Markus 3

Ap inggis venak weyak sek okbagagi wene

(Matius 12:9-14; Lukas 6:6-11)

1Hivis it Yakuri samban ogasagwima umwa akoma ap inggis venak vikit anyedek mondok masalek werekma, At Yesus nonggagagi. 2Nunggwigya lagagimu, avakwa ambetap akoma en, “Samban ogasagwi vaga yavup ogarup moga hegek, At Yesus ap inggis weyak ako sek okbagya hamwi a, dek a?” yiluk, enane wonggalogo ovaga baguluk, inil vurek adigat welagagwa. 3Inil vurek werekma At Yesus akoen, ap inggis weyak ako yugugu dugwit, “Mendek yiluk, o ilim yenam oma,” yugugu lagagirik, 4it ako yugirigya dugwit, “Samban ogasagwi vaga sek oginivup andi sek a, ata, weyak oginivup andi sek a? Eneyave inidi yup andi sek a, ata inirup andi sek a?” yugeragagi ovara, enanedek mbup yagagwa.

5Enanedek mbup yugu lagagwama, Yesus endawima en mbet iri dugwit, il dombalinivit lagagi. Il dombalinivit lagya lagagirik, “Enendawi lakot ai,” yiluk, endawi burup iri dugwit, ap inggis weyak ako yugugu dugwit, “Hinggis welalhanen,” yugugu lagagimu, inggis welalhagagi. Inggis welalhigya lagagimu, inggis ako sek agagi. 6Sek agya lagagimu, it Varisi menda akoen wulu wagu lagagwarik, it Herodes menda inim homakbaluk, “Nggarogonggan okbaluk waruk?” yiluk, avok mbinggugwa.

Yesus en avakwa wisane sek oginipigi wene

(Matius 12:15-16; Lukas 6:17-19)

7At Yesus ane welagwi menda ako inim inamut Galilea omban vaga lagu lagagwama, avakwa wisane o Galilea en At inim lagagwa. 8It At Yesus ogarit lagya ako enaruk hunggu lagagwarik, o Yudea en, Yerusalem en, o Idumea en, o Yorodan elavikit en, o Tirus Sidon yi awi ndi awi andoma en, avakwa wisane At adema homari wagagwa. 9Avakwa wisane homari wagu lagagwama, At Yesus en At eyaganggom yugirigya dugwit, “It avakwa wisane atma, An hobabanunggu saoen, mburis ambi An hora yumenda amot okbomanes,” yiluk, yugeragagi. 10At mburis ambi amot okbomanes yugeragagi ako, it avakwa wisane erogo sek oginipigirikmu, it aup warera akoen Yesus ininggis vagaruguluk horok-horok nonggagagwa. 11Horok-horok werekma, it madis enendawima nonggagagwa ako it madis akoen Yesus inil hugu lagagwarik, “Ala Abut Hat aro,” yiluk, na yugu dugwit, yeve-reve yagagwa. 12Yeve-reve yugu lagagwama, At Yesus en ane anye erogo it madis ako yugirigya dugwit, “Hit yedok neyagipikmu avakwa mondok yonggo yugerabuk!” yugeragagi.

Yesus en ap eneyave 12 yanggup yugeragagi wene

(Matius 10:1-4; Lukas 6:12-16)

13Yugirigya lagagirik, At Yesus ako hulikmu inggya lagagirik, akom en inim dogoguluk endawi imbita lagagirik, warupwak yiluk yanggup yugirigya lagagimu, adema homari wagagwa. 14-15Homari wagu lagagwama, it ap 12 ako mondok okbugu lagagirik, wene yugirigya dugwit, “Ninim dambulik dogoguluk, mondok okbigigis o. Eke Ala wene yugurugwi, madis ap enendawima nunggwigya halok, An ninis vaga nggigilogo wibugwis, ogagu dogovovok yiluk, lakbigigaliga o,” yiluk, enogo mondok okbogogi.

16It ap 12 enogo mondok okbogogi ako yi:

at Simon inis hivis Peterus sanggigi ako inim,

17Sevedius aburi Yakobus aot Yohanes inim, ininis andi it enane vaga Boaneges sabogogi, eke nit nenane vaga Unggulane Aburi menda sabogogi, ako inim,

18Andereas inim,

Pilipus inim,

Batolomeus inim,

Matius inim,

Tomas inim,

Alepeus abut Yakobus inim,

Tadeus inim,

at Simon ap Selot#3:18: Ap Selot andi it Yakuri menda enadik dogop ogagu lagagwa menda. menda inim,

19At Yudas Ikariot Yesus hivis warupwak yiluk, wogeragagi ako inim

akoat enogo mondok okbogogi.

Sile Mbelesebul wene

(Matius 12:22-32; Lukas 11:14-23; 12:10)

20Enogo mondok okbisiluk, hivis umwa nunggwigya lagagirik, andoma werekma, avakwa wisane At adema homari wagu lagagwama, Yesus At ane welagwi menda inim erom naup meyanat agya lagagimu, 21avakwa en “Ap yi nenek yagan naliga yi, wi!” yugu lagagwama, At owa-aot enaruk hunggu lagagwarik vagaruguluk lagagwa.

22Vagaruguluk ogagusim, it Ala wene vagago welagagwa menda ako o Yerusalem en wagu lagagwarik, “Ap yi madis enasin Sile Mbelesebul endawima nonggagagi. Madis enasin anye ako vaga At madis nggigilogo wibisaliga,” yiluk, yugu lagagwa.

23Yugu lagagwama, At Yesus en it avakwa warupwak yiluk, yanggup yugirigya lagagirik, At adema homari wagu lagagwama, wene wakhegek yugirigya dugwit, “At Sile atma, avakwa enendawima nonggagagi andi, at Sile nggarogo wibaup embetep?” yiluk, yugeragagi. 24Yugirigya lagagirik, “Ap enowa o vagago ambi at avema agarwik inim ir-it ogot baluk, adik-adik wungguselok andi, sek dogosogombuk, weyak lasogon. 25Eke, it o yapwi ambiat agarwik atma, ir-it ogot baluk, adik-adik wungguselok andi, enawi yapwi andi sek dogosogonbuk. O ako um-at arisogon. 26Andi halok, at Sile inim at avema agarwik menda inim, ir-it ogorek dugwit halok, dambulik dogosogombuk. Ovok degat arisogon o,” yiluk, yugeragagi.

27Yugirigya lagagirik, “Ap anye werek ambi aninis wisane heda magetek hegek, at angge ndiyali nunggup meyan. Heda makbaluk ndiyali nunggup andi ndak,” yugeragagi.

28-29Yugirigya lagagirik, “An wene avyarat ambi yukherayogon o. Avakwa yi weyak ndi weyak ogasagwi inim, avakwa enane wiyiknom-weyaknom erogo biselagwi inim, it enomaduk andi, Ala en degerogo bisaup ndak ovara, Averiniki wiyiknom-weyaknom erogo baguselok, At Ala en enomaduk andi mondok degerogo bisayogonbuk. Andi vaga weyak enovaga mondok dinggilik-at dogosogom o,” yiluk, yugeragagi. 30(Anderogo yugeragagi ako, iren, “Madis endawima nonggagagi,” yagagwa halok, At anderogoat yugeragagi.)

Yesus isa inim, aori inim wagagwa wene

(Matius 12:46-50; Lukas 8:19-21)

31Anderogo yugirigyama, At isa inim, aori inim, wagu lagagwarik, wamu andenam mendek dugwit, “Yesus wulu warupwak yiluk, yugeres,” yugeragagwa. 32Yugurugu lagagwama, it avakwa wisane At adema homago horaik welagagwa akoen, “Yesus wai. Hisa inim, haori inim, wamu dugwit, habyam agarwik,” yugogogwa.

33Yugugu lagagwama, At Yesus akoen, “An hinya andi, An naori andi, sani embetep?” yugirigya lagagirik, 34At adema horaik welagagwa ako il yambenipu dugwit, “Dek o. An hinya-naori andi, hit heneyave yiat. 35Sanien Ala endawi ombasiga wane-wane ogaguselok andi, hinya-naori andi it aro,” yiluk, yugeragagi.

Currently Selected:

Markus 3: nbq2013

Highlight

Copy