Matius 28
28
Yesus natuwu nculi
(Mrk. 16:1-8; Luk. 24:1-12; Yoh. 20:1-10)
1Naliupi eo Pentuua to Yahudi, parabaa eo pamulana mingku ee mai, rauramo Maria Magdalena pade Maria to ntanina nampahilo dayo Yesus. 2Ngkali naratami linu bohe habana hadua malaeka Pue nehompo lako langi rau nampadulia watu bohe powunta dayo Yesus, pade noncunami malaeka ee mai i lolo watu ee. 3Lencena nabaa ewa kila pade waruna nabula ngkihi. 4Tantara-tantara to nampodoo dayo ee mai nokaridi purara pade nawali ewa to mate keni ekara.
5Naupawee malaeka ee mai nangulikara bangkele ee, “Nemo komi maeka, apa laincaniku ane komi tumai nampali Yesus to laisalib ee. 6Moma-'I naria i hei bo, apa laipakatuwu nculi-'Imi, ewa to laiuli-Na amimi wengi. Mai hilo motomi podulea wataloka-Na. 7Aji, dungku koimo komi mangulikara ana guru-Na ane laipakatuwu nculi-'Imi lako lentongora to mate pade poilodoka-Namo komi rau i Galilea. I riadimi mei pade mihilo-'I. Linga napa to laiulikaku komi ei.”
8Dungku neongkoramo lako dayo ee mai. Naekara naupawee nagoe mpuu rarara, pade nokumenoramo rau mangkewokara ana guru Yesus.
9Lentongo dala ngkali naratami Yesus nampotomukara pade nanguli, “Tabe hi komi.” Laimohukira-'I, laikapuira paa-Na nampasombaa-'I. 10Yesus nangulikara, “Nemo maeka. Koimo komi pade ulikaramo ompi-ompi-Ku, bona raura i Galilea. I riara mei mampahilo-'A.”
Kalowo imam-imam to i matana
11Bulara bangkele ee i lentongo dala, bahangkua dua to nampodoo dayo Yesus nanculi rau i rara ngata pade nangkewo humawee to nadupa hi imam-imam to i matana. 12Pangepera lauria, imam-imam to i matana ee mai nolibu hante totua-totua ngata to Yahudi, pade laibotuhira bona to nampodoo dayo eera mai rawaikara madea doi. Lauparia laiwaika mpuuramo to nampodoo dayo ee doi 13pade iulikara, “Kana miuli iwei, ‘Ana-ana guru-Na narata ntongo bengi pade nampangio wataloka-Na bula kami naleta.’ 14Ane naepe gubernur mei kareba ei, kamidimi mampojaritaka'i bona nemo komi nahuku.” 15Lauparia laitarimarami doi ee pade laituturarami ewa to laibohakara. Tutura ee mai notolele hi to Yahudi duu ei mai.
Parenta mopatudu humawee tauna mawali to pantuku Yesus
16Napu ee to hampulu hadua ana guru Yesus ee mai neongko rau Galilea, i bulu to naria amimi laiulika-Nara Yesus. 17Hangka laihilorapi Yesus, laisombaarami. Naupawee nariara to nokarara. 18Yesus nampamohukira, pade iuli-Na, “Humawee baraka i huruga bo i dunia laiwaika hi Akumi. 19Etumo, koimo komi i humangkulili dunia pade patuduramo tauna i humawee ngata mawali to pantuku-Ku. Diura rara hanga Alatala Tuama, Ana-Na pade Inoha to Nagaha. 20Pade patudura mantuku humawee to laiparentaka-Ku komi. Bona mincani, Kupodohe moto oa komi duu kahudua dunia.”
Currently Selected:
Matius 28: MYL
Highlight
Share
Copy
Want to have your highlights saved across all your devices? Sign up or sign in
