Nar 10
10
1An ieremim ker ramarik Sesaria, netigen Kornilius, sentiurion le nahuto ierem netigen Italia,
2Ieremim ut ierem ramagnin Wuhgin, in mene neremim petum le nimwa tahan, an ramofen am nar ribor kam neremim mamohwak kam wuhgin le nian min,
3Neterahm aken le nar pa rolkoma le aur katilum mekuer le nian agelo te Wuhgin rakava ton mameni ton, Kornilias.
4An nemrin neteramait hmahma lan neteramagen mameni, Neta, Ieremera? An netereni ton, Nahwakan mene nofenaman min taham kenaret marol hninatinan le nemri Wuhgin.
5An towek halipen neremim to Jopa kariripa ieremim ker Saimon, ierem netigen mun Piter.
6In ramarik to ieremim ker Saimon ierem ramol work le nevige natipun, ierem nimwa tahan le nikali tehe.
7An agelo ierem ramakar kam in neterakavan, an neteraunin iolatkokun nar kiu tahan mene soldier ierem ramohwak ker le nerem kamapitipen lan nian min,
8An neterameni nar min to ihlel, neterhalipen ihlel to Jopa.
9An lauk in ihlel netakahmaluan hmalua iwaket to nauanu, an Piter neteret muan letui nimwa moma terahwak le aur katilum mekarena.
10An neteremek molkeikei moma terkin nar ker; an ilar netakarepinapina le nauganan, an nemelaitan neterua ton.
11An neterahm neai kenetita an nevige nar ker ramatite rolkoma napen asul kavatevata lan le nikalin kuer to nemapten;
12Ierem natipun min le nelikin ilar kuer mene nar min kamate le nemapten mene nemenuk le neai kamairik lan.
13An nakaran neterua ton, Armig, Piter, moho mekin.
14Mero Piter netereni, Kapa, Ieremera, mero in ka iemeskinan ena nar apnapen mene nar resevitan.
15An nakaran neterua ton mau kiu, Nar Wuhgin rahmapel, ik tenesenian moma nar apnapen.
16An nar uk kenol kau kisil, an ihwe am nevige nar kenosit le neai.
17An Piter neteretiktik am le nekin moma neta nubalakin nar pa ierem ramahm, an ahm ru ierem kahmalipa ihlel le Kornilias kenahmeihrapuk to nimwa taha Saimon, an kahmailil le nausilua,
18An netakhaikar apahm mahmeihrapuk hmama Saimon ierem netigen Piter ramarik iken.
19An Piter nekin neterakahmo nar pa, an Nanumun netereni ton, Ahm ru ieremim kisil kahmaitkoigen ik.
20Mero armig matite maroupa ihlel, mesenian neiwean lan, mero in ka io iehmalipa ihlel.
21An Piter neteratite to wus mihlel ka mameni, Ahm ru, io ierem kamhiel nakahmaitkoigen; neta nar nehmalua ton?
22An ihlel netakhani, Kornilias, sentiurion, ieremim ut ierem ramagnin Wuhgin an nausitoan tahan ravit le nahuto petum le Ju min, kameni ton le agelo ausim moma terhalipa tonik moma tenekuan le nimwa tahan, an moma tererou nakaran tonik.
23An neteriripen ihlel imwa mairik. An lauk in neterermig mier ilar min, an pian min nevin le Jopa netakairoupen in.
24An lauk in neterua Sesaria; an Kornilias neteramaunin afugen nereman min mene pian min mametanin ilar.
25An Piter neterua imwa, an Kornilias neterail tosig in neteram le nelikin mamohwak.
26Mero Piter neteruit in mameni, Armig, io mun ieremim am.
27An neterakar kam in muan imwa, an neterahm neremim ribor kenarhwafugen.
28An netereni to ilar, Kamiar nakarhinatin mama resmatuan to ieremim Ju ker moma terapitipen wa teruan imwa to ieremim le nahuto pusen ker; an Wuhgin reknetikun in io moma tesenian le ieremim ker moma nar apnapen am wa nar resevitan.
29Mero in ka io mun iava mesenian nar ker lan loanian kahmalipa kiripa io. Mero to nar uk tiakahrapuk moma neta nakaran nemahilipi kiripa io ton?
30An Kornilias netereni, Hnikuer meroatis aur ierem uk io iamamohwak le aur katilum mekuer le nimwa tahak, an ahm ru ieremim ker neteramail le nemrok raviu le nar ramselsel,
31An netereni, Kornilias, nahwakan taham kamerou, an nofenaman taham reknol hninatinan le nemri Wuhgin,
32Mero to nar uk halipen to Jopa maunin Saimon ierem netigen Piter. In ramarik le nimwa te Saimon ierem ramol work le nevige natipun le nikali tehe.
33An ihwe am netiakhalipena tonik, an ik neknol vi neknua. An towek kamar min iaknarhwafugen le nemri Wuhgin mama tiakairou neremnar Ieremera rekneni tonik.
34An Piter neteroag mameni, Nuparhien iaknahm moma Wuhgin resahmpenan ieremim,
35Mero le nahuto min ierem ramagnin in mamol tehwaga ut kenahmpen lan.
36Nakaran ka in rehmalipa to nereri Israel, mamausito in nakaran ut te nemelinuan le Iesu Kristo; in Ieremera te neremim petum.
37Kamiar nakarhinatin nakaran ka kamol le Judia petum, rerwowun le Kalili oatisig le nebaptisoan ierem Jon ramamausito in;
38Iesu le Nasareth, moma Wuhgin ramol kaiuk kam in le Nanumun Ausim mene le nesanenan, ierem ramamavan min mamol nar ut min, mamol ut nerem iaremis ramol nahwohwean kam ilar, mero in ka Wuhgin ramarik lan.
39An kamar nerem iemaihm esas le naremnar min in ramol le ten te Ju min mene le Jerusalem; ierem ilar kamahro mun mamaruit le nik.
40In uk Wuhgin ramosit mun le nian ierem rol kisil, an ramofen moma terier pa.
41Resolan moma to neremim etahun, mero to nerem takaihm esas nerem Wuhgin ramaupan mahmpen ilar, to kamar nerem iemarugan mamaramnum kamar min loanian in ramermig mun le neki nerem kamaremis.
42An rameni hmahma to kamar moma tiakatikun neremim mamaiusito in moma in uk ierem Wuhgin reknehlau moma tereremera le nerem kamarmiuh mene nerem kamaremis.
43Profeta min kamaiusito in, mama le netigen ierem tereni nuparhienan lan taposita tehwaga tat tahan.
44An Piter ramameni ena nakaran min uk, an Nanumun Ausim neterampen le ilar petum nerem kamairou nakaran.
45An nerem kenasigipen ilar nerem kenani nuparhienan lan, nanumun ilar neterakamuka ton nerem karua was ilar Piter, mero in ka nofenan Nanumun Ausim kenuipen le Jentail min mun.
46Mero in ka kamairou ilar kameikar le nakaran min mameni vivi Wuhgin.
47An Piter neteraram, Ieremim ker to renhiau nu moma tesauian nerem uk, nerem kenaros Nanumun Ausim kama katar mene?
48An netereni moma takaui ilar le netige Iesu Kristo. An ilar netakaihrapuk ton mama teramarik nian nevin.
Currently Selected:
Nar 10: LEN1902
Highlight
Share
Copy

Want to have your highlights saved across all your devices? Sign up or sign in
Published by the British and Foreign Bible Society in 1902, reprinted in 1935.