यूहन्ना 1
1
वचन देह धारी भयौ
1सुरू में वचन हतो। वचन परमेस्वर के संग हतो और वचनई परमेस्वर हतो। 2बेई सुरू में परमेस्वर के संग हतो।
3बाई के द्वारा परमेस्वर नें सब कछू बनांयौ। ऐसौ कछू नांय जो वाके बिना बनांयौ गयौ होबे। 4बामें जीबन हतो और बू जीबन लोगन के काजै उजीतौ हतो। 5बू उजीतौ अंधेरे में चमकतै पर अंधेरौ बाय मिटा नांय सकौ।
6 #
मत्ती 3:1; मर 1:4; लूका 3:1,2 परमेस्वर नें एक आदमी भेजौ वाकौ नाम यूहन्ना हतो। 7बू जिय गबाही दैबे आयौ के बू उजीते की गबाही देय, जाते लोग वाकी सुनें और भरोसौ करें। 8बू खुद तौ उजीतौ नांय हतो पर बू उजीते की गबाही दैबे आयौ हतो।
9बू सच्चौ उजीतौ हतो और सब आदमिन के अंधेरे कूं दूर करतो हतो और बू दुनियां की नजर में आयबे बारौ हतो। 10बू दुनियां में हतो और दुनियां वाके द्वारा रची गयी पर दुनियां ने बाय नांय पैहचानों। 11बू अपने लोगन के बीच में आयौ पर लोगन नें बाय नांय अपनांयौ। 12पर जितने लोगन नें बाकूं अपनांयौ और बापै भरोसौ करौ, बानें बिनकूं परमेस्वर की सन्तान हैबे कौ अधिकार दै दियौ। 13बे खून और मांस ते पैदा नांय भये, और न काऊ आदमी की इच्छा ते पर परमेस्वर की इच्छा ते आतमिक रूप ते पैदा भये।
14 वचन देह धरकें हमारे बीच रहौ। हमनें वाकी ऐसी महिमा देखी जैसी पिता के इकलौते बेटा की, जो दया और सच्चाई ते भरकै परमेस्वर ते आयौ है।
15यूहन्ना ने वाके बारे में गबाही दई और पुकार के कही, “जि बेईए जाके बारे में मैने कही हती, ‘जो मेरे बाद में आयबे बारौ है और बू मोऊते बढ़कें चौंकि बू मोते पैहले हतो।’” 16वाकी दया ते भरे भये हैबे की बजैह ते हमें किरपा पै किरपा मिली है। 17जामारै सच्चाई तौ जि है कै मूसा ने तौ हमें व्यबस्था दई पर किरपा और सच्चाई ईसू मसीह के द्वारा हम तक पौंहची है। 18परमेस्वर कूं कबऊ काऊनें नांय देखौ। पर पिता कौ इकलोता बेटा जो परमेस्वर है बू परमेस्वर के जौरें है और बानेंई परमेस्वर कूं हमें दिखायोए।
बपतिस्मा दैबे बारे यूहन्ना ने मसीह हैबे ते नांई करी
(मत्ती 3:1–12; मरकुस 1:1–8; लूका 3:1–18)
19जब येरूसलेम ते यहुदी नेतन नें पुरोहितन और लेबीन कूं बाते जि पूछबे काजै भेजा, “तू को है?” 20तब यूहन्ना नें बिनते खुलके साफ सबदन में कही, “मैं मसीह नांऊ।”
21बिन्नें बाते पूछी, “तौ फिर तू को है? का तू एलियाह हैं?”
तब बानें कही, “मैं एलियाह नांऊ।”
जाके बाद बिन्नें बाते पूंछी, “तौ का तू परमेस्वर की ओर ते बात बतायबे बारौ है।”
बानें कही, “कै मैं नांऊ।”
22तब बिन्नें बाते पूछी कै, “तू को है? हमें बता जाते कै हम बिनकूं बतामें जिन्नें हमें भेजौए। तू अपने बारे में का कैहतै?”
23परमेस्वर की ओर ते बात बतायबे बारे यसायाह के सब्दन के अनुसार यूहन्ना नें बिनते कही,
“मैं, बेहड़ की बू अबाज हूं, बू अबाज जि कहती है।
‘पिरभू के काजै रस्ता सीधी करौ।’”
24फरीसी जिनें भेजौ गयौ हतो, 25बिन्नें बाते पूछी कै, “अगर तू मसीह नांय और तू ना एलियाह और ना परमेस्वर की ओर ते बात बतायबे बारौऐं तौ फिर तू बपतिस्मा चौं देतुए?”
26बिनकूं जबाब देते भये यूहन्ना नें कही, “मैं पानी ते बपतिस्मा देतूं पर यांपै बू खड़ौए जाय तुम नांय पैहचानत। 27जो मेरे बाद आयबे बारौ है, मैं तौ वाके जूतन के फीतऊ खोलिब के लायक नांऊ।”
28जि सब कछू यरदन नदी के पार बैतनियां सहर में भयौ, ज्हां यूहन्ना बपतिस्मा देतो।
बपतिस्मा दैबे बारे यूहन्ना ने ईसू के बारे में गबाही दयी
29अगले दिना यूहन्ना ने ईसूए अपनी ओर आते भए देखकें कही, “देखौ, जि परमेस्वर कौ मेमनाऐं, जो दुनियां के पापन कूं दूर करतै। 30जि बेई है जाके बारे में मैंनें तुमते कही हती, ‘कै मेरे पीछे एक आदमी आयबे बारौ है, बू मोते बढ़कें है चौंकि बू मोते पैहले हतो।’ 31पैहले मैंऊ नांय जानतो कै बू को है पर मैं जाके मारे पानी ते बपतिस्मा देतौ आयौऊ, कै बू इसरायल के लोगन पै उजागर होबे।”
32फिर यूहन्ना ने जि गबाही दई, “मैंनें सुरग में ते पबित्र आतमा कूं कबूतर की तरैह वाके ऊपर उतरते भये देखौ और बू बाई के ऊपर ठहर गयौ। 33मैं तौ बाय नांय जान्त हतो पर जानें मोय पानी ते बपतिस्मा दैबे कूं भेजौ, बानें मोते कही, ‘जाके ऊपर पबित्र आतमा कूं कबूतर की तरैह ते उतरते भये देखेगौ, बेई पबित्र आतमा ते बपतिस्मा देबेगौ।’ 34मैंनें जि देखौऐ और मैं जाकी गबाही देतूं, कै जि परमेस्वर कौ बेटा है।”
ईसू के पैहले चेला
35दूसरे दिनां बपतिस्मा दैबे बारे यूहन्ना अपने दो चेलान के संग मांपै हतो। 36बानें ईसू कूं मांते जाते भये देखौ, और कही, “देखौ, जि परमेस्वर कौ मेमनाऐं।”
37तब वाके दोनों चेला वाकी जि बात सुनकें, ईसू के पीछे चल दये। 38ईसू नें पीछे मुड़कै उन्नें अपने पीछे आबत देखकै कही, “तुम कौनें ढ़ूढ़ रयेऔ?”
बिन्नें बाते पूछी, “हे गुरू, तू कहां रैहते?”
39बानें बिनते कही, “चलौ चलकै देख लेओ।”
तब बिन्नें आयकै बू जगैह देखी ज्हांपै बू रैहतो हतो और बे म्हांपै वाके संग रहे और जि साम के चार बजे कौ समै हतो।
40जो दो चेला यूहन्ना की बात सुनकें ईसू के पीछे गये हते बिनमें ते एक सिमौन पतरस कौ भईया अन्द्रियास हतो। 41बानें सबनते पैहले जायकै अपने भईया सिमौन ते कही, “हमें मसीह मिल गयौऐ।” मसीह, जाकौ मतलब चुनों भयौ होतै। 42तब बू बाय ईसू के जौरें लायो।
ईसू नें बाय देखकें कही, “तू यूहन्ना कौ बेटा सिमौन है, तू कैफा कैहलाबेगौ।” कैफा जाय पतरसऊ कैहतै इनकौ मतलब चट्टान है।
ईसू नें फिलिपुस और नतनेल कूं चुनों
43ईसू नें दूसरे दिना गलील जायबो चाहौ और फिलिपुस ते मिलौ और बाते कही, “मेरे पीछै आजा।” 44फिलिपुस, अन्द्रियास और पतरस के नगर बैतसैदा कौ रैहबै बारौ हतो। 45फिलिपुस नतनेल ते मिलौ और बोलौ, “जाकौ बर्नन मूसा की व्यबस्था और परमेस्वर की बात बतायबे बारेन ने करौ है, बू हमें मिल गयौए। बू यूसुफ कौ बेटा नासरत कौ रैहबे बारौ ईसू है।”
46नतनेल ने बाते कही, “नासरत! का नासरत तेऊ कोई अच्छी चीज आ सकतै?”
तब फिलिपुस ने कही, “आऔ चलकै देख लेओ।”
47नतनेल कूं अपनी ओर आबत भयौ देखके ईसू नें कही, “देखौ, जि सच्चौ इसरायली है। जाके मन में कोई कपट नांय।”
48नतनेल नें ईसू ते पंछी, “तू मोय कैसे जानतै?”
ईसू नें बाते कही, “तोय फिलिपुस के बुलायबे ते पैहलेई मैंनें तोय अंजीर के पेड़ के नीचे बैठो देखौ।”
49नतनेल ने बाते कही, “हे गुरू, तू तौ परमेस्वर कौ बेटा है, और तू इसरायल कौ राजा है।”
50ईसू नें बाते कही, “मैनें तोते कही, मैंनें तोय अंजीर के पेड़ के नीचे देखौए, का तू जा बजैह ते भरोसौ कर रयौए? तू जाऊते बड़े-बड़े चमत्कार देखेगौ।” 51ईसू नें बाते कही, “मैं तुमते सच कैह रयौऊं कै तुम सुरग कूं खूलो भयौ और परमेस्वर के दूतन कूं मुझ, ‘मनुस्य के बेटा’ के जौरें उतरते भये और चढ़ते भये देखौगे।”
Currently Selected:
यूहन्ना 1: BRAJ
Highlight
Share
Copy
Want to have your highlights saved across all your devices? Sign up or sign in
NonCommercial-NoDerivatives 4.0 International (CC BY-NC-ND 4.0)
