Lukas 2
2
Pangotea Yesus
(Mat. 1:18-25)
1Tempo ee Magau Bohe#2:1 Magau Bohe biahana mui laiuli Magau Bohe Roma, rara baha Yunanina laiuli ‘Kaisar.’ Tempo ee hia noparenta i Israel pade humangkulili tahi Mediterania. Agustus nampopehuwu hangu parenta, bona humawee tauna i humangkulili kamagaua Roma kana ratulihi hangara. 2Eimile potulihia hanga to pamulana ntoto laibabei tempo Kirenius noparenta i propinsi Siria. 3Lauparia humawee tauna rau i hore-hore ngatara nampopetulihi hangara.
4Wee mui Yusuf neongko lako ngata Nazaret i Galilea rau i ngata Betlehem to laiuli ngata Daud i Yudea, habana hia muli Magau Daud. 5Yusuf rau nampopetulihi hangana hingkani-ngkani hante Maria karohoana to bulana notiana.
6Bulara i Betlehem, naratami tempona Maria moana. 7Hia noana hadua ngana balailo, anana to ulumbua. Ngana ee mai laikumuina hante kae, pade laidulena i pangkonia ewua, apa momami naria hou to nakaloa rapo'ohaira.
To poewu nangepe kareba pangotea Magau to Pepakahalama
8Moma na'awa lako ngata Betlehem, nariara to poewu bulara nampodoo ewuara ngkawengiana i tongo mpada. 9Ngkali nokangkoremi hadua malaeka Pue i tingoora, pade baa baraka Pue nampawantara hampena naeka mpuura. 10Naupawee malaeka ee nangulikara, “Nemo maeka. Epe, aku mangkewoka komi Kareba Belo nangkambelai kagoea bohe to marata hi humawee tauna. 11Habana bou-bou ei he, i ngata Daud, laiotemi to mampakahalama komi, Hiami Magau to Pepakahalama to laitipa Alatala#2:11 Magau to Pepakahalama to laitipa Alatala ee mai laiuli ‘Mesias’ rara baha Ibrani, pade laiuli ‘Kristus’ rara baha Yunani. pade Hiami Pue. 12Ei tandana, mirata mei Ngana laikumui hante kae pade laidule i pangkonia ewua.”
13Lauparia, ngkali nadea mpuu malaeka Pue ntanina nopahangkani hante malaeka ee nampaune Alatala, iulira,
14“Raunemi Alatala to i kalangkoana
pade katuwu to nanone i dunia hi manuhia to laipomambela-Na.”
15Napurapa nanguli lauria, malaeka-malaeka Alatala ee nampalahira to poewu pade nanculi rau huruga. Napu ee noneulikaramo to poewu ee, “Kitamo rau i Betlehem, mampahilo napa to nadupa ewa to ikewoka-Nata Pue.”
16Lauparia, dungku neongkoramo rau Betlehem, nampotomuka Maria hante Yusuf pade Ngana to laidule i pangkonia ewua. 17Hangka laihilorapi Ngana ee, laikeworami napa to laiulikara nangkambelai Ngana ee. 18Humaweera to nangepe to laiulira to poewu ee mai, nahera. 19Naupawee Maria nopairara humawee ee mai pade laipekirina. 20Napu ee, nanculiramo to poewu ee mai pade nampemabohe bo nampaune Alatala, habana napa to laiepera pade to laihilora nahibali hante to laikewokara.
Yesus laitini pade laikeni hi Pue
21Naganapi umuru-Na walu eo, laitinimi Ngana ee, pade laikahangai Yesus ewa to laiuli malaeka kapoma-Na laipotianaka tina-Na.
22Kaganana eo pampegaha woto ewa patudu Taurat to laitulihi Musa, laikenirami Ngana ee rau i Yerusalem rapopewai hi Pue, 23#Kel. 13:2, 12-13ewa to laitulihi rara patudu Taurat, “Humawee ngana balailo ulumbua, kana rapopewai hi Pue.” 24Pade rapopewaira kurban ewa to laitulihi rara patudu Taurat: hancamoko tonci wurukou, ba romaa ana tonci bangkebodo.
25Tempo ee, i Yerusalem, naria hadua tauna hangana Simeon. Hia ee mai tauna to nanoro pade to nengkoru hi Alatala. Nahaemi nampopea tempona Alatala mampakahalama to Israel. Simeon ee laipodohe Inoha to Nagaha. 26Inoha to Nagaha nangkewoka'i, poma'i mamate ane poma'i nahilo Magau to Pepakahalama to laitipa Pue Alatala. 27Simeon narata i karawaa Hou Alatala laipanuntu Inoha to Nagaha. Tempo ee mui Yusuf pade Maria nangkeni Yesus rapopewai hi Alatala nantuku atura patudu Taurat. 28Simeon nangala Ngana ee, laihalengkuna pade nampaune Alatala, iulina,
29“Pue, welau ei palele'amo batua-Mu ei mamate
hante kanonea ewa to iulika-Mu'a.
30Apa hilo matakumi kahalamaa to lako hi Iko
31to laipahadiaka-Mu i tingoo humawee tauna.
32Hiami baa to mampawanta tauna to moma Yahudi,
pade mangkeni pebila hi todea-Mu Israel.”
33Nangepe to laiuli Simeon nangkambelai Yesus lauria, nahera mpuura tuama pade tina Yesus. 34Lauparia, Simeon nampatiroira pade nangulika Maria tina-Na, “Hilo, Ngana ei laipelihi mawali to mampakanawu pade mampakahalama madea tauna to Israel. Hia mui mei mawali tanda to rapomebilii, 35hampena rancanimi humawee to ipekiri tauna to nadea. Dua raramu mei ewa hamata tono lampa mampatohu raramu moto.”
36I hee mui, naria hadua nabi bangkele, hangana Hana ana Fanuel lako muli Asyer. Hia ee, natua mpuumi. Pitu mpae'i natuwu hante balailona, 37pade nabalumi. Umuruna walu mpulu opo mpaemi. Butu eona bo bengina'i nepue hi Alatala, nopuaha pade nohambaya. 38Tempo Simeon nojarita, narata muihawo Hana nampaune Alatala pade nojarita nangkambelai Ngana ee hi humawee tauna to nampopea tempo Alatala mobakaha to Yahudi lako kahehaa.
39Nahudurapa Yusuf pade Maria nobabei humawee parenta nantuku patudu Taurat, nanculiramo rau i po'ohaara i ngata Nazaret to i Galilea. 40Ngana ee kaboo-bohea pade nantambai karoho woto-Na, nelabi noto-Na, pade laipotowe Alatala-'I.
Yesus i Hou Alatala
41Butu mpaena, totua Yesus rau i Yerusalem nantuku eo bohe Paskah to Yahudi. 42Kaganana umuru Yesus hampulu rompae, neongkoramo rau i Yerusalem mantuku kabiahaara nangkambelai eo bohe ee mai. 43Nahudupi eo bohe ee mai, nanculiramo totua-Na. Moma laincanira ane Yesus naboli i Yerusalemdipi. 44Iulira hira, rau-'Imi dohera tau ntanina to hampomakoa hante hira. Haeoramo nomako pade laipaliradi Yesus i lentongo ompi-ompira bo tau ntanina to incanira.
45Hangka moma-'I laihumara, nanculikira rau i Yerusalem nampali-'I. 46Katolu eona, lairatara-'I i karawaa Hou Alatala ranca-Na noncuna dohera to nataualu buku Taurat, nangepe to iulira pade nepekune hi hira. 47Humawee tauna to nangepe-'I nahera hante kataualu-Na bo pehono-Na. 48Tina pade tuama-Na nakonce nampahilo-'I. Lauparia tina-Na nangulika-'I, “Ana, napa pade weidi ingku-Mu hi kami? Namere raraku hante tuama-Mu nampali-Ko.”
49Nehono Yesus, “Napa pade laipalimi-'A? Apa moma ncanimi ane Aku kana i hou Tuama-Ku?” 50Naupawee, moma laipahara napa to iuli-Na. 51Napu ee, nanculimi Yesus dohera rau i Nazaret, pade i ria-'I nanturuhi totua-Na. Humawee to nadupa lauria laiboli tina-Na i rara bongona.
52Yesus kaboo-bohea woto-Na, nantambai mui noto-Na, pade nantambai towe Alatala bo manuhia hi Hia.
Currently Selected:
Lukas 2: MYL
Highlight
Share
Copy
Want to have your highlights saved across all your devices? Sign up or sign in
