मत्ती 5
5
ईसू कौ पहाड़ी उपदेस
1बा भीड़ कूं देखके ईसू पहाड़ पै चढ़ गयौ और जब बू बैठ गयौ तब वाके चेला वाके जौरै आए, 2 और बू बिनकूं परमेस्वर के वचन की सिछा दैबे लगौ।
सच्ची खुसी
(लूका 6:20–23)
3“धन्य हैं बे जो आतमिक रूप ते जरूरत मन्द है,
चौंकि सुरग कौ राज बिनईं कौए।
4धन्य हैं बे, जो बिलाप करतें चौंकि बे तसल्ली पाबिंगे,
5धन्य हैं बे जो नम्र हैं,
चौंकि बे धरती के अधिकारी बनाए जांगे।
6धन्य हैं बे जो धारमिकता के भूंखे और पियासेए,
चौंकि बे तृप्त करे जांगे।
7धन्य हैं बे, जो दयालू हैं,
चौंकि बिनपै दया करी जाबैगी।
8धन्य हैं बे, जिनके मन पबित्र हैं,
चौंकि बे परमेस्वर कूं देखिंगे।
9धन्य हैं बे जो मेल-मिलाप कराबे बारेऐं,
चौंकि बे परमेस्वर के बेटा बेटी कहे जांगे।
10 #
1 पत 3:14
धन्य हैं बे, जो धारमिकता की बजैह ते दुख उठातैं और सताए जाबतैं,
चौंकि सुरग कौ राज बिनईं कौ है।
11 #
1 पत 4:14
“धन्य हो तुम, जब मेरी बजैह ते लोग तुमारौ अपमान करतैं और तुमें सताबतें और झूंठ बोल बोलकें सब तरैह ते बुरी बुरी बात करतैं। 12#प्रेरि 7:52तब तुम आनन्द मगन होईओं, चौंकि सुरग में तुमारे काजै भौत बड़ौ फल रखौए। जाई बजैह ते बिन्नें उन परमेस्वर की ओर ते बात बताबे बारेन कूं जो तुमते पैहले हते बिनकूं जाई रीति ते सतायौ हतो।
नौन और उजीतौ
(मरकुस 9:50; लूका 14:34–35)
13 #
मर 9:50; लूका 14:34,35 “तुम जा धरती के नौन हौ। अगर नौन अपनों नुनखरौ पन छोड़ दैवे तौ फिर बाय दुबारा काये ते नुनखरौ करौ जाय सके? फिर बू काऊ काम कौ नांय रैहबेगौ केबल जाके कै फैंकौ जाय और आदमिन के पामन ते रोंदौ जाय।
14 #
यूह 8:12; 9:5 “तुम जगत के उजीते हौ। जो सहर पहाड़ पै बसौ होय बू छिप नांय सके। 15#मर 4:21; लूका 8:16; 11:33लोग दीयौ जरायकै परात के नीचे नांय रखतई पर बाय दीबट के ऊपर रखतें तब बाते घर के सब लोगन कूं उजीतौ पौंहचतेै। 16#1 पत 2:12बाई तरैह ते तुमारौ उजीतौ लोगन के सामने चमकै और बे तुमारे भले कामन कूं देखके सुरग में रैहबे बारे तुमारे पिता परमेस्वर की बड़ाई करैं।
परमेस्वर की व्यबस्था के बारे में सिछा
17“तुम जि मत समझौ कै मैं परमेस्वर की व्यबस्था या परमेस्वर की ओर ते बात बताबे बारेन की किताबन कूं खतम करबे आयौऊं। मैं बिन्नें खतम करबे काजै नांय आयौ, पर मैं तौ बिनकूं पूरौ करबे आयौऊं। 18#लूका 16:17चौंकि मैं तुमते सच कैह रयौऊं भलेई आकास और धरती टल जांय पर परमेस्वर की व्यबस्था की एक मात्रा और एक बिन्दीऊ पूरौ भये नांय टलेंगी। 19जामारै अगर जो कोई आदमी परमेस्वर की व्यबस्था की किताब में ते छोटी ते छोटी एकऊ आग्याए तोड़ेगौ और दूसरेन्नें तोड़बौ सिखाबेगौ तौ बू सुरग राज में छोटे तेऊ छोटो करौ जाबेगौ। पर जो कोई इन आग्यान कौ पालन करैगौ और दूसरेन कूं पालन करबौ सिखाबेगौ बू सुरग राज में बड़ौ करो जाबेगौ। 20मैं तुमते कैह रयौऊं कै अगर तुमारी धारमिकता सास्त्रन कूं सिखाबे बारे और फरीसियन की धारमिकताते बढ़के नांय होय तौ तुम सुरग के राज में कबऊ नांय घुस पाऔगे।
गुस्सा के बारे में सिछा
21“तुम पैहलेई सुन चुकेऔ कै पुराने जमाने के लोगन ते कही हती, ‘तुम हत्या मत करियों, और जो कोई हत्या करैगौ बू दन्ड कौ भागी होगौ।’ 22पर मैं तुमते कैह रयौऊं कै जो कोई अपने भईया पै गुस्सा करे तौ बू दन्ड कौ भागी होगौ और जो कोई अपने भईया को अपमान करैगौ तौ बाय पंचायत में जबाब देनौ होगौ और जो कोई अपने भईया कूं बद दुआ दैबेगौ बू नरक की आग के दन्ड के लायक होगौ।
23“जामारै अगर तू अपनी भेंट परमेस्वर काजै बेदी पै चढ़ाबे लाबे और म्हांपै तोय जि याद आबे कै मेरे भईया के मन में मेरी ओर ते कछू मन-मुटाब है, 24तौ तू अपनी भेंट बेदी के सामने छोड़ दै। और जायकें सबते पैहले अपने भईया ते मेल-मिलाप कर लै वाके बाद, आयकै अपनी भेंट चढ़ा।
25“अगर तेरौ बिरोधी तोय कचैहरी लै जाय रौ होय, तौ तू रस्ताई में बाते झटपट मेल-मिलाप कर लियो कऊं ऐसौ नांय होय तेरौ बिरोधी तोय न्याय करबे बारे के हात में दै देय और न्याय करबे बारौ तोय सिपाइयन के हात में सौंप दैबै और सिपाही तोय जेल में डार देबें। 26मैं तोते सच सच कैह रयौऊं, कै जब तक तू मुद्दई की पाई पाई नां भर देगौ तब तक म्हांते छूट न पाबेगौ।
कुकर्म के खिलाफ सिछा
27“तुम पैहलेई सुन चुकेऔ, ‘कुकर्म मत करियों।’ 28पर मैं तुमते कैह रयौऊं, कै अगर तुम काऊ औरत पै बुरी निगाह डारतौ तौ समझ लेओ के तुम अपने मन में बा औरत ते कुकर्म कर चुकेऔ। 29#मत्ती 18:9; मर 9:47अगर तेरी सीधी आँख तोय पाप के रस्ता पै लै जाबै, तौ तू बा आँख कूं फोड दै, जाते तौ जि बढ़ियाए कै तेरौ एक अंग नांस है जाय और पूरौ सरीर नरक में नांय डारौ जाय। 30#मत्ती 18:8; मर 9:43और अगर तेरौ सीधौ हात तोते पाप करबाबतै तू बाय काट के अपने जौरै ते फैंक दै जाते तौ जि बढ़ियाए कै तेरौ एक अंग नांस है जाय और पूरौ सरीर नरक में नांय डारौ जाय।
तलाक
(मत्ती 19:9; मरकुस 10:11–12; लूका 16:18)
31 #
मत्ती 19:7; मर 10:4 “तुमते जेऊ कही गयी, ‘अगर कोई अपनी पत्नी कूं छोडै तौ बाय लिखकै त्याग पत्र देय।’ 32#मत्ती 19:9; मर 10:11,12; लूका 16:18; 1 कुरि 7:10,11पर मैं तुमते कैहतूं, अगर कोई आदमी अपनी पत्नी कूं कुकर्म के अलाबा काऊ दूसरी बजैह ते छोड़तै और बू पत्नी दूसरे आदमी के संग रैहते तौ वाके कुकर्मी हैबे कौ जिम्मेदार वाकौ पैहलौ आदमी होगौ। और जो कोई बा छोड़ी भयी ते ब्याह करै तौ बेऊ वाके संग कुकर्म करतै।
सौगन्ध के बारे में सिछा
33“तुम जेऊ सुन चुकेऔ कै पुराने जमाने के लोगन ते कही गयी हती, ‘तुम सौगन्ध मत तोरियों पर पिरभू के काजै अपनी सौगन्ध कूं पूरी करियों।’ 34#याकू 5:12; मत्ती 23:22पर मैं तुमते कैह रयौऊं, तुम कबऊ सुरग की सौगन्ध मत खईंयों। चौंकि बू परमेस्वर की राजगद्दी है। 35और ना धरती की सौगन्ध खईंयों चौंकि बू वाके पामन की चौकीए, ना येरूसलेम सहर की सौगन्ध खईंयों चौंकि जाकौ राजा महान हैं। 36और अपने सिर कीऊ सौगन्ध मत खईयों चौंकि तू अपने सिर कौ एकऊ बाल न तौ कारो कर सकै और न सफेद कर सकै। 37पर तुमारी बात हाँ की हाँ और नां की नां होय, चौंकि जाते और कछू जादा होबे तौ बू बुराई ते पैदा होतै।
बदले की भाबना मत रखौ
(लूका 6:29–30)
38“तुम लोग सुन चुकेऔ कही गई हती, ‘आँख के बदले आँख, और दांत के बदले दांत।’ 39पर मैं तुमते कैहरौऊ कै बुराई करबे बारे आदमी के संग बुराई मत करिओं। पर कोई तेरे सीदे गाल पै थप्पड़ मारै तौ वाके माऊं अपनों दूसरौ गाल कर दियौ। 40अगर कोई तुमते तुमारौ कुरता जबरन लेबौ चाहबे तौ तुम बाय अपनी लोईऊ दै दियौं। 41अगर कोई तुमें बेगार में एक कोस ले जाए तौ तुम वाके संग दो कोस तक चले जईयों। 42अगर कोई आदमी तोते कछू मांगे तौ तू बाय दै और जो कोई आदमी तोते उधार लैबै तौ तू बाते मौंह मत मोड़िऔ।
दुसमनन ते पिरेम करौ
(लूका 6:27–28,32–36)
43“तुम सुन चुकेऔ कै जि कही गई हती, ‘अपने पड़ौसी ते पिरेम रखियों और अपने बैरिन ते बैर।’ 44पर मैं तुमते कैहरौऊ कै अपने बैरिन ते पिरेम रखौ और अपने सतायबे बारेन के काजै पिराथना करौ, 45जाई ते तुम अपने सुरगीय पिता की सन्तान ठहरौगे चौंकि बू भले और बुरे दोनोंन पै अपनों सूरज निकारे और बू भले और बुरे दोनोंन पै अपनों मेह बरसाबे है। 46चौंकि अगर तुम अपने पिरेम करबे बारेन तेई पिरेम करतौ तौ वाके काजै तुमें का इनाम मिलैगौ? ऐसौ काम तौ चुंगी लैबे बारेऊ करतैं। 47अगर तुम अपने भईयन तेई नमस्कार करतौ तौ का भलौ काम करतौ? ऐसौ तौ गैर यहुदीऊ करतैं। 48जामारै तुम सब तरैह ते सिद्ध है जाऔ जैसे कै तुमारौ सुरगीय पिता सिद्ध है।
Currently Selected:
मत्ती 5: BRAJ
Highlight
Share
Copy
Want to have your highlights saved across all your devices? Sign up or sign in
NonCommercial-NoDerivatives 4.0 International (CC BY-NC-ND 4.0)
