Markus 5
5
Yesus en madis nggigilogo wibagagi wene
(Matius 8:28-34; Lukas 8:26-39)
1Andi okbaluk, it inamut yanggadek ako ambo elavikit ap o Nggerasa menda werekma lagagwa. 2Lagu lagagwarik, mburis vaga en ao wunggu lagagwama, ap madis agoda werek endawima nonggagagi menda ap hambuguselok wimu biselagwima akoma en, Yesus adema wagagi. 3At ap ako, hambuguselok wimu biselagwima akoma welagagi. Welagagirikmu, inggis isok mbusi heda magu lagagwa ovara, heda mabagwi, libinggu, heda mabagwi, libinggu, hunik ogagu lagagwa. 4Inggis isok inim, mbusi heda adigat magek ogagu lagagwa ovara, yimbi-mandok iri dugwit, inggis isok mbusi heda mago ako libik-ndendok erogo lakbagek adigat ogagya halok, it avakwa ovok en ap ako vagarup meyan hagagwa. 5Hup dingga hunik wimu biselagwima akoma inim, hulikmu inim, naik yagan nagu dugwit, helep vaga wakhedegek nagu lagagi.
6Akoma dugwit, o adumu en Yesus wagya il hagagi. Il higya lagagirik, At adema vupuk lagya lagagirik, avema seve yiluk, 7“Yesus wai. Hat Ala Mondok Siyalek Adigat Agarik ako Abut yi an nggayok neragiluk wagen?” yiluk, ane ombok vaga naik iri dugwit, “Ala inis vaga an edup-mbedup okbanubuk,” yiluk, yugogogi. 8(“Ala inis vaga an edup-mbedup okbanubuk,” yagagi andi, At Yesus en “Hat madis yi ap yi endawima en wilin,” yugugu lagagimu, at ap ako en “Ala inis vaga” yagagi.)
9“Wilin,” yugugu lagagirik, “Hat hinis sa?” yugugu lagagimu, “An ninis Wisane salek agirik, neneyave wisane halok,” yiluk, 10“Nasin ai! An nendawima yoma en eneyave nggigilogo o isugut hunogoma andoma wibisabuk,” yiluk, ane ngges erogo yugogogi.
11Yugugu lagagirik, hulik avema andoma wam wisane buris yilin nagusim werekma, 12it madis akoen “Ai, wam enendawima nungguguluk lakbininin,” yiluk yugogogwa.
13Yugugu lagagwama, At Yesus en “Sek, elales,” yiluk, yugeragagi. “Elales,” yugirigya lagagimu, madis ap endawima en wunggu lagagwarik, wam enendawima nunggugu lagagwama, wam wisane 2.000 hudi o lapik-lapikmu akoma en yulup yagan, inamutmu nunggugu lagagwama, is akoen ndokalipigi.
14Is ndokalipu lagagimu, it wam woginiviluk nelagwi menda ako hoda sak yagan wunggu dugwit, wam is ndokalipigi wene ako o ombokma inim, madukma inim, yugeregek lagu lagagwama, it avakwa akoma en, “Yi nggayok lagamu?” yiluk bigisa wagagwa. 15Yesus adema wagu lagagwarik, ap madis endawima nonggagagi ako, eve ap endawi sek agya lagagirik, yum yikbetaluk werekma, andoma-at horaik hugu lagagwarik, enalon agagwa. 16Enalon agu lagagwama, it endak oklagagi inil hagagwa akoen madis at endawima nonggagagi wene inim wam is ndokalipigi wene inim, mbilinogo yugeragagwa.
17Yugurugu lagagwama, it avakwa akoma en Yesus it enamwa hekbaluk wulupwak yiluk, enane nggengges erogo yugogogwa.
18At Yesus mburis vaga nunggwigiluk ogagya lagagimu, ap madis endawima welagagi akoen, “An ninim lasogom adigat,” yiluk, yugogogi.
19Yugugu lagagimu, At Yesus en, “Dek o. Hat hamwa howa-hasin werekma lagya dogomindik, hat Hasin Ala aigwak aberen sek okhetas ako yugerelak,” yugogogi.
20Yugugu lagagimu, lagya lagagirik, o inis Dekapolis akoma, Yesus ogagagi wene ako yugeregek nagu lagagimu, avakwa ovok erogo vok yagagwa.
Ap Yairus abut inim, hwa Yesus asum vagatigi inim, sek oginipigi wene
(Matius 9:18-26; Lukas 8:40-56)
21Mburis vaga At Yesus ako is ambo elavikit en eyami vaga wulu wagya lagagirik, is embet vaga werekma, avakwa wisane At adema homari wagagwa. 22Homagu lagagwarik werekma, it ap Yakuri samban ogasagwima vagenombogo agarik menda ambi inis Yairus wagya lagagirik, Yesus avema seve yiluk, 23abwa edik abwa edok iri dugwit, “Yesus wai. An nabut hwavyak edup en hambigiluk ogasiga atma, hinggis vakbaluk sek iluk okbanok yiluk, oma o,” hunik adigat yugogogi. 24Hunik adigat yugugu lagagimu, At inim lagagwa.
Iperen lagusim, it avakwa wisane inim lagu dugwit, linggililuk lagagwa. 25Linggililuk lagusim, hwa ambi amuya ogagya helan, 12 tahun ogagagi ako, 26angge-angge ovok erogo dokter-mandiri it ap sek oginivisagwi menda wogirigya lagagimu, sek oknerapwak yiluk ogagu lagagwa ovara, edup ako dek agetek evenuk agya lagagi. 27At hwa akoen Yesus sek oginivit nagu ako aruk hunggu lagagirik, avakwa wisane enanggelekma Yesus ambukmu nunggwigya lagagirik, asum inggis vakbagagi. 28“Asum ninggis vakbagya neyalok, sek oknerayogon o,” imbita lagagirik, inggis vakbagagi.
29Asum inggis vakbagya lagagirik, amuya ogagya lagagi ako dek agya lagagimu, “Namuya ogagya lagi ako yogak andi sek oknitya higi o,” yiluk, imbitigi. 30Imbita hegek, At Yesus akoen, “An nanye ambi dek agya higi,” yiluk, yedok higya lagagirik, avakwa linggililuk wagwi ako, avilimu ambukmu dagalogo biginipu dugwit, “An nasum saen inggis vaknetas?” yiluk, yugeragagi.
31Yugirigya lagagimu, At eyaganggom akoen, “Avakwa linggilik welagao inigin ovara, Hat nggarogo yiluk, saen vakhetamu yagaliga?” yiluk, yugogogwa.
32Yugugu lagagwama, At Yesus il yen woginipu dugwit, “Saen nasum inggis vagatas?” yiluk, yugeragagi. 33Yugirigya lagagimu, at hwa ako “Sek oknetas higi,” imbita lagagirik, alon en owak dede iri dugwit, At avema seve yiluk, at ogagagi ako vagalogo yugogogi. 34Vagalogo yugugu lagagimu, At Yesus en, “Ai, nabut o. Hat hendawi An novaga vanggabaluk, avyarat nembeten vaga sek agen. Sek dogosogon atma, hendawi ugunat elak,” yugogogi.
35Ao yugugu hegek, ap Yairus amwa en wagu lagagwarik, at Yairus ako yugugu dugwit, “Habut ovok hombagarikmu Nenasin ngguru yi sup enam warogo wolok lagun en,” yiluk, yugogogwa.
36Yugogogwa ako Yesus aruk hunggigi ovara, enane hunggitek heda erogo, at Yairus ako yugugu dugwit, “Hendawi An novaga vanggabaluk, avyarat nimbita dogwen. Halon ombarubuk,” yiluk, 37yugugu lagagirik, “It avakwa ugun ninim warubuk,” yiluk, at Peterus inim, Yakobus aot Yohanes iperen inim, Yesus inim enadik lagu lagagwarik, 38ap Yairus ako amwa wagu lagagwarik, avakwa nane-hane yugu dugwit, de wene yugwi, yup yagwi, inugu lagagirik, umwa akoma nonggagagi. 39Umwa nunggwigya lagagirik, yugirigya dugwit, “Hwavyak yi hambegetek, un nogo yiligama, nggarogo yiluk nane-hane yugwi, yup yagwi, ogasagwi?” yugeragagi.
40Yugirigya lagagimu, it akoen At agonda yagagwa ovara, avakwa ovok erogo haryogo wasim wibugu lagagirik, hwavyak asin-isa inim, At aori henggam ako inim, wogonombolok hwavyak werekma akoma nonggagagwa. 41Nunggugu lagagwarik, inggis vagatya dugwit, “Talita hum,”#5:41: Talita hum andi it Aram menda enane. O andi vaga it avakwa akoma Aram enane vaga yugu lagagwa. yugogogi. Eke, nit nenane vaga “Hwavyak yi. Mondok yinok yiluk yukhisiga o,” yiluk, yugogogi.
42Yugugu lagagimu, at hwavyak ako mondok iri lagagirik, amwa akoma nagu lagagi. Hwavyak ako endago hegek, umur 12 tahun welagagi. At nagu lagagimu, avakwa ovok erogo “Wi,” yiluk, vok yagagwa. 43At Yesus en ane anye erogo avakwa enadema yugirigya dugwit, “At hwavyak sek ogagi yi, avakwa yugerabuk,” yugirigya lagagirik, “Erom napwak yiluk wogeres,” yiluk, yugeragagi.
Currently Selected:
Markus 5: nbq2013
Highlight
Share
Copy
Want to have your highlights saved across all your devices? Sign up or sign in
