Lukas 20
20
Pepekunea nangkambelai baraka Yesus
(Mat. 21:23-27; Mrk. 11:27-33)
1Hangkani tempo, bula Yesus nopatudu pade nangkarebai Kareba Belo hi todea i karawaa Hou Alatala, imam-imam to i matana, to nataualu buku Taurat pade totua-totua ngata to Yahudi narata hi Hia. 2Pekunera-'I, “Kewoka kami, hante baraka hema-Ko nobabei humawee etu mai? Pade hema to nampawaika-Ko baraka etu?”
3Nehono Yesus hi hira, “Naria mui-Kuwo hangaa to Kupekuneka komi. Kewoka-'A, 4lako rima baraka Yohanes nopadiu tauna? Lako Alatala ba lako manuhiadi?”
5Laipomeulira hore hira pepekunea lauria. Iulira, “Ane tauli lako Alatala, Naulikata mei, ‘Napa pade moma'i laiparahayami?’ 6Naupawee, ane tauli lako hi manuhia, humawee tauna ei mei mampawunuta hante watu, apa laiparahayara mpuu ane Yohanes ee mai hadua nabi.” 7Alaana nehonora, “Moma laincani kami lako rima baraka Yohanes nopadiu tauna.”
8Iulika-Na muirahawo Yesus, “Ane wee, moma mui-Kuwo Kukewo hi komi hante baraka hema-'A nobabei humawee lauria.”
Porapa nangkambelai to pobago-to pobago i pampa anggur
(Mat. 21:33-46; Mrk. 12:1-12)
9Napu ee Yesus notutura hi todea ee mai hante hangu porapa. Iuli-Na, “Naria hadua tauna notuda anggur i pampana pade pampana ee laiparahayakana hi bahangkua dua to pobago. Napu ee neongko'imi rau mahae i ngata ntanina. 10Temponapi wua anggur ee rapupu, laituduna hadua batuana rau hi hira to pobago ee mai, bona rawaikara'i bagiana lako pampa anggur ee mai. Naupawee, hira to pobago pampa ee nampaduahi batua ee pade nantudu'i nanculi hante pale ngkaloa. 11Napu ee, laituduna mui batua to ntanina rau hi hira. Naupawee, batua ee mui laiduahira, laipakaeara pade laitudura nanculi hante pale ngkaloa. 12Laituduna mui batua katoluna, naupawee batua ee mui laiduahira hampe nowota raa pade laitenera i hawaliku pampa anggur ee mai.
13Rara bongona tumpu pampa anggur ee mai nanguli, ‘Napapi to kana kubabei? Agina Kutudu anaku to laipotoweku. Ane hia, natantu amimi rapokaekara'i.’
14Naupawee hangka to pobago pampa eera mai nampahilo ana tumpu pampa ee mai, noneulikara iwei, ‘Hilo, etumi tumai ana tumpu pampa to mangkami pampa ei mei. Agina tapatehi lau'imi bona pampa ei mai ta'ala kitami.’ 15Napu ee, ana tumpu pampa ee mai laikenira rau hawaliku pampa pade laipatehira.
Aji, napa mei to nababei tumpu pampa anggur ee mai hi hira to pobago pampana ee? 16Marata'i mei mampatehira to pobago ee pade mamparahayaka pampa anggur ee mai hi to pobago ntanina!”
Pangepera lauria, iulira tauna to nadea i hee, “To ewa etu mai moma mamala madupa!”
17 #
Mzm. 118:22
Penoto-Nara Yesus pade iuli-Na, “Ane wetu, napa batuana to laitulihi rara Buku to Nagaha, to nanguli iwei,
‘Watu to laitadira tuka hou,
watu ee laumi to nawali koro watu pondasi’?
18Hema-hema to manawu i lolo watu ee mai, marega, pade hema-hema to naruncuhi watu ee mai, marutu.”
19To nataualu buku Taurat pade imam-imam to i matana nampehimukui mampahoko Yesus eo ee mui, apa laincanira ane porapa to laiuli Yesus lauria nangkambelai hira, naupawee naekara hi todea.
Nangkambelai pobayari paja hi Magau Bohe Roma
(Mat. 22:15-22; Mrk. 12:13-17)
20To nataualu buku Taurat pade imam-imam to i matana nangkamata bongo Yesus. Laitudura bahangkua dua to pekamata bona moingku ewa tauna to nanoro. Tauna eera mai laitudura rau mepekune hi Yesus hante patuju mopanuwu-'I bona mamala-'I rapangadukara hi Gubernur bona nahuku-'I. 21To pekamata eera mai nepekune hi Yesus iwei, “Guru, laincani kami ane napa to iuli-Mu pade to laipatudu-Mu nakono. Moma-Ko nampelihi tauna pade Iko nopatudu to nakono nangkambelai dota Alatala. 22Mantuku patudu agamata, mamalada kami mobayari paja hi magau bohe Roma, ba momadi?”
23Naupawee laincani-Na Yesus akalara mopanawu-'I. Iulika-Nara, 24“Pahiloika-'A hampeka doi halaka. Gambara pade hanga hema to laitulihi i rara doi ei?”
Nehonora, “Gambara pade hanga Magau Bohe.”
25Yesus nangulikara, “Ane wetu, popewaimi hi Magau Bohe napa to kana mipopewai hi Magau Bohe, pade hi Alatala napa to kana mipopewai hi Alatala.” 26Moma-'I namala laipanawura hante to iuli-Na i tingoo todea. Naherara hante honoia-Na, alaana momaramo nowotu.
Pepekunea to Saduki nangkambelai katuwu nculi
(Mat. 22:23-33; Mrk. 12:18-27)
27Bahangkua dua to Saduki narata hi Yesus. Pampahara to Saduki moma naria katuwu nculi tauna to namate. Nepekunera hi Yesus, 28#Ul. 25:5“Guru, Musa notulihi rara Buku to Nagaha hi kita iwei, ane maria hadua balailo to namate ompina, bo bangkele ompina ee mai natuwudipi pade momara noana, balailo ee kana mangala bangkele ompina ee mai napobangkele, pade mampomulika ompina to namate ee mai. 29Naria papitu dua tauna no'ompi. To ulumbua nampobangkele hadua toronaa. Poma'i noana namate'imi. 30Napu ee ompina to karodua nampobangkele bangkele ee mai. Hia mui namate pade moma'i noana. 31Napu ee, ompi katoluna mui nampobangkele bangkele ee mai. To katoluna ei mui namate, wee mui to nadupa hi humawee tuaina duuna to kapapitu. Humaweera namate pade momara noana. 32Alaana, namate muimihawo bangkele ee mai. 33Aji, ane tempora to mate rapakatuwu nculi, mawali bangkele hema'i? Apa papitura no'ompi, humaweera nampobangkele'i.”
34Nehono Yesus, “Tauna i dunia ei noncamoko bo laipoponcamoko. 35Naupawee hira to mahipato mantarima katuwua nculi i dunia to marata, momaramo moncamoko bo rapoponcamoko 36pade momaramo mamateki, apa mahibaliramo hante malaeka-malaeka. Hira eemi ana-ana Alatala, apa laipakatuwu nculiramo. 37#Kel. 3:6Naupawee, nanotomi iuli Musa ane tauna to namate rapakatuwu nculi. Rara tulihiana nangkambelai dunumpu to nabaa to moma laikoni apu, Musa nanguli ane Pue eemi ‘Alatala Abraham, Alatala Ishak pade Alatala Yakub.’ 38Aji, Alatala ee mai moma-'I Alatalara to namate, naupawee Alatalara to natuwu, apa humawee tauna natuwu i tingoo-Na.”
39Napu ee, bahangkua dua to nataualu buku Taurat nanguli, “Guru, nakono to iuli-Mu!” 40Lako hee, momami hema nabati nepekune napa-napa hi Yesus.
Katekaia Yesus hante Magau Daud
(Mat. 22:41-46; Mrk. 12:35-37)
41Yesus nampekunera, “Bewa pade Magau to Pepakahalama to laitipa Alatala ee laiulira muli Magau Daud? 42#Mzm. 110:1Bo Magau Daud moto notulihi i rara buku Mazmur iwei,
‘Nololitami Pue Alatala hi Pueku,
“Poncunamo-Ko mali pangkana-Ku,
43duuna bali-bali-Mu Kupakatundu hi Iko.” ’
44Aji, Magau Daud nanguli Puena-'I. Bewa mui pade rauli mulina-'I?”
Yesus nepalingai bona mainga hi to nataualu buku Taurat
(Mat. 23:5-7; Mrk. 12:38-40)
45Bula humawee tauna nangepe patudu-Na, Yesus nangulikara ana guru-Na, 46“Kana mainga komi hi to nataualu buku Taurat, to ipokonora nomako-mako nampake waru to nalanga pade laibila i pasar. Pokonora noncuna i poncunaara to laibila i rara hou pepuea pade i pohuhaa. 47Hira namparampaki houra bangkele to nabalu, pade hambayara laipakalanga-langara bona nemo rancani ingkura to nadaa. Hira ei mei kana mantarima pehuku to neliu kantomona.”
Currently Selected:
Lukas 20: MYL
Highlight
Share
Copy
Want to have your highlights saved across all your devices? Sign up or sign in
