endawima nggigilogo winggigirikmu, nggilik werekma halagagi.

Yesus en ap aruk nggulup anedek menda ambi sek ogagagi wene

31Andi okbagya lagagirik, Yesus o Tirus hekbaluk, sup o Sidonggan en o Dekapolis andoma nunggwigya lagagirik, is Galilea ombanma lagagi. 32Andoma lagya lagagirik, werekma, it avakwa andoma akoen, ap aruk nggulup anedek ambi wolok At Yesus adema bawagu lagagwarik, Yesus en inggis ovaga vagarupwak yiluk, enabwa edok erogo dugwit, yugogogwa.

33Yugugu lagagwama, it avakwa wisane wonggalek ako hekbisiluk, Yesus en at aruk nggulup ako wolok lagya lagagirik, aruk elola inggis mabagya lagagirik, waris inggi-vaga suvutbaluk abya vaga lombabagagi. 34Lombabagya lagagirik, il mbogot vaga ilik lagya dugwit, “Ai” imbita dugwit, “Epata,” #7:34: Bahasa Aram. yugogogi. Yugogogi andi nit nenane vaga “Haruk hutlaru o,” yiluk, yugogogi.

35Yugugu lagagimu, aruk huklagya, anedek ako ane werek agya, agya lagagirik, ane sek agagi.

36Ane sek agya lagagimu, At Yesus en avakwa andoma ako yugirigya dugwit, “Avakwa mondok yugerabuk, moga!” yiluk, yugeragagi ovara, hegek, ane sovabaluk, yugeregek adigat nagu lagagwa. 37Yugeregek nagwis ako enaruk hunggu lagagwarik, “Enaruk nggulup ako enaruk hurogo bugu, enanedek ako, enane werek erogo bugu, oginivit lagya dugwit, yi ogagek ndi ogagek sek adigat ogarit naliga yi, wi,” yiluk, enalon agu dugwit, vok yugu lagagwa.

Currently Selected:

Markus 7: nbq2013

Highlight

Copy