Lukas 4

Yesus laipehori i tongo mpada to nabai

(Mat. 4:1-11; Mrk. 1:12-13)

1Palahi-Napi Yesus Ue Yordan, Hia naponu hante Inoha to Nagaha. Inoha to Nagaha ee mai nangkeni-'I rau i tongo mpada to nabai. 2I ria-'I no'oha opo mpulu eo kahaena, pade laipehori Magau Heta. Moma napa laikoni-Na hampena naoromi tai-Na. 3Lauparia nojaritami Magau Heta hi Yesus, iulina, “Ane Ana Alatala-Ko, ulikami watu ei mawali roti.”

4 # Ul. 8:3 Yesus nampahonoi'i, “Moma! Naria laitulihi rara Buku to Nagaha, ‘Moma wuwu roti to nampakatuwu manuhia.’ ”

5Napu ee, Magau Heta nangkeni Yesus nengkahe rau i kalangkoana pade hampiniri mata nampahiloi-'I humawee kamagaua i dunia. 6Nojarita muimi Magau Heta, “Kuwaika Iko purami humawee baraka hante kahugia lauria, apa humaweena lauria laiwaika akumi pade aku mampawaika hi hema to kupodota. 7Aji, ane madota-Ko motingkodu mepue hi aku, humawee lauria Iko purami mangkami.”

8 # Ul. 6:13 Iuli-Na Yesus, “Naria laitulihi rara Buku to Nagaha, ‘Iko kana mepue hi Pue Alatalamu pade hi Hiako aga meturuhi.’ ”

9Napu ee Magau Heta nangkeni Yesus rau i Yerusalem pade nampopokangkore-'I i lolo wumu Hou Alatala, pade laiulikana-'I, “Ane Ana Alatala-Ko, pengkanawumo-Ko lako hei, 10#Mzm. 91:11-12apa naria laitulihi rara Buku to Nagaha nangkambelai Iko,

‘Alatala mei mantudura malaeka-Na mampodoo-Ko,

11mamparade-Ko hante palera

bona paa-Mu nemo mambela watu.’ ”

12 # Ul. 6:16 Nehono mui Yesus, “Naria mui laitulihi rara Buku to Nagaha, ‘Nemoko mampehori baraka Pue Alatalamu!’ ”

13Nahudupi Magau Heta nampehori Yesus hante humawee pehori lauria, nekangkaurami Magau Heta pade nampopea loga belona.

Yesus nanculi rau Galilea

(Mat. 4:12-17; Mrk. 1:14-15)

14Rara baraka Inoha to Nagaha nanculimi Yesus rau i tana Galilea, pade kareba nangkambelai Hia notolele i humangkulili tana Galilea. 15Hia nopatudu i hou-hou pepueara to Yahudi pade humawee tauna nampaune-'I.

Yesus moma laitarima i Nazaret

(Mat. 13:53-58; Mrk. 6:1-6)

16Raumi Yesus i Nazaret ngata kabohea-Na. Ewa kabiahaa-Na, tempo eo Pentuua to Yahudi Yesus rau i hou pepuea pade nokangkore mobaha Buku to Nagaha. 17Laiwaika-'I buku to laitulihi Nabi Yesaya, pade laibole-Nami buku ee pade namparata pobahaa to laitulihi iwei,

18 # Yes. 61:1-2 “Inoha Pue naria hi Aku,

habana Hia nampaongko-'A moparata Kareba Belo hi tauna to nakahiahi.

Hia nampahuro-'A mangkarebai ane tauna to itawani rabakaharamo,

pade mampakauri matara tauna to naburo,

mampabakahara to laipobatua,

19pade mangkarebai ane temponami Pue mampakahalama todea-Na.”

20Nahudupi laibaha-Na, lailulu-Nami Buku to Nagaha ee, laiwaika-Na nculi hi to popanimpu pade noncunami. Humawee mata tauna to i hou pepuea ee nampenoto belo-'I. 21Napu ee, nopamulami Yesus nojarita, iuli-Na, “Welau ei pangepemi lolita lauria, laipaganaimi napa to laitulihi i rara Buku to Nagaha ei mai.”

22Humawee tauna to i hee nampemakono-'I bo nahera hante jarita belo to nahowa lako ngudu-Na. Pade nonepekuneramo, “Apa moma Hia ei mai ana Yusuf?”

23Lauparia, iulika-Nara Yesus, “Natantu amimi miulika-'A jarita ei, ‘Dokutoro, pakauri woto-Mu moto. Babeimi i ngata-Mu hei mui humawee to nepakahera to iepe kami laibabei-Mu i Kapernaum.’ ” 24Napu ee iuli-Na mui, “Mpuu-mpuu Ku'ulika komi, moma naria nabi to laitarima i ngatana moto. 25#1Raj. 17:1, 8-16Pade nakono mpuu to iuli-Ku ei: Nadea bangkele to nabalu i Israel tempo katuwu Elia, tempona moma naria uda tolu mpae ono mula kahaena hampena oro mpai nerumpa nahobo i Israel. 26Elia moma laihuro rau mampatulungi hadua lako hi hira bangkele to nabalu i Israel, naupawee hia laihuro rau nampatulungi hadua bangkele to nabalu to moma Yahudi i ngata Sarfat i tana Sidon. 27#2Raj. 5:1-14Wee moto mui tempo katuwua Nabi Elisa, nadea tauna to nohaki kusta i Israel. Moma hema haduaa laipakauri, wuwu Naaman to Siria aga to laipakauri.”

28Pangepera lauria, nahodo mpuura humawee tauna to i rara hou pepuea ee mai. 29Lauparia, neongkoramo nampopetibo Yesus lako ngata ee pade laikenira-'I rau i kabingkeana mpuu i wiwi pongataara ee bona ranawura-'I. 30Naupawee, Yesus nantara ntongora pade nampalahira.

Yesus nopatudu pade nampopalai anudaa i Kapernaum

(Mrk. 1:21-28)

31Napu ee raumi Yesus i Kapernaum, hangu ngata i Galilea. I hee-'I nopatudu i rara hou pepuea tempo eo Pentuua to Yahudi. 32Nahera purara nangepe popatudu-Na, apa Hia nopatudu halaku tauna to nabaraka. 33I hou pepuea ee, naria hadua to laipehua anudaa nongare narimboho, iulina, 34“He, Yesus to Nazaret, napa uruhia-Mu hante kami? Tumai-Ko mampakaropu kami? Incaniku hema-Ko. Iko to Nagaha lako Alatala.”

35Naupawee Yesus nangkamaro anudaa ee, iuli-Na, “Kalino pade palaimoko lako tauna etu!” Lauparia, anudaa ee mai nampakadampa tauna to laipehuaina ee i lentongo humawee tauna pade nehuwumi, naupawee tauna ee moma'i laikua-kuana.

36Nampahilo lauria, humawee tauna to naria i hee namangka pade noneulika hore hira, iulira, “Nabaraka mpuu jarita-Na, apa hante baraka-Na laiparenta-Na anudaa ee, pade nehuwuramo lako tauna ee.” 37Pade kareba nangkambelai Yesus notolele i humawee ngata i hee.

Yesus nampakauri paniana Simon Petrus to bangkele pade tau ntanina

(Mat. 8:14-17; Mrk. 1:29-34)

38Napu ee, nehuwumi Yesus lako hou pepuea ee, rau i hou Simon. I ria, paniana Simon to bangkele bulana nangkarani. Pade laiperapira hi Yesus bona Napakauri'i. 39Lauparia, Yesus nokangkore i humpii to tina ee nangkamaro pangkaranina, pade naurimi. Nematami to tina ee pade raumi nopahadia pangkonira.

40Naholopi eo, humawee tauna nangkeni ompira to nadua hi Yesus, to nengila hakira. Laidama-Naramo hadua bo hadua pade laipakauri-Nara. 41Pade anudaa mui nehuwu lako tauna to nadea, nongare nanguli, “Ikomi Ana Alatala!” Naupawee Yesus nangkamarora bona malinora, habana laincanira ane Hiami Magau to Pepakahalama to laitipa Alatala.

Yesus nopatudu i ngata-ngata ntanina

(Mrk. 1:35-39)

42Hampepulona, neongkomi Yesus rau i kalinoana. Poma nahae, nadea tauna nampali-'I. Hangka lairatara-'I, laipehimukuira nampataha-'I bona nemo olu Napalahi ngatara. 43Naupawee, laiulika-Nara, “Kana rau-'A i ngata-ngata ntanina moparata Kareba Belo ane nopamulami Alatala noparenta halaku Magau, apa eemi to laihuroka-'A.” 44Pade raumi Yesus nangkarebai Kareba Belo i hou-hou pepuea i tana Yudea.

Currently Selected:

Lukas 4: MYL

Highlight

Copy