Mark 13
13
1An neterier le nimwa ahwak, tan ieremim min ker netereni ton, Ietikun, arup le kapiel asul min mene nimwa asul min.
2An Iesu netereni ton, nakamahm nimwa asul min uk? Tepespasan ikenuk kapiel rowatatin kapiel mero tepelakhiau petum in.
3An neteramowata le Towar Oliv min etuatu to nimwa ahwak, an Piter mene Jems mene Jon mene Andru netakaihrapuk pusen ton,
4Ani ru to kamar moma tohnan nar min uk tapol? An neta nimtatin lan takama nar min uk iwaket tapol petum?
5An Iesu netererwowun mameni to ilar, Amairouena kamiar moma ieremim ker tereseuhiatinan kamiar;
6Neremim rapus teparua le netigok mamani mama, Io ka in; an tepareuhiatin nevin.
7An takama tenepairou neluakenan mene nausitoan in neluakenan, asarigenan. Naremnar min uk takaikeikei marua, mero resolan moma nian oatisig reknua.
8Mero in ka nahuto terepermig to nahuto, an niko terepermig to niko, an mig rapavan le ten nevin; an rapoumus; nar min uk nerwowunan nahmean min.
9Mero amairouena kamiar; teparofen kamiar kam nerem asul; an kafho kamiar le nimwa ahwak min; tene pailil le nemri nerem asul mene neremera tonio to nausitoan to ilar.
10An nakaran ut terakeikei kaupan kausito in kam nahuto min.
11An takama teparir kamiar mamarofen kamiar; tenesarigenan mama neta tenepani; mero nar kenofena kam kamiar le nian ka tenakani, mero in ka resolan moma kamiar tenakaikar mero Nanumun Ausim.
12An ieremim ker terepofen pian to nemisan, an remin terepofen nerin, an nererin tepairmig to remin mene inen ilar an teparhwapnin ilar.
13An neremim petum tepaimakin kamiar to netigok, mero ierem repail tumutum to nuhiefin in tapos miuh.
14An takama tenakaihm nahwohwean le nelikunan ramail iken resevitan iken, ierem terahwin pas rhinatin, le nian ka pas nerem le Judia kaikam maret le towar min,
15An ierem letui nimwa pas resatitean muan imwa moma terosita nar le nimwa tahan.
16An ierem le neki nasuman pas reslelegpean mun to nosan napen tahan.
17Mero awe to neberan kamasinen mene neberan kamaimaih ilar le nian min ka.
18An aihwak mama tepesolan le nian te nerapan.
19Nian min ka tapol nahwohwean ierem kasolan maka lan le nerwowunan naremnar min Wuhgin ramol meroatis le nian uk towe mene, an tepesolan mun maka lan.
20An takama Ieremera repesolan nian rerparup ieremim ker tepesosmiuhan; mero to neremim kenahmpen ilar, ierem min ramahmpen ilar, ramol nian rerparup.
21An le nian ka takama ieremim ker tereni to kamiar, Ahm ru, in uk Kristo, Ahm ru, iken, tenesanian nuparhienan lan.
22Mero in ka Kristo aiwa tepairmig mene profeta aiwa min, an teparofen nimtatin min mene narepuk min mama takareuhiatin nerem kenahmpen ilar, takama remeruk.
23Mero kamiar amairou ena kamiar. Iaknaupan meni nar min to kamiar.
24Mero nian ka oatisig le nahwohwean ka mit repapinap, an mouk terepesofenan hnakakan tahan.
25An mahau min tepeisas le neai an nesanenan min ierem min le neai tepaisiouh.
26An le nian ka tepaihm Neri Ieremim rakava le napua le nesanenan asul mene nevitan.
27An le nian ka terefhalita agelo min, an terefhwafugen nerem kenahmpen ilar le nemetag kuer le nuhiefi ten meroatis le nuhiefi neai.
28Mero to nihm arhinatin hnoa nakaran; takama nelimin rikenmeruk mamol numalin, nakarhinatin mama telesa iwaket.
29Rol mok lan kamiar mun takama tenakaihm naremnar min uk kamol, nakarhinatin mama in iwaket le nausilua.
30Nuparhien tiakani to kamiar moma nepsen neremim uk teresikean meroatis naremnar min uk tapol.
31Neai mene nemapten tepiaka, mero nakaran min tahak teresikean.
32Mero ieremim ker reshinatinan nian ka wa aur ka, an agelo min le neai katiktik, mene Nerin, mero in am Remin.
33Amairouena kamiar mamarit mameihwak, mero in ka nesarhinatinan mama nian petuan.
34In rolkoma ierem ramarik le ten pusen an mapas tahan nimwa, an mofen nesanenan kam nolatkokun nar tahan, mameriatin karena kiten le work tahan, mameni to ierem ramail le nukulu moma terait.
35Mero in ka tenakamarit, mero in ka nesarhinatinan mama Ieremera le nimwa terua nahan, lehnaiu wa lapin lalukan, wa menuk terakaka, wa lakapnipin.
36Moma teresuean hwaihwai am mahm kamiar nakamaipul.
37An nar iakameni to kamiar iakameni to neremim petum, tenakamarit.
Currently Selected:
Mark 13: LEN1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902, reprinted in 1935.
