Nar 2
2
1An nian te Pentekost reknua, an netakarhwafugen ilar min lam karena.
2An ihwe am noian netersipe le neai, rolkoma navi nemetag asul, an neterol nimwa ret iau iken kamamaiwata iken.
3An netakaihm namin risum rolkoma nekam, an ramowata karena kiten le ilar min.
4An nekin ilar min ret iau le Nanumun Ausim, an netakarwowun mameikar le nakaran pusupus min, rolkoma Nanumun ramofen kam ilar to nenian.
5An kamemairik Jerusalem Ju min, neremim ut le nahuto min lahau le neai.
6An noian uk kenerou, an nahuto netarkhwafugen, an nanumun ilar neterika mero in ka kamairou ilar kameikar le nakaran pusen pusen min tenilar.
7An nanumun ilar neterakamuka magien, netakani to ilar min, Ahm ru resolan moma nerem uk kameikar nerem Kalili etahun?
8An retol kamairou le nakaran pusen tetar min iken kaviah katar iken?
9Nerem Parthia mene Midia mene Elam, mene nerem kamairik Mesopotemia mene Judia mene Kapadosia, Pontas mene Esia,
10Frijia mene Pamfilia, Ijipt mene le ten Libia kualivarik Sairini, mene nerem kamairik Rom, Ju min mene nerem kamaros to Ju min,
11Nerem Krit mene Arebia, katar kenairou ilar kamani narepuk taha Wuhgin le nakaran min tetar.
12An ilar muka nanumun ilar neterakamuka netakatiktik am, netakamani to ilar min, Nar uk nubalakin neta?
13Mero nevin netakaiusan mamani, Ilar kamaipus le wain vi.
14Mero Piter neterermig le ilar katilum katilum makarena, neterahwatin nakaran tahan mameni ete to ilar moma, Kamiar nerem Judia, mene kamiar min nerem nakamairik Jerusalem, arhinatin nar uk maiteleg in nakaran tahak.
15Mero in ka nerem uk kasaipusan, rolkoma nekimiar rakahmo, mero in ka aur reknol kisil le nian.
16Mero in uk nar ka kameni le profeta Joel,
17An tapol le nian oatisig, Wuhgin rameni, tiapuipen Nanumok le neremim petum, An nererimiar min, naman mene neberavin, tepatikun, an netemalua temiar tepaihm nar pa, An nahigal min temiar tepamelait le nemelaitan.
18An le nian ka tiapuipen Nanumok le nolatkokun nar tahak, naman mene neberavin, an tepatikun.
19An tiapofen narepuk iles le neai, mene nimtatin lahau le nemapten, nita mene nekam mene hnanekam le napua.
20Mit terepol kama napinapan, an mouk terepol kama nita, aupan in nian te Ieremera terua, nian asul mibor aken ka.
21An raplo moma ierem terasakhatigen netigen Ieremera le nian ka tapos miuh.
22Kamiar nerem Israel, airou ru nakaran min uk. Iesu le Nasareth, ierem Wuhgin rametikun kamiar in le nesanenan mene narepuk mene nimtatin min Wuhgin ramol lan le nekimiar, rolkoma kamiar nakarhinatin,
23Ieremim uk, kenofen le nowa kenamenita mene hninatinan aupan taha Wuhgin, kamiar nemaruit marhwapnin le nelimi noletat.
24Ierem Wuhgin ramosit mun in, mirisinita nahmean te nemisan, mero in ka riakis moma terhiapatin hmahma in.
25Mero in ka Devid rameni lan,
Iehmahm Ieremera le nemrok le nian min,
Mero in ka in le nelimok matu moma tieskiukiuan.
26Mero in ka to nar uk nekiuk ramagien, an namok ramagien aken,
An nubalakok mun terepamarik le natigetean.
27Mero in ka tenepesapasan nanumok le nimwa te nemisan,
An tenepesofenan ierem ausim taham moma terahm namramuran.
28Nemhinhin lak suatu te nemihwan,
Tenepol nekiuk ret le nagienan le nemram.
29Piak min, remeruk moma tiakani etuatu to kamiar le riputar Devid moma rememis an kerenum, an nepag kamrenum iken ramarik to katar towe mene.
30Mero in profeta, an rhinatin moma Wuhgin ramos nowanavel ton moma le nowa nubalakin terepol ker rowata le thron tahan.
31Ramaupan mahm mameni nermigan mun te Kristo moma kamesapasan in le nimwa te nemisan an nubalakin remesahman namramuran.
32In uk Iesu Wuhgin ramosit mun, ierem kamar min iemaihm esas lan.
33Mero in ka kenosit in le nelimi Wuhgin matu, an reknos to remin Nanumun Ausim ierem kenemenita, an reknuipa nar uk kamiar nakamaihn mamairou.
34Mero in ka Devid remesetan muan le neai, mero in atu rameni,
Ieremera rameni to tahak Ieremera, Awata le nelimok matu.
35Meroatis tiapol tikimer min taham nar nakamehlau nelikam lan.
36Pas nerem Israel petum karhinatin ut mama Wuhgin reknol in Ieremera mene Kristo, in uk Iesu ierem kamiar nemaruit le nik aluauin.
37An ilar netakairou nar uk nekin ilar neteramahma, an netakani to Piter mene apostelo min nevin mun, Tiakarol neta, piemar?
38An Piter netereni to ilar, Aleleg, maros nebaptisoan, kamiar etahun, le netige Iesu Kristo to nositean tehwaga tat temiar, an teneparos nofenean Nanumun Ausim.
39Mero in kar nar kenamenita in temiar mene taha nererimiar min mene taha nerem isou min, ierem min Ieremera Wuhgin tetar terepaunin ilar ton.
40An le nakaran mun nevin neteramakeikei kam ilar makahwag mameni, Aros miuh atu kamiar to nepsen neremim iko uk.
41An nerem kenaros nowa tahan kamaui ilar, an kamehlau kam ilar le nian ka nanumu neremim rolkoma thausand kisil.
42An netakamairik tumutum le netikunan te apostelo min mene le narikwasan le nerkahlan bred mene le nahwakan.
43An naginan neterua le nanumun ilar min, an narepuk min nevin mene nimtatin kamol le nelimi Apostelo min.
44An nerem kamani nuparhienan lan ilar min kamairik was mamarol was am nar min tenilar.
45An netakamaiurai in nauta mene naremnar min tenilar, mamaroti le ilar min karena kiten nerem kamesarosan.
46An le nian min kamairik tumutum le nekin ilar karena le nimwa ahwak, mamarkahl bred imwan ilar, mamaros nauganan le nagienan mene le nekin ilar karena.
47Netakani vivi Wuhgin, maros nakarvian to neremim petum. An Ieremera neterehlau kam ilar le nian min nerem kamos miuh ilar.
Currently Selected:
Nar 2: LEN1902
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1902, reprinted in 1935.
