लूका 1
1
1जो बात हमारे बीच में भई हैं, बिनकौ इतिहास लिखबे की भौत ते लोगन नें कोसिस करी। 2जोकि वचन के सेबक हैं, बिन्नें बू बात सुनींऐं और बिनके द्वारा हम तक पौहचीं हैं। 3हे स्रीमान थियुफिलुस! मोऊए जि अच्छौ लगौ कै, मैं इन सब बातन कूं सुरू ते सावधानी के संग तेरे काजै सही सही जाँचकें क्रमते लिखूं, 4जाते कै तू इन बातन्नें जान सकै कै, बे सबरी बात सहीऐं और अटल हैं।
यूहन्ना बपतिस्मा दैबे बारे के जनम की भविस्यबानी
5-6यहुदियन के राजा हेरोदेस के समै में यहुदी पुरोहित समाज के अबिय्याह के दल में जकरयाह नाम कौ एक यहुदी पुरोहित हतो, वाकी पत्नी हारून के बन्स की हती और वाकौ नाम इलिसिबा हतो, बू दोनों परमेस्वर के सामने धरमी हते और पिरभू की सबरी आग्या मानबे बारे और बिनपै चलबे बारे हते। 7बिनके कोई औलाद नांय हती। चौंकि इलिसिबा बांझ हती और बे दोनों बूढ़े हते।
8एक बार जकरयाह अपने दल की पारी पै परमेस्वर के सामने पुरोहित कौ काम कर रयौ हतो, 9तब पुरोहितन के नियम के अनुसार वाके नाम की परची निकरी कै, बू पिरभू के बड़े पिराथना घर में जायकै धूप जराबै। 10धूप जराबे के समै सबरे लोगन कौ झुंड बाहर पिराथना कर रयौ हतो।
11तब जकरयाह कूं धूप जराबे की बेदी के सीदे हात माऊं पिरभू कौ सुरग दूत खड़ौ दिखाई दयौ। 12जकरयाह बाय देखकें घबरा गयौ और भौत भय भीत है गयौ। 13पर सुरग दूत नें बाते कही, “हे जकरयाह डरपै मत चौंकि परमेस्वर नें तेरी पिराथना सुन लयी है और तेरी पत्नी इलिसिबा एक बेटा जनैगी तू वाकौ नाम यूहन्ना रखियो। 14तोय भौत खुसी होबैगी और वाके पैदा हैबे ते लोग खुसी मनाबेगें। 15बू पिरभू के सामने महान हैबैगौ और वाके काजै अंगूर कौ रस और नसीली चीजन्नें पीवौ मना है और बू अपनी माँ के पेट में तेई पबित्र आतमा ते भरौ होबैगौ। 16और बू इसरालीयन में ते भौतन कूं बिनके पिरभू परमेस्वर की ओर फेरैगौ, 17और बू बाई सक्ती और आतमा ते जो एलियाह के जौरें हती, बाई सामर्थ ते पिरभू के आगे-आगे चलैगौ और बू बाप दादान कौ मन अपने बालकन के मांऊ फेरैगौ और परमेस्वर की आग्यान मानबे बारेन कूं बू धरमियन की समझ दैबेगौ और बू पिरभू के काजै भौत ते लोगन कूं तैयार करैगौ।”
18जकरयाह नें सुरग दूत ते पूछी, “मैं जि कैसै जानूं? चौंकि मैं तौ बूढौ है गयौऊं और मेरी पत्नीऊं बूढी है गई है।”
19तब सुरग दूत नें बाते कही, “कै मैं जिबरायल हूं, मैं परमेस्वर के सामने वाकी सेबा के काजै खड़ौ रैहतूं और मैं तोते बात कर रयौ हूं, मैं तेरे जौरें सुख कौ समाचार सुनांयबै काजै भेजौ गयौ हूं। 20देख जा दिना तक जि सबरी बात पूरी न हे जाबैगीं बा दिना तक तू गूंगौ रैहबेगौ और तू बोल नांय सकेगौ चौंकि तैने मेरी बातन पै भरोसौ नांय करौ।”
21-22लोग जकरयाह कौ इन्तजार कर रये हते और जब जकरयाह बाहर आयौ तब लोगन कूं अचम्भौ भयौ चौंकि बू बोल नांय सकौ, बू गूंगौ है गयौ और बू केवल इसारे करतो हतो, तब बे सब जान गये कै बड़े पिराथना घर में इतनी देर चौं भईए जरुर जानें कोई दरसन देखौए।
23जब वाके सेबा के दिन पूरे है गये तब बू अपने घर कूं चलौ गयौ।
24कछू दिनां बाद वाकी पत्नी इलिसिबा पेट ते भई और बू पाँच महीना तक अपने आप कूं दुबकाबत रही। 25और बू ऐसे कैहती, “कै लोगन में मेरौ अपमान दूर करबे काजै इन दिनान में पिरभू नें मेरे ऊपर किरपा करके मेरे काजै ऐसौ करौ है।”
ईसू के पैदा हैबे की भविस्यबानी
26इलिसिबा कूं छटमों महीना लगौ तब परमेस्वर की ओर ते जिबरायल नाम कौ सुरग दूत गलील के नासरत सहर में, 27#मत्ती 1:18एक क्वारी के जौरें भेजौ गयौ, जाकी सगाई दाऊद के घराने में ते यूसुफ नाम के एक आदमी के संग भई। बा क्वारी को नाम मरियम हतो। 28 सुरग दूत नें वाके जौरें भीतर आयकें कही, “तोकूं नमस्कार, तोपै परमेस्वर की किरपा भईए और पिरभू तेरे संग है।”
29जि वचन सुनकें मरियम घबरा गई और सोचबे लगी कै, “जा नमस्कार कौ का मतलब है?”
30तब सुरग दूत नें बाते कही, “हे मरियम डरपै मत, चौंकि तोपै परमेस्वर की किरपा भईए, 31#मत्ती 1:21और सुन तू पेट ते होबैगी और एक बेटा जनेंगी तू वाकौ नाम ईसू रखियो। 32बू महान होबैगौ और परम पिरधान कौ बेटा कहौ जावेगौ, पिरभू परमेस्वर बाय वाके पुरखा दाऊद की राजगद्दी दैवेगौ। 33और बू याकूब के वंसजन पै हमेसा राज करैगौ और वाकौ राज कबऊ खतम नांय हैबैगौ।”
34मरियम नें सुरग दूत ते कही, “कै जि कैसै है सकैं? मैं तौ अबई क्वारी हूं।”
35तब सुरग दूत नें बाते कही, “कै तोपै पबित्र आतमा आबैगौ और परम पिरधान की सामर्थ की छाया तोपै परैगी जामारै बू पबित्र पैदा हैबैगौ और बू परमेस्वर को बेटा कहौ जाबैगौ। 36और सुन तेरे खानदान की इलिसिबा बुढापे में बेटा जनैगी जाय सब लोग बांझ कैहतें अब वाकौ छटौ महीना चल रयौ है। 37परमेस्वर के काजै कछू अनहोनौ नांय, जाय बू नांय कर सकै।”
38मरियम नें बाते कही कै, “देख मैं पिरभू की दासी हूं। और तेरे वचन के अनुसारई मेरे संग हैबैगौ, जाके बाद बू सुरग दूत मांते चलौ गयौ।”
मरियम इलिसिबा ते मिलबे कूं गई
39कछू दिनान के बाद मरियम तैयार हैके जल्दी ते यहुदिया के पहाड़ी इलाके के एक नगर में गई। 40बानें जकरयाह के घर में जायकै इलिसिबा कूं नमस्कार करौ। 41जैसेई इलिसिबा नें मरियम कौ नमस्कार सुनों तबई वाके पेट में बालक कूंदबे लगौ। और इलिसिबा पबित्र आतमा ते भर गई। 42और बानें ऊंची अबाज ते कही, तू सबरी औरतन में धन्य है और तेरे पेट कौ बालकऊ धन्य है। 43जि किरपा मोपै कांते भईए, कै मेरे पिरभू की मा मेरे जौरें आईए। 44जबई मैंनें तेरौ नमस्कार सुनों तबई मेरे पेट कौ बालक कूंदबे लगौ। 45तू धन्य है कै तैने पिरभू की बातन पै भरोसौ करौ है जो बातें पिरभू नें कहीएं बे सबरी पूरी होबैगी।
मरियम नें परमेस्वर की बड़ाई करी
46तबई मरियम नें कही,
“मेरौ पिरान पिरभू की बड़ाई करतै
47मेरी आतमा उद्धारकरता परमेस्वर की खुसी ते भर गई हती।
48मैं जो वाकी दासी हूं बानें मोपै दया दिखाईए,
जाके मारे लोग मोय जुग-जुग तक धन्य कहिंगे,
49और वाकौ नाम पबित्र है,
चौंकि बा सक्तीमान नें मेरे काजै बड़े-बड़े काम करे हैं।
50और जो वाकौ भय मानतै उनपै वाकी दया
पीढ़ी ते पीढ़ी तक बनी रैहतै,
51बानें अपनी सामर्थ ते
जो अपने आप कूं बड़ौ समझत काए बिनकूं बिखेर दयौ है।
52बानें राजा महाराजन कूं राजगद्दी ते नीचे गिराय दयौ है
और दीन कमजोर लोगन कूं बानें ऊँचौ कर दयौए,
53सब जरूरत मन्दन की जरूरत अच्छी चीजन ते पूरी कर दई है
और धनबानन के हात बानें खाली कर दये हैं।
54-55परमेस्वर नें बू बात याद रखीं
जो बानें हमारे पुरखा अब्राहम और वाकी पीढ़ी ते कही हतीं
कै, ‘मैं अब्राहम और वाकी पीढ़ी पै सदा दया करुंगो।’
जामारै बानें अपने दास इसरायल कूं सम्हारोए।”
56मरियम लगभग तीन महीना तक इलिसिबा के संग रही और वाके बाद बू अपने घर बापिस लौट गई।
यूहन्ना बपतिस्मा दैबे बारौ पैदा भयौ
57तब इलिसिबा के बालक पैदा हैबे कौ समै भयौ और वाके एक बेटा पैदा भयौ, 58वाके पड़ौसी और खानदान के सबरे लोगन नें जब जि सुनी कै पिरभू नें बापै दया करी है तौ बे सब वाके संग बड़े खुस भये।
59जब आठमें दिना खतना करबे बारे बा बालक कौ खतना करबे काजै आये और वाकौ नाम वाके बाप के नाम पै जकरयाह रखबे लगे, 60पर वाकी माँ बोल उठी कै जाकौ नाम जकरयाह नांय रखौ जाबैगौ, जाकौ नाम तौ यूहन्ना रखौ जाबैगौ।
61तब लोगन नें बाते कही, “तेरे खानदान में जि नाम तौ काऊ कौ नांय।”
62फिर बे वाके बाप ते इसारे में पूछबे लगे कै, “तू जा बालक कौ नाम का रखबौ चाहतै?” 63तब बानें लिखबे बारी पट्टी मंगाई और वाकौ नाम बानें यूहन्ना लिख दयौ तब सबन्नें अचम्भौ करौ। 64और तबई जकरयाह की जीब की गाँठ खुल गई और बू बोलबे लग गयौ। और परमेस्वर की बड़ाई करबे लगौ। 65जा बात ते मांके अड़ौस परौस के सब रैहबे बारेन पै भय छा गयौ और इन सब बातन की चर्चा सबरे यहुदिया के देस के पहाड़ी इलाके में फैल गई, 66और सब सुनिबे बारे अपने मन में जि कैहबे लगे कै, “जि बालक कैसौ है?” पिरभू वाके संग है।
जकरयाह कौ भजन
67यूहन्ना कौ बाप जकरयाह पबित्र आतमा ते भर गयौ और परमेस्वर की ओर ते कैहबे लगौ।
68“इसरायल के पिरभू परमेस्वर की महिमा होबै
चौंकि बानें अपने लोगन पै दया करी है और बिनैं छुड़ायौ है।
69और बानें अपने दास दाऊद के घराने में
हमारे काजै एक सामर्थी उद्धारकरता भेजौ है,
70जैसौ कै बानें परमेस्वर की ओर ते बातें बताबे बारे पबित्र लोगन के द्वारा पैहले समैं तेई कही हतीं।
71कै बू आबैगौ और तुमें तुमारे बैरियन ते
और तुमते नफरत करबे बारेन के हातन ते छुड़ाबैगौ।
72बानें अपनी पबित्र बाचाए याद रखी,
और हमारे पुरखन पै दया दिखायी
73कै जो सपथ बानें हमारे पिता अब्राहम ते खाई हती।
74कै बू हमें हमारे बैरीयन के हातन ते छुड़ाबैगौ,
और हम बिना डर के पिरभू की सेबा करते रैहबें,
75हम पूरी जिन्दगी वाके सामने पबित्रता और धारमिकता ते जि सकै।
76हे मेरे बेटा, तू परम पिरधान परमेस्वर की ओर ते बातें बताबे बारो कहौ जाबैगौ
तू पिरभू के काजै लोगन के मन कूं तैयार करैगौ और वाके आगे-आगे चले करैगौ।
77और परमेस्वर के पबित्र लोगन कूं बिनके पापन की मांफी के काजै उद्धार कौ ग्यान दैवेगौ।
78और हमारे परमेस्वर की बड़ी किरपा ते
हम पै उद्धारकरता ऊपर सुरग ते उगते भये सूरज की तरैह ते चमकैगौ।
79और जि उजीतौ अंधेरे और मौत की छाया में बैठबे बारेन के ऊपर चमकैगौ
और बू हमारे पामंन कूं सान्ती के रस्ता पै चलाबैगौ।”
80और बू बालक बड़तौ और आतमा में बलबन्त होत गयौ और इसरायल के लोगन के सामने पिरकट हैबे ते पैहले बू बेहड़ में रहौ।
Currently Selected:
लूका 1: BRAJ
Highlight
Share
Copy
Want to have your highlights saved across all your devices? Sign up or sign in
NonCommercial-NoDerivatives 4.0 International (CC BY-NC-ND 4.0)
