Markus 1

1At Yesus Keretus #1:1: Inis Keretus adem andi Ala en avakwa enagap wendarupwak yiluk enogo lakba wagagi. Ala Abut en o endak ogagagi wene sek menda ako yusogom.

Ap Yohanes ima wombabisaliga menda yonggo endak lakba wagagi wene

(Matius 3:1-12; Lukas 3:1-18; Yohanes 1:19-28)

2 # Maleakhi 3:1 yokhanes. O endak erogo, Yesus ao wagatek hegek, at navi Yesaya Ala wene yugirigya lagagi akoen Sek Wene yugirigya dugwit:

“At Ala en ‘Hat laup sup yarogo bagapwak yiluk,

Anen nayonggo endak ambi lakbagya neyayogon o,’

3 # Yesaya 40:3 yokhanes. Ap ambi o harumu avakwa dekma andoma dugwit, yanggup iri dugwit:

‘Nenowa Inis Ombok At warup sup sek erogo yagwi,

At lagya dogop sup amorerogo yagwi,

ogagu dogones,’ yagagi,”

Yesaya en dirup watigi.

4Dirup watigi ako wane-wane ap Yohanes avakwa ima wombabisaliga menda o harumu avakwa dekma andoma wagagi. Wagya lagagirik, avakwa yugirigya dugwit, “At Ala en hit weyak ogasagwi ako degerogo bigigapwak en, henasam helok, weyak ako nggelabisines. Nggelabugu hiniselok ima wombabigigayogon,” yiluk, yugirigya lagagi. 5Yugirigya akoma, werekma, it yi ap ndi ap o Yudea inim, Yerusalem menda inim, ovok erogo at Yohanes adema wagu lagagwarik, it weyak ogagu lagagwa ako vagangguselok, at Yohanes en is Yorodan ima wombabugu lagagi.

6At Yohanes ako wam unta iris vaga asum manggadogo yikhidigya, eke agamut vaga amboranis yikhidigya lagagi. At agarom ako idam inim, somok amburup inim, ninggya lagagi. 7It ako yugirigya dugwit “At hivis nambetaga warisogon andi, ap ombok aro. Eke an andi maduk atma, At aropato sovalek dugwit anen nggolalup andi meyan. 8An un ivaga wombabigigaliga ovara, At andi, Averiniki henovaga bigigagiluk warisogon,” yugirigya lagagi.

Yohanes en Yesus ima wombabagagi wene

(Matius 3:13-17; Lukas 3:21-22)

9At Yohanes en ima wombabuguma, At Yesus o Galilea kota Nasaret en adema wagagi. Wagya lagagimu at Yohanes en is Yorodan ima wombabagagi. 10Wombabagya lagagimu At Yesus ima en mondok iri dugwit, mbogot elo heyarogo Averiniki swa suwa ovagak wigak yagan At ovaga wambu wagya hagagi. 11Higya lagagimu, At Ala ane mbogot vaga en iri dugwit “Hat Nabut nendawi hunik atma, nendawi adenggen ogagya heyagi o,” yagagi.

Sile en Yesus avut mbanggigi wene

(Matius 4:1-11; Lukas 4:1-13)

12Iri lagagimu, Averiniki en Yesus wolok o harumu avakwa dekma lagagi. 13Werekma, at Sile en endawi avut mbanggu hegek, ndugwis 40 hudi, swa-bagas inim enamwa andoma welagagi. Inim werekma it malaikat mbogot vaga yonggo nelagwi menda en wagu lagagwarik, inim dugwit endawi aik wakbagwi, yonggat-hugwi, ogagu lagagwa.

Yesus o Galilea lagagi wene

(Matius 4:12-17; Lukas 4:14-15)

14Andi okbaluk, at Yohanes ako heda magago lembaga mabagagwa. Mabagu lagagwama At Yesus o Propinsi Galilea Ala wene Sek Wene ako yugeregek nagu lagagi. 15Yugirigya dugwit, “At Ala ogarup endawi imbitigi ako vage atma ari waga o. At Ala avema bigigaup ako vage horok ari wagarikmu, hit weyak ogasagwi ako henasam helok nggelabisines. Nggelabugu dogomundik Sek Wene ako henendawi avyarat umbutu dogwes o,” yiluk, yugeregek nagu lagagi.

Yesus en ikan wasagwi menda eneyave 4 yugeragagi wene

(Matius 4:18-22; Lukas 5:1-11)

16Yugeregek nagu lagagirik, inamut Galilea imbilimu lagya dugwit, at Simon aot Andereas inim ikan wasagwi menda atma, yum yarin ikan wasagwi menda ikan waruguluk ima wombabagusim, At Yesus en il enogogi. 17Wombabagwi il inugu lagagirik, yugirigya dugwit, “Avyak yoma wai. Hit ikan belalogo wasagwi andi hak, avakwa belalinivit nagu dogop mamulheragiluk, ninim lasogom en omanes o,” yiluk, 18yugirigya lagagimu yum yarin ikan wasagwi menda hekbaluk mbikit Yesus inim lagagwa.

19Horok andoma-at lagya lagagirik at Sevedius aburi Yakobus aot Yohanes inim, enasin inim, mburis vaga dugwit yum yarin ikan wasagwi menda sek erogo manggatwis ako il inugu lagagirik, 20mbikit, “Ninim lasogom en, omanes,” yiluk, yugeragagi. Yugirigya halok, it enasin Sevedius eyaganggom inim mburis vaga andoma hekbisiluk Yesus inim lagagwa.

Madis ako Yesus ane hobaluk ap endawima en winggigi wene

(Lukas 4:31-37)

21It ako inim lagu lagagwarik, o Kapernaum nonggagagwa. Nunggugu lagagwarik, it Yakuri samban ogasagwima akoma, At Yesus samban ogasagwi vaga nunggwigya lagagirik, wene mamuleragagi. 22It At ane enaruk hunggu lagagwarik, ‘Ap yi wi!’ yiluk, vok yagagwa. “At ap yi it Ala wene vagago agarwik menda en yagalagwi wane-wane dek o, ata At endawi werek dugwit ane anye vaga mamulneraliga yi, wi!” yiluk, vok yagagwa.

23At wene mamulirigya hegek, ap ambi madis agoda werek endawima nonggagagirikmu, it ap Yakuri samban ogasagwima akoma nunggwigya lagagirik, 24naik hunik iri dugwit, “Yesus wai, Hat ap Nasaret menda nggarogo okbininagiluk wagen? Hat dek okbininagiluk wagen a?” yugugu lagagirik, “Ala Abut weyak ogasigadek mondok sek adigat enek menda heyave an nilup,” yugogogi. 25Yugugu lagagimu, At Yesus en mberugu dugwit, “Hat hanedek, wilin!” yiluk, 26yugugu lagagimu, at madis ap endawima nonggagagi akoen eyave wuruk-wuruk dede iri dugwit, naik iri lagagirik, nggigilogo winggigi.

27Wunggu lagagimu, it ovok erogo “Ayai” yiluk, enalon wisane agu lagagwarik, at ambien at ambi yugigik yugu dugwit, “Avyak. Nggarogonggan winggas? Wene adik swi mamulik ane anye vaga ‘Wilin,’ yugugu halok, madis agoda werek ako endawi hobaluk ap endawima en winggas,” yagagwa. 28Yugu lagagwarik, Yesus ogagagi wene ako yiluguluk o Galilea avilis ambot akoma wigak yagagi.

Yesus en avakwa wisane sek okbogogi wene

(Matius 8:14-17; Lukas 4:38-41)

29It Yakuri samban ogasagwima en wulu wagu lagagwarik, Yesus inim Yakobus Yohanes inim, it Simon Andereas enamwa nonggagagwa. 30Nunggugu lagagwama, at Simon ogwa isa aup edup hali vago hak nggilik werekma, Yesus yugogogwa. 31Yugugu lagagwama, At Yesus hwa ako adema lagya lagagirik, inggis vagago mondok okbagagi. Vagago mondok okbagya lagagimu, hwa ako sek agya lagagirik, enake ogagya lagagi.

32O howam mo huruk irisim it avakwa andoma en, it aup warek menda inim, madis enendawima werek menda inim woginiviluk Yesus adema lagagwa. 33It avakwa andoma menda ovok erogo sup mbanggutmu mbumbumu homagagwa. 34Homagusigik, At Yesus en avakwa yi aup ndi aup adik-adik menda akoma ovok erogo sek okbugu, avakwa madis enendawima werek menda akoma nggigilogo wibugu, ogagagi. It madis ogo At Yesus inilup atma, At Yesus en “Hit henanedek mbuverek dogwes!” yugirigya lagagimu, enanedek wunggugwa.

Yesus o Galilea Sek Wene yugeregek nagu lagagi wene

(Lukas 4:42-44)

35O yanggo yigiluk o hwis okbaliga andi vaga, Yesus iluk agya lagagirik avakwa dekma andoma samban ogari winggigi. 36Samban ogagya akoma werekma, at Simon aswei inim belalit lagu dugwit, At eyave hagagwa. 37At eyave hugu lagagwarik, “Hat ako aroma heyagek it avakwa ovok erogo Hat heyave belalhetek nelagwi!” yugogogwa.

38Yugugu lagagwama, At Yesus en “Ap enawi o adik-adik andoma yugeregek lagiluk wagirikmu, lasogom o,” yiluk yugirigya lagagirik, 39o Galilea avilis-ambot andoma it ap Yakuri samban ogasagwima yugeregek nagu dugwit, madis enendawima werek menda halok, nggigilogo wibisilin nagu lagagi.

Yesus en ap amu hunik werekma sek ogagagi wene

(Matius 8:1-4; Lukas 5:12-16)

40Ogarit naguma ap amu hunik welagagi ambi erambo yunggup erogo Yesus avema hora yi lagagi. Hora iri lagagirik “Haren an sek okbanup imbita heyalok sek okbanin o,” yiluk, nggino yugogogi.

41Yugugu lagagimu, At Yesus en abwa imbita dugwit inggis ovaga vagago, “An sek okbagaup himbitirikmu, heyave sek aru!” yiluk, 42ao yugugu hegek, amu ako dek agagi. Dek agya lagagirik, sek agagi.

43-44 # Imamat 14:1-32 yokhanes. Sek agya lagagimu, At Yesus ane anye erogo yugugu dugwit, “Avakwa yugerabuk. At ap imam#1:43-44: It ap imam-imam ako Agama Yakuri vagago welagagwa. It avakwa Yakuri menda en wam ndomba a, kambin a, swa a, Ala ake baguluk wolok waguselok, it ap imam-imam akoen, Ala ake yiluk, warogo hali napwak yiluk, hali hunbagu lagagwa. ako hat avyarat sek aga andi il heyapwak yiluk adema elak. Hat sek okbagagirikmu, at Musa en ‘Ala ake anderogo bagu dogop o,’ yiluk, yagagi ako it avakwa bagya heyapwak yiluk, Ala ake balak,” yiluk, aruk warogo lakbagagi. 45Aruk warogo lakbagagi ovara, ap ako amwa akoma en wunggu lagagirik, at sek okbagagi wene ako ovok erogo yi awi ndi awi vagalogo yugeregek lagagi. Vagalogo yugeregek lagya lagagimu, At Yesus ako o kota yi awi ndi awi andoma selekma nagu dogop meyan agya lagagimu, avakwa dekma lagya lagagirik werekma, avakwa yi awi ndi awi andoma en At adema homari wagek ogagu lagagwa.

Currently Selected:

Markus 1: nbq2013

Highlight

Copy