यूहन्‍ना 13

ईसू नें चेलान के पाम धोबो

1फसह के तौहार ते पैहले कौ दिना हतो। ईसू जि जानतौ कै, “अब मेरौ बू समै आ गयौ है, जब मोय जा संसार कूं छोड़कै पिता के जौरें जानों है।” जा संसार में जो वाके अपने लोग हते, बिनते जैसौ पिरेम करतौ आयौ हतो बैसौई पिरेम अन्‍त तक बिनते करतौ रयौ।

2सैतान साम कूं खानों खायबे के समै तक सिमौन के बेटा यहूदा इस्करियोती के मन में जि डार चुकौ हतो कै बू ईसू कूं धोखे ते पकड़बा दैबे। 3ईसू जि जानतौ कै, “परमेस्‍वर पिता ने मेरे हातन में सब कछू दै दयौ है और मैं परमेस्‍वर के जौरें आयौऊं और परमेस्‍वर के जौरेंई जा रयौ हूं।” 4जामारै ईसू नें खानों खायबे पैते उठकै अपनों कुर्ता उतारौ और कमर में अँगौछा बांध लियौ। 5तब बू एक परात में पानी भरकै अपने चेलान के पाँम धोबे लगौ और अपनी कमर में बंधे अँगौछे ते पाँमन नें पौंछबे लगौ।

6फिर जब बू सिमौन पतरस के जौरें पौंहचौ तौ पतरस नें बाते कही, “हे पिरभू, का तू मेरे पाँमन नें धोबेगौ?”

7तब ईसू नें बाते कही, “तू अबई नांय जान्‍त कै मैं का कर रयौऊं, पर तू बाद में जान जाबैगौ।”

8पतरस नें ईसू ते कही, “मैं तोय अपने पाँम कबऊ नांय धोन दूँगो।”

ईसू नें बाते कही, “अगर मैं तेरे पाँम नांय धोऊंगो तौ तेरौ मोते कोई सम्बन्ध नांय रैहबेगौ।”

9जापै सिमौन पतरस नें ईसू ते कही, “पिरभू, तब तौ मेरे पाँमन नेंई नांय, बल्कि मेरे हातन नें और मेरे सिरऊऐं धो दै।”

10तब ईसू नें बाते कही, “जो नहाय चुकौ है, बाय अपने पाँमन के सिबा और कछू धोबे की जरूरत नांय। चौंकि बू पूरी तरैह ते सुद्ध है। तुम लोग सुद्ध हो, पर सबके सब नांय।” 11ईसू अपने संग बिसबास घात करकै पकरबायबे बारेऐं जानतो हतो जामारै बानें कही हती कै, “तुम सबके सब सुद्ध नांऔ।”

12 # लूका 22:27 तब चेलान के पाँम धोबे के बाद ईसू नें अपनों कुर्ता लयौ फिर बैठकै बिनते बोलों, “का तुम समझतौ कै मैंनें तुमारे संग का करौऐं? 13तुम मोय, ‘गुरू’ और ‘पिरभू’ कैहतौ, और तुम ठीकई कैहतौ। चौंकि मैं बेई हूं। 14जामारै अगर मैंनें पिरभू और गुरू हैके तुमारे पाँम धोये हैं, तौ तुमऊऐं एक दूसरे के पाँम धोने चहिऐं। 15चौंकि मैंनें तुमें नमूना दिखायौ है, कै जैसौ मैंनें तुमारे संग करौ है, बैसौई तुमऊं करै करौ। 16#मत्‍ती 10:24; लूका 6:40; यूह 15:20मैं तुमते सच कैह रयौऊं, सेबक अपने मालिक ते बड़ौ नांय और ना भेजौ भयौ बाते बड़ोऐ जानें बाय भेजौ है। 17तुमतौ सच्‍चाई जानतौ अगर तुम इन बातन पै चलोगे तौ तुम धन्य हो।

18“मैं जि तुम सबन के बारे में नांय कैह रयौ, मैं जान्‍तू कै मैंनें किन किन लोगन कूं चुनों है। पर जि जामारै भयौ है कै पबित्र सास्त्र कौ बू वचन पूरौ होबै, ‘जानें मेरी रोटी खायी बुई मेरे बिरोध में है गयौ।’

19“अब मैं पैहले तेई तुमें जि जामारै बता रयौऊं, कै जब ऐसौ होबै तब तुम भरोसौ करौ कै बू मैंई हूं। 20#मत्‍ती 10:40; मर 9:37; लूका 9:48; 10:16मैं तुमते सच कैह रयौऊं, जो मेरे भेजे भयेऐं अपनाबतै, बू मोय अपनाबतै और जो मोय अपनाबतै, बू बाय अपनाबतै जानें मोकूं भेजौ है।”

धोखा दैबे बारे के बारे में ईसू कौ बोलबौ

(मत्‍ती 26:20–25; मरकुस 14:17–21; लूका 22:21–23)

21जि कैहबे के बाद ईसू की आतमा भौत व्‍याकुल भयी और जि गबाही दयी, “मैं तुम लोगन ते सच कैह रयौऊं तुम में तेई एक मोय धोखे ते पकड़बा दैबेगौ।”

22चेला एक दूसरे कूं देखत रहे, बे समझ नांय पा रये हते कै बू कौन के बारे में कैह रयौ है। 23ईसू के चेलान मेंते एक चेला, जाय बू पिरेम करतौ, बू वाके बगल में बैठौ भयौ हतो। 24तब सिमौन पतरस नें बाते इसारौ करकै कही, “पूंछ तौ सई, बू कौ है?”

25तब बा चेला नें धीरे ते ईसू ते पूंछी, “हे पिरभू, बू कौन है?”

26ईसू नें कही, “बू बेईऐ, जाय मैं जि रोटी कौ टुकड़ा जा कटोरा में डुबोयकै दुंगो।” बानें रोटी कौ टुकड़ा डुबोयकै सिमौन इस्करियोती के बेटा यहूदा कूं दयौ। 27यहूदा के टुकड़ा लेतेई सैतान बामें घुस गयौ।

तब ईसू नें बाते कही, “तोय जो करनों है, बाय जल्दी कर।” 28पर मांपै बैठे भयेन में कोई जि नांय समझ पायौ कै ईसू नें बाते जि बात चौं कही। 29यहूदा के जौरें रुपईयन की थैली रैहती जामारै कछू लोग जि समझ रये हते कै ईसू बाते कह रयौ है कै तौहार काजै जरूरी सामान खरीद लै या जि कैह रयौ है कै गरीबन कूं कछू दै दै।

30तब यहूदा रोटी कौ टुकड़ा लैके बाई समै बाहर चलौ गयौ। जि रात कौ समै हतो।

31जब यहूदा बाहर चलौ गयौ तब ईसू नें कही, “मुझ, ‘मनुस्‍य के बेटा’ की महिमा पिरकट भयी है और मेरे द्वारा परमेस्‍वर की महिमा पिरकट होगी। 32अगर मेरे द्वारा परमेस्‍वर की महिमा पिरकट होतै, तौ परमेस्‍वरऊ अपने में मुझ, ‘मनुस्‍य के बेटा’ की महिमा पिरकट करैगौ और बू जल्दी अई महिमा पिरकट करैगौ।

33 # यूह 7:34 “हे मेरे प्यारे बालकौ! मैं और थोड़े समै तक तुमारे संग हूं। तुम मोय ढ़ूढोगे, और जो मैंनें यहुदियन ते कही हती, अब तुमतेऊ बेई कैह रयौऊं, मैं ज्हाँपै जा रयौऊं, मांपै तुम नांय आ सकत।

34 # यूह 15:12,17; 1 यूह 3:23; 2 यूह 1:5 “मैं तुम लोगन कूं एक नयी आग्‍या दै रयौऊं, तुम एक दूसरे ते पिरेम करौ जैसौ मैंनें तुम लोगन ते पिरेम करौ है, बैसेई तुम एक दूसरे ते पिरेम करौ। 35अगर तुम एक दूसरे ते पिरेम करौगे तौ बाई ते सब लोग जानिंगे कै तुम मेरेई चेला हो।”

पतरस के इनकार की भविस्‍यबानी

(मत्‍ती 26:31–35; मरकुस 14:27–31; लूका 22:31–34)

36सिमौन पतरस नें ईसू ते कही, “हे पिरभू, तू काँपै जा रयौ है?”

ईसू नें बाते कही, “मैं जाँपै जा रयौऊं, माँपै तू जा समै मेरे पीछे नांय सकत। पर तू बाद में मेरे पीछे आबेगौ।”

37पतरस नें बाते पूँछी, “हे पिरभू, मैं जा समै तेरे पीछे चौं नांय आ सकत? मैं तेरे काजै अपने पिरान दै दूँगो।”

38ईसू नें बाते कही, “का तू मेरे काजै अपनों पिरान दैबेगौ? मैं तोते सच सच कैह रयौऊं मुरगा के बांग दैबे ते पैहले तू मोय तीन बार पैहचानबे ते इनकार करैगौ।”

Currently Selected:

यूहन्‍ना 13: BRAJ

Highlight

Copy