Lukas 23
23
Yesus i tingoo gubernur Pilatus
(Mat. 27:1-2, 11-14; Mrk. 15:1-5; Yoh. 18:28-38)
1Neongkoramo humawee tauna to nahiromu ee nangkeni Yesus rau hi gubernur Pilatus. 2I ria nopamulami Yesus lairaira iulira, “Tauna ei mai lairata kami nopatudu todea bona mampaewa poparentaa Roma i ngata kami. Laitagi-Nara mobayari paja hi Magau Bohe Roma pade nangaku-'I ane Hia mui hadua magau, Magau to Pepakahalama to laitipa Alatala.”
3Nepekunemi Pilatus hi Yesus, “Magau to Yahudi-Ko?”
Nehono Yesus, “Iko motomi nanguli.”
4Naliu ee iulina Pilatus hi imam-imam to i matana pade humawee todea, “Moma naria kahalaa lairataku hi tauna ei.”
5Naupawee laipahimukukira laumi nanguli, “Hia ei mai nampaukei todea i humawee ngata i Yudea hante popatudu-Na, laipamulana lako Galilea duu narata i hei!”
6Nangepe lauria, Pilatus nepekune, “Apa to Galileadi tauna eie?”
7Laiulikara'i ane Yesus ee mai lako Galilea, poparentaa Herodes. Alaana Pilatus nantudura tantara mangkeni Yesus hi Herodes, apa Herodes tempona i Yerusalem ria mui'ihawo.
Yesus i tingoo Herodes
8Nagoe mpuu Herodes nampahilo Yesus, apa nahaemi mingki nahilo, habana laiepenami kareba nangkambelai Yesus pade mingki'i mampahilo Yesus mobabei tanda to nepakahera. 9Nadea ngaa pepekunea Herodes hi Yesus. Naupawee moma naria hangua to laihonoi Yesus. 10Imam-imam to i matana pade to nataualu buku Taurat nokangkore pade nanguli peraira hi Yesus. 11Herodes hante tantara-tantarana nampopore Yesus. Laiwaruira-'I hante waru to nabelo ewa waru magau. Napu ee Herodes nantudura tantarana mangkeni nculi Yesus rau hi Pilatus. 12Naliu ee, Herodes hante Pilatus nonepobelo nculiramo, apa kapomana ee mai nonekawuntora.
Yesus laihuku mate
(Mat. 27:15-26; Mrk. 15:6-15; Yoh. 18:38–19:16)
13Pilatus nopahiromura imam-imam to i matana, totua-totua ngata to Yahudi, pade todea. 14Pade iulikanara, “Laikenimi Tauna ei hi aku pade lairaimi-'I nopatudu todea bona mampaewa to poparenta Roma. Laiparehakumi i tingoomi, naupawee moma naria kahalaa-Na lairataku ewa to lairaikami-'I. 15Wee mui Herodes, moma naria kahalaa Tauna ei to lairatana. Etu pade pakatuna nculi-'I tumai. Moma naria kahalaa laibabei Tauna ei to mahipato rahukuka mate-'I. 16Etumo, kuduahi-'I, napu ee kubakahami.”
[ 17Laiulina lauria, apa butu eo bohe Paskah to Yahudi, kana nabakaha hadua to laitarungku hi todea.] 18Naupawee hingkani-ngkanira todea ee mai nongare, iulira, “Patehi Tauna ei, pade bakahakamo kami Barabas!” 19Barabas ee mai tauna to laitarungku habana nampaewa to poparenta Roma i Yerusalem pade nepatehi.
20Pilatus mingki mobakaha Yesus, hampena hangkani'ipi nojarita hi hira. 21Naupawee nongare dolara todea ee nanguli, “Salib-'I! Salib-'I!”
22Napu ee iulikanara Pilatus katolu ngkanina, “Napa pade rasalib-'I? Ingku napa to nadaa laibabei-Na? Moma naria kahalaa-Na lairataku to mahipato rahukuka mate-'I. Etumo, kuduahi-'I pade kubakahami.”
23Naupawee nahimukuki laumi pongarera nepahuru bona Yesus ee rasalib. Kahuduana nebetara hante pongarera. 24Aji, laibotuhina Pilatus mantuku dotara todea ee mai. 25Laibakahanami Barabas to laitarungku habana nampaewa to poparenta Roma pade nepatehi, apa ee to laipodotara. Pade Yesus laipopewaina hi hira bona rapatehira-'I mantuku dota rarara.
Yesus laikeni rau rasalib
26Napu ee tantara Roma nangkeni Yesus. Lentongo dala, laitahara hadua tauna to Kirene to ikahangai Simon, to narata lako hawaliku ngata. Laipahurura'i nopahaa salib ee nantuku Yesus.
27Nadea mpuu tauna nantuku Yesus, hante bangkele-bangkele to nangkakeohi pade notantangihi-'I. 28Naupawee Yesus nampeilira bangkele ee mai pade iuli-Na, “He bangkele-bangkele to Yerusalem, nemo-'A mikakeohi. Kakeohimi wotomi moto pade ana-anami. 29Apa marata mei tempona tauna manguli, ‘Norahi laurapa bangkele-bangkele to nalalo, to moma hangkania noana, pade to moma naria nopahuhu ngana!’#23:29 To Yahudi nobatuani, ane noanata, ee rahi lako Alatala to nelabi kabelona (Mzm. 127:3), pade ane tauna moma noana, hia laiulira laikamo Alatala. Patuju Yesus rara ayat 29, marata mei tempona, kahehaa bohe mamparumpa Yerusalem. Maheha mpuu raepera, hampena maria to manguli aginalaupi momara noana. 30Tempo ee mei mopamularamo tauna merapi hi bulu-bulu, ‘Parumpihi pade tabuhinimo kami!’ 31Bo Aku to moma naria hala-Ku laibabeira ewa ei, neparauli mei hi komi to nadea halami.”#23:31 Bo Aku to moma naria hala-Ku laibabeira ewa ei, neparauli mei hi komi to nadea halami. Baha ei laiparata Pue Yesus hante pangengko ei, “Ane tau-tauna mobabei humawee ei hi kau to natuwu, bewa hante kau to namate?”
32Naria mui rodua to nadaa ingkura laikeni dohe Yesus rau rahuku mate.
Yesus laisalib
(Mat. 27:33-44; Mrk. 15:22-32; Yoh. 19:17-24)
33Karatara i hangu bulu to laikahangai Pobolia Banga Woo, laisalibrami Yesus hante rodua tauna to nadaa ingkura ee mai. Hadua mali pangkana-Na pade hadua mali pangkai-Na. 34Napu ee iuli-Na Yesus, “Tuama, ampunirahawo, apa moma incanira napa to laibabeira!”
Napu ee waru-Na laipometiraira hante nocabu lot. 35Nadea tauna nokangkore namparono napa to nadupa i ria. Totua-totua ngata to Yahudi nampopore-'I iulira, “Tahiloi-'Idi! Tauna ei nampakahalama tau-tau ntanina. Ane nakono-'I Magau to Pepakahalama to laipelihi Alatala, palelemi Napakahalama woto-Na moto.”
36Tantara ee muira nampopore-'I. Naratara nampawaika-'I ue anggur to naonco, 37pade iulira, “Ane nakono-Ko magau to Yahudi, pakahalamami woto-Mu!”
38I wongko woo-Na laiparika tulihia iwei, “Eimi magaura to Yahudi.”
39Hadua lako to nadaa ingkura to laisalib dohe Yesus ee mai nampopore-'I, iulina, “Ane nakono-Ko Magau to Pepakahalama to laitipa Alatala, pakahalamami woto-Mu hante kami!”
40Naupawee to hadua nangkamaro doona ee, iulina, “Hilo, kakonona kana maekako hi Alatala, apa humaweeta ei hingkani-ngkani laihuku mate. 41Kita ei nahipato ami rahuku halaku balahia ingku daa to laibabeita. Naupawee Hia ei mai moma naria hala-Na.” 42Napu ee iulikana Yesus, “Yesus, linga'akuwo ane marata-Ko halaku Magau!”
43Iuli-Na Yesus, “Mpuu-mpuu Ku'ulikako, welau ei mui rara Firdausmoko hingkani-ngkani hante Aku.”
Yesus namate
(Mat. 27:45-46; Mrk. 15:33-41; Yoh. 19:28-30)
44Tempo ee mai tinti hampulu rongu mpoeo lia. Humangkulili ngata ee mai nalimau duu tinti tolu ngkinuwia, 45apa eo moma neino. Powide rara Hou Alatala nahia ntongo nawali rongu. 46Yesus nongare narimboho, iuli-Na, “Tuama, Kupopewai inoha-Ku i rara mpale-Mu!” Nahudupi nanguli lauria, nalalimi inoha-Na.
47Hangka kapitee tantara ee nampahilo napa to nadupa, hia nampaune Alatala pade iulina, “Nakono mpuu Tauna ei moma naria hala-Na.”
48Hangka todea to nahiromu nerono i ria nampahilo humawee to nadupa, nanculiramo hante notimolu bamarara habana laihohora rarara. 49Humawee to nangincani Yesus nokangkore i ka'awaana nampanaa humawee to nadupa lauria. Naria muirahawo i hee bangkele-bangkele to nantuku Yesus lako Galilea.
Yesus laitana
(Mat. 27:57-61; Mrk. 15:42-47; Yoh. 19:38-42)
50Naria hadua tauna to ikahangai Yusuf. Hia ee mai hadua lako to Pobotuhi Agama Yahudi, to nabelo pade nanoro ingkuna. 51Moma'i nahituju hante to laibotuhira to Pobotuhi Agama Yahudi pade ingku to laibabeira hi Yesus. Yusuf ee mai lako Arimatea, hangu ngata to Yahudi. Hia nampopea tempona Alatala moparenta i dunia halaku Magau. 52Rau'i hi Pilatus pade namperapi wataloka Yesus. 53Laipopanauna wataloka Yesus lako salib, laibunguna hante kae bula pade laidulena i dayo to laikae i rara bulu watu. Dayo ee mai poma'i naria laipodulei to mate. 54Kamate Yesus ee mai nambela eo kahadiaa mantarima eo Pentuua to Yahudi. Yusuf nopatana wataloka Yesus ngkinuwia mparomi, parami eo Pentuua.#23:54 Ane hira to Yahudi, eo bou laipamula lako kaholo eo.
55Bangkele-bangkele to narata dohe Yesus lako Galilea netuku rau mampahilo dayo ee mai pade bewa wataloka Yesus laidule. 56#Kel. 20:10; Ul. 5:14Napu ee nanculiramo rau mopahadia rampa-rampa pade lana to nawongi rapopoelaira wataloka Yesus. Nopamulapi eo Pentuua, nondodoramo lako bagora nanturuhi parenta to laitulihi rara patudu Taurat.
Currently Selected:
Lukas 23: MYL
Highlight
Share
Copy
Want to have your highlights saved across all your devices? Sign up or sign in
