Markus 4

Ap awi lisilit lagagi wene

(Matius 13:1-9; Lukas 8:4-8)

1Hivis ambi inim inamut Galilea yanggadekma omban vaga wene mamuleragagi. Wene mamulirigya werekma, avakwa iya erogo At adema homagagwarikmu, inamutmu mburis vaga hora yi nonggagagi. Mburis vaga horaik dugwit, it avakwa horok is omban vaga ombok homago wisane-at inigik, 2yi wene ndi wene ovok erogo wene wakhegek vaga mamuleragagi. Wene mamulirigya dugwit, 3“Henaruk holek dogwes, wene ambi yukherayogon!” yugirigya lagagirik, “Ap ambien awi lisiligiluk lagagi. 4Lisilit lagya hegek, nin suvaga wombalit lagagi. Suvaga wombagagi ako andi, swa wagu dugwit, ovok nenggek lagagwa. 5Nin andi wen helep iri vaga wombalit lagagi. Wambigya lagagirik, helep iri vaga wombagagi ako andi, wen ambukumat halok, avuduk inggigi ovara, 6helep iri vaga atma, omanggen sek erogo yago dekma, mo en dis iri lagagirik, mbuk agagi.

7Eke, nin yoangga hedangga aik werek anggelekma wombalit lagagi. Yoangga hedangga aik werekma wombagagi ako, vudanggigi ovara, adok-adok angge ako inggya dugwit, mbalogo wombanggigirikmu enggen yigitek-at welagagi. 8Nin wen mudis vaga wombalit lagagi. Wen mudis vaga wombagagi ako avuduk inggya lagagirik, ombok erogo inggya dugwit, andi okbaluk, enggen yugu dugwit, adem ambien 30 yugu, adem ambien 60 yugu, adem ambien 100 yugu, ogarit lagagi o,” yiluk, yugeragagi.

9Yugirigya lagagirik, “Henaruk werek halok andi, des erogoat henaruk hunggu dogwes,” yugeragagi.

Nano yiluk Yesus wene wakhegek vaga yugeragagi wene

(Matius 13:10-17; Lukas 8:9-10)

10Yugirigya lagagirik, adik werekma, At inim nelagwi menda ako inim, it ap 12 inim, it akoen Yesus hemetugu dugwit, “Hat wene wakhegek vaga yukneregen ako, des erogo yuknerano,” yugogogwa. 11Yugugu lagagwama, At akoen, “At Ala avema bigigaup wene ako At agose endawima hwilago welagagirikmu, vagalogo yukheraliga ovara, it ugun andi, yi wene ndi wene wakhegek vaga yugeraliga o.

12 # Yesaya 6:9-10 yokhanes. Andi:

‘Inil helagwi ovara, yedok hegetek,

enaruk hulisagwi ovara, enendawima dibelagwidek,

enasam helok, yi weyak ndi weyak hekbaguselok,

At Ala en degerogo bagya haoen,’

yiluk, wene atok wakhegek vaga yugeraliga o,” yiluk, yugeragagi.

Wene awi lisilit lagagi ako adem yugeragagi wene

(Matius 13:18-23; Lukas 8:11-15)

13Yugirigya lagagirik, “Wene wakhegek vaga yukhirigi yi, wegetek dugwit, yagalagwi? Wegetek hiniselok, hivis wene wakhegek yukhirigya neyalok nggarogo waup embetep?” yiluk, yugirigya lagagirik, 14“Wene wakhegek ako adem yerogo: At ap awi lisilisiga menda akoen, awi lisilit lagagi ako hak andi, Ala wene Sek Wene yugeregek nelagwi andi aro. 15Eke, awi suvaga wombagagimu swa nenggek lagagwa ako hak, it avakwa ambetap Sek Wene ako hunggu lagagwama, at Sile mbikit wagya lagagirik awi Ala wene enendawima yago ako henogo wolok wilisiga. 16Awi wen helep iri vaga wombagagi ako hak andi, it avakwa nin Sek Wene ako enaruk hunggu dugwit, enendawi adenggen vaga mbikit welagwi ovara, 17wene ako enendawima omanggen segerogo yagetekma, ndugwis ambiat welagarwik, wene wagao ako vaga anggin-mbanggin erogo bugwis, edup-mbedup okbugwis, oginipuselok, ‘Wene yi nenanggon o,’ yiluk, hekbisiluk wilisagwi akoat. 18Awi yoangga hedangga aik werek anggelekma lisilogo wombagagi ako hak andi, avakwa nin Sek Wene enaruk hulisagwi ovara, 19wen vaga menda adigat enendawi anggin vaga wenggelit lagwi, yi menda ndi menda dek arup hegek enendawi wenggelit lagwi, yi menda ndi menda enendawi hogop ombarit lagwi, andi ogarit lendagwi vaga, wene ako sovalogo hekbelagwi atma, andi vaga eyave enggen yiklagetek-at agaruk. 20Eke awi wen mudis vaga lisilogo wombagagi ako hak, andi, avakwa nin wene enaruk des erogo hobaluk, wogogwarikmu, enggen yugu dugwit, adem ambi enggen 30 yugu, adem ambi enggen 60 yugu, adem ambi enggen 100 yugu, ogasagwi o,” yugeragagi.

Lambu yevedogo belagwi wene

(Lukas 8:16-18)

21Yugirigya lagagirik, it yugirigya dugwit, “Lambu yevedogo sogolowak avema baup embetep? Mbanggu avema baup embetep? Dek o. Yevedogo baluk, sigama baup andi sek. 22Anderogo hak, yi menda ndi menda hwilago agarik andi sigam arigiluk, agarik o. Yi wene ndi wene enendawima sovalek agarik ako andi, selekma arupwak yiluk agarik. 23Henaruk werek halok andi, des erogoat hunggu dogwes o.”

24Yugirigya lagagirik, “Hit henaruk hulisagwi ako, henendawi dibagu dogwes. Wakhegek ako vaga wal okhelok, avakwa wogerelagwi ako ndatak, wal okhelok wokhirigya hagup. Andi halok, ambi inim ovaga hondalogo wokhirigya hagup. 25Hit menda ambi agarik halok andi, ambi inim ovaga hondalogo wokhirigya hagup. Eke, hit menda ambi dek halok andi, ambukumat agarik ako haurogo hidigya hagup o,” yiluk, yugeragagi.

Enggen yiliga wene

26Yugirigya lagagirik, “Ala avema bisaup ako andi, ap ambi awi lisilit lagya lagagirik enggen yiliga hak aro.”

27“At ako o hup agya halok nogo yugu, eke o yanggo iri halok, yi ogagek ndi ogagek ogagya, anderogo ogagya hegek awi angge ako avuduk inggya lagarik, adem ombok asiga. Adem ombok asiga andi, nggarogo ombok asiga? At inggut. 28Wen vaga awi lisilik atma, endagen enggen yiliga. Endak andi avuduk dagasiga. Avuduk inggya lagarik, angga mbigalisiga. Angga mbiganggu lagarik enggen yiliga. 29Enggen yugup sok agya halok, mbalup amor agarikmu, ap en enggen yaga vaga mbalisagwi hak andi, nit Ala avema bininaup ako ndatak aro,” yiluk, yugeragagi.

Vudok enggen wakhegek yugeragagi wene

(Matius 13:31-32, 34; Lukas 13:18-19)

30Yugirigya lagagirik, ambi yugirigya dugwit, “At Ala avema bisaup ako andi, nano ndatak wakhaup embetep? At Ala avema bisaup ako ndatak wene wakhegek ngga yukheraik?” yugirigya lagagirik, 31“Dek o. Ala avema bisaup andi vudok enggen hak aro. Yigyo ndigyo enggen ombok hegek, yo vudok enggen andi eve madugat agarik. 32Awi yaguselok, enggen madugat ovara, avuduk inggya dugwit, yi menda ndi menda yavup yagoma dagasiga ako eyave horok madugat hegek, yo vudok ako ombogat inggya lagarik, abwak wiganggu halok, yirwa ndirwa avema andoma enawi valheda nunggwisagwi hak andi, nit Ala avema bininaup ako anderogo ndatak aro,” yiluk, yugeragagi.

33Yesus ako yi wene ndi wene nggarogonggan inilup arupwak yiluk, Ala wene wakhegek vaga yugirigya lagagi. 34Wene selekma vagalogo yugeregetek, wakhegek adigat yugirigya lagagi ovara, it At ane welagwi menda ako andi At inim enadik dugwit, yi wene ndi wene yugeragagi ako mbilinogo yugirigya lagagi.

Havut ako Yesus ane hunggigi wene

(Matius 8:23-27; Lukas 8:22-25)

35Yugirigya lagagirik, o howam agya halok, At Yesus en At ane welagwi menda ako yugirigya dugwit, “Is ambo elavokot lasogom en,” yiluk, yugeragagi. 36Yugirigya lagagirik, it At ane welagwi menda ako avakwa wisane akoma hekbisiluk, At Yesus mburis vaga werekma, adema nunggugu lagagwarik, At inim lagagwa. Mburis nin ogo, inim lagagwa. 37Lagusim o havut endengga ombok wagya dugwit, is legamuk ogagya dugwit, mburis elola akoma is yanggatlari nonggagagi. 38Yanggatlari nunggwigya hegek, At Yesus ako mburis atokma yum unggul didibaluk, nogo yuguma, it akoma en iluk okhugu lagagwarik, “Nenasin ngguru wai. Is vage ndokalninivisiga en, Hat nano yiluk nenabwa hegetek nogo adigat yiliga?” yiluk, yugogogwa.

39Yugugu lagagwama, iluk agya lagagirik, havut ako, “Moga,” mberugu lagagirik, is ako “Havolok dek mbup iru,” yugugu lagagimu, havut inim, is inim avolok dek agagi. 40Dek agya lagagimu, “Hit nggarogo yiluk henalon yagalagwi? Hit henendawi An novaga vanggabaluk, avyarat nembetetek dugwit yagalagwi?” yiluk, yugeragagi. 41Yugirigya lagagimu, it ako enalon agu lagagwarik, ap ambien ap ambi yugigik yugu dugwit, “Eya! Ap yi is inim, havut inim, At ane hulisiga yi sa?” yiluk, vok yagagwa.

Currently Selected:

Markus 4: nbq2013

Highlight

Copy