Tutura Rasul 6
6
Papitu dua tauna laipelihi mampahuko bagora rasul Pue Yesus
1Kahaa-haea natetambaikimi kadeara to neparahaya hi Yesus. Tempo ee mai to Yahudi to nampake baha Yunani nampongudukara to Yahudi to nampake koro bahara moto. Laiulira ane bangkele to nabalu lako hi hira momarahawo nantarima bagiara to rakonira eo-eona ewa to laiwaika hi bangkele to nabalu koro to Yahudi. 2Etu pade hampulu rodua rasul ee mai nopahiromu humawee to neparahaya hi Yesus pade nangulikara, “Moma'i nabelo ane mentuu kami mangkarebai lolita Alatala habana kana mampauruhi pangkoni. 3Etumo ompi-ompi, pelihimi papitu dua lako hi komi to laincanimi nabelo ingkura pade naponu hante Inoha to Nagaha pade noto Alatala, bona hirami to kiwaika bago ei. 4Apa bago kami koropokona, mohambaya pade mangkarebai lolita Alatala.”
5Humawee jumaa ee nahituju hante napa to iulira rasul ee mai, pade laipelihirami Stefanus to naroho peparahayana pade naponu hante Inoha to Nagaha, pade Filipus, Prokhorus, Nikanor, Timon, Parmenas pade Nikolaus to lako Antiokhia. Nikolaus ee moma'i to Yahudi naupawee nehua agama Yahudimi. 6Humaweera to laipelihi ee laikeni i tingoora rasul pade rasul-rasul ee mai nodama tanuanara pade nampahambayanira.
7Natetambai potolele lolita Alatala hampena natetambaiki kadea tauna to neparahaya hi Yesus i Yerusalem. Pade nadea mui imam to Yahudi neparahaya pade nanturuhi patudu nangkambelai Yesus.
Stefanus laipangaduka
8Stefanus mpuu-mpuu laitiroi Alatala pade laiwaika baraka hampena laibabeina to nepakahera pade tanda-tanda to moma naria hibalina i tingoo todea. 9Naupawee nariara tauna to nampabili'i. To nampabili'i ee mai to Yahudi lako Hou Pepuea Libertini. To i Hou Pepuea Libertini ee mai tauna lako Kirene pade Aleksandria. Hira ee mai nodohe hante to Yahudi lako Kilikia pade Asia nonehono hante Stefanus. 10Naupawee Inoha to Nagaha nampawaika Stefanus noto nojarita hampena moma ibukura nampahonoi'i.
11Alaana laipaukei bongora bahangkua dua tauna bona manguli, “Laiepe kami tauna ei nampopore Musa pade Alatala.”
12Weemi dalara nampaukei todea, totua-totua ngata to Yahudi pade to nataualu buku Taurat, pade rauramo nampahoko Stefanus pade laikenira i tingoo to Pobotuhi Agama. 13Laikenira mui habi-habi to moma nakono to nanguli, “Tauna ei mai nampopore oa Hou Alatala to nagaha pade patudu Taurat. 14Apa iepe kami'i nanguli ane Yesus to Nazaret ee mei mampakaropo Hou Alatala ei pade mobaliki ada kabiahaata to laipopanau Musa hi kita!”
15Humawee tauna to noncuna i rara Pobotuhia Agama ee mai nampenoto Stefanus. Laihilora lence Stefanus ewa lence malaeka Alatala.
Currently Selected:
Tutura Rasul 6: MYL
Highlight
Share
Copy
Want to have your highlights saved across all your devices? Sign up or sign in
