लूका 4

ईसू की परीछा

(मत्‍ती 4:1–11; मरकुस 1:12–13)

1ईसू पबित्र आतमा ते भरकै यरदन नदी ते बापस आयौ। तब आतमा बाय बेहड़ में लै गयौ। 2ईसू चालीस दिना तक मांपै रहो और सैतान नें वाकी परीछा लई। ईसू नें बिन दिनान में कछू नांय खायौ और जाके बाद बाय भूंक लगी।

3तब सैतान नें बाते कही, “कै अगर तू परमेस्‍वर कौ बेटाए तौ इन पत्‍थरन ते कैह दै कै जे रोटी बन जांय।”

4पर ईसू नें जबाब दयौ, “पबित्र सास्त्र में लिखौ है कै, ‘आदमी केवल रोटी तेई नांय जीबित।’”

5फिर सैतान बाय ऊंची जगैह पै लै गयौ और पल भर में दुनियां कौ सबरौ राज दिखायौ 6और बानें ईसू ते कही कै, “मैं जि सब अधिकार और बैभव तोय दै दुंगो चौंकि जि सब मोय सौंपो गयौ है और मैं जाय चाहूँ बाय दै देतूं। 7अगर तू झुककै मोय दन्‍डबत करै तौ जि सब तोय दै दुंगो।”

8ईसू नें बाते कही कै, “पबित्र सास्त्र में लिखौ भयौ है,

“‘तू केवल अपने पिरभू परमेस्‍वर कूं दन्‍डबत कर और बाई की अराधना कर।

तू केवल बई की सेबा कर।’”

9तब सैतान बाय येरूसलेम के बड़े पिराथना घर की सबते ऊंची जगह पै लै गयौ और बाते कही, “कै अगर तू परमेस्‍वर कौ बेटाए तौ तू अपने आप कूं य्हांते नीचै गिरा दै। 10चौंकि लिखौ भयौ है कै,

“‘बू तेरे काजै अपने सुरग दूतन कूं आग्‍या देगौ और बे तेरी रछा करिंगे।’

11‘बे तोय हातो हात उठाय लिंगे कऊं ऐसौ न होय,

कै तेरे पामंन में पत्‍थर ते ठेस लगे।’”

12ईसू नें बाय उत्‍तर दयौ, “जेऊ लिखौ भयौ है, ‘कै तू अपने पिरभू परमेस्‍वर की परीछा मत करियो।’”

13जब सैतान ईसू की सब तरैह ते परीछा लै चुकौ वाके बाद बू बाय थोड़े समै तक छोड़कै चलौ गयौ।

ईसू की सेबा की सुरूआत

(मत्‍ती 4:12–17; मरकुस 1:14–15)

14फिर जब ईसू आतमा की सामर्थ ते भरकै गलील कूं लौटौ तौ वाकी चर्चा जौरें के सबरे इलाकेन में फैल गई। 15और ईसू पिराथना घरन में परमेस्‍वर के वचन की सिछा देतौ रहौ और सब लोग वाकी बड़ाई करते हते।

ईसू का नासरत में लौटना

(मत्‍ती 13:53–58; मरकुस 6:1–6)

16ईसू नासरत में आयौ ज्हांपै बू पलौ-बड़ौ हतो और यहुदियन के आराम दिना में बू अपनी आदत के अनुसार पिराथना घर जायकै पढ़बे के काजै खड़ौ भयौ। 17परमेस्‍वर की ओर ते बात बताबे बारे यसायाह नाम के आदमी की किताब पढ़बे काजै बाय दई गई और बानें किताब खोलकें,बू पाठ निकारौ ज्हांपै जि लिखौ भयौ हतो।

18“पिरभू को आतमा मोपै है,

जामारै बानें कंगालन कूं सुभमाचार सुनांयबे काजै मेरौ अभिसेक करौ है और मोय जाई के काजै भेजौ है कै,

बंधुअन कूं छुटकारे कौ और

अंन्धेन कूं रोसनी मिलबे कौ सुभ समाचार पिरचार करूं

और कुचले भयेन नें छुड़ाऊं।

19और पिरभू के दया के समै कौ पिरचार करूं।”

20तब ईसू नें किताब बन्द करके दास के हात में दे दई और बू मंई बैठ गयौ। पिराथना घर के लोग ईसू की ओर देखबे लगे। 21तब ईसू उनते कैहबे लगौ, “कै पबित्र सास्त्र में लिखौ भयौ, जि लेख आज तुमारे सामने पूरौ भयौ है।”

22हर कोई ईसू की बड़ाई कर रयौ हतो, वाके मौंह ते दया ते भरे वचनन कूं सुनकें लोग अचम्भौ करबे लगे,और कहबे लगे, “का जि यूसुफ कौ बेटा नांय?”

23तब ईसू नें बिनते कही, “तुम लोग मोते जि कहाबत जरूर कहौगे, ‘कै हे बैद्य तू अपने कूं ठीक कर और जो कछू तैनें कफरनहूम में करौ हतो वाके बारे में हमनें सुनौ है, बाय तू अपने नगर मेंऊं करकै दिखा।’”

24 # यूह 4:44 फिर ईसू नें कही, “मैं तुमते सच कह रयौ हूं कै, कोई परमेस्‍वर की ओर ते बात बतायबे बारौ अपने नगर में सम्मान नांय पावत। 25मैं तुमते सच कैहतूं, कै एलियाह के दिनान में साढे़ तीन साल तक आकास ते मेह नांय बरसौ और सबरे देस में अकाल पर गयौ, तब इसरायल में भौत सी बिधबा हती। 26पर एलियाह सैदा नगर के जौरें बारे सारपत गांम की एक बिधबा के जौरें ही गयौ। 27और ऐसेई परमेस्‍वर की ओर ते बात बताबे बारे एलिसा के दिनान में इसरायल में भौत ते कौढ़ी हते। पर सीरीया देस में रैहबे बारे नामान कोढ़ी कूं छोड़िकें और काऊ कूं सुद्ध नांय करौ गयौ हतो।”

28पिराथना घर में जितने लोग हते, बे सब जा बात कूं सुनकें गुस्सा ते भर गए। 29और बे सब लोग ईसू कूं नगर ते बाहर पहाड़ की चोटी पर लै गये जा पहाड़ पै बू नगर बसौ भयौ हतो कै बे बाकूं मांते नीचे गिराय दें, 30पर ईसू चुपचाप बिनके बीच में ते निकरकै चलौ गयौ।

एक आदमी कौ दुस्‍ट आतमा ते छुटकारौ

(मरकुस 1:21–28)

31फिर ईसू गलील के कफरनहूम नगर में गयौ और यहुदियन के आराम दिन में लोगन कूं परमेस्‍वर के वचन की सिछा दैवे लगौ। 32#मत्‍ती 7:28,29बे लोग वाकी परमेस्‍वर के वचन की सिछा ते चकित है गये, चौंकि वाकौ वचन अधिकार ते भरौ भयौ हतो।

33पिराथना घर में एक आदमी हतो जापै दुस्ट आतमा हती बू बड़े जोर ते चिल्लायौ, 34“हे नासरत नगर के ईसू! तोय हमते का काम? का तू हमें नांस करबे आयौ है? मैं तोय जान्‍तूं कै तू कौऐ, तू परमेस्‍वर कौ पबित्र जन हैं।” 35ईसू नें बाय फटकारकै कही, “चुप है जा और जा आदमी में ते निकर जा” तब दुस्‍ट आतमा नें बा आदमी कूं धरती पै पटक दयौ और वाकौ बिना कछू नुकसान करे भये बामें ते निकर गई।

36जापै सब लोगन कूं बड़ौ अचम्भौ भयौ और बे आपस में बात करबे लगे कै, “जि कैसी बात है? कै जि अधिकार और सामर्थ के संग दुस्‍ट आतमान कूं आग्‍या देतुए और बे निकरकै भाग जाबें।” 37और ईसू की जा बात की चर्चा आस-पास के सबरे इलाकेन में फैल गयी।

बीमार औरत कूं ठीक करौ

(मत्‍ती 8:14–17; मरकुस 1:29–34)

38तब ईसू पिराथना घर में ते उठकै सिमौन के घर में गयौ, मांपै वाकी सास कूं बुखार चढ़ि रयौ हतो, बिन्‍नें ईसू ते वाके काजै बिनती करी, कै बू बाय ठीक करै। 39ईसू नें वाके जौरें जायकै बुखार कूं डांटौ और बू ठीक है गई और बू उठकै बिनकी सेबा करबे लग गई।

ईसू नें भौत ते बीमार लोगन कूं ठीक करौ

40जब सूरज छिपबे पै हतो तब जिनके य्हां लोग अलग अलग तरैह की बीमारिन में परे हते, बे सब बिनैं ईसू के जौरें लैके आए और तब बानें हर एक के सिर के ऊपर हात रखत भये बिनकूं ठीक कर दियो। 41और भौतन में ते दुस्‍ट आतमा चिल्लावत भए जि कैहकै बाहर निकर जातीं, “कै तू परमेस्‍वर कौ बेटा है” पर ईसू बिनें फटकारतौ और बिनें बोलबे कौऊ मौकौ नांय देतौ चौंकि बे जानतीं हती कै “बू मसीह है।”

ईसू दूसरे नगरन में गयौ

(मरकुस 1:35–39)

42जब सबेरौ भयौ तब ईसू मांते निकरकै बेहड़ में गयौ और भीड़ बाय ढूढत भये वाके जौरें आई और बाय रोकत भये कैहबे लगी, “य्हांते मत जा।”

43पर ईसू नें बिनते कही, “मोय दूसरे नगरन मेंऊ परमेस्‍वर के राज कौ सुभ समाचार सुनांबौ जरूरी है, चौंकि मैं जाई कै काजै भेजौ गयौ हूं।” 44और बू यहुदिया देस के पिराथना घरन में परमेस्‍वर के वचन की सिछा देतौ रहौ।

Currently Selected:

लूका 4: BRAJ

Highlight

Copy