Matius 13
13
Porapa nangkambelai hadua to pohawu
(Mrk. 4:1-20; Luk. 8:4-15)
1Eo ee mui, nehuwumi Yesus lako hou ee pade rau noncuna i wiwi rano mopatudu todea. 2Nadea mpuu tauna nahiromu i humpii Yesus, etu pade raumi Yesus nengkahe i hangu duanga pade noncuna i hee, bo tauna to nadea ee mai nokangkore i wiwi rano motora.
3Yesus nopatudu nadea ngaa hi hira hante porapa. Iuli-Na, “Naria hadua to pohawu rau nohawu. 4Tempona nohawu, habagia hawuana nanawu i wiwi dala pade naratami tonci nantilo hawua ee duu kaapuna. 5Naria mui hawuana to nanawu i tana to nawatua to moma nadea tanana. Hawua ee mai nahomi potumena apa nanipi moto tanana. 6Naupawee neinopi eo, nalaumi tinuda ee pade nabangi, apa moma nandala polarina. 7Habagiana mui nanawu i lentongo dunumpu rui. Dunumpu rui ee mai neumba nampabungu'i. 8Habagia mui hawuana nanawu i tana to narudu. Hawua ee mai natuwu duuna nowua. Kadea wuana, naria to hatu ngkani, ono mpulu ngkani, pade tolu mpulu ngkani. 9Hema to natalingaa, epe belo to iuli-Ku lauria.”
10Napu ee, narataramo ana guru-Na nampekune-'I, “Napa pade nampake porapa-Ko nopatudura?”
11Nehono Yesus, “Komi laiwaika Alatala noto mangincani napa to ipopalerui nangkambelai bewa Alatala noparenta halaku Magau. Naupawee hira, momara laiwaika-Na noto. 12Apa, hema-hema to mantarima pade manturuhi lolita Alatala, Alatala mampatambaiki napa to incanira duuna rapahara mpuu patuju Alatala. Naupawee hema-hema to moma madota mantarima pade manturuhi lolita Alatala, ane maria nau hodi aga to incanira kana ra'ala lako hi hira. 13Etumile habana pade laipatudu-Kura hante porapa. Apa naupa nehilora, moma incanira napa to ihilora. Pade naupa ne'epera, moma incanira napa to iepera pade momara nengkao. 14#Yes. 6:9-10Apa hi hira laipaganaimi peboha Alatala to laiparata nabi Yesaya owi to nanguli iwei,
‘Komi mei me'epe hante talingami,
naupawee moma mipaha napa to iepemi.
Komi mei mehilo hante matami,
naupawee moma komi mengkao napa to ihilomi.
15Habana nakoomi rarara tauna ei,
nantomomi talingara ne'epe,
pade tungkai pirira matara.
Ane moma iwee ingkura, mamala rahilora napa to nadupa,
mamalara me'epe bo mampaha batuana,
mamalara mampaha napa to nakono,
alaana megolira hi Aku pade Aku mampakaurira.’ ”
16Napu ee laipadola-Na Yesus nangulikara ana guru-Na, “Norahi mpuu komi, habana komi nehilo pade ne'epe. 17Mpuu-mpuu Ku'ulika komi, nadea nabi pade tauna to nanoro i tingoo Alatala owi mingki mampahilo napa to laihilomi, naupawee moma'i laihilora, pade mingkira mangepe napa to iepemi, naupawee moma'i laiepera.
18Etumo, epemi batua porapa nangkambelai to pohawu ee. 19Hawua to nanawu i wiwi dala, batuana: Tauna to nangepe lolita nangkambelai bewa Alatala noparenta halaku Magau, naupawee moma'i laipahana, alaana naratami Magau Heta namparampaki lolita ee lako rara pekiri tauna ee. 20Hawua to nanawu i tana to nawatua, eemi tauna to nangepe lolita ee pade dungku itarimana hante goe rarana. 21Naupawee, moma'i nolari hampena hangoni'i aga nantaha. Hangka laipakaheha pade laiduahi'i habana lolita ee, dungku laihapuakanami peparahayana. 22Hawua to nanawu i tana to laikatuwui dunumpu rui, eemi tauna to nangepe lolita ee mai, naupawee kamere rara nangkambelai katuwua i rara dunia pade pebagiu kahugia nampaupi lolita ee hampena moma naria bununa i rara katuwuara. 23Hawua to nanawu i tana to narudu, eemi tauna to nangepe lolita Alatala pade laipahana hampena nadea mpuu wuana to nabelo i rara katuwuana. Kadea wuana, naria to hatu ngkani, ono mpulu ngkani pade tolu mpulu ngkani.”
Porapa nangkambelai dono to natuwu i olo gando
24Yesus nampotuturakara hangaa porapa ntanina. Iuli-Na, “Poparentaa Alatala ee, ewa hadua tauna to nohawu hawua to nabelo i bonena. 25Naupawee bula humawee tauna naluru, naratami balina nohawu wua dono i olo gando ee, pade raumi. 26Gando ee natuwu pade nowuli, bo neumba muimihawo dono ee.
27Lauparia narataramo batua tumpu bone nepekune hi maradikara iwei, ‘Apa moma hawua to nabelo'i laihawumu i bonemu? Lako rima'i dono ee?’
28Nehono'i tumpu bone ee, ‘To nohawu wua dono etu tauna to nampobalita.’
Lauparia nepekuneramo batuana hi hia, ‘Ane wetu, madotako rau kiwuka dono ee?’
29Naupawee, nehono maradikara ee, ‘Nemo, apa ane miwuka mei dono etu, baka maria mei gando mipohiwuka. 30Palelemi gando hante dono etu matuwu hingkani-ngkani duuna marata tempona rasangki. Tempo ee mei Ku'ulikaradamo to posangki: Palimpuru olu dono etu pade pou hampou-hampou bona rapapuhi. Napu ee, pade mipalimpurudi gando etu, miboli rara gampiriku.’ ”
Porapa nangkambelai beha sesawi pade ragi
(Mrk. 4:30-34; Luk. 13:18-21)
31Yesus nampotutura mui porapa ntanina hi hira. Iuli-Na, “Poparentaa Alatala ewa beha sesawi to laihawu hadua tauna i bonena. 32Beha sesawi ee mai neliu kanetena lako beha uta ntanina. Naupawee ane matuwudimi meliupi kabohena sesawi ee hante uta ntanina. Sesawi ee natuwu ewa hampuu kau hampena tonci-tonci namala nodumu i pengana.”
33Naria muipi hangaa porapa ntanina laitutura Yesus hi hira, iuli-Na, “Poparentaa Alatala ewa ragi to laiala hadua bangkele pade laigalona i rara tolu mpulu kilo labu gando, hampena labu gando ee newoke.” 34Humawee patudu Yesus lauria laiuli-Na hi todea hante porapa. Moma naria patudu to laipatuduka-Nara todea ee mai ane moma-'I nampake porapa. 35#Mzm. 78:2 Lauria nopaganai napa to laiuli nabi owi iwei,
“Mojarita-'A hi hira hante porapa,
pade hante porapa aga Kupatudura nangkambelai napa to laipopalerui Alatala hinungkai dunia laipajadi.”
Pobatuani porapa nangkambelai dono i olo gando
36Napu ee laipalahi-Naramo Yesus tauna to nadea ee, pade nanculimi rau i hou po'ohaa-Na. Lauparia, narataramo ana guru-Na pade nangulika-'I, “Kewoka kami batua porapa nangkambelai dono to i bone ee.” 37Nehono Yesus, “Tauna to nohawu hawua to nabelo ee mai, Ana Manuhia. 38Bone ee mai, dunia ei. Pade hawua to nabelo ee mai, todea i rara poparentaa Alatala. Dono ee mai to pantuku Magau Heta. 39Bali to nohawu dono ee mai Magau Heta. Eo posangkia ee mai eo kahudua dunia, pade to posangki eera malaeka Alatala.
40Aji, ewa dono ee mai laipalimpuru pade laipapuhi rara apu, wee moto mui mei to madupa i eo kahudua dunia. 41Ana Manuhia mei mantudura malaeka-Na rau hi todea rara poparentaa-Na pade mopalimpuru humawee tauna to nampakadoha tau ntanina pade humawee tauna to nadaa ingkura lako lentongo todea-Na. 42Malaeka eera mei motene humawee tauna ee mai i rara apu naraka. I riami potantangia pade kapepaa. 43Tempo eemi mei tau-tauna to nanoro i tingoo Alatala mewanta ewa eo i rara poparentaa Tuamara. Hema to natalingaa, epe belo to iuli-Ku lauria.”
Porapa nangkambelai gagu to laitana i rara pampa pade mutia to nahuli olina
44“Poparentaa Alatala ee mai, lairapaika ewa gagu to laitana i rara pampa. Hangkani tempo, hadua tauna nampahuma gagu ee, pade laitanana nculi. Keni kagoena, rau laipobaluna humawee gaguna, pade laiolinami pampa ee.”
45“Poparentaa Alatala ee mui, lairapaika ewa hadua to pobalu-balu to nampali mutia to naramba. 46Pamparatana hangu mutia to neliu mpuu kahuli olina, raumi nobalu humawee gaguna, pade nangoli mutia ee.”
Porapa nangkambelai jala
47“Poparentaa Alatala ee mui lairapaika ewa jala to laitene i rano mampahoko nadea ngaa bau. 48Naponupi jala ee mai, laidiirami rau i wiwi rano. Napu ee noncunaramo nampelihi bau. Bau to nabelo laibolira i rara karanci bo bau to moma nabelo laitadira.
49Ewa ee moto mui i eo kahudua dunia. Malaeka-malaeka mei marata pade mopatanira tauna to nadaa ingkura lako hi tauna to nanoro ingkura i tingoo Alatala. 50Napu ee, malaeka eera mei motene humawee tauna to nadaa ingkura i rara apu naraka. I riami potantangia pade kapepaa. 51Laipahami purami humawee porapa to laiulika-Ku komi?”
Nehonora, “Io, laipaha kamimi.”
52Napu ee Yesus nangulika muira, “Ane to nataualu buku Taurat nawali to pantuku-Ku i rara poparentaa Alatala, laincanina patudu Alatala to nahae pade laincanina mui patudu Alatala to nabou. To nataualu buku Taurat ee mamala rarapaika ewa hadua tumpu hou to nampopehuwu lako rara houna gagu to nahae bo gagu to nabou.”
Yesus moma laitarima i Nazaret
(Mrk. 6:1-6; Luk. 4:16-30)
53Nahudupi Yesus nampotutura porapa-porapa lauria, neongkomi lako hee, 54pade rau i Nazaret ngata-Na moto. Karata-Na i Nazaret laipatudu-Nara to Nazaret ee i hou pepueara. Namangka pura tauna nangepe-'I nopatudu, pade iulira, “Lairata-Na lako rima muihawo Tauna ei noto pade baraka nobabei to nepakahera? 55Apa moma Hia ei mai ana tuka-'I? Apa moma hanga tina-Na Maria, pade ompi-Na balailo hira Yakobus, Yusuf, Simon pade Yudas? 56Apa moma humawee ompi-Na bangkele no'oha doheta heira? Lako rima muihawo lairata-Na humawee noto pade baraka lauria?” 57Lauparia, nahaumi rarara pade momaramo nadota nantarima-'I.
Naupawee Yesus nangulikara, “Hadua nabi laibila i rima-rima ngata karauana, naupawee i ngatana bo i houna moto moma'i laibila.”
58Moma nadea ngaa to nepakahera laibabei Yesus i Nazaret apa momara neparahaya.
Currently Selected:
Matius 13: MYL
Highlight
Share
Copy
Want to have your highlights saved across all your devices? Sign up or sign in
