Mak 4
4
Na hokchi nan isht ʋlhpisa; micha kaniohmi kak o̱ Chisʋs ʋt nan isht ʋlhpisa ho̱ isht anumpuli, 1; 14 na hokchi isht ʋlhpisa yʋt atokowʋt annoa. 21 Kʋna hosh Chihowa im anumpa ha̱ ithana hokʋto, ai ithana kʋt inla a̱sha ka im abʋcha he tuk: 26 ʋbanumpa hanta hatak chu̱kʋsh a fohka hokʋt na‐nihi yakni a holokchi yʋmmak oka yakohmi hosh ahni keyu kia, offot ma̱ha̱yʋt waya cha, ʋlmo ona chatuk a̱ chiyuhmi hoke: 30 micha mʋstʋt nihi ak o̱ it ʋlhpisa akinli. 35 Chisʋs ʋt kocha umba, mahli kʋllo ka im anumpulit yukobli.
1Atuk osh anonti okhʋta lapalika ya̱ nan ai im abʋ chit ahanta tok; yohmi ma okla chinto fehna kʋt im ai itahoba: yohmi na yʋmmak ash ot peni yo̱ pit chukowa cha, okhʋta paknaka yo̱ binili ma; okla laua yash ot okhʋta alaka ak inli ho̱ ma̱ya tok.
2Mihma nana ka lauachit nan‐isht ʋlhpisa ho̱ isht im abahanchi tok: mihmʋt nan isht im abʋchi kʋt;
3Inta! ho haponakló; na‐hokchi ʋt na‐hokcha chi̱ hosh ia tok oke.
4Atuk o̱ hokchi ma, yakohmi tok; kanimi kʋt hina lapalika yo̱ kaha tok; yohmi tuk o̱ ʋba hushi puta kʋt ant ʋpʋt tahli tok.
5Mihma kanimi kʋt tʋli foka yakni a̱sha fehna keyu ho̱ kaha tok; atuk osh yakni ʋt i̱ su̱ko keyu hatuk okʋt, chekosi fehna offo tok.
6Yohmi kia hʋshi ʋt kohcha ma, anakshuʋt hakshish ʋt iksho hatuk okʋt, bʋshit kʋnia tok.
7Mihma kanimi kʋt kʋti foka yo̱ kaha tok: atuk o̱ kʋti ʋt offo cha, ai olʋbi na ik wayo ki tok.
8Mihma inlaka yʋto yakni achukma yo̱ kaha tuk osh, offot i̱ shahlit ma̱ha̱yʋt, ʋnit wa̱ya mʋt, kanimi kʋt pokoli tuchina ma, kanimi kʋt pokoli hannali, anonti kanimi kʋt tahlepa achʋfa ʋnit waya tok.
9Mihmʋt, Kʋna hosh haksobish isht haponakla hi ʋt i̱ hinlikmʋt, haklashke, im achi tok.
10Atuk o̱ ilap banot a̱sha ma, yʋmma aiasha tuk ʋt auah tuklo kash it apeha cha, nan‐isht ʋlhpisa hash im a ponaklo tok.
11-12Hʋchishno ak okʋto Chihowa apehlichika nan ik otano ka hʋsh ithana hi ʋt a hʋchim ʋlhpisa hoke; amba kocha ma̱ya kak okʋno pisa hokʋno pisa kia ik ithano ka he: haklo hokʋno haklo kia ik akostinincho ka he mak o̱, ilʋppa puta kʋt nan‐isht ʋlhpisa ho̱ ai im ʋlhtaha hoke: yʋmmak keyukma nitak kanima ka chu̱kʋsh ʋt inlʋt toba cha, nan im ai ashʋchika puta kʋt i̱ kashofa hinla hoke, im achi tok.
13Mihmʋt, Nan‐isht ʋlhpisa ilʋppa hʋch ik ithano cho? mih kʋto katiohmi hosh nan‐isht ʋlhpisa puta moma ka hʋsh ithʋna hinla cho? im achi tok.
14Na‐hokchi ʋt ʋbanumpa hak o̱ hokchi hoke.
15Yohmikma kanima yo̱ ʋbanumpa hʋt a holokchikma, yakohmi kak osh ai itʋnowa lapalika kaha mak oke: haklo tuk kia, chekosi mak inli ho̱ Setan ʋt ʋlʋt chu̱kʋsh im a holokchi tuk ʋbanumpa hash ishit kanchi hoke.
16Yohmikma anonti, yakohmi kak osh tʋli foka yakni a holokchi mak oke: yʋmmak okʋt ʋbanumpa ha̱ haklo mʋt, ashali̱ka na‐yukpʋt ai okpʋchi hoke.
17Yohmi kia ilap hakshish ʋt ik im iksho, yohmi hokʋt chekosi ta̱kla kak bano ho̱ kʋllot hiohma̱ya hoke: atuk mʋt ʋbanumpa pulla hatuk mak o̱ nan ilbʋsha, keyukmʋt na‐palʋmmi kʋt a̱shakma, chekosi mak inli ho̱ ibetʋbli chatuk oke.
18Mikma yakohmi kak osh kʋti foka yo̱ a holokchi mak oke.
19Ʋbanumpa ha̱ haklo; yohmi tukmʋt yakni ilʋppa nan isht im anukfila, micha nan in laua bʋnna kʋt isht ashʋchi, mikmʋt nana inla puta ai anushkunna aiena kʋt ibai alota cha, ʋbanumpa hash ai olʋbit ishi na ik ʋno toba kak oke.
20Mikma yakohmi kak osh yakni achukma a holokchi mak oke; ʋbanumpa ha̱ haklo mʋt, yʋmmak ash yimmi cha, ʋnit wayʋt, kanimi kʋt achʋfa tuk ʋt pokoli tuchinakma; kanimi kʋt pokoli hannali; anonti kanimi kʋt tahlepa achʋfa ona hoke, im achi tok.
21Mihmʋt, Pʋla ha̱ tanchi isht‐ʋlhpisa nutaka, keyuk mʋt topa nuta yokmá, nana ho̱ talali cha, ai‐o̱ hikia ik o̱ hilecho ka hi o̱ toba ho̱?
22Nana kʋt ik otano ka hi osh luma kʋt ikshokma, anonti nana kʋt ik haiako ka hi osh luma tuk ʋt iksho, amba haiaka he ak o̱ bano hoke.
23Hatak nana hosh haksobish isht haponakla hi ʋt i̱ hinlikmʋt, haklashke, im achi tok.
24Mikmʋt, Nana hʋsh haklo kʋt ahah! hʋsh aiahnashke: nan‐isht ʋlhpisa nana ho̱ isht hʋsh apesa tuk mʋt, hʋchishno ʋt isht hʋchim ʋlhpisa hi oke; mikma na haponaklo hʋchia hoka i̱ shahlit hʋchim ibʋlhta hi oke.
25Kʋna hosh i̱shi hokmʋt, mihi yosh im ibʋlhta he, mikma kʋna hosh ik im iksho tuk ma, mihi yo̱ i̱shi tuk ash kia im ai isha hi oke, im achi tok.
26Mihmʋt, Chihowa apehlichika yʋt hatak osh na‐nihi o̱ yakni anu̱ka pit hokchi:
27Yohmi cha ninak a̱ nusit, nitak ma taha̱nikma, na‐nihi ash ot offot hofantit taiyaha ka, yakohmi kak osh ik aiahno;
28Yakni ak osh ilap inlit wayachi hoka: ʋmmona ka ʋpi atuk mʋt, okshonli, yohmi ha mak osh waya chatuk.
29Yohmi kia ʋni ʋt a lakna hokʋno, ai‐ʋlmo ona hatuk oka, ashali̱ka isht‐ʋlmo isht iba chukowa chatuk ak o̱ chiyuhmi hoke, achi tok.
30Mihmʋt Chihowa apehlichika ya̱ nanta hak o̱ ohmichit, nan‐isht ʋlhpisa nanta mak o̱ il ai itilauecha chi̱ cho?
31Mʋstʋt nihi yʋmmak okʋt yakni anu̱ka a holokchi kʋt, na‐nihi yakni paknaka moma ka iskitini kʋt ik lauwo;
32Yohmi kia holokchi mʋt, offot isht ma̱ha̱yʋt, chito kʋt haiyu̱kpulo moma imaiya ma, naksish ʋt hochitot filamohli: yʋmohmi na ʋba hushi puta kʋt hoshontika nutaka a nusi ka chiyuhmi hoke.
33Mihmʋt ai akostinincha hinla ka, anumpa hash nan‐isht ʋlhpisa yʋmma chohmi ka lauachit isht ai anumpohonli beka tok.
34Amba nan‐isht ʋlhpisa ho̱ keyukmʋno ik im anumpulo; micha ilapo banot ma̱ya hokma, nan im ai ithʋna ʋhleha ha̱ nana moma ka achukmalit im anoli beka tok.
35Atuk osh nitak yʋmmak atuk ʋt ont opiʋt taha ma, yʋmmak ash o̱, Misha tʋnnʋp ak o̱ pit keho hlopullí, im achi tok.
36Mihma okla laua kash kanima pit yuhli mʋt, yʋmmak ash o̱ peni fohka tuk ʋt moma na okla isht ia tok. Yohmi ma peni inla ak kia apehʋt a̱ya tok.
37Atuk o̱ mahli okpulo chinto kʋt kocha: yohmi na oka banʋtha kʋt peni ash ai‐issot pit ʋlhpihinta ma, pola̱ka alota tok.
38Mihma yʋmmak ash osh nusi hosh peni asha ka pilla ho̱ ʋlhpishi on itonla tok: atuk o̱ okla ont okchʋli mʋt, Nan ithʋnanchi ma! pilla chi̱ ka nan‐isht chik ahno cho? im achi tok.
39Mihma wakaya cha, mahli hash im alʋmmit okhʋta hash, Nuktanlʋt lumʋt ish talaiashke, im achi tok. Mihma mahli hʋt issa na yokopa achukmʋt talaia tok.
40Mihma, Na katihmi ho̱ hʋchi nukshopa fehna cho? na katihmi ho̱ na‐yimmi kʋt ik hʋchim iksho cho? im achi tok.
41Yohmi ma okla nukshopa fehna mʋt, Ilʋppʋt hatak katiohmi mak atuk a̱ mahli, micha okhʋta aiena kak kia im antia cho? im achit ma̱ya tok.
Currently Selected:
Mak 4: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913
